KEFDER MAGA JUD YER NE MONO 1 - Tupuri Bible

Heege jage

¹ Wããre sen mokay yern diŋ ndi Jud, ndi wejõõ Yeso Kris, ndi diŋ wegeman Jag. Ndi yer wo ne jar maga Baa ɗe ra, maga wo de lag ge da kããra de dage mani Baa Pããben mono, jar maga Yeso Kris de koɗ rage mono.

² Daga Baa mo men ɗig re ɓlagge go we ti, mo hã jam we de dage kããra we debaŋ debaŋ lay.

Jar had jar de geteʼ wo

³ Bar ɓin wo, ndi kiɗ debaŋ maga ndi mo yer wo we ti wããre Je yãã naa go de kããra ɓuy no, ama ndi ko wããre sen ti ɓi ga hayba ẽẽ layblaʼ, ndi yer wo we ma coɓ nen ɓay, ga nday mo dur debaŋ ti hãge ɓil naa ne Baa no, maga á hã faage ɓe le go ɓaale boŋ ma tum, ne jar maga wo diŋ ɓe mono.

⁴ Werga jar ma de hãã po yaŋ wo de laa ge yoo naa de tawgi tiʼ jãɗ see. Jar sen dĩɗ wo wããre maga wãã ti woore Baa naan go, maga à mo riŋ ga seele saara maga bay ti ngel ɓe wa mbe de ele. Kaŋ wo kiŋ go ti Waŋ naa Yeso Kris, Waŋkluu naa ma boŋ no. Day kefder Baa le go de wãã ge ɓaaɓaa ga re go de baa rage.

⁵ Mbe tinoo ga nday mbay go de ko sen mokay pah ɓuy, ndi da ga ndi mo fer ɓoɗ sug ɓay ga de maga Waŋkluu yãã jar Israyel wo le go jag bon ɓi sir Ejipte, blam sen á raw bas jar maga day wo hã ɓil ɓaara ne hẽn gà go.

⁶ Ɗig we ti jar peele Baa maga laa wo fruygi ti egre maga Baa hay hãn ne hara ga day raw wo men ngel lagge ɓaara go. Baa raw tẽg jag ɓaara gesiŋ ɓi tuu ma de suŋgu ɓili, saɗ ra de receʼe ga á mo hay wo wo ni tum gor wur Cagge re ɓaara no.

⁷ Ɗig we ti sir Sodom wo de Gomor, de ɓi leege ma ɓiŋ ɓaaran wo ni mo ɓuy no. Jar ma ɓi sir sen hay wo joŋ ge doo jar peele Baa sen wo la no lay, hã wo see ɓaara joŋ re sõõre, suɗ wo diŋ de kããre ɓaara werpiiri, á raw wo daʼ poɗge ɓaaran diŋ nen wùu maga huu go gà. Day re maga joŋ ra mo hãʼ go de kaŋ nen jar poɗag ga Baa joŋ ge bon jar ma doosen wo ne ɓuy no.

⁸ Jar sen wo la, joŋ wo doosen no lay. Raw wo seɗ ge diŋ wer lwaɗge ma woge joŋ ɓlagge ti see ɓaara de see ɓaara tigriŋ, mbuɗ wo foo egre mani Baa no, ɗar wo fẽẽre ma de woore ma ciŋ wo lay.

⁹ Mokay diŋ re maga Misel waŋ jar peele Baa wo de see ɓe joŋ te re sen gà. Ti kwãy ɓaara de gee Manhúulí, de maga á wo de joŋ faare de kããra ti húulí Moyis ga wose nen maŋ ge ɓe yoo saara la mokay, Misel wo caa wããre ne Manhúulí see de ɗar ge gà. Misel raw wãã ɓen boŋ ga : Waŋkluu mo joŋ bon ɓo.

¹⁰ Day ma jar sen la ɗar wo fen maga á bay wo de laa wer ɓe wa. Á ko wo we meʼ mokay, koge sen doo ɗiggi này ma koore wo nono, ɗiggi sen wo go de ɓaara bas ge pa.

