FILEMOŊ 1 - Tupuri Bible

Heege jage

¹ Wããre sen mokay, yern diŋ ndi Pole. Ndi de ɓoʼge ti daŋgay werga ɗúu Yeso Kris jag ɓi mono, wùr de hẽn naa Timote. Wùr hãn wo ne ndo Filemoŋ bar wùr ma de tayge ti joŋre de wùr no,

² ne Tayge jar ma wer Kris maga tay wo liŋ ni ɓo mo lay, ne maygeman naa Afiya wo de Arsip ma de tayge durgi de wùr no.

³ Daga Baa Pããbe naa wo de Yeso Kris Waŋkluu mo woo wo nday, mo hã wo jam ne nday lay.

Dage wo de hãge se Filemoŋ

⁴ Hẽn ɓi Filemoŋ, de maga ndi leʼ tos ge we mo ɓuy no, ndi yaŋ ɗig ti ti ɓo, ndi yaŋ joŋ suse ne Baa ɓi no,

⁵ werga ndi yaŋ laa wããre dage ɓo maga ndo de da jar mani Baa wo de hãge see ɓo ne Yeso Waŋkluu mono.

⁶ Ndi yaŋ wii Baa ti re hãge see ɓo ne Kris no, ga ndo mo daʼ egre wer ɓe, á mo kaŋ nen ɓo ga ndo mo ko wer fẽẽre ma de eln wo ɓuy ti sug sug naa de tayge de Kris mo ɓuy no.

⁷ Hẽn ɓi no, dage ɓon fug ɓil go me, coɓ nen ɓi debaŋ, werga ndo fer coɓ jiili jar mani Baa wo no.

Pol de wii Filemoŋ ga á mo yãã Onesim de ele

⁸ Diŋ wersen, hayba ga Kris de pog me go ti see ɓi ga ndi mo riŋ ndo ti fen maga ndo mo joŋ ne mo ɓuy layblaʼ no,

⁹ de sen ɓuy, ndi wii mo wo diŋ dage ɓo, ndi Pole, je tããbe no, daŋge ɓuy ndi patala ti daŋgay ti wããre Yeso Krisi.

¹⁰ Ndi de wii mo ge wo ti Onesim. Á diŋ wel ɓi ni Kris, werga ndi kol diŋ pan ɓe ti ɗúu Baa ti daŋgay lam taʼ no.

¹¹ Taŋgu á hay bay de el see ɓo wa, ama patala á se naa de ele, see ɓo, see ɓi lay.

¹² Patala ndi de ɓoʼge ɓe wo ne ndo, á kol doo ɓiiri ɓi nono.

¹³ Ndi hay mbi nen maga ndi ɗawn mbi see ɓi ti daŋgay maga ndi la ni wer Wããre ma de Cõõre no, nen maga á mo joŋ joŋre me ti ngel ɓo.

¹⁴ Ama ndi hay ɗig ga ndi joŋ mopo tuu bay daʼ ɗiggi ɓo gà ndi bay de dage ga ndo mo joŋ de el diŋ de doole wa, ama ndi daga ndo mo joŋn diŋ doo ga ɓil ɓo dan nono.

¹⁵ Ti ga Onesim hay blaw bà le go de ɓo naw meʼ maga ndo mo fer daʼ ge ɓe ma tum layblaʼ yaw.

¹⁶ Werga á bay patala diŋ gebee koɗ wa so, ama á daŋ gebee, á diŋ hẽn naa ma dage ni Kris cwãy. Á diŋ je maga ndi dan debaŋ, ama á joŋ yaŋ diŋ je maga ndo dan daŋge, bay doo gebee ɓo no koɗ wa so, ama doo hẽn ɓo ni Waŋkluu nono lay so no.

¹⁷ Wersen, hayga ndo yaŋ de ko mege ga ndi diŋ je ma de tayge de ɓo no, yãã ne de el doo ga ndo yãã ndi no lay no.

¹⁸ Hayga á hay joŋ ndo we le de ɓlagge noga ɓèere ɓo hay yaŋ ti ɓe no, ni ndo kee sen me ti.

¹⁹ Yer wããre sen wo ne ndo mokay diŋ ndi de doo ɓi, ndi Pole, ndi poɗ mo yaŋ. (Ndi fer ɓoʼ sug ɓo ga ndo nen poɗ mege de hõõgese ɓo ɓuy lay.)

²⁰ Wersen, hẽn ɓi, ndi de kam mo ge, joŋ sõõre ɓi wer dage Waŋkluun ɗa, fer coɓ mege jiili doo hẽn ɓo mani Kris no ɗa la.

²¹ De maga ndi de yer wããre sen wo mo mokay, ndi ko mbi we go cwãy ga ndo joŋ ge fen maga ndi wiin wo yaŋ, ndi de koge ga ndo joŋ ge yaŋ de daŋ fen maga ndi wii wo mo pa yaw.

²² De sen ni, ni ndo kneʼ tiŋ ma suuli go me lay, werga ndi ɗig ga Baa yiŋ jag yaŋ we ti tosge ɓayn wo no, day hã mege yaŋ we lay.

Herge jag ma blam taw wo

²³ Epafras maga wùr ti daŋgay de kããra ti wããre Yeso Kris la hee jag wo mo.

²⁴ Mark, Aristarke, Demas wo de Lug jar maga wo de tayge de ɓi, her wo jag wo mo lay.

²⁵ Daga Yeso Kris Waŋkluu mo woo we ɓuy.