Yakubu 1 - Bwaki Kifwiyang

Di̱siir Yakubu

¹ M mi̱n n Yakubu naba nanga Kwama n ti wu Yesu Masiya, mi̱n mwal ti̱fi̱ki̱ri ni̱bu bunti̱ki̱m Kwamami kub chiri turabitu a ti̱ran we ti̱ti̱niti kwang mi̱n lwangi̱n di̱du.

Keku bi̱yili̱mang n ti yinku

² Kebi̱mi̱m, yo sweki̱ku a ya chine, ti̱ma ne furi mwen.

³ Di̱ne ti̱yim, yo swa̱ka̱ku changu ka ride ka ta ki̱tabu we keku bi̱yili̱mang chi̱nge, ka yo muku ni̱rang changu ka duyedu.

⁴ Ti̱duba duyen, ta kau ni̱bi biin bi̱bi di̱mbi̱ri̱m bi̱bu a kwalabu chiim.

⁵ Ka ni wu a kwala kasan we chitu n Kwama ki̱baddu ni madite, a bi̱u a di̱Kwama ke a miya ki̱mi̱n kasantu, n ki̱n ka ni̱n ti̱nu yi burtu. A ne kwabu wu ki̱ma di̱bi̱de.

⁶ Aya yo ti̱ bi̱dde, ti̱yodu kamaki̱we keku bi̱yili̱m chingu a ka̱tadu chi we. Di̱ne wu ki̱kama chiye a tiwe laabi mwetu ki̱fi̱be mwe ki̱wiledi bwa ki̱tunti̱ni bwaantu.

⁷ Duum ni̱bi̱m bi̱bu a yo ti̱nu ni̱r we ko chi ya ti̱kan chi̱n we di̱Tewuduwe.

⁸ Niwu ti̱kuran ni̱r ki̱ni̱ntu a keran kerane, n ki̱n a tibu fiwiin we chitu n ki̱n ki̱maditi kwang.

Buni n ti kuli

⁹ Kasi ki̱ku ni̱bu a swa̱ban nii ki̱bunti̱ Kwama, ke wuko a nang mi̱ladu ko n Kwama a ri̱ka ki̱n.

¹⁰ Kasi ki̱ku ni̱bu ki̱kuradu ko naba kuli ki̱ni ki̱si̱i̱yange, a dakan n ki̱n ka yindu ko n Kwama a swa̱ba ki̱n. N fwa ying di̱ne n ki̱n ti kulikitu ka sudu yinang fili̱ntu a ne ni kuti̱nuwe.

¹¹ Yo Kuko a sii ti̱me, ki̱twi swa̱ki̱ki̱ ki̱ni chuwangu, n ti filin ti̱tu ki̱ bwadu ki̱twakati̱nu, yinu leran kitu ki̱twiyati̱nu a fi wiine ti kuli̱mu ka twiyadu ki̱ni chi n ki̱n ki̱muriti kwang.

Swaka̱ku

¹² N Kwama a dela ni̱bu a mu ni̱ru we swa̱ka̱ki̱mu, di̱ne yo n chi a chau ki̱la we sweki̱ke n chi ka ya ki̱ti̱me ki̱diya kwadi a di̱Kwama wu a bwa̱u ka ni bi̱bu a mi̱la ki̱ni̱mu.

¹³ Ka sweku a be ni mi̱ne wu ka yo ki̱nu ka ma ki̱le, ni a yiduwe ko, “N Kwama a swe mi̱n.” Ti̱nti̱ne a ne ni ka swe Kwama ki̱ni bwila we, di̱ne n Kwama a swebu ni ki̱ni bwila.

¹⁴ Aya ka wuwule niye ki̱ya Swa̱ka̱ki̱ku we yo ti̱kuran ti̱bwilai ki̱ntu a tau ki̱n a bututi̱ ki̱ne.

