ESEKIYEL 1 - Tupuri Bible

Waŋkluu naa nen see ɓe ne Esekiyele

¹ Nen kiŋgi ma de doo swaʼ no, nen naw dwee ɓil few ma de naan mono, ti ngel sen ndi hay yoo jar maga à hay hoo ra wo go daŋgay jag maarog Kebarn mono. Ngel ma ciŋ kal bulgi go, Baa kal ndar nen fẽẽre mbuɗgi wo me nene.

² Wur naw ma de dwee nen fewn mono, sen diŋ kiŋgi ma de dwee maga waŋ Yoyakin wo go de baage mono.

³ Manwur kal sii wããre ɓen ne Esekiyel je ni Busi, je siɗ jag no, ɓi sir ni jar kalde wo jag maarog Kebare. Diŋ ti ngel sen ni, ga doo Manwur kal joŋge de ɓe.

⁴ Ndi de ko nene, kona diŋ maga degurleege ma nen ɓaŋ gloŋhwede kal naage le, swaare ma kluu le de gaɗge day car wùu nen de tee ngel go ti caw. Lerge ngel po hay yaŋ sagge ni day kal le go nen wùu no.

⁵ Ti gisiɗgi ɓe mo pa no, nàyre kal wo naa nen le ni naa. Ndo ko ra mono, saara de far jar téebeere.

⁶ Wosela ɓuy yoo ɓaara de ɓaŋ ma ko nen ti naa naa, de graŋ ti ni naa naa lay.

⁷ Ɓaale ɓaara de deele, ɓi coo ɓaale ɓaara doo ɓaale wedày nono. Day saara car wùu go see doo boo dob maga go de korge ceɗceɗ nono.

⁸ Doo ɓaara hay diŋ jar téebeere wo, de tõɗge wer graŋ ɓaara ma naa naa wo no. Á wo naa ɓuy ma honla ɓuy hay de ɓaŋ ma ko nen ɓe, de graŋ ɓe lay.

⁹ Graŋ ɓaara hay de yiŋgi see kããra. Á hay bay wo ngiɗ nen ma seege wa, ama wosela ɓuy see wo pel ɓe de deele.

¹⁰ Ama ma ɓaŋ ma ko nen ɓaara maga ndo kon wo hãʼ mono, saara hay ɓuy de nen de maŋ je táabay. Á wo naa ɓuy nen ma de maŋ mingir wo ti ɓaŋ ware, á wo naa ɓuy nen ma de maŋ dày wo ti ɓaŋ gùri, á wo naa ɓuy, nen ma lan wo doo beg nono.

¹¹ Ɓaŋ ko nen ɓaara wo de graŋ ɓaara hay wo go de caa holaŋ nen ciŋ. Ma honla ɓuy yoo ɓaara hay de graŋ ɓoge, de yiŋ jag see kẽẽ, day ma ɓog ma lan wo diŋ ma hulgi ne hara see.

¹² Ma honla ɓuy hay wo seege pel ɓe de deele. Á hay wo seege wo diŋ nen ti ngel maga leege fer wo nen ni mono, day saara hay bay ngiɗgi wa hase.

¹³ Ndo ko này sen wo mono saara ko doo jaŋre wùu ma de ngalge ngil kaʼ nono. Á hay koge doo wùu de yããge kaʼ nono, day wùu sen hay seege ti holaŋ này wo no. Wùun hay go tee ngele, sagge ngel hay le go carge nen wùu no.

¹⁴ Day nàyren hay wo ɗeege, wo wo le, fer wo le deparday doo sagge Baa nono.

¹⁵ Ndi raw ko nàyre sen wo no, day kona ɓaale mopo doo ɓaale pus go gesiŋ la, ti jeŋ nàyre wo no, pel nen ɓaara ma naa no.

¹⁶ Ndo ko kneʼge ɓaale sen wo mono, se sag doo húulì krisolid nono, day á wo naa ɓuy hay wo koge de far kããra ɓuy. Ndo ko ra, kneʼge ɓaara hay koge doo maga ma honla ɓuy hay go de heege ɓil ɓaale ma lan nono.

¹⁷ De maga á leʼ wo seele we no, á bay wo ngiɗ nen ma seege ngiɗgi wa, á see wo jag kããra naa ɓuy.

¹⁸ Jaŋte ɓaaran kluu bay jag foo wa ɓuy, jaŋte ɓaaran naa ɓuy go de cor nen ti gewgew ɓuy.

¹⁹ De maga nàyren see wo we no, mo ma doo ɓaale pusn raw wo legadge ti jeŋ ɓaara lay. De maga nàyren pud wo we go ciŋ no, ɓaalen kal wo pudgi go ciŋ wer ɓaara lay.

²⁰ Á hay wo seege diŋ nen ti ngel maga leege see wo nen ni mono, nen wer leege no, nenterse nàyren hay wo ɓil ɓaalen wo no.

²¹ De maga á yaʼ wo we no, se kal yaʼge lay. De maga á oo we no, se kal ooge lay. De maga á pud wo we go ciŋ no, ɓaalen kal wo go pudgi ciŋ wer ɓaara lay, werga nenterse nàyren hay wo go ɓil ɓaalen wo no.

²² Go ciŋ ti này ma honla ɓuy mono, holaŋ ngel ma ciŋ hay naa nen ni, maga hay sagge jag foo gà ɓuy tuu, doo kristal nono, maga go de ɓoʼge ciŋ ti ɓaara.

²³ Wer holaŋ ngel sen mono, graŋ ɓaara hay wo go de deele, ma la de kaŋge see kẽẽ lay, see kẽẽ lay. Day graŋ hay ti ma honla ɓog ɓog ɓuy ma hulgi go ne see ɓe ti hõõgese.

²⁴ De maga á yaʼ wo we no, ndi hay laa fĩɗgi graŋ ɓaara no, de ngaɓge doo kaŋngaw bii nono. Doo gẽẽge je ma de Egre Ɓuyn nono. Á hay diŋ samge po giggig doo ngarge jag ɓaale soode wo nono. De maga á lag wo we no, saara ɓod graŋ ɓaara go gesiŋ.

²⁵ Gẽẽge po kal wããge ti holaŋ ngel ma de ɓoʼge ti ɓaara no. De maga á lag wo we no, saara lag graŋ ɓaara go gesiŋ.

²⁶ Go ciŋ ti holaŋ ngel maga hay go ciŋ ti ɓaara mono mopo hay yaŋ go ciŋ ti ɓaara ni ga ndo kon mono se doo húulì Safir nono, day se ko wo de maŋ paale waŋ. Day le ciŋ ti mo ma de maŋ paale waŋ mono, mopo kal naa nen le ni de maŋ je táabay.

²⁷ Ndi kal koge tigriŋ, mopo doo sagge po maga de welge, ko de maŋ wùu day hay tee ngel go ti ɓe degarra ɓuy, tĩĩ wer ti ngel maga ko doo sag ɓe no mono leʼ go ciŋ, day tĩĩ wer ti sag ɓe leʼ go gesiŋ. Ndi kon se doo wùu nono day go de ler ngel ti ɓe degarra ɓuy.

²⁸ Ndo kon mono se doo manyaabaa maga naa yoo swaare de wur maga Baa hay ra nono, ndo kon mono lerge ɓe maga go de yiŋ ti ɓe hay diŋ doo sen nono. Á hay diŋ naage nen togoɗge mani Manwur no. De maga ndi kon doo kay no mono, ndi raw leʼge de jel nen ɓi gesiŋ, day sug ɓi raw laa gẽẽge le ti wããre me.