OSE 1 - Tupuri Bible

¹ Wããre maga Manwur fern ne Ose je ni Beeri no, ti wur maga Osiyas wo de Yotam, Ahas wo de Esekiyas joŋ wo waŋre ma Judan mono, day ti wur maga Jerobowam je ni Jowasn ti waŋ Israyel mono.

Jar ni Ose wo, wããre maga Baa wãã ne hẽn mono

² Tĩĩgi wer wããre maga Manwur fern ne Ose mono : Manwur wii Ose ga : See, wo da wãy figliw, day weere maga ndo biŋ gi ra mono joŋ ge wo diŋ weere ma ɓil figliw, werga sirn go de lengãɗge de figliw ti maga á tob Manwur go!

³ Á kal rawge, kal da Gomer may mani Diblayim no. Gomer kal maŋ ɓiili, kal biŋ wel ne hẽne.

⁴ Day Manwur kal wiigi ɓe ga : Kaŋ ɗúu ne hẽn ga Jisreyel, werga ig la meʼ mono, ndi ur gi yaŋ ciŋ see tiŋ mani Jehu no, ti cíi maga á kaan go ɓi leege ma Israyel mono, ndi taw ge wer waŋ ma ti feele mani Israyeln ge go.

⁵ Ti wur sen mokay no, ndi harag ge toŋwaa yaŋ go ne Israyel doo ɓi ful ma Jisreyele.

⁶ Á kal maŋ ɓiili tigriŋ pa, kal biŋ may. Day Manwur wii Ose ga : Kaŋ ɗúu ne hẽn ga Lo-Ruhama, werga ndi baa ge wùu wo ko decoo tiŋ mani Israyeln ni caw gà nen maga ndi mo hay mbi tum fug ɓil go ne hara ti ni caw gà hase.

⁷ Ama, ndi ko ge decoo ti tiŋ mani Juda no. Ndi yãã ge ra yaŋ go diŋ ndi Manwuri, Baa ɓaara no. Ama ndi yãã ge ra go bay diŋ de toŋwaa wa, bay diŋ de moslam wa, bay de durgi wa, bay de piiri wo wa, bay de jar yaɗ piiri wo wa lay.

⁸ Á kal maŋ jag Lo-Ruhama go ti pãã, blam ɓe kal maŋ ɓiili ma tigriŋ pa, kal biŋ wele.

⁹ Day Manwur kal wiigi ɓe ga : Kaŋ ɗúu ne hẽn ga : Lo-Ammi, werga nday bay diŋ jar ɓi wa, day ndi de see ɓi ndi bay diŋ jobo ɓay wa lay.