WÃÃRE MA DE CÕÕRE MAGA LUG YER NE MONO 1 - Tupuri Bible

Tĩĩgi wer wããre no

¹ Tewfil, jar po debaŋ laa wo yer re maga hay joŋ wo ti yoo naa la mono.

² Á yer wo diŋ wããre maga á laɗ ra wo jag jar maga ko wo re sen le ti tĩĩ gi wer ɓe le ɓaa, jar sen wo diŋ jar siɗ wããre sen go de see ɓaara lay.

³ Day ndi Lug patalam lay no, á raw wooge nen ɓi, ndi raw kiɗ wer fẽẽre maga hay joŋ wo mo deŋ le ti tĩĩ gi wer ɓe le hãã, maga ndi mo yer wããre sen wo wo jag kããra ne ndo je ma de ra ɗúun lay.

⁴ Ndi joŋ doo sen, maga ndo mo fer ko cwãy hadge maga ndo hay had ra go mono.

Je peele Baa go de wãã ge ga Jaŋ ma joŋ batem jar biŋ gi yaŋ

⁵ Ti kal maga Herod hay diŋ waŋ Jude, je siɗ jag po yaŋ ni, ɗúu ɓe ga Sakari, á ti ɓĩĩni mani Abiya no, wãy ɓe Elisabed ti ɓĩĩni mani Aaron je kluu ma siɗ jagn lay.

⁶ Á wo ɓog ɓuy see wo wer wããre Baa wo de bagge blam wããre maga Baa wãɗ ra ti ngel ɓe de deele.

⁷ Ama wel ɓaara bay wa, werga Elisabed hay go de gedge, á hay wo go de tããrebe ɓog ɓuy lay.

⁸ Day ti wurpo, Sakari raw kalge joŋ fẽẽre siɗ jag ne Baa, werga á de kiigi le wur sen diŋ ti ɓaara.

⁹ Day wer hadge ɓaara jar siɗ jag mo so no, doo raw leʼ ge ti ɓe maga á mo kal roɗ gúmgùm ne Baa Waŋkluu ɓi tiŋ ɓen diŋ se.

¹⁰ Ngaɓa jar wo le go de lagge siigi tos Baa de maga á de roɗ gúmgùm mono.

¹¹ Je peele Baa raw naa nen see ɓe ne Sakari de oo le nen ti ɓaŋ war ngel maga á roɗ gúmgùm ni deŋe.

¹² Sakari wo ko ge ɓe no kay, nenterse ɓe raw daŋ ge ɓe go, hẽẽne raw joŋge ɓe debaŋ.

¹³ Ama je peele Baa raw riŋgi ɓe ga : Joŋ hẽẽne wa Sakari, Baa laa roo ɓon we, wãy ɓo Elisabed biŋ wel yaŋ mo, ni ndo kaŋ ɗúu ɓe ga Jaŋ.

¹⁴ Ɓil ɓo joŋ ge yaŋ go feh so, jar debaŋ joŋ ge wo ɓil yaŋ go wur biŋ gi ɓe feh lay.

¹⁵ Werga á joŋ ge yaŋ diŋ jobo ma de ra ɗúu nen Baa Waŋkluu debaŋ. Á jo ge yii ga : hayba fen jo ge ma de jii gi draʼ á jo ga : á baa ɓil yaŋ le go de Nenterse ma bay ɗag de maga á biŋ le go mokay tuu no.

¹⁶ Á fer yaŋ kaŋ weere Israyel wo debaŋ se Baa Waŋkluu ɓaara no.

¹⁷ Á see ge yaŋ wo go pel ɓe de ɗiggi wo de egre mani Eli no, ma ferge tay jag pããre weeren wo de weere ɓaaran wo no, ma ferge kaŋ jar maga bay wo yãã jag Baa wa yaŋ seege ti faage Baa de deele ma kneʼ jar téebeere wo go ne Baa Waŋkluu no.

¹⁸ Sakari raw riŋ je peele Baa ga : Day ndi ko ge se may ga wããre ɓon cwãy ne? Werga ndi go de tããbe, wãy ɓin go de tããbe lay mono.

