Филимонга 1 - Ыдыктыг Библия

Байыр чедириишкини

¹ Христос Иисуска бүзүрээни дээш хоругдаттырган Павелден база бүзүрээн дуңмам Тимофейден байыр. Чаңгыс ажыл-херек кылып турарывыс ханы ынак эживис Филимон сеңээ,

² ол ышкаш Христоска бүзүрээн кыс эживис Апфияга, туруштуг демисекчивис Архиппке база сээң бажыңыңда чыглып турар христиан ниитилелге бижидим.

³ Бурган Адавыс болгаш Дээрги Иисус Христостан келген авырал биле амыр-тайбың силерге доктаазын!

Филимоннуң бүзүрээни болгаш ынакшылы

⁴ Мөргүл кылган санымда-ла, сени сактып, Бурганымга үргүлчү өөрүп четтирер-дир мен.

⁵ Сээң Дээрги Иисуска бүзүрээниң болгаш Бурганның бүгү улузунга ынакшылың дугайында дамчыыр чугаалар меңээ чедип тур.

⁶ Христостуң биске бергени бүгү ачы-буянны билип алганың ачызында бодуңнуң бүзүрелиңни улам идепкейлиг илередириң дээш, мөргүп тур мен.

⁷ Дуңмам Филимон, сээң ынакшылың меңээ улуг өөрүшкү болгаш аргалалды эккелди, чүге дээрге сээң ачыңда Бурганның улузунуң чүректери сорук кире бергенин дыңнадым.

Павелдиң Онисим дээш дилээ

⁸ Шак ол чылдагаан-биле хүлээлгеңни күүсет деп, Христостуң адындан дидими-биле негээр эргем бар-даа болза,

⁹ мен сени дужаай бербейн, ооң орнунга, ынакшылымга ооргалангаш, күштүү-биле дилеп тур мен. Мен, Павел ирей, а ам Христос Иисустуң ады дээш хоругдаттырган кижи,

¹⁰ хоругдал адаанга ооң адазы болганым, Христосту дамчыштыр харылзаалыг оглум Онисимче ээ көрнүрүңнү дилеп тур мен.

¹¹ Мооң мурнунда ол сеңээ шуут ажыы чок-даа турду ыйнаан, а ам чүгле сеңээ эвес, меңээ база ажыктыг кижи-дир.

¹² Мен ону сенче дедир эгидерим ол, а ону чорудуптарымга, мээң чүрээм база ооң-биле кады чорупкан дег-дир.

¹³ Буянныг Медээ ужун хоругдал адаанда олурумда, сээң орнуңга меңээ дузалашсын дээш, мен ону чанымга дыка-ла арттырып алыксадым.

¹⁴ Ынчалза-даа сээң чөпшээрелиң чокка чүнү-даа кылыр хөңнүм чок болду. Сээң кылып турар бүгү буяның хүлээлге ёзугаар эвес, а сээң тура-сорууң аайы-биле илерээн болуру күзенчиг-дир.

¹⁵ Бодуңнуң кулуңну ооң соонда кезээ мөңгеде дедир эгидип аарың дээш, Онисим сенден кезек өйде чарлы берген бооп чадавас.

¹⁶ Ам ону кулуң эвес кылдыр, а оон артык – ханы ынак дуңмаң кылдыр хүлээп алыр-дыр сен. Ол меңээ дыка эргим-дир, ынчалза-даа сеңээ ол, анаа кижи-даа дег, Дээрги-Чаяакчыга башкарткан дуңмаң-даа дег, оон-даа артык эргим апаар.

¹⁷ Ынчангаш мени чаңгыс ажыл кылган эжиң кылдыр санаар болзуңза, мени канчаар хүлээп аарың дег, ону ынчаар хүлээп ап көр.

¹⁸ Ол сени кандыг-бир чүве ужун хомудадыпкан азы сеңээ өрелени берген болза, ол түңнү мээң адым дужунга бижип каг.

¹⁹ Бодумнуң холум-биле бижип олур мен: мен, Павел, ооң өрезин төлээр мен. (Сен база бодуңнуң амыдыралың-биле меңээ өрелииңни сагындыргаш-даа чоор деп мен.)

²⁰ Ынчангаш, дуңмай, Дээрги Христос дээш, меңээ ачы-дузадан көргүзүп, мени ооң-биле сорук киирип көр.

²¹ Мени дыңнаар боор деп идегээш, сеңээ бижип олур мен. Херек кырында мээң бижээн чүвемден-даа хөйнү кылып каарыңны билир мен.

²² Ол ышкаш меңээ аалчылар өрээлин белеткеп каап көр. Чүге дээрге Бурган сээң мөргүлдериңерге харыылап, мени удавас хостап салыптарга, силерге чеде бээримге идегеп тур мен.

Түңнел байыр чедириишкиннери

²³ Христос Иисуска бүзүрээни дээш, мен ышкаш хоругдаттырган Эпафрас сеңээ байыр чедирип тур,

²⁴ а ол ышкаш мээң чаңгыс ажыл-херек кылып турар эштерим Марк, Аристарх, Димас болгаш Лука олар база.

²⁵ Дээрги Иисус Христостуң авыралы силерниң сагыш-сеткилиңерге доктаазын.