EKLESIYASTE 1 - Tupuri Bible

EKLESIYASTE NOGA WAARE MANI JE KO RE NO Duniyãn mokay wer ɓe bay tinoo wa

¹ Diŋ wããre Eklesiyaste je ni Dafid waŋ Jerusalem no.

² Eklesiyaste ga dekoɗkoɗ ngel dekoɗkoɗe, fẽẽren wo ɓuy dekoɗkoɗe.

³ Je táabay ti joŋre ɓe maga á joŋ ra mo deŋ ɓuy á daʼ mayse wer ɓe ni la, joŋre maga á sii joŋge ɓe nen cege mo hẽẽ deŋ ɓa?

⁴ Jar po naa wo, sen raw wora, jar ma tigriŋ naa wo le, day tamsir mbe ti ngel ɓen eŋ tiʼ tumtum lay.

⁵ Wur naa le, wur leʼ go gesiŋ, day se kal wo ferge ti ngel maga se hay naa le go ni mo pa no.

⁶ Raw wo nen ɓaŋ ni wãybane, fer go nen ɓaŋ gloŋhwede, ngiɗ mbe, ngiɗ mbe. Leege kii nà doosen no lay, kii mbe le, kii mbe le.

⁷ Blam bii wo ɓuy wo wo nen maaroge, day maarog bay go bagge wa ɓuy. Ti ngel maga á raw wo wo nen ni mono, blam biin wo mbaara tum jag yuugi.

⁸ Fẽẽren wo ɓuy jag joŋre hãã nen maga à kol wããge ga, nen bay gayge doo koge wa, sug bay gayge doo laage wa lay.

⁹ Fen maga hay le go ti wurpo mono, diŋ fen maga joŋ ge wo pel mono, fen maga hay joŋ go mono, diŋ fen maga joŋ ge mono, fen maga naa wãã ti sen ga á defay nen cege lam no baywa.

¹⁰ Mopo yaŋ mbe nen maga à wãã ti sen ga : Ko mbo mo ma hãʼ ɗa, á defay mono yaŋ mbe? Á diŋ mo maga hay joŋ we le go nen kiŋgi maga raw wo le go blam mono.

¹¹ À bay ɗiggi ti fen maga hay joŋ le go blam mo wa, day fen maga sen nduu le ti ngel ma pel mono, ɗiggi ɓe bay gwaʼge ti jar maga nduu gi wo le blam ɓe mo wa lay.

Fen maga naa nen koge ɓe see je ko reen ni mono

¹² Ndi, Eklesiyaste, ndi hay kol ti waŋ Israyel Jerusalem.

¹³ Ndi hay hay wer go de el yeʼ kiɗ wer ne fẽẽre maga wo de joŋge ti tamsir lam no, maga ndi mo ko wer ne wer ɓaara. Sen mokay diŋ joŋre po ma bay ngar maga Baa kaŋn ne jar téebeere wo ti ma bal rage mono.

¹⁴ Ndi kal ko fẽẽre maga wo gesiŋ lam ɓuy, ndi ko mo kay, á wo ɓuy diŋ dekoɗkoɗ ngel dekoɗkoɗe, diŋ ɗee ma wer leege.

¹⁵ Mo maga go de dĩĩgi mono, kãã ma ferge ɗoɓge gà mo maga sen baywa mono, kãã ma kolge keege hãʼ gà lay.

¹⁶ Ndi kal wããge de ɓil ɓi gana : Koɗa, ndi baa jag koge re pur debaŋ debaŋ de daŋ jar maga hay wo go taŋgu ɓi Jerusalem mono, day jiili ɓi hay daɗ wer ne koge re wo, de koge po ma ti duniyãn wo pa.

¹⁷ Ndi hay go de kaŋ ɗiggi ɓi diŋ ga ndi mo daʼ wer ne koge re, logõɗge wo go de bagge bii. Ndi wo ko sen mokay pa no, sen diŋ ɗee ma wer leege pa.

¹⁸ Werga koge re raw ndo we no, se gay coo ɓo debaŋ, day ndo ko we debaŋ no, bon daɗ ndo debaŋ lay.