ABDIYAS 1 - Tupuri Bible

¹ Wããre mani Abdiyas mokayn diŋ wããre maga Waŋkluu Manwur wããn ti Edom mono : Wùr hay laa wããre po maga a le jag Manwuri, day à hay ɓoʼ jobo raŋ wer jar wo ra. Pud we go ciŋ! Naa see we ma woge dur Edom.

Manwur ga se frum gi sir Edom go

² Koɗa la, ndi kol ge ndo yaŋ go klee yoo wer jar wo ra, ndo kol ge yaŋ diŋ fen feg ti debaŋ.

³ Maʼge jag jiili ɓon hay yee mo go, ndo maga ndo le ɓi rum húulì, ndo maga le de hayle ciŋ hãã, ndo maga ndo de ɗiggi ga wose srog ge ndo yaŋ le go gesiŋ la mono.

⁴ Ndo mo wo bà ciŋ hãã doo gebeg nono, ndo mo kaŋ bà tiŋ ɓon le go yoo gér wo ra, le ti ngel sen ni hãã, ndi srog mo yaŋ le go gesiŋ. Kay diŋ jag Manwuri.

⁵ Hayga jar freŋ wo noga jar frum jar laa wo we liŋ ni ɓo de suŋ no, a men wo ndo go de gefafge nà gefafge la! Bà layblaʼ a hoo wo fẽẽre yaŋ de daŋ maga saara kãã ma hooge mo yawla? Hayga jar we coore a wo we ni ɓo no, a men wo nen coore go blam ɓaara gà yawla?

⁶ Ko we à njegad Esaw go ɗala! Ko we à frug ngel yoŋre ɓen wo go ɗala!

⁷ Jar maga ndo hay de tay jag de ɓaara mo ɓuy hay haw wo nen ɓo le go, kaŋ wo wer ɓo wo go ti haagu. Bar ɓon hay jãã wo ndo, day kol wo go wãã re ɓo, jar maga hay wo re hoole ɓon fer wo laa gǔu ne ndo ciŋ jag ɓe ni. Ndo hay daʼ faage ma ko wer go ne sen seŋ gà so.

⁸ Manwur ga : Ndi dus ge jar ko re ma ɓi sir Edom wo go nà wur sen gà yawla? Ndi nii gi nday ge go ti húulì mani Esaw nà wur sen lay gà yawla?

⁹ Ndo ɓon mono Teman, soode ɓo ma de egren kol wo yaŋ go joŋ hẽẽne wer maga à id gi jar ma ti húulì mani Esawn wo yaŋ go ɓuy ti wur durgi sen no.

Debaycõõre mani jar Edomn wo

¹⁰ Wer hun maga ndo hay joŋ see hẽn ɓo Jakob mono, sõõre baa ge ndo yaŋ wurpo, day à ɓlag ge ndo yaŋ go ma tum.

¹¹ Wur maga ndo hay de oole pel ɓe mono, wur maga jar tigriŋ hay hoo wo soode ɓen wo ti daŋgay mono, wur maga waare hay laa wo ɓi sir ɓen day ɓrew wo fẽẽre ma ɓi leege Jerusalemn go mono, ndo de see ɓo ndo hay kol see ɓo go doo jar heen ɓaaran wo no lay.

¹² Ko hẽn ɓon jag de fruygi wur maga re leʼ we ne ne ti mo wa. Feg ti weere mani Judan wo ti wur maga à ɓlag ra we go mo wa. Hãʼ jag ɓo go kluu de war ti wur maga gayre de daʼ rage mo wa.

¹³ Kal ɓi leege mani jar ɓin wo wur maga fen ma de gaali a we ne hara ti mo wa. Ko re maga hay daʼn jag de fruygi wa. Wur maga fen ma de gaali a we ne ne ti no, baa doo ti fẽẽre ɓen wo wa, wur maga fen ma de gaali a we ne hara ti no.

¹⁴ Oo ti largaʼ faage ma id jar maga sen daŋ wo go de ɗeere mo wa, fer go hã jar ɓe maga sen daŋ wo go wur maga gayre a ne hara ti mo wa lay.

¹⁵ Gahãyla wur Manwur go mbaŋ ma age ne wer jar wo ɓuy ti. Wur sen mono, à joŋ ndo yaŋ doo maga ndo hay joŋ jar no lay, joŋre ɓon fer ge wo yaŋ ne ndo ti doo ga.

Jar Israyel joŋ ge wo Edom go de gùri

¹⁶ Kidolgi doo maga nday hay joge ti húulì ɓi ma bay ɗagn nono, wer jar ɓuy jo ge wo yaŋ ceɓ doosen no lay. Á joge wo yaŋ, lig gi wo yaŋ day kol ge wo yaŋ doo ga saara hay bay wa has ɓuy nono.

¹⁷ Ama à daʼ ge jar maga gwaʼ ge wo yaŋ ti húulì ma Siyoŋ no. Á kol ge wo yaŋ diŋ jar ma bay ɗag wo, day tiŋ mani Jakobn fer ge yaŋ yãã fẽẽre maga hay wo ti sir ɓen wo yaŋ.

¹⁸ Tiŋ mani Jakobn joŋ yaŋ doo wùu nono, tiŋ mani Josef doo trum wùu nono. Ama tiŋ mani Esaw joŋ ge yaŋ doo dramgi ɓaara nono, day saara doʼn ge no. Jobo joŋ boŋ ti tiŋ mani Esawn gà hase. Wããn diŋ Manwuri.

Jar Israyel kol ge wo waŋre jar dehãy wo

¹⁹ Jar ma ɓil Negef yãã ge wo húulì mani Esaw yaŋ go. Jar ma ɓil Kefela kol wo yaŋ go ti sir mani jar Filistẽẽn wo, kol ge wo yaŋ go ti tway mani Efrayimn wo de tway ma Samari no. Benjamen kol ge yaŋ go ti sir ma Galaad no.

²⁰ Jar daŋgay maga à hay hoo ra yoo soode mani jar Israyeln kol ge wo yaŋ go ti sir mani jar Kanaan wo hãã wo go ɓi leege Sarepta. Jar Jerusalem maga à hay hoo ra wo go ti daŋgay Sefarad kol ge wo yaŋ go ti ɓi leege ma ɓil Negefn wo.

²¹ Jar ma yãã jarn pud gi wo yaŋ le ti húulì ma Siyoŋ no, day lagge wo yaŋ go ma wãã re húulì mani Esaw no. Day twayn joŋ ge yaŋ ma Manwuri.