Tisimu 148 - Tshwa Bible

Zontlhe zivangwa a zi dumise Jehova.

¹ Dumisani Jehova! Dumisani Jehova hi le matilweni, Mu dumiseni le hehlahehla. Lu. 2:14

² Mu dumiseni, nwina nwentlhe tingelosi takwe, Mu dumiseni, nwina nwentlhe tiyimpi takwe.

³ Mu dumiseni, nwina gambo ni hweti, Mu dumiseni, nwina nwentlhe tinyeleti ta kuwonekela.

⁴ Mu dumiseni, nwina matilo ya matilo, Na nwina mamati mu nga hehla ka matilo. Gen. 1:7

⁵ Ngha zi dumisa a vito ga Jehova, Hakuva i lo leletela, zi vangiwa.

⁶ I zi tiyisile lezaku ziva kona kala kupinzuka, I zi nyikile nayo, ku hava ni xinwe xi wu hambunyetako. Joba 28:24; Jer. 33:25

⁷ Dumisani Jehova laha misaveni, Nwina madragoni ni kueta kontlhe.

⁸ A nzilo ni maralala, gapongo ni hunguva, Ni bhubhutsa leʼgi mahako kulaya kakwe;

⁹ A zitsunga ni yontlhe miganga, Tisinya ta mihanzu, ni tisedari tontlhe;

¹⁰ Zivanza ni zifuyo zontlhe; Leʼzi kokakokako, ni tinyanyani ti purumako;

¹¹ Tihosi ta misava, ni wontihe matiko; Tihosana, ni Valamuli vontlhe va misava;

¹² Majaha ni vanhwana, Zikhosana ni vanana:

¹³ A va dumise a vito ga Jehova, Hakuva hi vito gakwe goce gi tlakukileko; A wuhosi gakwe gi tlakukile ku hunza misava ni tilo. Isa. 12:4

¹⁴ I tlakusile a limhonzo la vanhu vakwe, Lezaku a dumiswa hi vakubasa vakwe vontlhe; Va nga vana va Israeli, a tiko gi nga kusuhani kakwe. Dumisani Jehova!