Михей 1 - Ыдыктыг Библия

¹ Дээрги-Чаяакчы Морешет чурттуг Михейге Иудеяның хааннары Иоафам, Ахаз болгаш Эзекия оларның чагырып турган чылдарында Бодунуң сөзүн ажыткан. Самария биле Иерусалим дугайында Михейниң көргени көстүүшкүн бо-дур.

Бурганның израиль чонну кезедири-биле чедип кээри

² Бүгү аймак-чоннар, дыңнаңар, чер-делегей болгаш ону долган бүгү чүве, мону кичээнгейге алыңар! Дээрги-Бурган-Чаяакчы силерге удур херечи боор-дур, Дээрги Бодунуң ыдыктыг өргээзинден чугаалаар-дыр.

³ Көрүңер даан, Дээрги-Чаяакчы Бодунуң чурттап турар черинден үнүп ор: Ол куду бадып, черниң бедиктерин базып тур.

⁴ Даглар Ооң будунуң адаанда эстип тур, шынаалар чарлып тур, олар отка эзилген чук дег, тейниң ийинден агып баткан суг дег апаар.

⁵ Иаковтуң салгалдарының кемниг херектери дээш, израиль чоннуң бачыттары дээш ол бүгү болуп турар-дыр. Израильдиң кем-буруузу кайыын тывылганыл? Самариядан эвес бе? Иудеяның дүрзү-бурганнарга тураскааткан бедик черлери кайдал? Иерусалимде эвес бе?

⁶ «Ынчангаш Мен Самарияны хову-шөлде бузундулар оваазы кылып каар мен, чүгле үнүш олуртурунга тааржыр чер кылып каар мен. Хоорай ханазының даштарын шынааже дүжүр октап, ооң таваан чанагаштап каар мен.

⁷ Ооң шупту даш көжээлери буза шаптырар, ооң бүгү дүрзү-бурганнарын үрегдеп узуткаар мен, ооң шупту өргүл белектери отка өрттеттирер. Самария ол өргүл белектерин самыын-садар херээженниң төлевири дег кылдыр ап турган болгай, ол белектер самыыраан улуска катап база төлевир апаар».

Иудеяның хоорайлары эжелеттирер

⁸ Самарияның буурааны дээш ыглап-сыктаар мен, качыгдалдан кызыл-даван, чанагаш улчуп чоруптар мен, шөө-бөрүлер ышкаш улуур мен, страус куштар ышкаш хомудап ыглаар мен.

⁹ Чүге дээрге Самарияның балыы эмнеттинмес-тир, ол балыгланыышкын Иудеяда чеде берген-дир, Мээң чонумнуң хаалгазында, Иерусалимниң бодунда барган-дыр.

¹⁰ Иудейлер, кел чыдар кеземче дугайында Геф хоорайга чугаалаваңар, аңаа шуут ыглашпаңар. Бет-Леафра суурга качыгдалдан довурак-доозунга боражып алыңар.

¹¹ Шафирниң чурттакчылары, бужартаан, шалдаң боттарыңар өскээр көжер силер; Цаанда чурттап турар улус дезип үнүп шыдавас; Бет-Эцелдиң чурттакчылары кажыыдап ыглажып турар, олардан дуза ап шыдавас силер.

¹² Мароттуң чурттакчылары эки медээлер манап чадааш, могап турупкан, чүге дээрге Дээрги-Чаяакчының ыдыпкан айыыл-халавы Иерусалимниң хаалгазында безин чедип келген-дир.

¹³ Лахистиң чурттакчылары, чүгүрүк аъттарыңарны дайынчы тергелерге кожуңар! Израильдиң кемниг херектерин өттүнгеш, силер Сион-кысты бачытче киирип каан силер.

¹⁴ Иудей чон, сен ам Морешет-Гефче чарлыышкынның белектерин чорудар сен. Ахзив хоорай Израильдиң хааннарының манаан идегелин мегелеп каар.

¹⁵ Морешаның чурттакчылары, Бурган силерже эжелекчи эккээр, Израильдиң алдар-аттыг улузу Одолламда куйларже чаштынар ужурга таваржыр.

¹⁶ Эргим ынак оолдарыңар дээш качыгдап, бажыңар дүгүн чулуп, дас куш ышкаш тас апарыңар, чүге дээрге оларны силерден чарып, тудуп аппаар-дыр.