LAAGE GO 1 - Tupuri Bible

BAA LAA JAR ISRAYEL WO LE GO EJIPTE Jar Israyel wo le jag gebee ɓi sir Ejipte

¹ Mokay diŋ ɗúu jar Israyel maga nduu wo Ejipte de pan ɓaara Jakob mono, wosela yoo ɓaara de jar ni ɓe wora :

² Á wo diŋ Ruben, Simeyoŋ, Lefi wo de Juda.

³ Isakar, Sabulon wo de Benjame,

⁴ Daŋ wo de Neftali, Gad wo de Aser.

⁵ Jar maga biŋ wo le go see Jakob hay wo ɓuy doo renam. Josef hay wo go Ejipte pel ni so mono.

⁶ Húulí baa ge Josef go de hẽẽre ɓen wo, de jar maga saara hay joŋ de kããra mo ɓuy no.

⁷ Jar Israyel kal wo jawge, kal wo tesge, dus wo, kol wo ngaɓa de egre, hãã sirn baa go de ɓaara.

⁸ Waŋ ma tigriŋ po defay maga hay bay de ko Josef wa kal kolge ti sir no.

⁹ Á kal wii jar ɓen wo ga : Ko we ɗa, jar Israyel wo patala ngaɓa debaŋ de daŋ naa, wo de egre de daŋ naa lay.

¹⁰ Patala naa see, naa joŋ we ɗeŋ go see ɓaara pel bole. Naa dig faage jawge ɓaaran go, nen maga tiga durgi po ur wurpo laybla á tay wo de jar hee naan wo ma dur naa, day blam ɓe saara laa ge go ɓil sir no.

¹¹ Á ko doo kay no so mono, kal kaŋ waŋre joŋre ma de doole wo pel ɓaara, kaŋ joŋre ma de gaali ne hara ti ma gay coo ɓaara de koɗkoɗe. Diŋ doo kay nono ga jar Israyel joŋ wo nen boo ɓi leege ma Pitom wo de Ramses, ga hay diŋ ngel lag fẽẽre ma Farawoŋ mono.

¹² Day so, de maga à de joŋ bon ɓaara debaŋ doo kay no mono, saara yaʼ wer tesge wo ciŋ ni debaŋ lay, à kal yaʼ wer caa hee wo de jar Israyel wo pel ni debaŋ lay.

¹³ Doo kay no mono, jar Ejipte kal wo joŋ gebee jar Israyel wo debaŋ.

¹⁴ Jar Ejipte kol wo duniyãn ne jar Israyel wo pel de gaali de hãã debaŋ. Kaŋ wo joŋre pãy ma naa brig ne hara ti, de wer joŋre po ma ɓil pay wo. Á diŋ wããre debaycõõre po wora, maga à hay kaŋ ra ne jar Israyel wo ti mono.

Farawoŋ de joŋ coo jar Israyel wo

¹⁵ Waŋ Ejipte kal fer wããre ne naare ma ko biŋ naare mani jar Hebren wo, ga à ɗe lan Sifra, á ɗe ma lan ga Puwa.

¹⁶ Á wii ra ga : De maga nday leʼe biŋ naare mani jar Hebre wo we no, de maga á wo hayge ti paale so mokay, á biŋ we twar no, ni nday ʼwarn go, á yaŋ twãy lay no ni nday men se no.

¹⁷ Ama naare ma ko biŋ naaren kal wo joŋ hẽẽne Baa, laa wo dayge joŋ fen maga waŋ Ejipte wii ra ti ɓe mo gà. Á kal wo mbaara men weere ma twerpiiri wo tenene.

¹⁸ Waŋ Ejipte kal ɗe naaren wo le day wii ra ga : Nday joŋ sen ga nday men mbay weere ma twerpiiri wo tenen nà ga le ɓa?

¹⁹ Naare ma ko biŋ naaren kal wo fer wããre ne Farawoŋ ga : Diŋ werga naare mani jar Hebre bay wo doo naare mani jar Ejipte wo no wa, á wo de egre. De maga wãy ma ko biŋ naaren wo dayge mokay daʼ la saara biŋ we go.

²⁰ Baa kal woo naare ma ko biŋ naaren wo no, jarn kal tesge kol wo de egre debaŋ.

²¹ Wer maga naare ma ko biŋ naare sen la joŋ wo hẽẽne doo Baa mono, Baa kal hã fẽẽre ne tiŋ ɓaaran wo no.

²² Doo kay no mono, Farawoŋ kal fer wããre ne jar ɓen wo ga : Nday laa ge weere ma twerpiiri maga biŋgi wo mo ɓuy go nen maarog Nil, day ni nday men we ma tenaaren wo ɓuy lay.