2 Biti̱re 1 - Bwaki Kifwiyang

Di̱siir

¹ M mi̱na Simun Biti̱r, bwe nanga n ti fandu Yesu Masiya. Mi̱n mwal bi̱bu a ya keku bi̱yili̱mang ki̱yilang yinangu n ni̱n nang ya ti̱nangu, we yile Kwama chire n ti naba yuke chire n Yesu Masiya.

² Li̱me n ti li̱mangu burtu we di̱chine di̱ne ta yim Kwama n ti Yesu Tewuduwe chire.

Di̱yal Kwaman n ti suti̱ku

³ N Kwama we a dukan ki̱nu a ni chi̱ni chi no ni yaditu kwang ke ni ma duum fiswe wu a ni̱bu ki̱nwe tayi kiye. Ki̱chitu wu kwang ka ti̱chirei di̱ne niyang yim Masiya yinange. N ki̱n a yal niye ke ni ma fiswe lwekake ware n ti ki̱n we dwiyen kitu n ti da wuyile ko.

⁴ Di̱ne dwiyen kitu n ti da wuyile ko, n ki̱n a bwa̱u ka ma nimi̱n chitu nabwen ti̱tu a lelei. We ti̱tu, ta kadu ki̱ni da Kwama, yinu ta swidu we muli̱nu a ti̱ti̱nitu ki̱bunte kubeku ki̱kusangu.

⁵ Di̱ne yiko, ti̱funti̱ bwi yinang, ti̱su ti̱tu ta mwemi̱netu ki̱nitu, ti̱su keku bi̱yili̱mang changu ki̱ni yile, we yile ti̱n, ti̱subi ki̱ni yingku,

⁶ we yingki̱ku, ti̱subi ki̱ni takku durang, we takku durangu, ti̱subi ki̱ni muku ni̱rang, we muku ni̱rangu, ti̱subi ki̱ni da wu a bunti̱ki̱ Kwamange,

⁷ we da wu a bunti̱ki̱ Kwamange, ti̱subi ki̱ni maku chi a lele we ka wuwule niye yinang kebu, we maku chi a leletu, ti̱subi ki̱ni mi̱laku.

⁸ Yiyu nang datiyu a dakan ta kadi ki̱niyu. Ka n ti̱ni ki̱ni burte, ka yodu ta kadu ki̱ni funti̱ku bwiyang n ti bi̱bu ki̱ni ki̱kwi we yinku Tewuduwe chire n Yesu Masiya.

⁹ Di̱ne ka nang wuwule niye wu a kwala datiye, a yung n ki̱n a kubu di yinang, n ki̱n ki̱du yinu a tabu ki̱ni nuraki̱ku ni̱bu a ma ki̱mi̱n we ki̱leti kiyu ferediye.

¹⁰ Di̱ne yiko kebu mi̱m, ti̱su funti̱ku bwiyang changu, ti̱yungi siin kasi di̱yal n ti sutuki̱ku n Kwama a ma chimi̱nangu. Ka ti̱maye, a ne ta yari̱nduwe ko bayim.

¹¹ Nang ki̱swi n Kwama ka niin chi̱n nabwe da wu ta le mati̱n Tewuduwe chire n ti Naba Yuke Yesu Masiya wu ki̱diya kwade.

¹² We yiko, manni̱n kur chimi̱n ki̱chitu wu kwadu, kasi ki̱ku ta tu ta yim yinu tati ki̱ri̱ng we ya̱m bi̱yili̱mu ta yi̱bi̱mu.

¹³ We da̱ngki̱ mangu, a da, manni̱n kur chimi̱n ti̱tu chi ka m mi̱n we ki̱ni ti̱kuriye.

¹⁴ Di̱ne n yim diti miyu we ti̱ti̱nitu a dubu nabwen, kangu n Tewuduwe chire Yesu Masiya a yungyangu.

¹⁵ Di̱ne yiko, mang funti̱bwi, ke ti̱swaan ki̱chitu wu, ta tadu we ni̱tu chi̱ntu kasi no a kutengu mang du ti̱ti̱nitangu.

Ni̱bu a ku dwiyen Masiyantu

¹⁶ We ya̱m dukan n ti beki̱ Tewuduwe n Yesu Masiya nang fwa chimi̱nangu n ke di̱buti̱r ka ki̱si̱nni kasani nang kaba ni̱ri, aya ni̱n ku dwiyen kitu ki̱ni nui ni̱n.

¹⁷ Di̱ne n ki̱n a yiu ri̱kaku n ti dwiyentu we di̱Kwama Te, yo ker a chir ki̱mi̱ne we dwiyen Kwamatu ki̱ni dukan ki̱fwadu ko, “Wu nang Bwemi, mi̱n mi̱lade, wu mi̱n nwe ta̱ma̱ng n ti ki̱n yinang.”

¹⁸ N ni̱n ni̱n fwan ni̱n nwe ker di̱du a chire a dii, yo ni̱n we ware n ti ki̱n we kun di̱di wauwadi̱nu.

¹⁹ Ti̱chitu wu kwang a yo ni̱n yim ko bi̱yili̱m chi fa̱kubu bi̱bu feredimu a fwaatu. A dakan ta madi daan daan we ya̱m bi̱bu di̱ne a kau yinang ki̱yiiye wu ki̱yiidu a ki̱liye a lami̱nti̱ yo ti̱mu ka kwiyade, yo m Masiya wu n ki̱n nang Di̱turmi̱ne kama yiiku we ni̱tu chintangu.

²⁰ We ti̱ti kwang, a dakan ta swaanu tiko ya̱mi fa̱kuyi bi̱bu a mwalang we ya̱m Kwamamu ni̱bu a mwalbu ki̱ni swaanku ki̱ku a Fa̱kubang.

²¹ We ya̱m fa̱kuyimu, a bebu a ki̱ke niye, aya Fi̱ki̱m Kwamamu a le ni̱tu ni̱bitu a yo n chi a fwa chi n chi a yiuwe a di̱Kwamatu.