Luka 1 - Bwaki Kifwiyang

Ya̱m bi̱li̱m a di̱ Luka

¹ Nii wuduwe Tiyofi̱la, ni̱bu nabwen a funti̱bwi ko chi mwal chitu a fwe we tibe chire.

² N chi a mwal chi nang nwe we ni̱bu bi̱bu n chi a ku ki̱ni nui chiitu we tile bi̱rke, n chi nang fanseti bi̱ba fwa ni̱bu mi̱n ti̱n ya̱m ki̱mi̱mu.

³ Di̱ne yiko, nii wuduwe Tiyofilu, m mi̱n m mi̱fwan, n ta̱l ya̱m Yesumi daan we tile bi̱rke, n da̱ng a le mang mwal mi̱nu kangu dakanangu.

⁴ M ma yiko ke n yim kasi bi̱yili̱mu ya̱m we ka ti̱ti̱le yinang ka ni̱bu a miya mi̱nengu.

Ni̱bu a fwa bi̱be Yowana naba batisma

⁵ We ki̱dangu m mai Yiridu ki̱chau mati̱n Yafudiya tangu, wuka we fansetiyu, di̱n ki̱nu n Sa̱kariya, wu a chire a ba̱la̱ng Fanse Abisa. Di̱n nelokonu n Alisabatu, n ki̱n a chirte ti̱n a ki̱kuwang bi̱u Arunang.

⁶ N chi ki̱ni burako, a ma da wu yile yinang kangu n Kwama ki̱badangu. N chi a bunti̱ yili̱n Tewuduwe n ti datiyu a dakaniyu.

⁷ Aya n chi a ne bwe we di̱ne Alisabatu ki̱twa̱ne, n ki̱n ti kwartako n Sa̱kariya a ka̱ra̱ni kuu.

⁸ Wuka ki̱di n Sa̱kariya ki̱ma nanga we Kan Kwama na Wurchalimanu.

⁹ We da wu a fansetiye, n chi a sutu Sa̱kariya ke a le mure kan Tewuduwe a twi ki̱nung ki̱ki fi̱rfi̱ra̱ng.

¹⁰ We ki̱dangu n ki̱n ki̱twi ki̱nung ki̱ki fi̱rfi̱ra̱ngu, ni̱bu a mura na fi̱lang ki̱twa̱ba̱ buni.

¹¹ Naba di̱tumbi̱re Tewuduwe a fwe Sa̱kariya mi̱ntuwe, a bale kang ki̱yilange we see we fi ki̱twing ki̱nung ki̱ki fi̱rfi̱range.

¹² Yinangu Sa̱kariya a ku Naba di̱tumbi̱rengu, ni̱r ki̱nu a ti̱ren, tayi a tau ki̱n.

¹³ A ya Naba di̱tumbi̱re a yi ko, “Nwedu tayi we Sa̱kariya! N Kwama a yiu twa̱ba̱ki̱ mwangu, n ne lomo Alisabatu ka bi̱u mi̱n bwe. Mwang chau ki̱mi̱n di̱nu n Yowana.

¹⁴ Ka a bi̱u ki̱ne, mwang ma furi mwen n ti ti̱mi̱lantu yinang, ni̱bu nabwen ka ma ti̱mi̱lantu n ti chi̱n we bi̱beko.

¹⁵ Bwe wu ka kau ni wuduwe we kakku Tewuduwe. A ne no mwe yinabiye aya ka ridu ki̱ni Fi̱ki̱m Kwamam.

¹⁶ N ki̱n nang wu ka yo ni̱bu Yisrelamu ka ki̱la bwa Tewuduwe Kwama.

¹⁷ N ki̱n ka tu Tewuduwe we beki̱ku, n ki̱n kanodi ki̱ri̱ng ki̱ni dukan Fi̱ki̱m yinang Yiliya, n ki̱n ka bedu ki̱ni fiswe li̱mange we tibe bwesi̱me n ti tebu chimu. Ka yo bi̱bu ki̱ko Kwamamu ka ki̱la wa̱re wu bi̱bu ni̱ri dini̱mu a tabe, ka do ni̱bu ke a yiu Tewuduwe.”

