KEFDER MAGA POL ƁOʼ NE TID MONO 1 - Tupuri Bible

Heege jage

¹ Wããre sen mokay yer diŋ ndi Pol wejõõ Baa no, ndi je peele Yeso Kris no. Á hã faage me maga ndi mo wo de jar maga Baa hay far ra go hã ɓil ɓaara ne hẽne, ko cwãyn jag Baan lay.

² Diŋ hãge ɓil wo de cwãy jag Baa maga wo de ɓod wer ti gorge tenen maga taw gà mono. Baa maga bay caa geteʼ wa hay wãã le go taŋgu ti gorge tenen sen de maga ngel hay bay tĩĩ wer ɗa mono.

³ Wo day ge ti wur maga hay go de ngaɓge mokay, Baa raw naa nen wããre ɓen go diŋ de siɗgi wããre maga à hã faage ɓe me ga ndi mo wãɗ go ti jag ɓe Baa je ma yãã naa no.

⁴ Ndi hã kefder sen mokay wo ne ndo Tid wel ɓi ma cwãy maga de tayge de ɓi boŋ de hã ɓil ne Kris mono. Daga Baa Pããben wo de Yeso Kris Je yãã naan mo woo wo ndo, mo hã wo jam mo.

Joŋre maga Tid mo joŋn Kred mono

⁵ Ndi men mo Kred maga ndo mo kneʼ re maga hay gwaʼ bay kneʼge go ti ngel ɓe, ndo mo lag jar kluuri wo yoo Tayge jar ma wer Kris wo go ɓi leegen wo ɓuy doo hadge maga ndi hay had mo de ɓe nono.

⁶ Je kluu ma pel jarn mo hay diŋ je ma de wããre ti wa, daga á mo hay de wãy boŋ, weere ɓen mo hay wo de deele lay, bay wo diŋ jar maga à wãɗ ti ɓaara ga á wo diŋ jar figliw noga jar maga yãã wo jag gà wa lay.

⁷ Daga je ma pel Tayge jar ma wer Krisn mo hay de wããre ti wa. Doo je maga Baa hay jag fẽẽre ɓe wo ga á mo ko ra nono, daga á mo hay riŋgi ga se wa, á mo hay diŋ je ma ɓil de tuu wa, mo hay diŋ je jo yii wa. Á mo hay pad pad wa, mo hay daɗ fẽẽre ɓen wo de freŋ nen wa.

⁸ Daga á mo hay yãɗ waare jare, mo hay da fẽẽre ma de el wo, mo hay ɗiggi de ele, mo hay de deele, mo hay go de hã see ɓe day ɗaw see ɓe lay.

⁹ Á mo hay de saʼ see ɓe de wããre ma cwãyn de egre doo maga à hay hadn le nono, nen maga á mo hay de kããge ma coɓ nen jar de hadge ma cwãy no, mo kaŋ nen jar maga giŋ wo de faare ti ɗiggi ɓaara maga bay ti ngel ɓe wa mo lay.

¹⁰ Werga jar po yaŋ wo debaŋ, daŋge ɓuy yoo jar Jwif wo, day wo yãɗ jag gà wo diŋ jar wãɗ wããre ma bay blam wo, wo diŋ jar hãy nen jar wo.

¹¹ Ndo nen ham jag ɓaara go gesiŋ, werga á ɓlag wo feele jar wo go ɓuy, day had wo re maga bay ma hadge wa ma daɗ fẽẽre de tay nen de freŋ wo.

¹² Je ɓaara tuu, diŋ je ma ndar nen wããre ma jag baa ɓaara go hay wãã we gano : Jar Kred wo tum diŋ jar car geteʼe, jar ma de ɓlagge doo nàyre ma koore wo nono, jar cwããge wo, ɗig wo diŋ ti rege kad boŋe.

¹³ Day sedewa maga á joŋn go, á cwãy. Wersen ruu ra de egre, nen maga á mo hay wo de hã ɓil ɓaara ne Yeso Kris de ele.

¹⁴ Á mo hay wo de saɗ see ɓaara diŋ de mbaa jar Jwif wo wa, mo saɗ wo see ɓaara de keɗeg keɗeg jar maga mbuɗ wo faale go ne cwãy mo wa lay.

¹⁵ Fẽẽren joŋ go bay ɗag ɓuy diŋ ne jar maga wo go bay ɗag mono. Ama ma jar joŋ re meyeɗe ma de hig jiilin wo mono, mopo ma bay ɗag bay nen ɓaara wa hase, werga ɗeŋ ɓaara wo de ɗiggi ma ɓil ɓaara ɓuy go de ɓlagge.

¹⁶ Á wãɗ wo ga saara de ko Baa, ama joŋre ɓaara kal kaŋ nen go ga á bay wo de ko Baa wa. Á joŋ wo meyeɗe ne jare, wo diŋ jar ma ti graŋ, day saara kãã ma joŋ joŋre ma de el po meʼ gà has lay.