OSE 5 - Tupuri Bible

Jar had hadge ma de ɓlagge ma Israyel wo no

¹ Coʼ we sug fen ma kay no jar siɗ jag wo! Hay ɗeged coʼ sugi tiŋ mani Israyel no Kaŋ sug ɓo de ele, tiŋ mani waŋ no! Werga wããre kiidan de wiigi diŋ nday Werga nday hay diŋ giniɗ jar le Mispa Nday hay diŋ rew maga go de ler hũy ti húulì Tabore.

² Le Sitim mokay no nday hay tee tuu ma kuɗum Ama ma ɓin mokay no ndi joŋ ge yaŋ nen liŋ rage ɓuy.

³ Ma ɓi ndi de ko Efrayim Day Israyel bay de yoŋre pel ɓi wa Werga patalam no Efrayim, Ndo go de leʼge joŋ figliw Day Israyel go de demge

⁴ Joŋre ɓaaran bay men rage le ferge ɓiŋ Baa ɓaaran wa, Werga ɗiggi ma joŋ bordel go ti holaŋ ɓaara Sen diŋ wer maga á bay wo de ko Manwur wa.

⁵ Maŋge ti ciŋ ma Israyeln go de ma joŋ sedewa ne hẽn ti, Israyel wo de Efrayim mbar wo ɓaale Diŋ wer maga á joŋ wo ni naŋ gà Juda maʼ ge ɓaale wo go wer ɓaara ni lay.

⁶ Á raw ge wo de horog ɓaara ma kleere wo De ma kluuri wo kiɗ Manwuri Ama á daʼ ge wo ne gà. Á ɗee go see ɓaara

⁷ Á mbuɗ wo Manwur doo, Werga á biŋ wo weere ma de nday Patala few boŋ yaŋ mbe de kããge ma Taw rage go de horog ɓaaran wo.

Durgi ma ti holaŋ Efrayim wo de Juda no

⁸ ʼWaa we cõõ gamla wo Gibeya ʼWaa we cõõ wo Rama Joŋ we nen ʼwad war wo Bet-Aven! Wo faale ɓo Benjame!

⁹ Efrayim law ge yaŋ wur bon no Ndi sii fen maga joŋ ge yaŋ go tinoo ne bĩĩni mani Israyel wo no.

¹⁰ Waŋre ma Judan wo doo jar yaɗ haagu nono, ndi Ɓoʼ ge baage põõ ɓin yaŋ ne hara ti doo bii yuuri nono.

¹¹ Efrayim go de luɓgi, Go de naŋge doo kiida Werga á hay dage diŋ ga se see diŋ wer jag liŋgi ma se de see se

¹² Ma ɓin ndi joŋ ge yaŋ see Efrayim doo tenɗe nono, Doo wããge gwẽẽ see tiŋ mani Judan nono.

¹³ Efrayim de ko cege ɓe no, Day Juda de ko wããge ɓe no, Efrayim cegaɗ go Asiri Day kal laa jar peele wo ɓiŋ waŋ Yareb Ama waŋ sen bay de kããge ma pẽẽ nday go wa, Bay de kããge ma rug wããge ɓayn go wa.

¹⁴ Werga ndi de see ɓi ndi joŋ ge yaŋ see Efrayim doo mingir nono, Joŋ ge yaŋ see tiŋ mani Judan doo wel mingir nono Ndi, ndi ceragn ge go cerag cerag day ndi raw jag ɓi Ndi maŋ ge mo ɓi la bay ga jobo yããn ge go jag ɓi wa.

Sen mokay nà diŋ ferge le see Baa mbe?

¹⁵ Ndi raw ge jag ɓi, day ndi fer ge le ti ngel hayle ɓi no, Hãã nen maga á wãã wo go de jag ɓaara ga Saara diŋ jar ɓlagge day kiɗ gi wo ndi yaŋ. Á kiɗ gi wo ndi yaŋ de maga saara nen bon mono.