¹⁸ N Sa̱kariya a yi naba di̱tumbi̱re ko, “Mang medu, mang yindi yire mi ti̱tu bi̱yili̱me? M mi̱n mang ka̱ra̱n, yinu nayemi a ka̱ra̱ti̱ne.”

¹⁹ Naba di̱tumbi̱re a ke ko. “M mi̱n nang chibrelu wu mi̱n tidu a kakku Kwamange, n ki̱n a tuiye ko n fwami̱n ya̱m bi̱li̱mu.

²⁰ A ya mwang kebu ya̱m mi̱mu, wu ka kau bi̱yili̱me we yo ki̱swi ko a lame. Di̱ne mwang kebu bi̱yili̱me, a ne mwan yim fwa ya̱m, ka lami̱nti̱ di bwa̱ki̱ mangu ka ride.”

²¹ We ki̱swi wuko, ni̱bu a swe ki̱yam Sa̱kariya ka chiredu, n chi ki̱kuradu ko, kano nii wu ki̱ma wule wu ki̱ti̱kadu we mure Kan Kwamane.

²² Yo n ki̱n a chi̱renge, a yimbu fwa chi mi̱n ya̱m, ni̱bu a swaan ko kano ni wu a tekan n ti naba di̱tumbi̱re we mure kane, di̱ne n ki̱n ki̱swe chimi̱n ya̱mi fa̱la̱ng a yimbu fwadu.

²³ Yo diti nangang kangu we Kan Kwamanu a riye, a ki̱lati̱ lo.

²⁴ We kuteng ki̱ku a dami̱ni bayimangu, neeloko n Alisabatu a ma lur, a lai dur ki̱nu swarti tunu a chirebu we lo.

²⁵ Alisabatu a yi ko, “N Tewuduwe a makai, n ki̱n a twiremi ti̱mwenitu, a ne ni ka swa̱ba mi̱ne we.”

Di̱mwar a bi̱be Yesune

²⁶ We swa̱ngi turukunangu, n Kwama a tume Naba di̱tumbi̱re ko wu di̱n ki̱nu n Chibrelu a bwa Nasa̱rete, di̱du a yaa Ka̱lili.

²⁷ A tum ki̱n a di̱kan fwa̱n, di̱da bwa̱u fati̱n n ti Yusufu, wa ki̱fi̱ku Mai Daudange. Di̱n fwa̱ni̱nu m Maryamu.

²⁸ Yo naba di̱tumbi̱re Kwama a be bwa di̱ki̱ne a yiko, “Li̱me a swe ti mun, n Tewuduwe we ware n ti mun, a yo mi̱n ti̱delaku.”

²⁹ Yinangu m Maryamu a nwe di̱siir di̱dangu, chitu a bwa ki̱n, ki̱kuradu ko kanodu di̱siir wulen di̱du.

³⁰ Naba di̱tumbi̱re a yi ki̱n ko, “Nwedu taiyuwe, Maryamu, n Kwama a yo mi̱n delaku.

³¹ Ya mwang ma lur, mwan bi̱u bwe, mwan chau ki̱mi̱n di̱nu n Yesu.

³² N ki̱n ka kau ni wuduwe, ti̱nti̱ne n ki̱n Bwe wa la chi kwange. N Tewuduwe Kwama ka ni ki̱n mati̱ntu yinang kangu tuke ki̱n n Dauda a mangu.

³³ N ki̱n ka ma mati̱ntu we lo Yakubu we ki̱diya kwadu, ti̱m Yisrelamu ki̱diya kwadu, Yaa ko a ne riduriye!”

³⁴ M Maryamu a yi Naba di̱tumbi̱re ko, “Ka medu yire ki̱chitu wu ka fwede, ki̱ka̱ngu mang daanbuwe n ti niyangu?”

³⁵ “Naba di̱tumbi̱re a ke ki̱mi̱n ko, Fi̱ki̱m ka bedu a di̱mune, dukan Kwamanu ka sumi̱nu. Di̱ne yiko, Bwe wu mwang bi̱dde wuduwe wu wawade, ni yal ki̱nu Bwe Kwama.

