3 JAŊ 1 - Tupuri Bible

Heege jage

¹ Ndi je kluu tiŋ Baan, ndi yer wo ne Gayus, je maga ndi dan ti cwãy ɓe mono.

² Bar ɓi no, ndi daga bosaʼ mo hay ti fẽẽre ɓon wo ɓuy, ga ndo mo hay jam ti hõõgese ɓo, ɗiggi ɓo mo hay jam doosen no lay.

³ Ɓil ɓi fug go feh debaŋ ti wur maga hẽẽre naa a wo le, day sii wo go ti cwãy ma ɓil ɓo wo de seele ɓo maga ndo see ti cwãy mo lay.

⁴ Ɓil ɓi fruy debaŋ ti maga ndi laa ga weere ɓin wo de seege diŋ ti cwãy mono. Fruygi ma de daŋ sen bay wa so.

Gayus ndar gog see ɓe ga

⁵ Bar ɓi no, fen maga ndo joŋ ne hẽẽre naa wo mono, ndo joŋ go ti faage ɓe, hayba ne jar waaren wo yaw,

⁶ jar sen la wãã wo go ti dage ɓon pel Tayge jar ma wer Kris wo doosen nono. Ndi kam mo ga ndo mo kaŋ waare ɓaara go de el doo maga ɓil Baa da.

⁷ Werga á hoo wo wo laa wer ɗúu Kris, bay wo de yãã mopo doo jar maga bay wo ti jag Baa wa wa has ɓuy.

⁸ Naa nen yãã waare jar ma doosen wo maga naa mokay jar se ma joŋ joŋre ti cwãy ɓen wo.

Diyotref wo de Demetriyus

⁹ Ndi yer wããre wo ne Tayge jar ma wer Kris wo mbage, ama Diyotref maga da ga se mo hay pel yoo ɓaara tum, bay yãã wùr see wa hase.

¹⁰ Diŋ wersen, ndi wo ge we wo no, ndi fer yaŋ wãã wããre fẽẽre maga á joŋ ne mono, de wããre ma de ɓlagge maga á wãã ti wùr mono, sen ɓuy kããn ga, á bay yãã hẽẽre naa wo wa, ama jar da wo we ga saara joŋ no, á raw far jag ɓaara go, raw niɗ rage go yoo Tayge jar ma wer Kris wo lay.

¹¹ Bar ɓi ma dage no, bir jag je ma joŋ ɓlaggen wa, ama bir diŋ jag je ma joŋ de el no. Je maga joŋ de el diŋ je ma Baa, je joŋ ɓlaggen bay de ko Baa wa.

¹² Ma Demetriyus, jar ɓuy de wãã ge go ti ɓe ga á de ele, wããre ma cwãy de see ɓe de wãã ge no lay. Wùr de see wùr, wùr de wãã ge ti ɓe no lay, day ndo yaŋ de koge ga wããre wùrn cwãy.

Heege jag ma blam taw no

¹³ Ndi yaŋ mbi de fẽẽre ma tigriŋ wo debaŋ ma yer ge wo mo pa, ama ndi bay da ge ga ndi yer ra wo mo ti kefder wa.

¹⁴ Ɗiggi ɓi de kaŋge ga ndi yiŋ yaŋ de ɓo gusi, ni ndi fer wããre sen wo yaŋ mo de jag ɓi.

¹⁵ Jam mo hay de ɓo. Bar ɓo ma lam her wo jag wo mo. Her jag ne bar naa ma see ɓon wo boŋ boŋ ɓuy lay.