1 PIYER 1 - Tupuri Bible

Heege jage

¹ Wããre sen mokay yer diŋ ndi Piyere, je maga Yeso Kris de ɓoʼ mege siɗ wããre ne jar mono, ndi hãn wo ne jar maga Baa hoo ra gom, á wo de lagge wo go ɓi sir ma hãã hãã wo, doo daŋgay won no, wo de dus gi wo ti prog Poŋ wo de Galad wo de Kapados, wo de Asi wo de Bitini.

² Baa Pan naa hoo nday le go taŋgu pel bol doo dage ɓe, nday diŋ ma ɓe, Nenterse ma bay ɗag de ɗoɓ naa maga naa mo yãã jag Yeso Kris, maga cíi ɓen mo yog naa go. Daga Baa mo woo nday mo hã jam ne nday debaŋ debaŋ.

Gorge maga go tinoo ga fen sen yaŋ

³ Naa togoɗ Baa Pan Waŋkluu naa Yeso Kris. Wer dage ɓe maga á da naa debaŋ, á raw kol naa go tenen tigriŋ de maga á fer bir Yeso Kris le go yoo jar ma de húulín wo mono. Wersen naa de gor ge go de pũygi ga naa daʼ fen maga naa de gor ge ɓe yaŋ.

⁴ Wersen naa joŋ fruygi ti fen maga Baa hay de yoŋge ɓe ciŋ ne jar ɓen wo ga á daʼn wo de koɗ doo ga jobo hoo taabul no mono, diŋ fen ma de el maga ɓlagge go gà dem gà sagge ɓe taw go gà lay, Baa yaŋ de yoŋge ɓe we ciŋ

⁵ maga egre Baa de koɗ we ge wer hãge ɓil ɓayn gor wur maga je yãã we gen go jag ɓlagge no, maga go de gragge ma naa nen see ɓe le go wur naw ma blam taw no.

⁶ Ama joŋ we mbay fruygi, hayba de maga nday mbay go de caa jiili patalam meʼ wer bon maga nday de jo ge ɓe mono.

⁷ Bon ɓay sen mokay diŋ ma kaŋ nen jar go ti de el hãge ɓil ɓay no. Boo biŋni diŋ fen maga taw go koɗe, ama de sen ɓuy à jii ne de wùu, hãge ɓil ɓayn doosen no lay, de daŋ boo biŋnin wo pel hãã, day à lam ne ma ko graŋ ɓe. Doosen à wo ge togoɗ we ge, grag we ge de woore, ra ɗúu ɓay, diŋ ti wur maga Kris wo ge naa nen mono.

⁸ Nday kon mbay de nen ɓay gà nday raw mbay dage ɓe, nday kon mbay patala gà nday raw mbay hã ɓil ɓay ne hẽn de sen ɓuy, nday de joŋ fruygi debaŋ mo deŋ diŋ wersen so. Fruygi ɓay maga jobo wããn ti ɓe go, jag ɓe wãã ge gà no,

⁹ werga nday daʼ fen maga nday hã ɓil ɓay ti ɓe mono : diŋ maga Baa yãã ge cee ɓay wo go wurpo mono.

¹⁰ Ti wããre joŋre maga Kris joŋ ma yãã naa go, jar ndar nen wããre Baa go hay wo kiɗ wer ɓe tum tum, á raw wo wãã ge ti fen maga á wo ge hãge ɓe ne nday mono.

¹¹ Á raw wo hã ɓil ɓaara kiɗ gi ga saara mo ko wur wo de ngel maga egre Kris ngaɓ gom, diŋ egre se ga hay ɓil ɓaara mono, ga raw wãã ge le go pel bol taŋgu ga Kris jo bon yaŋ, blam sen Baa gragn ge de woore lay mono.

¹² Baa raw naa nen ɓe go ne jar siɗ wããre ma jag Baa wo go ga re maga se hãn ne hara mokay, bay ma ɓaara de see ɓaara wa, ama diŋ ma ɓay. Wããre sen nday yaŋ de yãã ge ɓe patala, jar siɗn wo go de egre maga Baa ɓoʼ le ciŋ, yaŋ sii gi ɓe go we. Day jar peele Baa wo de see ɓaara wo de da ge ga saara mo kon lay.

Baa ɗe naa le lagge bay dage

¹³ Diŋ wersen ɗiggi ɓay mo hay go de gragge ma joŋ joŋre. Lag we go de pũygi, kaŋ we ɗiggi ɓay ɓuy diŋ ti de el maga nday wo ge daʼ ge ɓe ti wur maga Yeso Kris naa ge nen le mono.

¹⁴ Yãã we jag Baa, see we wer dage ɓay maga nday hay le de ɓe taŋgu mo wa, de maga nday hay bay de ko re wa ɗa mono.

¹⁵ Ama seele ɓay mo hay bay ɗag tum, doo je maga ɗe we le bay ɗag no lay.

¹⁶ Werga á go de yerge ga Lag we bay ɗag, werga ndi bay dage.

¹⁷ Nday leʼ we tos ge, ɗe we Baa ga Pan ɓay, á diŋ je maga cag re wosela ɓuy degaʼ, wer joŋre wosela maga je sen joŋ ne, ko jobo de daŋ kẽẽ gà mono, ti naw ɓay maga yaŋ de gwaʼ ge ti tamsir la ɗa mono, seele ɓay mo kaŋ nen jar go ga nday de hoo sug ti ɓe.

¹⁸ Nday yaŋ de koge ga : nday yãã le go jag seele ma bay ngar maga nday daʼ le doo moore ɓay wo mono. Á yãã we le go bay diŋ de mopo maga de el ɓe taw ge go, doo boo biŋni wo de boo solay ɓayn wo no wa.

¹⁹ Á yãã we le go diŋ de cíi Kris, fen sii jagn ma de woore no, á doo wesam ma bay defõõre wããge see, bay ɗagge.

²⁰ Baa maŋ Kris le go taŋgu joŋ ge tamsir no, raw naa nen ɓe go ma hã de el we ti naw ma blam wo la no.

²¹ Wer Kris nday raw hã ɓil ɓay ne Baa maga fer bir gi ɓe le go yoo jar ma de húulín wo, raw grag ge ɓe de woore mono. Wersen nday raw hã ɓil ɓay ne Kris, nday raw lagge gor ge ɓe de kaŋ ɗiggi diŋ ti Baa mono.

²² Nday fãã we go de yãã ge jag maga nday yãã wããre ma cwãyn, ma da hẽẽre ɓay ma de hã ɓil ɓaara ne Baa cwãy wo mono. Wersen baa we wùu da kããra kããra, de jiili ɓay ɓuy.

²³ Werga nday fer we biŋgi defay, bay de pããre ɓay maga huɗ wo mo wa, ama diŋ de mbèere maga huu gà mono, wer wããre Baa maga tenen ɓe taw gà mono.

²⁴ Á go de yerge ga : Jar tebere wo ɓuy doo fíin no, Woore ɓaara ɓuy doo fuɗgi fíi nono. Fíi hig gi go ɓuy, leɗ go lay.

²⁵ Ama wããre Waŋkluu gwaʼ ge mbe hãã tum. Wããre sen, diŋ fen maga Wããre ma de Cõõren a de ɓe we mono.