¹¹ Re ti ɓaara so. Á maŋ wo diŋ faage mani Kayin no. Á hã wo see ɓaara go ti re maga bay ti ngel ɓe wa wer solay doo Balaam nono, á bas wo go, werga á ur wo wǔy ciŋ doo Kore nono.

¹² Tayge ɓaara re hoole de ɓayn hẽẽreben diŋ fen kaŋ ɗag we see. Á joŋ wo few wo, sõõre joŋ ra gà lay. Á ɗig wo diŋ ti see ɓaara taw taw. Á wo doo swaare maga leege kog ne, se cwaa bii gà nono. Á wo doo koore maga wur leʼ ge ɓe mbe de a ge, se day leʼ ge mbe gà de sen ɓuy nono, doo koore maga kããge ɓaara ndar go ciŋ, á hig wo go ɓuy nono.

¹³ Á wo doo kaŋngaw maarog ma de hãã nono, joŋre ɓaara ma joŋ sõõren doo defõõre maga ur ciŋ no no, á wo doo gér maga bay wo lagge ti ngel ɓaara wan no, day Baa go de joŋ ngel lagge ma ɓaaran ne hara nen suŋgu ɓi tuu ma kuɗum debaŋ no.

¹⁴ Enog moo Adam didi maga seɗ le ti kẽẽ ti kẽẽ renam hay siɗ le go ti ɓaara ɓaa ga : Coʼ we sug ɓay, Waŋ Kluu à ge yaŋ le de jar peele ɓen wo wer ndar pur debaŋ,

¹⁵ ma cag re jar ɓuy ma baw jar ma de hããn wo ti ɓlagge ɓaara maga á ɗar wo Baa, de wããre ma de ɓlagge maga jar se maga bay wo hoo sug wa, wãɗn wo ti ɓe mono.

¹⁶ Jar sen wo tum de sõɗ ɓili, ndum wo de ɓil ɓaara tum tum. See wo diŋ wer dage ɓaara ma de ɓlagge no, wãɗ wo diŋ wããre ma far ti see ɓaara ciŋ, togoɗ wo jar maga saara mo daʼ mopo doo ɓaara mono.

Ɓoʼ ge sug ti re ma pel wo de dog ge wããre

¹⁷ Ama nday bar ɓin wo, ɗig we ti wããre jar maga Waŋkluu naa Yeso Kris hoo ra go hay wãɗ wo le we ɓaa mono.

¹⁸ Á hay wãã wo we we ga : Wo day ge ti wur naw ma blam taw mokay, jar po feg ge wo yaŋ ti ɓay, day see ge wo yaŋ diŋ wer dage ɓaara ma de ɓlagge no.

¹⁹ Jar sen car wo ɓil jar go sar sar, jar sen wo de hã see ɓaara diŋ gebeere ɗiggi ɓaara jar téebeere, bay ne egre Baa wa.

²⁰ Ama ma ɓay bar ɓin wo, yaʼ we hãge ɓil ɓay maga nday hãn ne Kris wo ciŋ ni, tos we de egre Nenterse ma bay ɗage.

²¹ Ɗaw we see ɓay nen dage Baa gor Waŋkluu naa Yeso Kris ma ko decoo naan, ga kol we ge go tenen tiʼ tum mono.

²² Ko we de coo jar maga wo de faare ɓil mono.

²³ Yãã we ra go, yãã ra we le go jag wùu. Ko we de coo jar lan wo, ama de tay nen de hẽẽne. Caa we hee de ɓaara, de õõbe ɓaara ma de demge wer joŋre ɓaara Jar tebere ma joŋ ɓlaggen wo.

Togoɗge maga taw go de ɓe

²⁴ Je ma de kããge ma koɗ we ge ga nday mo leɗ go gesiŋ wa, maga naa ge nen ɓay go wurpo pel ɓe de fruygi bay ɓlagge de gragge de woore mono,

²⁵ diŋ Baa ma boŋ no, Je yãã naa go de Waŋkluu naa Yeso Kris no, da ga woore no, kluu no, egre no, de wããge re fẽẽre no ɓuy wo diŋ ma ɓe le go ti naw ma taŋgun le ɓuy, de ma matala, wo hãã tum! Amen.