WÃÃRE MA DE CÕÕRE MAGA LUG YER NE MONO 4 - Tupuri Bible

Manhúulí maŋ blam Yeso wo jãɗ ge ɓe ti puuli

¹ Nenterse ma bay ɗag raw baa ɓil Yeso go mbaŋ mbaŋ, á le Jurdẽẽ ni, á raw ferge le, Nenterse kal rawge de ɓe wo ti puuli.

² Naw hwal hwal naa Manhúulí wo jãɗ ge ɓe ti puuli ni caw. Nen naw se ma hwal hwal naa mo caw á bay re mopo wa hase, blam naw ma hwal hwal naa koŋne raw cee ge ɓe.

³ Manhúulí raw riŋgi ɓe ga : Hayga ndo yaŋ diŋ wel Baa wii húulìn mo tiʼ ga á mo kol go diŋ hoole ɗa ɓa.

⁴ Yeso raw fer wããre ne hẽn ga : á go de yerge ga Je tabay joŋ tenen caw diŋ wer hoole tawa gà.

⁵ Manhúulí raw ɗii gi de ɓe ciŋ, raw kaŋ nen ɓe ti waŋre ma ti tamsir wo la ɓuy,

⁶ raw riŋgi ɓe ga : Waŋre sen wo de egre ɓaaran de horogre ɓaaran wo mo deŋ, ndi Manhúulí, ndi hã ra ne ndo, á hay de hã rage me, day ndi hãn ge ne wosela maga ndi da hãge ɓe hẽne.

⁷ Wersen hayga ndo leʼ monɗra we me pel, ni á kol ge wo diŋ ma ɓo ɓuy.

⁸ Yeso raw fer wããre ne hẽn ga : á go de yerge ga : Ndo mo leɗ monɗra gesiŋ goŋ ge diŋ Baa Waŋkluu, ndo mo tos diŋ se boŋ.

⁹ Manhúulí kal raw ge de ɓe Jerusalem, raw oo ge ɓe ti tipẽẽge tiŋ Baa, raw riŋgi ɓe ga : Hayga ndo yaŋ diŋ wel Baa, leʼ le gesiŋ.

¹⁰ Werga á go de yerge ga : Á riŋ gi jar peele ɓen wo yaŋ ti ɓo ga á mo koɗ wo ndo.

¹¹ Á go de yerge ɓe pa ga : Á cegawn wo ndo yaŋ doo ɓaara maga ɓaale ɓo mo maʼ ti húulì wa.

¹² Yeso raw riŋgi ɓe ga : Á go de wãã ge ɓe ga : Jobo mo jãɗ Baa Waŋkluu wa.

¹³ Manhúulí wo taw wer jãɗgen go ɓuy mokay, á raw men ge ɓe ni no maʼ ɗa pa.

Yeso tĩĩ wer joŋre diŋ ɓi sir Galile

¹⁴ Yeso raw ferge Galile de kããge de Nenterse debaŋ, riŋ ɓe raw leʼge wo go ɓi sirn ɓuy.

¹⁵ Á raw had jar ɓi tiŋ tos ge ɓaaran wo, ti wããre hadge sen jarn ɓuy raw wo kee ge ɓe ti ɓe.

Jar Nasared laa wo da wããre Yeso ga

¹⁶ Yeso raw ferge Nasared ti ngel maga á gẽẽ ni mono, á raw kalge ɓi tiŋ tos ge wur Saban doo ga á joŋ tum nono, á raw urgi ciŋ jaŋ kefdere.

¹⁷ À raw hã kefder mani Esay je ndar nen wããre Baa go ne hẽne. Á raw bul kefdern go, raw daʼ wããre de wãã ge ni ga :

¹⁸ Nenterse Waŋkluu yaŋ de ɗaw mege doo ɓe. Á maŋ me go ma sii Wããre ma de Cõõren ne jar coo wo ra, Á ɓoʼ me le sii wããre ne jar ma ti daŋgay wo ga à bud ra we go maga á mo fer wo liŋ, Car nen jar rẽwre wo go, Bud jar go jag gebeere,

¹⁹ siigi ne jar ga kiŋgi maga Baa Waŋkluu hay riŋ ga se a yaŋ yãã jar ɓen wo go baa jag we go so.

²⁰ Yeso kal kaa kefder no, raw hãge ɓe ne je ɗaw kefder no, kal mbe hay ge gesiŋ so. Jar ma ɓi tiŋ tosgen ɓuy raw wo lagge ko ge ɓe ɗeŋrese.

²¹ Á raw riŋ rage ga : Wããre ma de yergen mo taʼ la baa jag we go wara doo maga nday de laa ge ɓe de sug ɓay nono.

²² Á wo ɓuy raw wo kee ge ɓe, ngris wo debaŋ ti wããre maga kal le go jag ɓe de cõõre mono. Á raw wo wãã ge ga : Ɓa á bay diŋ wel mani Josefn wa yawla?

