Valamuli 1 - Tshwa Bible

A Kuhluhoa ka Kanani.

¹ Makunu laha Joxua a nga wa file, a vanana va ka Israeli va lo wutisa ka Jehova, vaku: Himani xikari ka hina a ta nga ranga a kanziha aya ka vaKanani a yalwa navo ke?

² Jehova i lo hlamula, aku: Ku ta kanziha Juda; nzi nyikele a tiko canjeni gakwe.

³ Zonake Juda i te ngalo ka nakulobye Simeoni: A hi kanzihe hontlhe hiya ka tiko legi nzi panzelweko, hi ya vukela vaKanani hilwa navo. Zonake nzi ta famba na wena ka legi u ta nga panzelwawu. Simeoni i lo famba naye.

⁴ Juda i lo kanziha, na Jehova i lo nyikela vaKanani ni vaPerezi canjeni gabye, va hlasela 10,000 wa vavanuna le Bezeki.

⁵ Vona va lo kuma Adoni-bezeki lomu Bezeki valwa naye, va daya vaKanani ni vaPerezi.

⁶ Kanilezi Adoni-bezeki i lo tsutsuma. Va lo mu hlongola, va mu khoma va mu tsema titiho ta hombe ta mandla ni ta mikonzo.

⁷ Adoni-bezeki aku: 70 wa tihosi, laha ti nga wa tsemilwe titiho ta tona ta hombe ta mandla ni ta mikonzo, ti wa rolela matlhatlha lahasi ka meza ya mina. Nungungulu i nzi tlhelisela zimaho za mina. Vona va lo mu yisa le Jerusalema, laho a nga ya fela kona. Ekso. 21:23

⁸ A vanana va ka Juda va lo vukela Jerusalema. Va lo enghena va gi khozisa hi wutlha ga supado, va hisa muti wa kona.

⁹ Anzhako ka lezo a vanana va ka Juda va lo relela va yalwa ni vaKanani lava va akileko zitsungeni ni le Dzongeni ni lomu libaleni.

¹⁰ Ju la i lo yalwa kambe ni vaKanani lava va akileko le Hebroni (a vito ga kale ga Hebroni ku wa hi Kiriat-Arba), va lo hlasela Xexai, na Ahimani, na Talmai.

¹¹ Kusukela laho va lo yalwa ni vaaki va le Debira. (A vito ga Debira ga kale ku wa hi Kiriat-seferi.)

¹² Kalebi a ku ngalo: Loyi a ta nga khozisa a muti wa Kiriat-seferi a wu teka, nzi ta mu nyika a nhanyana wa mina Aksa a maha sati wakwe.

¹³ Otnieli nʼwana Keneza, a nzisana ya Kalebi, i lo wu khozisa. Yena i lo mu nyika nhanyana wakwe Aksa kuva sati wakwe.

¹⁴ Laha Aksa a nga chikela ka nuna wakwe, i lo mu kucetela lezaku a mu vumela ku kombela a simu ka raru wakwe. I lo chika laha mbongoleni; Kalebi aku kakwe: Wo lava yini?

¹⁵ Yena aku kakwe: Nzihe xikatekiso; hakuva, kota lezi u nzi nyikileko a tiko ga le Dzongeni, nzihe ni tihlowo ta mati. Kalebi i lo mu nyika a tihlowo ta le tsungeni ni ta le nzhelelweni.

¹⁶ A vana va Keni, a muxade wa Mosi, va wa sukile mutini wa micinzu zinwe ni vana va Juda, vaya le xiwuleni xa Juda le Dzongeni ga Arade, va ya aka ni vanhu va kona. Ekso. 18:1; Deut. 34:3; 1 Sam. 15:6

¹⁷ Juda i lo famba ni nakulobye Simeoni va yalwa hi vaKanani lava va akileko le Zefate, va va lovisa vaku bhi. Hikwalaho a muti lowo wu lo chuliwa vito ga Horma,

¹⁸ Ni kambe Juda i lo khozisa Gaza ni miti ya kona, na Axkeloni ni miti ya kona, na Ekroni ni miti ya kona.

