Afisam 1 - Bwaki Kifwiyang

Di̱siir Bulus

¹ M Bulus fandu Yesu we ki̱ke Kwama, a tum ni̱bu bunti̱ki̱m Kwama a Afisa mi̱n lwangi̱n di̱du, ka nang chikiye ni̱bu bi̱bu ki̱bunti̱ Yesu Masiya ki̱ni ni̱ri diini̱mu.

² Li̱me n ti li̱mangu ki̱bedu a Kwama Te n ti Tewuduwe Yesu Masiyangu a swe ware n ti chi̱n.

Delaki̱ku a fi̱ki̱m we Yesuwe

³ Dela Kwama, n ki̱n Te Tewuduwe Yesu Masiya! N Ki̱n a dela ni ki̱ni chi ti̱yilitu nabwen ti̱tu a bwa diyetu ke a maka chi̱ni, ni dwiyen a Fi̱ki̱m Kwamam. N ki̱n a ma ti̱tu yo a kwarka chi̱ni n ti Masiya.

⁴ N ki̱n a mi̱la chi̱ni, a sutu chi̱ni we tile bi̱rke yo a kwarka chi̱ni n ti Masiya, n ki̱n a ma yiko ko ke ni kau ni̱bu yinang ki̱ni̱m bi̱bu a ne der we bwim.

⁵ N Kwama a tu a do feredi ka yiu chi̱ni ni kau bwesi̱m ki̱m a di̱n Yesu Masiya. N ki̱n a do ka madi yiko di̱ne a li̱m ki̱mi̱n we ni̱ru ka madi yiko.

⁶ Di̱ne yiko ni dela Kwama di̱ne nabwe li̱me wu a dwiyen kiye, n ki̱n a kur nimi̱ne n chir bi̱bu niyang ti a ba̱la̱ng bwe ni̱re komu.

⁷ Di̱ne bwa Yesuwe, n chi̱ni ni ya tuku we la̱n ki̱letinu. Bwa wu a tur wa̱re wu n Kwama a du nimi̱n ki̱leti chireyu di̱ne ki̱tuumu bweko a kuri̱mu.

⁸ N ki̱n a yung ni li̱me ko, a yo n chi̱ni ni kabbi ki̱ni kasi no bi̱bi̱le duum kasani̱m n ti yingku.

⁹ N Kwama a yo ni yim ti̱lairi ni̱r ki̱nitu n ki̱n a do we ya̱m Masiyamitu, doki̱ku ka riin furi mwen di̱yili̱n ki̱nu.

¹⁰ N ki̱n a do we ni̱r ki̱nu ko ka ki̱swi a lame, ka mur chitu a diitu n ti ti̱tu a ti̱miti kwang a wume dukan Masiyane. Kanang chikiye, kwali̱n chi̱nu ki̱ni kwang.

¹¹ Di̱ne kwarkaki̱ chirengu n ti Masiya a yo niyang kabi wiinangu, n Kwama a sutu chi̱ni we di̱n Masiyanu ni kau ni̱bu ka ya ki̱ti̱me we kula komu, n ki̱n a do ya̱m bi̱bu feredi, yinangu n ki̱n a ke ka madangu.

¹² Di̱ne ke n chi̱ni ni̱bu Yafudam bi̱bu niyang mwe yo ni̱re a di̱Masiyamu, ni dela ki̱n di̱ne dwiyen kitu.

¹³ We di̱n Yesunu ti̱kau ni̱bu Kwamam we ki̱dangu ta nwe ya̱m bi̱li̱m Kwamam bi̱bu a be chimi̱ne ki̱ni yukumu. We ki̱dangu ta ke bi̱yili̱mu we di̱Masiyangu, n Kwama a ni chi̱n Fi̱ki̱m ki̱mu yinangu a bwa̱u ka ni chi̱nangu. Ti̱tu a kau yinang di̱mwar di̱du ki̱yungdu n ti̱n m bi̱ki̱ni̱m.

¹⁴ Fi̱ki̱m Kwamamu nang chi ti̱yoritu ki̱ni chi̱ni dukanu ko n chi̱ni ni yiu chi n Kwama a bwa̱u ka ni̱nidite. Ni swaan ti̱n ko n ki̱n a tu chi̱ni ni kau bi̱ki̱m ni̱bu. N ki̱n a ma yiko ko ke n chi̱ni ni dela ki̱n ni ri̱kati̱ ki̱n.

M Bulus a twa̱ba̱buni

¹⁵ Di̱ne yiko, feredi n nwe yinangu keku bi̱yili̱mang changu a ti ki̱ri̱ng we di̱n Tewuduwe Yesunu, n ti yinangu ti̱mi̱la ni̱bu Kwamamu kasi no bwalengu.

¹⁶ Mang dubu wanaki̱ Kwamangi kwadu mi̱n madu di̱ne chi̱n, mi̱n yo chi̱nu we twa̱ba̱ku mangi kwadu, mi̱n madi yiko mi,

¹⁷ ke Kwama Tewuduwe Yesu Masiya, Te wu a lachi ki̱ni dwiyene, a nang ni chi̱n Fi̱ki̱m ki̱mu bi̱bu a yingki̱mu, a wudu chimi̱nti̱ yingku ke ti̱dwiyen we swaan ku Kwamangu.

¹⁸ Ti̱nti̱ne, mi̱n twa̱ba̱bunitu mi Kwama a yo ti̱ri ki̱ni swaanku we ni̱tu chi̱ntu ke ti yim chi ti̱yilitu n Kwama a yo chimi̱nitu. Mi̱n baddu ta swaan ti̱n kulitu n ti dwiyentu ta yaditu, ti̱tu n ki̱n a ni ni̱bu ki̱mitu.

¹⁹ Mi̱n twa̱ba̱bunitu mi Kwama a yo ti̱swaan dwiyen dukan ki̱ni ti̱tu a su ki̱nanti̱ng di̱ne chi̱ni bi̱bu niyang ke bi̱yili̱m a di̱Masiyatu. Di̱du dukan nang di̱diini̱n n ti di̱du a bwi chireyinu.

²⁰ Dukan di̱du n nang di̱du n Kwama a kukki̱n Masiya ki̱n we furi̱nu, a yo ki̱n a ki̱di̱ng mati̱nang we kang ki̱yilang Kwamangu we ti̱ti̱ni bwaditu.

²¹ Ki̱ka̱ngu n ki̱n a la ka nang wuwule maiye n ti ka ti̱ti̱le mati̱ne n ti ka di̱di̱le dukane n ti ka wuwule tikake n ti kasi no ti̱ti̱le we ti̱ti̱ni ti̱tu n ti ti̱ti̱nitu ki̱beditu.

²² Ti̱nti̱ne, n Kwama a du kanang ti̱ti̱le chiye a fa̱la̱ng Masiyang. A yo ki̱n a kau tikake wu a chiti kwange, ke ni̱bu bunti̱ki̱mi̱mu a nwe ta̱ma̱ng mati̱n kitangu.

²³ Nibu bunti̱ki̱mu yinang bwi Masiyai. M Masiya wu a ri kasi no bwa̱le, a riti̱ ni̱bu bunti̱ki̱mi ki̱ni dukani yiko.