³⁶ Ko no nang kemo Alisabatu, ki̱twa̱ne a ne bi̱u bwesi̱me, a ma lur swarti turukun, kasi ki̱ku a ka̱ra̱nangu.

³⁷ A ne chitu ki̱bwa Kwamatu we.”

³⁸ Maryamu a yi ko, “M mi̱n ka̱be Tewuduwe, n ke chi mwang fwaatu a fwe yiko.” Yinu naba di̱tumbi̱re a du ki̱n.

M Maryamu yaka siye Alisabatu

³⁹ Yo a ri̱keti̱ni bayi̱me, m Maryamu a funti̱bwi, a ya bi̱n di̱da bangri Yafuda.

⁴⁰ We bwako n ki̱n a le lon Sa̱kariya, ka si Alisabatu.

⁴¹ Yo Alisabatu a nwe di̱siir Maryamune, bwe a fur ki̱ne, a fa̱kta̱ bwi. Alisabatu a rii ki̱ni Fi̱ki̱m Kwamamu.

⁴² N Alisabatu a kuki̱ keru dukan ko, “ki̱mwangu delaku a la ki̱ka nati̱bangi kwang. Delaki̱ku we bwe wu mwan bi̱dde.

⁴³ “M mi̱n, n wure, wu mang ya chi ti̱dui ti̱te, wu ne Tewuduwe ka be miye sirame?

⁴⁴ Yo mang nwe ker di̱siir mune, bwe wa fur mi̱ne a fa̱kta̱bwi ki̱ni ti̱mi̱lan.

⁴⁵ N ya delaku di̱ne mwang ke bi̱yili̱mu mwi chi n Tewuduwe a bwa̱u ka ma mi̱nditu ka fwedu ki̱kumang!”

M Maryamu a kau Te delake

⁴⁶ M Maryamu a yi ko, “Mi̱n dela Kwama Tewuduwe we ni̱r mi̱nu

⁴⁷ Ni̱r mi̱nu a rii ki̱ni ti̱mi̱lantu nabwen di̱ne n Kwama Tewuduwe naba yukemi,

⁴⁸ di̱ne n ki̱n ki̱kur mi̱nu, wuti̱re ka̱beko! A ne fi̱rufi̱re, we bwa kake kutiyu kwang kani̱n yidu ko Kwama a dela mi̱n.

⁴⁹ “A fwe ying di̱ne n Kwama naba dukane kwang, a ma chi ti̱dui di̱ne mi̱n, n ki̱n ti̱n wu wauwade.

⁵⁰ N ki̱n ki̱nwe ki̱bune ni̱bu ki̱nwe tayi kiyimu we ti̱kalani yinang ka saki̱mi̱nangu.

⁵¹ “N ki̱n ki̱ma chitu nabwen ki̱ni dukan fa̱li kiyu. N ki̱n a yai ni̱bu ki̱kukku dutu chiti̱mu n ti bi̱bu ki̱yungdu ko n chi, chi la chiti kwangi̱mu.

⁵² “A chaku mati̱m bi̱duum we sa̱ngka mati̱n chite. N ki̱n a ya bi̱bu ni̱bu ki̱swa̱badi̱mu a ni chi dwiyentu.

⁵³ “N ki̱n a ni bi̱bu chun ki̱budi̱mu li̱me. Aya n ki̱n, a yo kuli̱mu ki̱ni fa̱li kwako.

⁵⁴ “N ki̱n a maka ka̱be yisrela, yinu a tabi̱bu ki̱nwe ki̱bune chi,

⁵⁵ we di̱ Yibrayime n ti di̱kur lon ki̱nu ki̱diya kwadu.”

⁵⁶ Maryamu a swe ti Alisabatu swarti ti̱tta, yinu a ki̱la loko.

Bi̱be Yowana naba Batisma

⁵⁷ Yo ki̱swi bi̱be Alisabatu a lame, n ki̱n a bi̱u bwe kwarta.

⁵⁸ Fati̱bu ki̱mu n ti kebu ki̱mu a nwe chi ka̱ta̱ki ti̱yilitu n Tewuduwe a ma we di̱ki̱netu, n chi a ma furi mwemwen n ti ki̱n.

