JONAS 4 - Tupuri Bible

Ɓil Jonas sõõ, Baa ruun ti seno

¹ Fen ma sen kal ne Jonas ɓil gà ɓil ɓe raw sõõge.

² Se raw tos Manwur ga : Manwuri, mokay bay diŋ fen maga ndi hay wããge ɓe de maga ndi hay le ɓi sir ɓi ɗa mo wa yawla? Ndi hay daŋ Tarsis mono maga fen ma doosen no kay mo joŋ wa. Werga ndi hay go de koge ga ndo diŋ Baa maga ɓil ɓo de el debaŋ, ndo ko decoo jare. Jag jiili ɓo sõõ deparday gà de el ɓon kluu debaŋ, de el ɓon fug ɓil go ti ɓlagge lay.

³ Patala Manwuri, maryãʼ taw mbo naw ɓi go, werga húulí nen ɓi ɗawa de daŋ tenene.

⁴ Manwur kal ferge ga : Ɓil ɓo sõõ mo nà ndo joŋ mbo nà de el yawla?

⁵ Jonas raw kalge go, men ɓi leegen go wo go hayge go nen nen wur botoŋ. Se raw baa duuli ni kal hayge wer ɓe nencee ma ko fen maga joŋ ge ɓi leegen de ɓe mono.

⁶ Manwuri, Baa raw tĩĩ kleere maga raw gẽẽge go ne Jonas ti doo ni tuu ma hã nen cee ne ne ti, maga jiili ɓe maga hay ɓlag go mo woo lay. Jonas raw joŋ fruygi debaŋ wer kleere sen no.

⁷ Ama toŋ ɓe de maga ngel maŋ le go mono, Baa raw ɓoʼ gogo po le ma caa kããge kleeren go, day kleeren raw higgi go.

⁸ De maga wur naa wer le go mono, Manwur raw urgi le de leege ma de tuu nen were, day ceg raw caage go ne Jonas ti, kol sealge ɓe go. Se raw wii húulí day gana : Húulí nen ɓi ɗawa de daŋ tenene.

⁹ Baa raw wii Jonas gana : Ɓil ɓo sõõ ti kleeren mono ndo joŋ mbo nà de el yawla? Se kal ferge gana : Ɓil ɓi mo sõõ bà go nen ʼwar ndi layblaʼ no, ndi joŋ mbi de ele.

¹⁰ Manwur day gana : Ɓon ndo ko decoo kleere maga ndo gay ti re ɓe gà hase, ga tĩĩ nen naw boŋ day huu go nen naw boŋ lay yaw,

¹¹ day ndi ɓin ndi ko decoo Ninif, ɓi leege ma kluu maga jar tabay yaŋ ɓil ɓe de daŋ ndar kis ti ɓe doo ɓoge day bay wo de ko doo war ɓaara noga doo gur ɓaara wa de horog maga wo ngaɓa debaŋ ni mo gà an yawla!