MARK 1 - Tupuri Bible

Wããre maga Jaŋ ma yog jar siin mono

¹ Wããre ma de Cõõre maga jar siɗn go ti Yeso Kris, Wel Baan tĩĩ wer doo kayn no.

² Esay je ndar nen wããre ma jag Baa go de yerge ɓe ga : Coʼ sug ɓo, ndi de ɓoʼ je soole ɓin wo pel ɓo, Ma kneʼ faagen wo go mo pele.

³ Je tabay yaŋ le ʼwaa ɓay ti puuli ga : Kneʼ we blam faage Waŋkluun go. Raɗ we faage ma kleeren wo go ne hẽn de deele ɗeger ɗegere.

⁴ Jaŋ raw naa nen joŋ batem jar ti puuli. Á sii wããre go ti batem ɓodge jag maga jar mo daʼ fuggi ɓil ti ɓlagge ɓaaran wo.

⁵ Jar ma ɓi sir Jude wo de jar ma ɓi leege Jerusalem raw wo woge ɓiŋ ɓe ɓuy, ɓoɗ wo jag go ti ɓlagge ɓaaran go tinoo nen jar poɗag ɓuy, Jaŋ raw joŋ batem ɓaara go nen pyew Jurdẽẽ.

⁶ Õõbe ma ti Jaŋ de joŋge de fũy yoŋyoŋ, se de saʼ ɓil ɓe de mblaaga hõõge, re diŋ maapoɗ wo de noo yõõre ma koore.

⁷ Á raw riŋ jarn wo ga : Je ma de egre de daŋ ndi yaŋ le age blam ɓi, ndi bay de kããge maga ndi naa way taarag ɓen go draʼ wa.

⁸ Ma ɓi, ndi joŋ batem ɓay diŋ de bii, ama ma ɓen á joŋ ge batem ɓay yaŋ diŋ de Nenterse ma bay ɗage.

Jaŋ joŋ batem Yeso go

⁹ De ngar ngel sen ni, Yeso raw age le Nasared ɓi sir Galile. Jaŋ raw joŋ batem ɓe go nen bii Jurdẽẽ.

¹⁰ De maga Yeso wo le go kalge nen biin mokay, á raw ko ngel ma ciŋ go de bulgi, raw ko Nenterse le sirgi ne hẽn ti doo kurgudu nono.

¹¹ Gẽẽge po raw riŋgi le ciŋ ga : Ndo diŋ Wel dage ɓi no. Ndo nen ɓi de el debaŋ.

Manhúulí jãɗ Yeso

¹² Blam sen tuu, Nenterse raw srogge ɓe wo go ti puuli.

¹³ Á joŋ naw wo go ni doo naa. Manhúulí jãɗn le ni. Á hay yoo nàyre ma koore wo. Jar peele Baa raw wo age joŋ rege hẽne.

Yeso tĩĩ wer siɗ wããre

¹⁴ Blam maga à ɓoʼ Jaŋ ti daŋgay mono, Yeso raw woge Galile, á hay siɗ wããre Baa ne jar ga :

¹⁵ Wur twaywaŋ mani Baan nduu we go. Coo we ɗiggi ɓay de deele yãã we Wããre ma de Cõõre no.

Yeso ɗe jar bag cẽẽ wo naa

¹⁶ Yeso kal rawge ti jeŋ maarog ma Galile no, raw ko Simoŋ wo de wegeman ɓe Aŋdre lag bày nen bii, werga á wo diŋ jar bag cẽẽ.

¹⁷ Yeso raw riŋ rage ga : See we le wer ɓi, ndi kol nday go jar fleg jar téebeere wo ne Baa.

¹⁸ Á raw wo men bày ɓaaran wo go ti ngel ni, raw wo maŋ blam ɓe.

¹⁹ Wo yaʼ ge pel meʼ Yeso raw ko Jag wo de wegeman ɓe Jaŋ jar ni Sebeden wo, wo ɓi daage ɓaaran de kneʼ bày ɓaara no.

²⁰ Yeso raw ɗe rage le go tuu. Á raw wo men pan ɓaara Sebede ɓi daagen de jar joŋre ɓen wo, raw wo maŋ blam Yeso lay.

Yeso nii sõõ go ne jobo ti

²¹ Yeso de jar ma wer ɓen kal wo rawge ɓi leege Kapernam. Wur síilí ma iggi, Yeso raw kalge ɓi tiŋ tosge, raw tĩĩ wer had rage ni.

²² Jar coʼ sug wããre ɓen ngris wo debaŋ, werga á had ra doo je ma de egren no, bay doo jar ma ndar wer wããre Baa wo no koɗ wa.

