1 Tɛsalɔnɛ́ka 1 - Hɛtɔnyɛ́ Hiɔ́sɔ

Məbíhóloniə

¹ Mɛaŋɔ́á Báwolo, Sílasɛ na Timotíó, tɔ ndɔ híihi hiəfulə tilə. Tɔ ndɔ hiítə tilinə ɔ ilúkunə yɛ́ bəlumininə ɔyɛ́á yɛ́ lɛ́á ɔ bətínə́ yɛ Tɛsalɔnɛ́ka, ɔyɛ́á yɛ́ lɛ́á tɔanátɔ́ na Huɛlɛ́ á Isə́, na Isə́lúkú á Yə́susu Kilísitusu. Huɛlɛ́ á bənú wə́yíə́ mɔlɛ́má muɛsɛ ínə́níə́, á bənú bumbə́nú índíə́ tɔ́na.

Báwolo a ndɔ Huɛlɛ́ mohóloniə híə́niniə ɛlɔ́áyɛ́ ilumininə yɛ́ bɛndɔ bá Tɛsalɔnɛ́ka

² Tɔ ndɔ əsú Huɛlɛ́ mohóloniə híə́niniə bikúílí bikimə ɛlɔ́áyɛ́ bənú bəkimə. Tɔ ndɔ bənú bɛ́kɔ́lɔmɔna ikúílí tɛ́á ɔ uwəsú mabɛ́kálɛ́na.

³ Tɔ ndɔ əsú tɛ́nɛ́ma á Huɛlɛ́ busíə́ ɔ yəsúə́ Isə́ ubusíə́ ɔbɔ́á tɔ́ bɛ́kálákɛ́ná náana. Tɔ ndɔ bɛ́kɔ́lɔmɔna yatɛ́ ɔyɛ́á nɔ ná kɛ́áka ɔ tɔ́mbákɛna na yə́núə́ ilumininə. Tɔ́ bɛ́kɔ́lɔ́mɔ́ná tɔ́na nəníə́ nɔ́ ná bɔsɔ́kɔ́ ɔ́lɔ́kɛ́na ɔ tɔ́mbákɛna na níə́núə́ nibo. Tɔ́ bɛ́kɔ́lɔ́mɔ́ná nəníə́ nɔ ndɔ táta na mɔlɛ́má mukimə yatɛ́ ɔyɛ́á Huɛlɛ́ a ná bənú bílíhə́níə́, bɔ́ɛ́yɛ́ bɔkɔa, ɔ́ nɛndahíáná nɛ́ yəsúə́ Isə́lúkú á Yə́susu Kilísitusu.

⁴ Á bənísə́, uwənú ɔbá Huɛlɛ́ a ná híkə́kíə́, tɔ ndɔ manya muɛsɛ ɔwá a ka bənú tɛ́fa ɔkɛaka ɔwá nɔ híáná báyɛ.

⁵ Tɔ ndɔ nɔ́yɛ́ manya bɔkɔasɛ́á, tɔ sá bənú Imbə́nú Yɛɛsɛ nɔŋɔnɛna ɔbánɔ́ na bɛtambá bɛ́ itə́mbí, mba, na injiŋə yɛ Umbúínyi Mɔnaŋanaŋa ɔwá wɔ́ ná bá wɔ́ ndɔ bəsú ɔ́lɔ. Tɔ ka bá tɔ ndɔ manya muɛsɛ ɔwá, yatɛ́ ɔyɛ́á tɔ́ ná bá tɔ́ ndɔ laa, yɛ́ ka bámɛnɛna taká. Nɔ ndɔ manya nəníə́ tɔ ná bítíkə́kə́ uwənú ətíə́ ɛlɔ́áyɛ́ búə́núə́ buɛsɛ.

⁶ Mba uwənú, nɔ ka kɛaka ɛ́sɛ́á bəsú, nɔ ná ɔŋgɔ́kɛ́ná tɔ́na ɔ iŋgətí yɛ Isə́lúkú, nɔ ka Imbə́nú Yɛɛsɛ luminə, bá ná bənú tə́kə́sə́kə ɛlɔ́áyɛ́ nɔ́yɛ́, mba Umbúínyi mɔnaŋanaŋa wɔ́ ka bənú ɔ́lɔ ɔkɛaka ɔwá, nɔ yɛ́táyɛ́ Imbə́nú ítíə́ na nɛhɔnɔ.

⁷ Nɔ́yɛ́ nɔ ka híána iŋgətí ɛlɔ́áyɛ́ bəlumininə bəkimə bá nɛkɛ́tɛ nɛ́ misí yɛ Masɛtɔánɛ na yɛ Akáyɛ.

⁸ Ɔ taká, ɛnaka Ɛtambá yɛ́ Huɛlɛ́ yɛ́ hɛ́kɛ́á ɔ uwənú busíə́, yɛ́ sa yambana ɔbánɔ́ ɔ nɛkɛ́tɛ nɛ́ Masɛtɔánɛ na nɛ́ Akáyɛ, mba, indumə yɛ yə́núə́ ilumininə yɛ́ ka yambana ɛbɔ́ka yikimə, ɔ nindínə́ ɔnɛ́á tɔ sa ósó ɔ ɔhɛ́na ɛlɔ́áyɛ́ nɔ́yɛ́ bɔkɔasɛ́á,

⁹ mɔndɔ mukimə a ndɔ hɔ́ɔ́ ɛ́sɛ́á nɔ ná bəsú káhá, ikúílí ɔyɛ́á tɔ ná ndásá ɔ uwənú busíə́. Bá ndɔ hɔ́ɔ́ tɔ́na nəníə́ nɔ ná bililí bɛsaŋɔna, nɔ ná ɔŋgɔ́ á tiísi yɛ Huɛlɛ́ ɔkɛaka ɔwá, nɔ wɛɛ́ya nyɔkɛ́na ɔwayɛ́ ɔwá a lɛ́á Huɛlɛ́ ɔ muɔmɔ́ na yɛ taká.

¹⁰ Nɔ ka nɔ́yɛ́ kɛaka ɛlɔ́áyɛ́ ɔtáta ɔwá, wayɛ́á Mɔná a Yə́susu á húlínə́ ɔ nɔɔ́mɛná, ɔwayɛ́ ɔwá Huɛlɛ́ a ná húŋúə́síə́ ətíə́ yɛ́ bəwə́nú, wɛɛ́ya a ndɔ bəsú sɔ́tɔ́na ɔ hilóbi ɔhɛ́á hɛ́ lɛ́á ɔ ɔsákɔna.