¹⁹ Je peelen raw riŋgi ɓe ga : Ndi diŋ Gabriyel ma de oo le pel Baa no, á ɓoʼ me le riŋ moge ga ndi mo á de Wããre ma de Cõõren mokay mo.

²⁰ Day ndo laa yãã wããre ɓi maga wo ge joŋ ge ti ngel ɓe doo ga ɓil Baa dan no, ndo laa yãã ge ɓe gà. Wersen ndo kol ge go mbululum, ndo kãã ma wãã wããre ge ga : hãã go ti wur maga re sen wo go joŋ ge ɗa.

²¹ De sen ni, jar ma ti jag Baa raw wo lagge gor Sakari de ngris gi, doo maga á ig le ɓi tiŋ Baa ni debaŋ mono.

²² Á wo le go kal ge jag ɓe laa wãã wããre ne hara ga, jar raw mbaara ko ge tuu ga á yaŋ le de ko mopo ɓi tiŋ Baa le ni. Á raw waɗ ge ne hara diŋ doo, gwaʼ mbe mbululum caw so.

²³ Sakari wo taw naw joŋre ɓe ma ɓi tiŋ Baan go, á raw ferge liŋ ni ɓe.

²⁴ Naw wo nà ge blam sen mbag, wãy ɓe Elisabed raw maŋ ɓiili, á raw yoŋ see ɓe few dwee, blam sen á raw wãã ge ga :

²⁵ Waŋkluu woo me we so, á maŋ sõõre we go me ti yoo jar so.

Je peele Baa ga á biŋ Yeso yaŋ

²⁶ Nen few ɓiili Elisabed ma de hiiraʼn, Baa raw ɓoʼ je peele ɓe Gabriyel le Nasared ti prog po ɓi sir Galile,

²⁷ se may tigli po de yãã ge ne jobo à ɗen ga Josefe, ti ɓĩĩni mani Dafid lay, ɗúu may tiglin ga Mari.

²⁸ Je peelen raw kalge wo liŋ ni may no, raw riŋgi ɓe wo ga : Waare yaŋ wo seege ni ɓo lay Mari, ndo may maga Baa de woo moge no, Baa Waŋkluu yaŋ de ɗaw ndo doo ɓe.

²⁹ Wããre sen raw caa hẽẽne ne Mari debaŋ lay, á raw wãã ge de ɓil ɓe ga : ɓa wer wããre sen mokay gahãy ɓa.

³⁰ Je peelen raw riŋgi ɓe ga : Joŋ hẽẽne wa, Mari, ma ɓo Baa go de woo moge.

³¹ Ndo maŋ ge ɓiili yaŋ, ndo biŋ wel yaŋe, ni ndo kaŋ ge ɗúu ɓe ga Yeso.

³² Werga á joŋ ge diŋ jobo ma de ra ɗúu debaŋ, day Baa Waŋkluu ma ciŋ ɗen ge yaŋ ga wel ɓe. Baa Waŋkluu hay ne yaŋ waŋ doo moo ɓe Dafid nono,

³³ hay ne ge waŋ jar Israyel wo ma tum.

³⁴ Mari raw riŋ je peelen ga : Fen sen joŋ ge joŋ ge ga ndi bay de ko je twar wa ne?

³⁵ Je peele Baa raw ga : Nenterse ma bay ɗag a ge ti ɓo, egre Baa ma ciŋ kuɓ ge nencee yaŋ mo ti. Wersen wel maga ndo biŋ gi, à ɗen ge ga wel Baa, á joŋ ge bay ɗage.

³⁶ Coʼ sug ɓo kaw ɓo Elisabed de tããbe ɓen ɓuy, á maŋ ɓiili we, á hay ɗe ge ɓe ga wãy de ged ge, day few ɓe bà patala hiiraʼ yaw.

³⁷ Werga mo ma ẽg Baa bay wa.

³⁸ Mari raw wãã ge ga : Ndi diŋ gebee Baa Waŋkluu, á mo joŋ mbe see ɓi doo ga ndo wãã nono. Je peele Baa raw men ge ɓe, kal rawge mbe so.