¹⁹ Jehova i wa hi zinwe na Juda; i lo hlongola vaaki va lomu zitsungeni, kanilezi i lo tsanzeka ku hlongola vaaki va lomu mikoveni, hakuva va wa hi ni tikareta ta ziketse.

²⁰ Va lo nyikela Hebroni ka Kalebi, khwatsi hi lezi Mosi a nga wa wulile. Yena i lo hlongola lomo a vanana vanharu va Anake.

²¹ Kanilezi a vanana va ka Benjamini a va hlongolangi a vajebusi lava va akileko lomu Jerusalema. Hikwalaho a vajebusi va akelene ni vana va Benjamini le Jerusalema kala nyamutlha. Jox. 15:63; 2 Sam. 5:6

²² A va ka Josefa na vonawu va lo kanziha vaya Beteli. Jehova i wa hi zinwe navo.

²³ A va ka Josefa va lo rumela a hloti a ku ya hlola Beteli. (A vito ga kale ka Beteli ku wa hi Luza.)

²⁴ A varinzeli va lo wona wanuna na ata hi le mutini, vaku kakwe: Hi mahele wuxinji u hi komba a nyangwa yi enghenako mutini, hi tava ni tipswalo ka wena.

²⁵ I lo va komba a nyangwa ya muti. Va lo hlasela a muti hi wutlha ga supado, va tsika wanuna loye a famba ni ngango wakwe.

²⁶ A munhu loye i lo rura aya tikweni ga vaHiti a ya aka muti a wu chula vito ga Luza, kala ni lezi wa ha vitwako hi vito lego.

²⁷ Manasa a nga hlongolangi a vaaki va le Bet-xeani zinwe ni miti ya kona, hambu Taanake ni miti ya kona, hambu ni vaaki va le Dora ni miti ya kona, hambu vaaki va le Ibeleami ni miti ya kona ge hambu vaaki va le Megido ni miti ya kona. Kanilezi a vaKanani va lo simamisa va aka lomu tikweni lego.

²⁸ Laha a vaIsraeli va nga kuma ntamu, va lo rwexa vaKanani mikhinyavezo, va nga va hlongolela magumo.

²⁹ Na Efraime a nga hlongolangi a vaKanani lava va nga wa akile lomu Gezera; kanilezi a vaKanani va lo akelana navo le Gezera.

³⁰ Na Zebuloni a nga hlongolangi vaaki va le Kitroni, ge hambu vaaki va le Nahalola; kanilezi a vaKanani va lo tshama xikari kabye va maha mahlenga va luva nzuvo.

³¹ Axeri a nga hlongolangi a vaaki va le Ako, hambu vaaki va le Sidoni, ni va le Ahlaba, ni va le Akziba, ni va le Helba, ni va le Afika, ge hambu va le Rehoba;

³² kanilezi a va ka Axeri va lo aka xikari, ka vaKanani, va nga vaaki va tiko lego, hakuva va wa nga va hlongolangi.

³³ Naftali a nga hlongolangi vaaki va le Bet-xemexe, hambu vaaki va le Bet-anate, kanilezi i lo aka xikari ka vaKanani, va nga vaaki va tiko lego. Ahembaloko, a vaaki va le Bet-xemexe ni va le Bet-anate va wa luva nzuvo.

³⁴ A vaAmori va lo kunya a vanana va ka Dani kala va chikela le tikweni ga xitsunga, hakuva va wa nga va vumeli kuta leno nzhelelweni.

³⁵ A vaAmori va lo aka lomu xitsungeni xa Heresi, lomu Aijaloni ni lomu Xaalabima. Hambulezo, a canja ga yindlu ya Josefa gi lo hlula, kala va luva nzuvo.

³⁶ A tiko ga vaAmori gi wa sukela le tsungeni wa Akrabima le ribyeni, wu kongoma le hehla.