NAHUM 1 - Tupuri Bible

¹ Põõre wããre ma ti Ninif no. Kefder naage nen mani Nahum je Elkos no.

Manwur diŋ Baa ma kluu

² Manwur diŋ Baa ma de huni, á saʼ hee see ɓe go. Manwur saʼ hee see ɓe go, á go de baa ɓil de waŋ. Manwur saʼ hee see ɓe go de jar giŋgi ɓen wo. Á ɗaw jar hee ɓen wo ɓili.

³ Manwur bay go caa jiili gus wa. Á kluu wer egre ɓe no. Á men jobo bay liŋgi gà. Manwur see diŋ nen swìl wo de degurleege. Swaare wo diŋ ɓurgi ma ɓaale ɓe wo.

⁴ Á caa põõ ne maaroge day se õg go. Á õg maarog ma de pããregen wo go ɓuy. Sir Basan wo de húulì Karmel puu wo go. Fuɗgi fẽẽre ma Libaŋ lwaɗ wo go lay.

⁵ Á fĩɗ húulìn wo, ngel ma de farge ciŋn dwas wo go. Sir daɗ doo ɓe, tamsir de jar ma ɓil ɓen wo ɓuy lay.

⁶ Wose oo ge yaŋ pel caage jiili ɓen la? Wose dig gi bagge põõ ɓe ma de hãã yaŋ la? Ɓil de waŋ ɓen doo wùu nono, húulì wo draʼ mbug wo go pel ɓe.

⁷ Manwur de ele. Á diŋ ngel yoŋre ti wur ma de bonn wo. Á ɗaw jar maga a wo yãã waŋ see ɓe doo.

Wããre ti Ninif wo de Juda

⁸ Ama á kaŋ ge bon ma de raw ti jar yaŋ wo ne jar ti, Day se ɓlag ge ngeln go has ɓuy tuu. Á nii gi jar hee ɓen wo yaŋ, Á kaŋ ge glog ɓaara yaŋ wo go nen suŋgu.

⁹ Nday ɗig re mayse de ɓlagge ti Manwur mo la? Ɓlag fẽẽren wo go ɓuy nà diŋ se. Reen dog ge caa jar ɓog gà.

¹⁰ Á mo hayba doo brem ma de hee doo kriggi noga wo go de taage de yii ɓaaran yaw, Á roɗ ge wo yaŋ go fãd ɓuy doo fíi ma de heeg nono.

¹¹ Je maga hay ɗig re ma de ɓlagge ti Manwuri, Day ɗiggi ma debaycõõren hay wo le ɓil ɓe hay kal le go nà ni ɓo.

¹² Mokay diŋ wããre maga Manwur wããn mono : Á mo hayba wo go de bag jag ɓuy noga wo ngaɓa doo mayse no yaw, À saŋ ge ra go day sen taw ge doosen no tuu no. Ndi da mbuɗ foo ɓo go nen maga ndi mbuɗ gi foo ɓo de daŋ sen wa so hase.

¹³ Ndi hrag ge jug ɓen yaŋ go patala ma maŋge ɓe go mo soole. Ndi hrag ge geyam ma de mbarge ne ndon wo yaŋ go.

¹⁴ Mokay diŋ fen maga Manwur wããn le ti ɓo mono Ninifi : Jobo joŋ ge ti wer mani ɓon ma ra ɗúu ɓo gà so. Ndi hoo ge fodo wo de mo ma de yorge ma ɓil tiŋ baa ɓon wo yaŋ go. Ndi ʼwũy gi tuu húulí ɓon yaŋ go, werga ndo patala bay diŋ mopo wa so.