1 Kɔlɛ́ŋɛ́tɛ 1 - Hɛtɔnyɛ́ Hiɔ́sɔ

Məbíhóloniə

¹ Ɔwámɛ á Báwolo mɔsɔ́másɔma wa Yə́susu Kilísitusu, ɔwá Huɛlɛ́ a ná ɛ́lɛ́ákɛ́na ɔ tɔ́mbákɛna na wə́yíə́ uhikiə, na wəsúə́ munísə́ á Sɔsɔtɛ́nɛ,

² mɛ ndɔ híihi hiəfulə tilinə ɔ ilúkunə yɛ́ bəlumininə yɛ́ Huɛlɛ́ ɔyɛ́á yɛ́ lɛ́á ɔ bətínə́ yɛ Kɔlɛ́ŋɛ́tɛ, bááyɛ́ ɔbá nɛtɔana na Yə́susu Kilísitusu, ɔbá Huɛlɛ́ a ná nə́ŋə́síə́ ɛlɔ́áyɛ́ ayɛ́, ɔbá Huɛlɛ́ a ná ɛ́lɛ́ákɛ́na ɔkɛaka ɔwá a bəə́bu híə́níə́ banaŋanaŋa, na bááyɛ́ bəkimə ɔbá bá ndɔ húlə́ niínyə nɛ́ Yə́susu Kilísitusu ɛ́lɛna ɔ bɛbɔ́ka ɔbánɔ́ bikimə, ɔwayɛ́ ɔwá a lɛ́á yəbúə́ Isə́lúkú na yəsú.

³ Huɛlɛ́ ɔ yəsúə́ Isə́ na yəsúə́ Isə́lúkú a Yə́susu Kilísitusu bá bənú buɛsɛ kɛáka, bá bənú bumbə́nú índíə́ tɔ́na.

⁴ Mɛ ndɔ Huɛlɛ́ mohóloniə híə́niniə bikúílí bikimə ɔ uwənú ɛlɔ́á, ɛlɔ́áyɛ́ buɛsɛ ɔbɔ́á a ná bənú kɛ́áka ɔ tɔ́mbákɛna na Yə́susu Kilísitusu.

⁵ Ɔ taká, ɔ tɔ́mbákɛna na wɛɛ́ya á Huɛlɛ́ a ná bənú úndúsíə́ na məəbə məkimə má yáyɛ́á ɛtambá ɔnɔŋɔna, na ɔmanya yatɛ́ ɔyɛ́á yɛ́ lɛ́á taká.

⁶ Ɔ kɛaka ɔwá ɛtambá ɔyɛ́á tɔ ná bənú lákɛ́na ɔwɔŋgɔkɔnɔ na Kilísitusu, yɛ́ kɛáka ɔwá nɔ lumínínə na iŋgínə́ yikimə,

⁷ ɔ nindínə́ ɔnɛ́á, uwənú ɔbá nɔ ndɔ ikúílí táta ɔyɛ́á yəsúə́ Isə́lúkú a Yə́susu Kilísitusu a ŋɔ fámálana, ata niəbə nɛ́mɔtɛ́ nɛ́ Huɛlɛ́ nɛ́ lɛ bənú áŋgɛna.

⁸ Á Kilísitusu a ŋɔ bənú óníniə ɔkafámáká ɔ nisúki ɔkɛaka ɔwá, nɔ báá ɛŋaná hɛkabalɛ ɔ buɔsɛ́ bɔ́ nɛ́áyɛ́á nɛndahíáná.

⁹ Huɛlɛ́ ɔwá a ná bənú ɛ́lɛ́ákɛ́na ɔ bɔlatɔ́ na wayɛ́á Mɔná ɔ yəsúə́ Isə́lúkú á Yə́susu Kilísitusu, abáka a úndúsəkiniə yatɛ́ ɔyɛ́á a ná bílíhə́níə́.

Kɛsalɛ́á ɔ ətíə́ yɛ ilúkunə

¹⁰ Á bənísə́, tɔ́kɔ́lɛ ɔbánɔ́, ɔ niínyə nɛ́ yəsúə́ Isə́lúkú a Yə́susu Kilísitusu, nɔ́ bá ɛ́mɛ́nɛ́nátɔ́ bənú na bənú, kɛsalɛ́á yɛ́ sá hɔ́ánana ɔbáá ɔ uwənú ətíə́; nɔ́ bámɛ́nɛ́ná bənú bəkimə tɔanátɔ́ muɛsɛ ɔ hɛtányɛ́ hímotí ɔ ɛfɛka ɛ́mɔtɛ́.

¹¹ Á bənísə́, ɔ taká bɛndɔ bá nikúlə nɛ́ Kolowə́ bá ka mɛaŋɔ́á lakɛna bá sɛ́á kɛsalɛ́á yɛ́ lɛa fínə́tɔ́ ɔ uwənú ətíə́.

