Чугаалар 1 - Ыдыктыг Библия

Угаадыглыг чугааларның ажык-дузазы

¹ Давидтиң оглу, Израильдиң хааны Соломоннуң угаадыглыг чугаалары бо-дур.

² Ол чугаалар мерген угаан биле сургаалды билип аарын күзээн, угаанныг сөс-бодалдың утказын билип алыксаан улуска херек;

³ олар бодамчалыг чорукту: чөптүг болгаш шынчы чорукту база эки мөзүлүг болурун шиңгээдип алыксаан улуска херек;

⁴ олар кенен сеткилдиглерниң сагынгыр боорунга, аныяктарның билиглиг болгаш бодамчалыг боорунга херек;

^5-6 оларны дыңнааш, мерген угаанныг кижи билиглерин көвүдедип аар, а сарыылдыг кижи – элдээртиглиг болгаш угаадыглыг чугааларны база мерген угаанныгларның сөс-бодал болгаш тывызыктарын билип аарынга херек арга-сүмени тывар.

⁷ Дээрги-Чаяакчыдан коргары – билигниң үнер дөзү. Чүгле мелегей кижи мерген угаанны болгаш суртаалды херекке албас.

Бачытка дуурайладып аарындан кичээндириг

⁸ Оглум, ачаңның сургаалын дыңна, аваңның өөредиин сагы,

⁹ ол сургаал биле өөредиг – сээң бөргүңге кадаар одага-дыр, мойнуңга азар каасталга-дыр.

¹⁰ Оглум, бачыттыглар сени дуурайлай берзе, оларны эдербе.

¹¹ Олар мынча дээрлер: «Кады чоруул че, кедеп чыткаш, кижиден өлүрээли, кем-буруу чок улусту кедеп, дозаалы!

¹² Өлүглер ораны дег, бис оларны диригге-ле сыырыптар бис олар – бүдүн-бүрүн боттары – тамыже кирген улус дег апаар.

¹³ Үнези улуг чүүл-бүрү эт-хөреңгиден үптеп, оран-сававысты олча-тывыш-биле долдуруп аар бис.

¹⁴ Биске каттыжып, бистиң-биле бир баг боор сен, тыпкан олчавысты деңге үлежир бис».

¹⁵ Оглум! Олар-биле орууң чаңгыс болбазын, оларны эдереринден кичээн,

¹⁶ чүге дээрге олар бузутче маңнап, хан төгер дээш далажып бар чыдарлар-дыр.

¹⁷ Куштар көрүп турда, четки салган ажыы чок –

¹⁸ олар база улусту ынчалдыр кедээш, боттарын боттары-ла узуткап аарлар.

¹⁹ Чазый-чилби үптекчиниң оруу муңгаш – былаап алган олчазы ооң бажын чиир.

Мерген угаанның улусту кый дээни

²⁰ Мерген угаан кудумчуда кый деп турар, хоорайның шөлдеринде ооң үнү дыңзыг дыңналып турар;

²¹ улус чыглыр хөлзээзинниг черлерде ыыткыр суртаалдап турар, хоорай хаалгаларының чанында чугаалап турар:

²² «Кенен улус, чежеге дээр кенен сеткилдииңерге мага ханып кээр силер; кочуургактар, чежеге дээр ыят чогуңарга таалап кээр силер; мелегейлер, чежеге дээр билигни көөр хөңнүңер чок бооп кээр силер?

²³ Мээң чемелээшкинимче эргилип, дыңнап көрүңер – сеткил-сагыжымны силерже сиңирип каар мен, сөзүмнү силерге медеглээр мен.

²⁴ Мен кый деп турдум, а силер хая көрнү бердиңер; холумну сунуп турдум, ынчалза-даа тооп көөр кижи чок болду.

²⁵ Мээң хамык сүмелеримни хүлээп албайн бардыңар, чемелээшкинимни дыңнаар хөңнүңер чок болду.

²⁶ Ындыг-дыр че, а мен база силер айыылга таваржырыңарга, шоодар мен, коргуушкунга алзыптарыңарга, дорамчылап кочулаар мен.

²⁷ Кызаңнаашкынныг чаъс дег, айыылдыг байдал силерге чедип кээр, хат-казыргы дег, айыыл-халап силерни хөме таварыыр, дарлал силерни чыттыр базып аар.

²⁸ Ынчан улус мени кый дээр, а мен харыылавас мен; мени дилеп эгелээр, ынчалза-даа тыппас.

²⁹ Билигни көөр хөңнү чогу дээш, Дээрги-Чаяакчыдан коргарын хүлээп албааны дээш;

³⁰ мээң арга-сүмемни дыңнаар хөңнү чогу дээш, хамык чемелээшкинимни херекке албааны дээш –

³¹ олар боттарының херектериниң үре-түңнелин четтирерлер, бодал-сагыжынга хара бээрлер.

³² Чүге дээрге кенен улустуң дедир чаңы боттарының бажын чиир, мелегей улустуң сагыш амыры боттарын узуткап каар.

³³ А мени тооп дыңнап турар кижи кандыг-даа бузуттан кортпайн, айыылга таварышпайн, амыр-шөлээн амыдыраар».