²³ Yeso raw riŋ rage ga : Wããre jagjõõ maga wãã ga : Dogtor pẽẽ mbo go diŋ see ɓo nday wããn yaŋ me ɓegdeʼe. Nday riŋ me yaŋ pa ga : Wùr laa wããre fẽẽre maga ndo hay joŋ ra le Kapernam mo ɓuy, joŋ ra mbo ɓi leege ɓo la lay.

²⁴ Blam sen á raw riŋ rage ga : Kidolgi ndi de riŋ we ge ga je ndar nen wããre Baa go po ga jar ma ɓi sir ɓe yãã wo ne de el bay boŋ wa hase.

²⁵ Ndi de riŋ we ge ga naare dwur hay wo we le ɓi sir Israyel debaŋ nen kiŋgi maga Eli hay le nen ɓe mono, le de sen ni Baa raw joŋ kiŋgi go ciŋ swaʼ de few hiiraʼ laa rage ga : koŋne raw joŋ jar go ɓi sir ɓuy debaŋ.

²⁶ Baa ɓoʼ Eli wo se ma baapo yoo naare dwur ma Israyel wo boŋ ga, á ɓoʼ Eli wo say diŋ ni wãy dwur ma Sarepta ɓi sir Sidoŋ no.

²⁷ Jar cíi hay wo we le Israyel debaŋ nen kiŋgi maga Elise je ndar nen wããre Baa go hay le nen ɓe, jobo fãã go yoo ɓaara de el boŋ ga, say diŋ Naaman je Sirin tawa.

²⁸ Jar ma ɓi tiŋ tosgen wo ni ɓuy wo wo laa wããre sen mokay ɓil ɓaara raw sõõ ge debaŋ debaŋ.

²⁹ Á raw wo hoo ge ciŋ kog ge ɓe wo go jag leege no, raw wo raw ge de ɓe ti tipẽẽge húulì maga tiŋ ɓaaran de boo ge ti ɓe mono, maga saara mo srogn le go gesiŋ.

³⁰ Ama á raw daŋ rage wo go caw.

Sõõ gay bloo po go debaŋ

³¹ Yeso raw ferge ɓi leege Kapernam ma ti prog Galile, á raw had jar wur Saba.

³² Á raw wo ngrisgi debaŋ wer hadge ɓe no, werga á wãɗ wããre de egre.

³³ Bloo po yaŋ ɓi tiŋ tosgen ni de sõõ ti, raw ngar jag kloŋ ga :

³⁴ Oh, Yeso ma Nasared, ndo á yoo wùr sõõre wo re may la? Ndo á nii wùr sõõren wo wo go yawla? Ndi de ko ge go cwãy ga ndo diŋ je ma Baa, Baa ɓoʼ mo le.

³⁵ Yeso raw caa põõ ne sõõn ga : Hay go baʼa, kal le go. Sõõn raw ɓoʼ bloon pel jar ni kaʼ ɓuy vbal, raw kalge go, mopo joŋ bloon mbe de ɓlagge ga hase.

³⁶ Á wo ɓuy raw wo joŋ hẽẽne, kal wo riŋ kããra ga : Ɓa á diŋ wããre may ga á ruu sõõre wo, saara laa go lay mo ɓa?

³⁷ Á kal rawge siɗ wããre Yeso go ɓi leegen wo ɓuy.

Yeso pẽẽ jar cege wo debaŋ

³⁸ Yeso raw men tiŋ tosgen go, kal kal ge wo go liŋ ni Simoŋ. Mannee Simoŋ hay de cege, see ɓe leɗ wùu debaŋ, á raw wo kam ge ɓe ti ɓe.

³⁹ Á raw oo ge ti ɓe deŋ kal caa põõ ne cege no, cegèn raw men ge ɓe go, á raw urgi go ciŋ ni tuuseŋ joŋ rege ne hara.

Yeso pẽẽ jar cege wo go debaŋ

⁴⁰ Wur wo go coŋ ge mokay, jar maga jar ɓaara wo de cege mo ɓuy raw wo nduugi de ɓaara see Yeso, á raw kaŋ doo ɓe ne wosela ti ɓuy pẽɗ ra go.

⁴¹ Sõõre raw wo ndar ge go ne jar po wo ti debaŋ, ngar wo jag ga : Ndo diŋ wel Baa, ndo diŋ wel Baa. Yeso raw car põõ ne hara, laa men rage wãɗ wããre ga so, werga á wo go de ko ge ɓe ga á diŋ Mesi mono.

Yeso sii wããre ɓi sir Jude

⁴² Ngel wo le go teege mokay, Yeso raw kalge go, raw wo go ti ngel maga jobo bay go ni wa, jar debaŋ raw wo raw ge kiɗ gi ɓe, raw wo yiŋgi de ɓe, á raw wo ga saara dig ne ga á mo men saara go wa.

⁴³ Ama Yeso raw riŋ rage ga : Daga ndi mo sii gi Wããre ma de Cõõre ma ti twaywaŋ mani Baan, go ne ɓi leege ma lan wo lay, werga Baa ɓoʼ me le diŋ ti se no.

⁴⁴ Á kal rawge siɗ wããre ɓi tiŋ tosge ma ɓi sir Juden wo.