²³ Bloo po yaŋ yoo ɓaara de sõõ ti ni, raw ngar jag ga :

²⁴ Oh, Yeso ma Nasared, ndo a yoo wùr sõõre wo re may la? Ndo a nii wùr sõõren wo wo go yawla? Ndi de koge go cwãy ga ndo diŋ Je ma Baa, Baa ɓoʼ mo le.

²⁵ Yeso raw caa põõ ne sõõn ga : Hay go baʼa, kal le go.

²⁶ Sõõ sen raw gejag bloon debaŋ, raw kalge go de ngar jage.

²⁷ Hẽẽne raw joŋ jar maga wo ni mo ɓuy, á raw wo riŋ kããra ga : Sen diŋ may ɓa? Naa ko we hadge po ma defay de egre mokay ɗa ɓa. Á ruu sõõren wo, saara yãã jag ɓe lay ɓuy.

²⁸ Blam sen ni tuuseŋ wããre Yeso raw dusgi go ɓi sir Galile ɓuy.

Yeso pẽẽ mannee Simoŋ wo de jar cege wo go debaŋ

²⁹ De maga saara laa le go ɓi tiŋ tosgen mono, á kal wo rawge liŋ ni Simoŋ wo de Aŋdre, wer kããra de Jag wo de Jaŋ.

³⁰ Mannee Simoŋ hay de suuli ti ɗeere, see ɓe leɗ wùu debaŋ, à raw riŋ Yeso ti ɓe,

³¹ á raw age ɓiŋ ɓe, raw maŋ doo ɓe go ciŋ ga : Ur go ciŋ. Cegèn raw mege ɓe go, á raw joŋ rege ne hara.

³² Wur wo coŋge go mono, à raw woge de jar cegèn wo de jar ma de sõõre wo ti ne Yeso ɓuy.

³³ Jar ma ɓi leegen raw wo tay ti jag tiŋ sen ni ɓuy.

³⁴ Yeso raw pẽɗ jar cegè wo go debaŋ, wer cege ɓaaran wo sar sare, niɗ sõõre wo go debaŋ lay, á raw far jag sõõren wo go ga á mo wãɗ wo wããre wa, werga á wo go de ko ge ɓe.

Yeso raŋ ɓi sir Galile

³⁵ Toŋ ɓe, Yeso raw urgi go ciŋ de jag toŋ mbuh, raw kalge wo go ti ngel maga jar bay ni wa, maga se mo hay fentray ɓe boŋ, raw hayge wo go tos Baa ni.

³⁶ Simoŋ raw wo baa blam ɓe de gee kããre ɓen wo.

³⁷ De maga á wo wo daʼ ge ɓe mono, á raw wo riŋgi ɓe ga : Jar wo de kiɗ moge ɓuy.

³⁸ Yeso raw riŋ rage ga : Naa see ɓi leege ma tigriŋ wo, maga ndi mo wo sii wããre go ni lay, doo ga ndi kal le go diŋ wer se no.

³⁹ Á raw raŋ sir Galile go ɓuy, siɗ wããre ne jar ɓi tiŋ tosge ma ɓi sir sen wo ni, niɗ sõõre wo go lay.

Yeso fãã je cíi po go

⁴⁰ Je cíi po raw age, joŋ kam kam ne Yeso, laa kõyõgre gesiŋ pel ɓe, raw riŋgi ɓe ga : Hayga ndo da we, ni ndo kãã ma fãã me yaŋ go.

⁴¹ Yeso raw ko decoo ɓe, raw coŋ doo ɓe ne hẽn ti, raw duʼgi ɓe, kal riŋ gi ɓe ga : Ndi da we, fãã go so.

⁴² Cíin raw mege ɓe go tuuseŋ. Bloon raw fããge go.

⁴³ Blam sen Yeso raw ruugi ɓe, raw mege ɓe rawge,

⁴⁴ á raw riŋgi ɓe ga : Ko nen ɓo, sii re sen go ne jar wa, wo wii nen see ɓo ne je kluu ma siɗ jag nene, fen sii jag maga Moyis hay riŋ ga hã ne ma kaŋ nen jar go ɓuy ga ndo fãã we go, wo hãge ɓe ne hẽne.

⁴⁵ Ama bloon kal rawge wããge go ga Yeso fãã se go, riŋ jar go de ɓe ɓuy. Wersen Yeso laa naa nen see ɓe go tinoo ɓi leege gà so, á raw hayge wo go jag leege, ti ngel maga jar bay ni wa. Jar raw le age see ɓe ɓaŋla lay ɓaŋla lay.