2 SAMYEL 1 - Tupuri Bible

À sii re húulí Sawul wo de Jonataŋ ne Dafidi

¹ Blam húulí Sawul mono, Dafid fer le Siglag de maga se ɓum jar Amalesid wo le go ɓum ɓum mono. Se raw joŋ naw ni ɓoge.

² Ti naw ma de swaʼn mono, jobo raw age le ti ngel maga Sawul hay wo de kaŋge le jag jaw ni mono, go de ngrag õõbe see ɓuy lay, go de lag sir ti ɓuy lay. De maga se a go se Dafid mono, se kal leʼ monɗra gesiŋ.

³ Dafid day wiin ga : Ndo a le gen la? Se kal ferge ne hẽn ga : Ndi yãã le go ti ngel maga Israyel wo le de kaŋge ni mono.

⁴ Dafid kal wiigi ɓe ga : Re mayse joŋ le ni la? Fer wããre me ti ɓe ɗala. Se raw ferge ga : Jarn ɗee wo doo jaw no. Day pa mono jar debaŋ yoo ngaɓan taw wo go. Sawul wo de wel ɓe Jonataŋ draʼ huu wo go lay.

⁵ Dafid raw wii wel ma jõõ se maga hay fer wããre sen ne hẽn ga : Ndo ko koge ga Sawul wo de wel ɓe Jonataŋ wo go de húulí la?

⁶ Wel ma jõõ se maga hay fer wããren ne Dafid la kal ferge ga : Ndi hay mbi wo ti húulì ma Gilbowan caw koɗ lay. Sawul hay de oole deŋ de deŋge de manjaw ɓe no. Kola pus durgin wo de jar piirin hebn wo we go maŋ maŋ yaw.

⁷ Se raw mbuɗ nen ɓe no kay nen ɓe raw baa mege, se kal ɗee ndi. Ndi kal ga : Ndi la!

⁸ Se day wii me ga : Ndo diŋ wosela? Ndi kal ferge ne hẽn ga : Ndi diŋ je Amalesidi.

⁹ Sawul day ga : A le see ɓi la day ni ndo ʼwar me go werga see ɓi daŋ me go, bà de maga ndi mbi tenen deŋ ɗa mo ɓuy no.

¹⁰ Ndi raw yaʼge le see ɓe, ndi raw ʼwarge ɓe go de koge ti ɓi cwãy ga á hay joŋ tenen caw gà so. Ndi hoo tilgi maga hay de kaŋge ti ɓe wo le de cen maga hay doo ɓe mono, day ndi a de ɓaara ne waŋ ɓin la so.

¹¹ Dafid kal ɗaw õõbe ma ti ɓen wo, ngrag ra go day jar maga hay wo ɓiŋ ɓe ni joŋ wo doosen no lay.

¹² Saara kal lawge, ra wo, hẽẽ wo bii hãã wo go de law ti re Sawul wo de wel ɓe Jonataŋ, de jar mani Manwur wo de jar Israyel maga à id ra go de moslam mono.

¹³ Dafid raw wii wel ma jõõ maga hay fer wããre sen wo ne hẽn ga : Ndo nà diŋ je mayla? Se kal ferge ga : Ndi diŋ je ni je Amalesid waare maga le go de urgi la.

¹⁴ Dafid day wiin ga : Joŋge joŋge ga ndo joŋ hẽẽne gà ndo maŋ doo ɓo ciŋ ma taw Mesi mani Manwurn go la?

¹⁵ Dafid raw ɗe jobo le yoo weere jõõre ɓen wo boŋ ga : Yaʼ le, ʼwarn go! Bloo sen la raw maʼ je Amelesid no, se kal huugi go.

¹⁶ Dafid day wiin ga : Cíi ɓo fer mbe ne ndo ti doo ga, gahãyla jag ɓo caa re mo ti, werga ndo ga ndo ʼwar Mesi mani Manwurn go diŋ ndo!

Siŋ maga Dafid ra Sawul wo de Jonataŋ de ɓe mono

¹⁷ Dafid raw ʼwaa siŋ se kayn la ma ra Sawul wo de wel ɓe Jonataŋ,

¹⁸ day se kal riŋgi ga had jar Juda wo de ɓe. Á diŋ siŋ jaw day se go de yerge ɓil kefder mani je ma Keɗed no.

¹⁹ Israyele, dog ɓon bas le go ti ngel ɓo ma de maŋge ciŋ wo! Sen joŋge joŋge ga blumri durgin taw wo le go la?

²⁰ Siin we ne jar Gad wo wa, wo we de re sen ti faage ma Askaloŋ wo wa! Mayre mani jar Filistẽẽ day la joŋ wo fruygi, Mayre mani jar bay caa ɓĩĩnin day la yor wo ciŋ de fege.

²¹ Húulì ma Gilbowan wo, daga meebe po mo leʼ ti ɓay wa so, Baa mo ra ti ɓay draʼ wa lay. Daga pay po mo joŋ ti ɓay maga à a de ɓe sii jag wa! Werga à ɓoʼ foo gidigli werpiirin wo go ti ɓay, Gidigli mani Sawul gwaʼ go bay noo ti.

²² Toŋwaa mani Jonataŋ hay bay go maŋ wer doo cíi jar ma de húulín wo wa lay, Doo noo này jar ma de egre jag jawn wo wa lay. Moslam mani Sawuln hay bay le ferge bay baa jag ne mopo see gà wa.

²³ Sawul wo de Jonataŋ maga à hay da rage, À hay senaʼ rage ti tenen ɓaara lay, Blaw wo ɓil go ti húulí ɓaara gà lay. Á hay wo deparday daŋ gebege, Hay wo de egre de daŋ mingir wo.

²⁴ Mayre ma Israyel no! Ra we Sawul maga hay grag weege go de õõbe ma burbur wo mono, Sawul maga hay biŋ fẽẽre woore ma de joŋge boo biŋni wo ti õõbe ɓayn wo mono.

²⁵ Blumri durgin taw wo le jag jaw ni nà tawge la! Jonataŋ gwaʼ le go de húulí ti húulì wo ni nà gwaʼge la!

²⁶ Ndi kol go nen lawge wer ɓo so hebo Jonataŋ! Ndo hay diŋ toɓog ɓi no. Dage maga ndo hay da mege hay de daŋ dage naare wo.

²⁷ Blumri durgin taw ge wo go nà tawge la! Fẽẽre durgin yee wo ge go mono yeege la!