2 KRONIG 1 - Tupuri Bible

¹ Waŋ mani Salomoŋ je ni Dafidn raw joŋge de ooge ne hẽn doo. Manwuri, Baa ɓen hay de ɓe, day hay gẽẽn go ciŋ de el hãã tuu lay.

Salomoŋ wii Baa ga á mo hã koge re ne se ma joŋ waŋ se no

² Salomoŋ kal fer wããre ne Israyel ɓuy. Ne waŋre ma wãɗ wããre jar ndar ndar wo no, ne ma wãɗ wããre jar kiskis wo no, ne jar car kiidan wo no, ne jar maga wo pel mo ɓuy, ne waŋre ma ti feelen wo lag lag mo ɓuy no.

³ Salomoŋ kal rawge de ngaɓan ɓuy ti ngel siɗ jag ma de maŋge ciŋ ma Gabawoŋ no, werga Tiŋ Yiŋgi de Baa maga Moyis wejõõ mani Manwurn hay joŋn le ti puuli mono hay le diŋ ni.

⁴ Ama ma komrom tayge jag mani Baan mono, sen Dafid hay maŋn le Kiryat-Yearim day hay wo go de ɓe kaŋge Jerusalem ti ngel maga Dafid hay kneʼn go ne hẽn ni mono, werga á hay baa mburyug wo go ne hẽn Jerusalem.

⁵ Ti ngel ni mo lay no, ngel siɗ jag boo dob maga Betsalel je ni Uri no, je ni Hurn hay joŋn mono hay pel mburyugn ni lay. Salomoŋ de tayge ngaɓan ɓuy kal wo wii ɗiggi Manwuri.

⁶ Diŋ ti ngel ni ga Salomoŋ wo ti ngel siɗ jag boo dobn pel Manwuri, maga hay ti Tiŋ Yiŋgi de Baa no, day á kal joŋ siɗgi jag maga à roɗ mo ɓen go ɓuy ndare.

⁷ Wursen de suŋ ni mono Baa raw naa nen see ɓe ne Salomoŋ day wiin ga : Wii fen maga ndo de sãy ɓe ti ga ndi mo hãn ne ndo mono.

⁸ Salomoŋ kal fer wããre ne Baa : Ga ndo joŋ ɓil de el see pan ɓi Dafid kluu debaŋ, day ndo kaŋ me joŋ waŋ ti ngel ɓe.

⁹ Patalam no, Manwuri, Baa, daga wããre maga ndo hay wããn ne pan ɓi Dafid mono, mo leʼ jag go, werga ndo kaŋ me waŋ ma wãã wããre jar maga wo ngaɓa doo ɓurgi ma nen sir no mono.

¹⁰ Doo kay nono, hã koge re wo de koge me, nen maga ndi mo hay de ko koɗ see ɓi pel jar sen wo no! Werga wose kãã ge yaŋ ma seege de jar ɓon wo la, jar se ma ngaɓan wo mo tiʼ ɓuy no.

¹¹ Baa kal wii Salomoŋ ga : Werga mo hãʼ diŋ fen maga jag jiili ɓo so mono, werga ndo wii diŋ ga ndo mo hay de horog gà wii fẽẽre gà wii togoɗge gà ndo wii húulí jar hee ɓon wo gà lay. Ndo wii ga ndo mo hay tenen caw wolaŋ gà ama ndo wii diŋ ga ndo mo hay de ko re, ndo mo hay de koge nen maga ndo mo hay seege de jar ɓi maga ndi kaŋ mo joŋ waŋ ti ɓaara so mono,

¹² ti ngel sen koge re wo de koge mono ndo go de daʼ rage yaw. Ciŋ ti ɓaara ni ndi hã ge horog wo yaŋ ne ndo, hã ge fẽẽre wo yaŋ de togoɗge ne ndo, nen maga waŋ po maga hay joŋ go taŋgu ɓo de daŋ moge bay wa, day waŋ po joŋ ge blam ɓo de daŋ moge gà pa.

¹³ Salomoŋ kal ferge Jerusalem de maga se hay le ti ngel siɗ jag ma de maŋge ciŋ ma Gabawoŋ mono, le ɓi Tiŋ Yiŋgi de Baan hãã, day kal joŋ waŋ ti Israyele.

Horog mani Salomoŋ wo de egre ɓe no

¹⁴ Salomoŋ kal tay ti pus durgi de jar yaɗ piiri wo. Pus durgi ɓe hay ndar ti ɓe kiskis naa, jar yaɗ piiri ɓe hay ndar hwal ti ɓoge, maga se kal lag rage ɓi leege maga ngel lag soode wo ni, lag ra Jerusalem ɓiŋ waŋ lay.

¹⁵ Waŋ hay kol solay wo de boo biŋni go gus Jerusalem doo weere húulì wo mbaara no koɗ no, kol koo seder wo go gus doo koo Sikomor maga ɓil Sefela nono.

¹⁶ À hay nduɗgi le de piiri mani waŋ Salomoŋ wo le Ejipte. Jar trere po hay wo le woge horge rage ne hẽn ti yoo maga saara go de ngaɓge ɓe taʼa.

¹⁷ Á hay wo wo rawge Ejipte, day hay wo horge pus durgi wo le, boŋ mokay yee boo solay kiskis hiiraʼa, day piir boŋ nen yee solay kis ti ɓe doo dwee. Á hay wo joŋge doo kay no lay, hay wo horge le ne waŋre ma Hitidn wo le doo ni de waŋre ma Sirin wo no.

Salomoŋ de gragge go ma boo tiŋ Baa no

¹⁸ Salomoŋ kal wããge ga daga boo tiŋ ti ɗúu Manwuri, day boo tiŋ waŋ ma se lay.