Mari wo ko Elisabed

³⁹ De sen ni tuuseŋ, Mari kal rawge deparday ɓi leege ma ti húulìn wo wo ti prog Jude.

⁴⁰ Á raw kalge liŋ ni Sakari, raw hee jag wo ne Elisabed.

⁴¹ Elisabed wo laa hee ge jag Marin mokay tuu no, mbarga ma ɓil ɓen raw maŋ ge ne hẽn ɓil seŋ, Nenterse ma bay ɗag raw baa ɓil Elisabed go,

⁴² á raw ngar jag de egre ga : Baa woo mo we go daŋ naare lan wo ɓuy, de woo wel ɓo maga ndo day biŋ gi ɓe go mo lay,

⁴³ ndi diŋ wose lay ga man Waŋkluu á ni ɓi lay la.

⁴⁴ Coʼ sug ɓo, de maga ndo hee jag le me mokay mbarga ma ɓil ɓin raw joŋ ɓil go feh, á raw fĩɗ gi ne ndi ɓil huɗug huɗug gi.

⁴⁵ Ndo woo we werga ndo yãã wããre maga Baa Waŋkluu wãã mo ga á mo joŋ mbe go mono.

Mari ʼwaa siŋ

⁴⁶ Mari raw ga : Ndi togoɗ Baa de jiili ɓi ɓuy á nen ɓi diŋ Waŋ ma Kluu no.

⁴⁷ Day ɓil ɓi raw joŋge go patala feh wer Baa je yãã mege no,

⁴⁸ Ɓil ɓe da, á raw woo mege maygebe ɓe maga ndi bay kee see ɓi ga riŋ ga ndi wa mono. Wersen jar téebeere maga joŋ ge wo wo pel mo ɓuy, wãɗ ge wo yaŋ ti ɓi ga ndi diŋ wãy maga Baa de woo mege no.

⁴⁹ Werga Baa ma de egren joŋ me de el debaŋ. Á diŋ Baa ma bay ɗage.

⁵⁰ Á ko decoo jar maga Hoo wo sug ti ɓe yaŋ wo hãã tum.

⁵¹ Á de egre ma ɓoɗ jag joŋre ɓen wo go de doo ɓe. Á dus ge jar maga keɗ wo see ɓaara de ɗiggi ɓaara ga riŋ ga saara yaŋ wo wo go.

⁵² Á srog waŋren wo yaŋ go ti paale ɓaaran wo, á hã ge ngel hay le ma de wooren wo yaŋ go ne jar maga ko wo see ɓaara depẽẽre mono.

⁵³ Á raw hã fẽẽre ge ne jar maga koŋne hay cee rage debaŋ mono. Raw nii jar ma de hurman wo wo go doo koɗe.

⁵⁴ Wããre maga á hay riŋ moore naa wo ga se woo ra yaŋ, á yõõ ti ɓe go ga : wersen á raw age kay jar Israyel weere jõõre ɓen wo.

⁵⁵ Á raw naa nen see ɓe go ko decoo Abraham wo de wer mani ɓen wo ma tum Doo ga á hay wãã no so no.

⁵⁶ Mari raw ig gi le se Elisabed ni nen few swaʼa, blam sen á raw ferge le liŋ.

Biŋ gi Jaŋ ma joŋ batem jar no

⁵⁷ Few ɓiŋ gi Elisabed wo go baa jag mokay, á raw biŋ wele.

⁵⁸ Jar leege Elisabed wo de kawre ɓe, wo wo laa ge ga Baa Waŋkluu woo ne we debaŋ doo sen no, ɓil ɓaara raw joŋge go feh lay.

⁵⁹ Weln wo joŋ naw renam á raw wo age de ɓe caa gersele, á hay da wo ga saara mo kaŋ ɗúu ɓe de pan ɓe Sakari.

⁶⁰ Ama man ɓe raw wãã ge ga : Bay wa, à ɗen ga Jaŋ.