¹² Mɛ ndɔ siə ɔlaa ɔwá, ɔ uwənú ətíə́; wɔ́ɔwɔ a sɛ́á, mɛ lɛa á Báwolo əlimə, wɔmɔtɛ́ a sɛ́á, mɛ lɛa á Abolóso əlimə; wɔmɔtɛ́ tɔ́na a sɛ́á mɛ lɛa á Sɛ́fasɛ əlimə; wə́ə́ní tɔ́na a sɛ́á mɛ lɛa á Kilísitusu əlimə.

¹³ Nɔ ndɔ ənú fɛka nɔ sɛ́á bá óso á Kilísitusu usələniə əə́? Baánɛ, ɔwámɛ á Báwolo mɛaŋɔ́á mɛ́ ná wínə́ ɔ ɔmbásá ɛlɔ́áyɛ́ mə́núə́ mabɛ́á əə́? Baánɛ ɔ ɔwámɛ niínyə nɔ́ ná nɛsɔa kusə́nə əə́?

¹⁴ Mɛ ndɔ Huɛlɛ́ mohóloniə híə́niniə ɛ́sɛ́á mɛ sa nɛsɔa índiə ata ɔmɔtɛ́ ɔ uwənú ətíə́, úhúlíə́ á Kilisibúsu na Kayíúsu.

¹⁵ Nɔ́yɛ́, ata mɔndɔ a sa ósó ɔlaa ɔwá, ɔ ɔwámɛ niínyə nɔ ná nɛsɔa kusə́nə.

¹⁶ Ə́ə́! Taká, mɛ ka nikúlə nɛ́ Itifányɛ nɛsɔa índiəkinə. Mba, mɛ lɛ ndɔ fɛka ɔwá, mɛ ka mɔndɔ muinə́muinə́ nɛsɔa índiə tɔ́na.

¹⁷ Kilísitusu a sa mɛaŋɔ́á lɔ́ma ɔwá mɛ nɛsɔa índíə́kínə, mba, a ka mɛaŋɔ́á lɔ́ma ɔkɛaka ɔwá mɛ Imbə́nú Yɛɛsɛ nɔŋɔ́náka, nɔ́yɛ́, ɛŋaná ɛmanya na nihókí nɛ́ mɔsá ɔbɛ́kɛna ɔkɛaka ɔwá, bá lɛ nyɛmbɛ́ yɛ Kilísitusu ɔ ɔmbásá yəníə́.

Ɛmanya yɛ bɛndɔ bá misí na yɛ Huɛlɛ́

¹⁸ Ɔ taká, imbə́nú ɔyɛ́á tɔ ndɔ nɔŋɔna ɔwɔŋgɔkɔnɔ na Kilísitusu ɔwá a ná wə́ə́ ɔmbásá, yɛ́ lɛa bɔála ɛlɔ́áyɛ́ bááyɛ́ ɔbá bá ná ɛ́tá á ɛnɔ́mɛ yɛ́ bunímə́, mba, uwəsú ɔbá tɔ lɛ́á ɔ ɛnɔ́mɛ yɛ́ nibínuəniə, tɔ ndɔ injiŋə yɛ Huɛlɛ́ lɛndɛna ɔmɔ́yɛ́.

¹⁹ Mɛ ndɔ nɔ́yɛ́ laa bɔkɔasɛ́á, Huɛlɛ́ a ka hɔ́ɔ́kɔ ɔ Mətilə Manaŋanaŋa a sɛ́á: «Mɛ ŋɔ ɛmanya yɛ bəmənyí nímə́siə, mɛ ŋɔ ɛŋgɛ́lɛ́ yɛ bɛ́ŋgɛ́lɛ́ yomosiə tɔ́na.»

²⁰ Ɛ́sɛ́á ikúílí yɛ́ lɛ́á nɔ́yɛ́, hə́níə́ mumənyí a ndɔ áyɛ́ ákána na yayɛ́á ɛmanya əə́? Hə́níə́ mɔmanyumbə́ndə́ a ayɛ́ lɛ́á əə́? Hə́níə́ bɛndɔ bá mitə́ŋí bá yɛ́ɛyɛ ɛhanyɛ bá əbú lɛ́á əə́? Nɔ́yɛ́, Huɛlɛ́ a ka fə́mə́ləniə ɔwá ɛmanya yɛ bɛndɔ bá yɛ́ɛyɛ misí yɛ́ lɛa bɔála.