⁵⁹ We di wu nari̱be, ni̱bu a be ka bii bwe mi̱n laaru, n chi a no ki̱baddu ka chau bwe mi̱n di̱nu ko sa̱kariya, di̱n teki̱ni̱n.

⁶⁰ Aya n ne ki̱n, a yi ko, “Ngango! ni yal, di̱n bwenu n Yowana.”

⁶¹ N chi a yi ki̱n ko, “Aya a ne ni a chau di̱n di̱de we ki̱kuwang chiyangu!”

⁶² Yinu n chi a swe te bwemi̱n, ko a fwa chimi̱n yinang ka ni yal bwengu.

⁶³ Sa̱kariya a swe chimi̱n ko a be ki̱ni chi mwalki yinu a mwal, “Di̱n bwenu ko Yowana.” Ti̱ta ya̱r ni̱bu yii!

⁶⁴ Bi̱nabi̱na yii Sa̱kariya a wuden, n ki̱n a le ki̱ dela Kwama.

⁶⁵ Ti̱ta kau ni̱bu mi̱n chi tayi we fi̱langu, ya̱m bi̱bu we chitu a fwetu a ti̱ran we a kun di̱da yaa Yafudiya mi kwang.

⁶⁶ Ni̱bu bi̱bu a nwe ya̱m bi̱bu ki̱fwadu ko, “Wu ki̱dum bwem kanodu beka kau wureni?” N chi ki̱fwadi ying, di̱ne dukan Tewuduwe n we n ti ki̱n.

N Sa̱kariya a ma fakui

⁶⁷ Yinu n te ki̱n, n Sa̱kariya, a ri ki̱ni fi̱ki̱m Kwamamu, a ma fa̱kuitu ko:

⁶⁸ “Ni dela Tewuduwe, Kwama wa Yisrela! N ki̱n a be ka maka ni̱bu ki̱mu ka tuti̱ chidu we ka̱bitu.

⁶⁹ N Ki̱n a tum ni mi̱ne wuduwe naba Yuke, a ki̱fi̱ku Dauda ka̱beko.

⁷⁰ Tiyangu n ki̱n a fwa a yiini fa̱kubi̱bu ki̱mi wawadi̱mu.

⁷¹ A yu ni we fa̱li fakwarbu chi̱remu, n ti ni̱bi kwang bi̱bu ki̱ ko chini̱mu.

⁷² N ki̱n a fwa ko ka nwe ki̱bune tukebu chi̱remu yinu ka kuru ki̱ni di̱twa̱mbi̱r bwa̱ki̱n.

⁷³ Di̱du nang di̱twa̱mbi̱r di̱du a ma n ti tuke chire Yibrayime.

⁷⁴ A yuni we fa̱li fakwarbu chi̱reme ke ni si Kwama a ne tayi we,

⁷⁵ ki̱ni wauwade n ti yile we diti chireyi kwang.

⁷⁶ “M mun bwemi, mwang kau fa̱ku Kwama wuduwe. Mwang ti Tewuduwe mi̱n kakku, mwang do wa̱re di̱ne beki̱ kangu.

⁷⁷ Mwang mwa ni̱bu ki̱mu mi̱nu tiyangu n chi ka ya yuki̱ku, we duku ki̱leti chiyu.

⁷⁸ Di̱ne we ki̱bune Kwama, wuka ni ka chiredu yinang yo kuko ki̱fi̱lede, a bwa diye beka yii nidu.

⁷⁹ N ki̱n ka yii ni̱bu bi̱bu ki̱yadu a ki̱liyemu n ti bi̱bu a swe a yii bwamu. N ki̱n ka yadu ki̱ni chi̱ni a wa̱re da wa li̱mange.”

⁸⁰ Yo n Yowana a dwiyene, a ri ki̱ni dukan Fi̱ki̱mi̱nu. N ki̱n a swe, a di̱kir, a lami̱nti̱ di n ki̱n a chirengi kwa̱rikwa̱riye we ni̱bu Yisrelamu.