⁶¹ Á raw wo wãã ge ga : Jobo bay boŋ ti ɓĩĩni mani ɓon ga à ɗen ga Jaŋ wa mo la.

⁶² Á raw wo wii pan ɓe wo de waɗ doo ga á da ga kaŋ ɗúu ne wel ɓen gahãyla.

⁶³ Sakari raw wiigi ga : maŋ koo ma de ceɗ ge kamram le ne se, kal yer ɗúu ɓe ga Jaŋ. Á raw wo ngrisgi ɓuy.

⁶⁴ Ni tuuseŋ jag Sakari kal wal ge go wãã wããre tigriŋ pa so, á raw togoɗ Baa de gẽẽge ɓe ciŋ kloŋ.

⁶⁵ Hẽẽne raw caa jar leege ɓen wo ɓuy, á raw siɗ wããre sen mokay wo go ɓi leege ma ti húulì ma ɓi sir Jude wo ɓuy.

⁶⁶ Jar maga laɗ wo wããre sen mo ɓuy, raw wo lagge ɗig wer ɓe wiɗ wo de ɓil ɓaara ga : Wel sen mokay kol ge diŋ may la? Nenterse ma bay ɗag mani Waŋkluu de ɗaw ge ɓe kidolgi mono.

Wããre maga Baa hãn hẽn jage

⁶⁷ Ɓil Sakari pan weln raw bagge go de Nenterse ma bay ɗage, se raw ndar nen wããre wo go doo kay nono ga :

⁶⁸ Naa mo togoɗ Baa Waŋkluu maga jar Israyel goŋ wo, Werga á nduu we kay jar ɓen wo, á á yãã rage go lay.

⁶⁹ Á naa nen je yãɗ jar ma de egre debaŋ we ne naa, Ti ɓĩĩni mani Dafid wejõõ ɓe no.

⁷⁰ Á diŋ fen maga á hay siin le go ɓaa jag jar wãɗ wããre ɓen wo, jar ɓe ma bay ɗagn wo.

⁷¹ Fen maga á hay riŋ naa ga se yãã naa yaŋ go doo jar hee naa wo, Se yãã naa yaŋ go doo jar maga bay wo ko naa nen wa mo ɓuy lay.

⁷² Baa hay riŋ moore naa wo we ga se naa nen se se yaŋ ne hara je da rage, Day á fer we ɗig ti barge ɓe sen so.

⁷³ Werga Baa hay hãʼ go ne moo naa Abraham,

⁷⁴ Ga se bud naa yaŋ go doo jar hee naan wo, Ma hã faage ne naa ma togoɗ ge ɓe bay hẽẽne.

⁷⁵ Maga naa mo hay go ma se, de deele pel se Ti naw naa tum tum.

⁷⁶ Sakari raw ɗe wel ɓe no, ga : Ma ɓo ndo wel ɓi no, à ɗe ge ndo yaŋ ga je siɗ wããre ma jag Baa ma ciŋ go, Werga ndo see ge yaŋ pel Baa Waŋkluun ma kneʼ faage ɓen go hẽne,

⁷⁷ Ndo kaŋ nen jar ɓen wo yaŋ ti ɓe ga á yãã ra yaŋ go, Ndo kaŋ nen ɓaara yaŋ ga á men ɗig re ɓlagge ɓaaran yaŋ wo go ne hara ti.

⁷⁸ Werga Baa maga naa goŋ ne á da jare, á joŋ jar de el de el debaŋ, Á ler ge ngel yaŋ le ne naa ti ciŋ doo wur maga leʼ kal ge le nono.

⁷⁹ Day ler ngel yaŋ go ne jar ma nen suŋgun wo ti, ler ngel yaŋ go ne jar ma joŋ hẽẽne húulí wo ti lay, Á koɗ ɓaale naa yaŋ ti faage jam.

⁸⁰ Weln raw gẽẽ ge go, raw joŋge de ko re ti ɗiggi ɓe debaŋ. Á raw hayge wo go ti puuli wo, hãã wo go naa nen see ɓe ne jar Israyel wo wurpo nen poɗag deŋe.