ESTER 5 - Tupuri Bible

Ester wo ɓiŋ waŋ ndalge ɓe ti glog re seno

¹ De maga naw ma de swaʼn wo nduugi mokay no, Ester kal laa õõbe ma de saɗ fẽẽre seen ti ɓe, kal woge naa nen see ɓe go feele ma nen ɓil maga tiŋ waŋ ni mono ga de ngafge de ɓe mono. Waŋ kal hayge ti paale waŋ ɓen ɓi tiŋ waŋ no, de ngafge de jag faage tiŋ no.

² De ngar ngel maga waŋ wo ko wãywaŋ Ester de oole ti deele ɓi feelen mokay no, á kal coge jag ɓe tuu. Waŋ kal coŋ graw boo biŋni maga hay doo ɓe mono ne Estere. Ester kal yaʼ see ɓe le, kal duʼ jag graw no.

³ Waŋ kal wiigi ɓe ga : Mayse joŋ ndo la wãywaŋ Estere? Sãy mayse ti ɓo la? À joŋ ge mbe yaŋ nen hãge ɓe ne ndo, hayba nus waŋ no!

⁴ Ester kal fer wããre ne hẽn ga : Hayga á coo yaŋ jag waŋ no, daga waŋ mo nduu wo le wara de Haman ti few maga ndi de kneʼge ɓe ne hẽn mono.

⁵ Waŋ kal fer wããre ga : Wii we Haman ga á mo joŋ deparday ma woge ti few mani Ester no.

⁶ Waŋ kal wo nduugi de Haman ti few maga Ester hay kneʼn go mo so no. De maga à de jo yii mono, waŋ kal wii Ester so ga : Ndo wii nà diŋ mayse so la? À hãn yaŋ mbe ne ndo. Fen maga sãy ɓe ti ɓo mono diŋ mayla? Hayba diŋ nus waŋn laybla, à yiŋ mbe jag ɓe yaŋ ne ndo.

⁷ Ester kal fer wããre ne waŋ ga : Wiigi ɓi no, fen maga ndi de sãy ɓe ti mono...?

⁸ Hayga wããre ɓin coo we jag waŋ no, daga á mo hay nen waŋ de el ma yiŋ jag ti wiigi ɓi no, day mo joŋ fen maga ndi de sãy ɓe ti mono. Daga waŋ mo nduu wo ti few maga ndi kneʼn ne hara de Hamane, day toŋ mokay no, ndi fer wããre sen yaŋ go ne waŋ poɗage.

Haman kneʼ koo ma de cõõ go see Mardoke

⁹ Haman kal le go wursen mo caw see ɓe go cwahcwah ti wããre maga se laa ne mono. Kona diŋ maga Haman kal ko Mardoke de hayle jag tiŋ ni waŋ yeʼe. Mardoke laa dayge go urgi ciŋ pel Haman gà laa dayge go yaʼ see ɓe go pel ɓe meʼ gà ɓuy. Doo kay nono ɓil Haman raw cege ɓe ne Mardoke ti debaŋ.

¹⁰ Ama á kal mbe baa see ɓe kay, raw mbe liŋ. Á kal laa jar ɗe bar ɓe ma debaŋn wo de wãy ɓe Serese.

¹¹ Haman kal ngaɓ horog ɓe maga se de ɓaara mo deŋ ne hara, de ngaɓa weere ɓen wo, de faage maga hay joŋ ga kaŋn go ti ngel ma tinoo ti ngel ma ciŋ yoo waŋren wo, de weere jõõre ma ti waŋ ɓen wo ɓuy mono.

¹² Á kal wii rage ga ko bà ɗa, wãywaŋ Ester hay ɗe wo ma woge ti few ɓen de waŋ nà diŋ ndi, ama bay diŋ jobo ma tigriŋ wa, day bà toŋ mo pa no, wo ge wer waŋ nà diŋ ndi pa.

¹³ Day sen mo deŋ ɓuy bay bà mbe nen ɓi de kãã mege wa ɗa, de maga nen ɓi yaŋ ko Mardoke je Jwifn mo hãʼ ti ngel joŋre ɓen jag tiŋ ni waŋ ni ɗa mono.

¹⁴ Wãy ɓe Seres wo de bar ɓe ma debaŋn kal wo wiigi ɓe ga : Kneʼ koo ma de cõõ go nen ngaɓ meeder doo ɓog ti dwee. Toŋ de jag toŋ mokay no, ndo wii gi waŋ ga ɓal Mardoke go ti ɓe. Ndo raw ge mbo de fruygi wer waŋ ti fewn koɗ so. Wããre sen mokay kal coge jag Haman lay, se ga ni kneʼ koo ma de cõõ no.