Zefania 1 - Tshwa Bible

A siku ga Jehova.

¹ Leyi hi mhaka ya Jehova yi ngata ka Zefania a nʼwana Kuxi wa Gedalia, wa Amaria, wa Hezekia, masikwini ya Josia nʼwana Amoni, a hosi ya ka Juda.

² Nzi ta lovisa zontlhe lezi zi nga kona misaveni, ku wula Jehova.

³ Nzi ta lovisa a vanhu ni zihari, nzi lovisa tinyanyani ta tilo ni zidluwani za bimbi, a zikhunguvanyiso ni lava vobiha; nzi ta fuvisa vanhu laha misaveni, ku wula Jehova.

⁴ Nzi ta nawuluta a canja ga mina hehla ka Juda, ni le hehla ka vontlhe vaaki va le Jerusalema; nzi ta lovisa a salela wa Baali wutshanwini legi, ni vito ga vapristi va zifananiso zinwe ni vapristi; 2 Tih. 23:4

⁵ ni lava va khozelako a yimpi ya tilo na va hi hehla ka tiyindlu; ni lava va khizamelako va hlambanya ha Jehova, va tlhela va hlambanya ha Malkamu.

⁶ Ni lava va tlhelelako nzhako va fularela Jehova; ni lava va nga hlotangiko Jehova, va nga mu wutisi nchumu.

⁷ Rutiseni mahlweni ka Hosi Jehova, hakuva a siku ga Jehova gi tshinele! Hakuva Jehova i longisile a muphahlo, i basisile lava a va rambileko. 1 Sam. 16:5; Jer. 46:10; Zak. 2:13

⁸ Hi siku ga muphahlelo wa Jehova nzi ta tsayisa a tihosana ni vana va hosi, ni vontlhe lava va ambeleko a tinguwo ta ginwani tiko. 2 Tih. 25:6

⁹ Hi siku lego nzi ta tsayisa lava va tlulako a xipimbitsi, lava va tatako a yindlu ya hosi yabye hi lezi zi phangilweko hi kanu ni kukhohlisa.

¹⁰ Hi siku lego, ku wula Jehova, ku ta zwala xirilo lomu Nyangweni ya Zidluwani, ni hlomulo hi tlhelo ga xipanze xiswa xa muti, ni guwa ga hombe hi le xitsungeni. 2 Tih. 22:14; Neh. 3:3

¹¹ Nwina vaaki va le Maktexi, banani nkosi, hakuva a vamahungani vontlhe va mbhelile, va file vontlhe lava va nga wa hi ni mati yo tala.

¹² Xikhatini lexo nzi ta lavisisa lomu Jerusalema hi tikandiya; nzi ta tsayisa a vavanuna lava va te ku njha hehla ka zisese zabye, lava va nge ngalo timbilwini tabye: Jehova a nga mahi xinene ge hambu zahava!

¹³ A kufuma kabye ku ta phangiwa, a tiyindlu tabye ti hahlulwa. Ina, va ta aka tiyindlu, kanilezi va nga ta tshama ka tona; va ta byala zivina, kanilezi va nga tanwa a vinya ga kona. Deut. 28:30, 38; Am. 5:11

¹⁴ A siku ga hombe ga Jehova gi kusuhani, ga tshinela hi xihatla. Hi nga zwani, a siku ga Jehova hi legi! A tinhenha ta rila ti tsikwila!

¹⁵ Lego siku i siku ga khulo, i siku ga zikarato ni hlokiselelo, a siku ga kuhahlula ni kuhangalaka, a siku ga munyama ni dzuvi, a siku ga marefu ni kuphuma.

¹⁶ I siku ga mpunzu ni nyandayeyo zi vukelako a miti yi bhiyelweko ni makhokhola ma tlakukileko.

¹⁷ Nzi ta neha a hlokiselelo xikari ka vanhu, kasi va fela ku famba khwatsi zikhumu, hakuva va onhele Jehova. A nkhata wabye wu ta hangalaswa khwatsi i tshuri, hi mimiri yabye kukotisa a koho.

¹⁸ A siliva yabye hambu ni nzalama yabye zi nga ta va vuna a sikwini ga khulo ga Jehova; kanilezi a tiko gontlhe gi ta hiswa hi nzilo wa xiluse xakwe, hakuva i ta fuvisa vontlhe a vaaki va misava hi lobyiselelo wu chavisekako.