Dwakam 1 - Bwaki Kifwiyang

Tileya̱me

¹ Taki̱da wu a di̱Yesu Masiya, n Kwama a ni ki̱n ti̱kattu ya̱mi ti̱ttu ko ke a yung bi̱bu ki̱si ki̱ni̱mu chi yaka fwedu a ne tikenge. A wuse ka̱be ko n Yowana mi̱n ti̱kattu ya̱mi ti̱tu ki̱dangu a tum ki̱mi̱ne naba di̱tumbi̱ri,

² wu a fwa chi n ki̱n a ku kwange. Bi̱bu nang ya̱mu n ki̱n a fwa we ya̱m Kwamamu n ti di̱mwar Bi̱yili̱mu n Yesu Masiya a yung ki̱ne.

³ N Kwama a dela nii wu ki̱ki taki̱da we, a dela ti̱n bi̱bu ki̱nwe ya̱m fa̱ku Kwamamu di̱ne ni̱bu bunti̱ki̱mu. We yiko, n ki̱n ka delati̱ bi̱bu ki̱nwe ya̱m ki̱mu ki̱ma nangi ki̱ni chi a fwaate, di̱ne ki̱swi ya̱mi yiyu ka riinde a mwatan.

Di̱siir di̱ne kambi Kwamati ti̱di̱bin a ti̱m Asiyamu

⁴ N Yowana a mwal ni̱bu we kambi Kwamati ti̱di̱bin a ti̱m Asiyamu mi̱n di̱siir di̱du. Li̱me n ti Li̱mangu ki̱chiredu we wu we, n ti wu a dilewe, n ti wu ki̱bede, yinu n ti Fi̱ki̱m Kwamamu n chi bi̱dibiin a ki̱di̱ng mati̱nang kangi̱tu a swe n ti chi̱n.

⁵ Ya̱mu a chire a di̱Yesu Masiya, n ki̱n wu ki̱ni di̱mwar di̱yili̱nu we ki̱chitu we, n ki̱n wu kakke a mwe a kun we bi̱bwari̱me, n ki̱n tikake Mai wu a mati̱mu ki̱ni kwang we ti̱ti̱nite. Dwiyentu ki̱ni kwang n ti̱ki̱n, n ki̱n a mi̱la chi̱ni, we bwa ko wu a kur ki̱tuum bi̱bu a chaku ni we ki̱leti chireye.

⁶ N ki̱n a yo ni kau wuka yaa wu fansetiye di̱ne ke ni sii Kwama ko. Dwiyentu a di̱ki̱ne n ti dukanu ki̱diya kwadu. Amin.

⁷ Da̱ng n ki̱n ki̱bedu a ti̱twini! N kawure ka ku ki̱nu. A ne bwin bi̱bu a kur ki̱ni̱mu. Kuuti a ti̱ti̱niyu ka ki wii ki̱ni furi ki̱lin di̱ne ki̱ne. Ki̱kumang! Ka kadi yiko. Amin.

⁸ N Kwama Tewuduwe a fwa ko, “M mi̱n nang mweki̱ku n ti swangki̱ku, m mi̱n nang wu ki̱ka̱nge, n ti wu a dilewe, n ti wu ka ki̱lade, naba Dukane Kwang.”

Dwakam bi̱yili̱m Masiya bi̱bu a Kwamamu

⁹ M mi̱n n Yowana ke chi̱n. We di̱n Yesunu, n chi̱ni a fiwiine we nwe riye, we Yaa Kwama n ti bwanu wu a muku ni̱range we di̱yal Yesunu. Ni̱bu a yikani ki̱ni mi̱n a bekune Fatmose di̱ne mi̱n ma di̱mwar ya̱m bi̱li̱mi̱ne n ti di̱mwar mi̱nu a di̱Yesuwenu.

¹⁰ We di Kwama, Fi̱ki̱m Kwamamu a be we di̱mi̱ne, n nwe keer di̱dun yinang sum we kuteng mangu,

¹¹ di̱du a fwa ko, “Mwal a taki̱da chi mwang kuutu, tum ni̱bu mi̱n we kambi Kwamatu ti̱dibiinitu mi̱n. Ka nang chikiye, Afisa n ti Si̱mi̱rina n ti Bi̱rka̱mu n ti Tiyati̱ra n ti Sardis n ti Fi̱ladelfiya a swanti̱na Lawudukiya.”

¹² N sabran mi mang da̱ng nii ki̱fwa mi ya̱me, n ku ti̱kwa̱li si̱nariyaiti ti̱dibin.

¹³ We tibe ki̱chitu we, n ku wuka yinang Bwe Nii “Bwe Nii” Di̱n di̱du n Yesu a yo yiki mi̱ni, ki̱ni luke wu swa̱me wu a swatuwe ti̱me. A mu di̱ki̱ri̱n si̱nariyan we kwiye ko.

¹⁴ Dur ki̱nu n ti rii kitu a fwiyeni mwe yinang fi̱bi̱n n ti talluken. Nui kiyu yinang ben ki̱rang.

¹⁵ Nani kiyu ki̱yiladu yinang tagula wukwasi̱re, wu naba kube a swa kwada ko. Ker ki̱nu yinang dir nabwe mwe ki̱sudusuwe.

¹⁶ A tau ki̱switi yidibiin we kang ki̱yilang kangu. Di̱kwal Kwamanu a chire we yiiko yinang kul di̱du ki̱ni yiiniyu a machamini yurau. Kabu ko ki̱yiladu yinang yo di a fi ki̱bisa ti̱me.

¹⁷ Yo mang ku ki̱ne, n yar we kakku kangu yinang wu bware. Yinu n ki̱n a yo kang ki̱lang kangu we bwi miyu ko, “Nwedu tayi we, mi̱n nang wu kakke, mi̱n nang swangkute.

¹⁸ Mi̱n nang wukure! M bwa, aya da̱ng ki̱ka̱ngu mi̱ni ki̱ni ti̱kuri ki̱diya kwadu. Ti̱nti̱ne, mi̱ni ki̱ni dukan we bwa n ti fi bi̱bwari̱mu a mura mi̱ne.

¹⁹ Mwal chi mwang kuutu fal, ti̱tu a fwetu n ti ti̱tu ka fwedu a bwa kakketu.

²⁰ “Chi ki̱switiyi yidibiin mwang ku a kang ki̱yilang mang ki̱yungditu, n ti chi ti̱kwa̱li si̱nariyati ti̱dibiin ti̱tu ki̱ni ki̱yiye ki̱yungditu nang ti̱tu. Ki̱switiyi yidibiiniyu, a ti we ni̱bu ti̱tumbi̱rimi bi̱dibiin bi̱bu a kambi Kwamamu. Ti̱kwa̱li si̱nariyati ti̱dibiinitu a ti we a kambi laditi ti̱dibiin.”