²¹ Ɔ taká, bɛndɔ bá misí na yəbúə́ ɛmanya bá sa Huɛlɛ́ lɛnda ɔwɔŋgɔkɔnɔ yatɛ́ ɔyɛ́á a ná kɛ́áká na yayɛ́á ɛmanya. Ɔ́ ɛlɔ́áyɛ́ nɔ́yɛ́ Huɛlɛ́ a ná ihə́ŋiə ɛtá ɔ bááyɛ́ unuəniə ɔbá bá ndɔ lumininə ɔ imbə́nú ɔyɛ́á tɔ ndɔ nɔŋɔna, ɔ́ yɛ́táyɛ́ imbə́nú yɛ́ lɛ́á bɔála bɔ́ bááyɛ́ ɔbá bá lɛ ndɔ lumininə.

²² Bɛyútɛnɛ bá ndɔ tɔŋgɛtɛ́nɛ́á tɔ́ yələ́mənə bata ubusíə́ ɔbɔ́á bá əbú lumínínə, Bɛkɛlɛ́kɛ tɔ́na bá ndɔ ɛmanya siə ubusíə́ ɔbɔ́á bəə́bu tɔ́na bá lumínínə;

²³ mba, uwəsú, á Kilísitusu wa ɔ́mɔ́kɛ́nátɔ́ tɔ́ ndɔ nɔŋɔna, imbə́nú yɛ ɛbɛ́nyɔ́kɔlɔ ɛlɔ́áyɛ́ Bɛyútɛnɛ, bɔála ɛlɔáyɛ́ bááyɛ́ ɔbá bá lɛ bá Bɛyútɛnɛ.

²⁴ Mba, bááyɛ́ ɔbá Huɛlɛ́ a ná ɛ́lɛ́ákɛ́na, Bɛyútɛnɛ mbá ata Bɛkɛlɛ́kɛ, á Kilísitusu a ndɔ injiŋə yɛ Huɛlɛ́ ínə́niə, a ndɔ ɛmanya yɛ Huɛlɛ́ ínə́niə tɔ́na.

²⁵ Yatɛ́ ɔyɛ́á bɛndɔ bá ndɔ sinə ɔwá Huɛlɛ́ a ka kɛaka, yɛ́ lɛ́á bɔála, yɛ́ lɛa ɛmanya yɛŋɛ́ŋa ɔyɛ́á yɛ́ ná yɛ bɛndɔ bá misí yayɛna, yatɛ́ ɔyɛ́á bá ndɔ sinə ɔwá Huɛlɛ́ a ka kɛaka, yɛ́ lɛa ndəmə, yɛ́ lɛa na iŋgínə́ yáyɛ́ná yatɛ́ ɔyɛ́á bɛndɔ bá óso ɔkɛa.

²⁶ Á bənísə́, uwənú ɔbá Huɛlɛ́ a ná ɛ́lɛ́ákɛ́na, nɔ́ bísíə́línə́ banɛ́ nɔ ənú lɛ́á, ɛ́sɛ́á usinə wɔ́ mɔsá, bəmənyí bá lɛ bá bəəŋí ɔ uwənú ətíə́, baŋɛ́ŋa mbá ata bifəyí, bá lɛ bá bəəŋí.

²⁷ Mba, Huɛlɛ́ a ka tɛ́fa yatɛ́ ɔyɛ́á bɛndɔ bá misí bá ndɔ sinə ɛ́sɛ́á bɔála ɔkɛaka ɔwá bəmənyí bá əbú sɛma. A ka tɛ́fa tɔ́na yatɛ́ ɔyɛ́á bɛndɔ bá misí bá lɛ ndɔ bə́tiə ɔkɛaka ɔwá bá íŋgínə́ bá sɛma.

²⁸ Huɛlɛ́ a ka tɛ́fa yatɛ́ ɔyɛ́á bɛndɔ bá ndɔ sinə ɛ́sɛ́á ndəmə, yomósíə́tɔ́ mbá ata ɛwayɛ́ ɔkɛaka ɔwá bááyɛ́ ɔ bɛŋɛ́ŋa bá híáná ndəmə.

²⁹ Ɛlɔ́áyɛ́ nɔ́yɛ́, ata mɔndɔ a sa ósó ɔ ubíbə́liə á Huɛlɛ́ busíə́.

³⁰ Mba, Huɛlɛ́ a ka bənú tɔa na Yə́susu Kilísitusu, a ná kɛ́áká tɔ́na Kilísitusu a ná híáná yəsúə́ ɛmanya bɔkɔasɛ́á, wɛɛ́ya a ndɔ bəsú híə́nəsiə bátaká á Huɛlɛ́ busíə́, a ndɔ bəsú hutunə tɔ́na ɔ bɔbɛ́á ɔkɛaka ɔwá, tɔ́ bámɛ́náná bɛndɔ bá Huɛlɛ́.

³¹ Mətilə má ndɔ laa má sɛ́á: «Wɛ́ɛ́yɛ́ ɔwá a ndɔ siə ubíbə́liə, á ayɛ́ bíbə́lə́kíə́ ɔ yatɛ́ ɔyɛ́á Isə́lúkú a ná kɛ́áka ɛlɔ́áyɛ́ ayɛ́.»