2 JAŊ 1 - Tupuri Bible

Heege jage

¹ Ndi je Kluun, ndi yer wo ne Manwãy maga Baa maŋ go wo de weere ɓe maga ndi da ra ti cwãy ɓe mono. De da rage bay diŋ ndi tawa wa, jar maga wo de ko cwãy mo ɓuy da wo ra lay,

² werga cwãy yaŋ de hayle ɓil naa, day se joŋ ge yaŋ ɓil naa tum sagsage.

³ Daga ɓil de ele, koge decoo jar wo de jam mani Baa Pããbe wo de Yeso Kris Wel Pããben mo joŋ wo see naa ma kay naa ma seege ti cwãyn wo de dage kããra no.

Cwãy wo de dage

⁴ Ɓil ɓi joŋ go feh debaŋ wer maga ndi daʼ weere ɓo maapo wo seege ti cwãyn de ngaɓge degaʼ de wããre jag liŋgi maga Pããben hay bag ne naa mono.

⁵ Patala fen maga ndi yer wo ne ndo ti ɓe mono Kiriya, bay ti wããre jag liŋgi ma defay wa, ama, mbe diŋ ti maga naa hay daʼ mbe le taŋgu ɓaa ga naa mo da kããra mono.

⁶ Day dage sen diŋ seege ti wããre jag liŋgi ɓen wo. Á mono diŋ wããre jag liŋgi maga nday nen seege ti ɓe doo maga nday hay laan le taŋgu ti tĩĩgi wer mono.

⁷ Werga jar ma jãɗ jarn laa wo we le go ti tamsir la debaŋ, jar sen bay wo wããge ga Yeso Kris hay kol we go je tabay wa. Je ma doosen no kay diŋ je hãy jar no, diŋ Je hee Kris so.

⁸ Koɗ we see ɓay de el nen maga mbèere joŋre naa mo bas go de koɗ wa, ama daga nday mo daʼ poɗge ɓayn keɗed ɓuy.

⁹ Je maga raw ɓen wo pel ni, day bay we seege wer hadge maga Kris hay hadn mo wa no, je sen bay diŋ je ma Baa wa. Je maga yaŋ seege wer hadge sen no, je sen diŋ je ma Pããben wo de Wel no.

¹⁰ Hayga jobo a we see ɓay diŋ de hadge sen gà no, ni nday yããn we liŋ ni ɓay wa, her we jag ne hẽn wa lay.

¹¹ Werga je maga hee jag we ne hẽn go de tay jag de ɓe ti joŋre ɓe ma de ɓlaggen wo lay.

Ɓoʼge ti wããre no

¹² Ndi yaŋ mbi de wããre ma tigriŋ wo debaŋ ma yerge wo we, ama ndi bay dage ga ndi yer ra wo we ɓil kefder wa. Ama ndi de ɗiggi ga ndi wo ge yaŋ go ni ɓay ma fer wããre sen we de jag ɓi, maga fruygi naan mo bag jag go ti ngel ɓe keɗed ɓuy.

¹³ Weere mani Maygeman ɓo maga Baa maŋ go her wo jag wo mo lay.