¹⁵ Yinu kubeki̱ku ki̱bwilang kangu a duyene, ka swanadi ki̱le, yo ki̱le a kwa̱sane ki̱ swanadi bwa.

¹⁶ Di̱ne yiko, kebu mi̱m bi̱bu mi̱n mi̱ladi̱mu ti̱ twa̱ndu wa̱re we.

¹⁷ Ka nang ki̱ki̱le ki̱li̱mang ki̱yilangi di̱mbi̱li̱m ti̱me wuyile ni yadu a di̱Kwama Te wu a diye wu a yo ka nang ki̱ki̱le yiike wu diye. N ki̱n a sutebu a newe yinang yo ki̱wulang ni̱bang ki̱sutede yo ki̱yiye ki̱ ki̱re.

¹⁸ We ki̱ ke ko, n ki̱n ki̱fwan a sutu ke a fwa ya̱m bi̱yili̱m ki̱mu a di̱ chiniye, ke a ni ni̱n da wufwiye bwesi̱m ki̱me yinangu a ni chi̱ni di̱kwa̱l di̱yili̱n ki̱ni̱nu. N chi̱ni we chitu n ki̱n a yoti̱ kwang ni kau bi̱suti̱ri̱m ki̱m bi̱kaki̱m.

Nwe ya̱m Kwamamu mati̱ nangangi ki̱n

¹⁹ Kebu mi̱m ti̱twar ya̱m bi̱bu mang fwadi̱mu, ka nang wuwule niye a sii ki̱tele we ya̱mu ni̱bu ki̱fwadi̱mu, ti̱fadu ya̱mu we daatu, ti̱madu ki̱fwiniwengi daatu.

²⁰ Di̱ne ki̱fwini wu a niye a bebu ki̱ni da wu yile wu n Kwama ki̱badde.

²¹ Di̱ne yiko ti̱ chakku kasi no wuwule dati yibwilai n ti muli̱nu n ti̱ni ki̱n we ni̱tu chi̱ntu. Ki̱ni bubbuke ni̱re, ti̱yiu di̱kwa̱l di̱du n Kwama a fi a ni̱tumu, di̱du ki̱ni dukwan ka yu ti̱kuri chinti̱nmu.

²² Ka ki̱ki̱le ki̱dange yo di̱kwa̱l Kwamanu mwan nwenu ma nangangi ki̱n, a mwituwe ta ma chitu a fwatu, ti̱ nwedu di̱kwa̱lu we ka nweku, ka yiko ti̱bu ka dutu chi̱n.

²³ Di̱ne ka wuwule niye wu ki̱nwe di̱kwa̱l ya̱mi̱nu a bunti̱be a kau yinang ni a da̱ng ki̱wulang kabu kongu a mwe.

²⁴ A tiwe niwu a da̱ng kabu ko a mwe kuti̱n tiyangu n ki̱n wemi̱nangu yo a yikane a tabuti̱n yinangu n ki̱n we mi̱nangu.

²⁵ Aya ka ni a da̱ng daan we yilang Kwaman ki̱yilangu ki̱chakku niyange, ka ni a chakakku ki̱kura chi ki̱fwadite, a tabi̱bu chitu a nwetu, aya a na tundu yinu n Kwama ka yo ki̱mi̱n delaku di̱ne a ma yiko.

²⁶ Ka wuka ni a da̱u ko ki̱chi n Kwama ka nwe ta̱ma̱nge, aya mwang tabu ben mune, n ki̱n ki̱butu dur ki̱n ko ki̱fwa ti̱yili, ti̱kuran kitu ko ki̱ma chi ka li̱ma Kwama ni̱re kana ti̱kusi.

²⁷ Chitu n Kwama Techire ki̱badu ni̱bu ka made ke a li̱ma ki̱n ni̱re nang ki̱tu. Makaku bwesi̱m buni̱mu n ti nati̱m buni̱mu yo a le riye, yinu n ti woku bwiyang we a ti̱ti̱nitu.