Mitsengo 2 - Tshwa Bible

¹ Jehova i lo wulawula ka Mosi ni ka Aroni, aku:

² A vanana va ka Israeli va ta gova a munwe ni munwani lahasi ka mujeke wa ngango wa vararu vakwe; va ta gova va cuwukana ni tenda ga mutlhangano, va gi ranzela vontlhe.

³ Le mahlweni, hi tlhelo ga Mutsuwuka-gambo, ku yimiswa mujeke wa nyangwa ya ka Juda hi mabutho yabye; ni hosana ya vana va ka Juda hi Naxoni a nʼwana wa Aminadaba,

⁴ zinwe ni vavanuna va yimpi yakwe, lava va hlayilweko va hi tsengo wa 74,600.

⁵ Lava va ta nga gova va gamela yena, hi lixaka la ka Isakari; ni hosana ya vanana va ka Isakari hi Netaneli a nʼwana wa Zuare,

⁶ zinwe ni vavanuna va yimpi yakwe, ni lava va hlayilweko va wa hi 54,400.

⁷ Ku lo gamela a lixaka la ka Zebuloni; loyi a nga hosana ya vanana va ka Zebuloni hi Eliabe a nʼwana wa Heloni,

⁸ zinwe ni vavanuna va yimpi yakwe; ni lava va hlayilweko va wa hi 57,400.

⁹ A tsengo wa vontlhe vavanuna lava va hlayilweko va wugovelo ga ka Juda, va wa hi 186,400, hi mabutho yabye; lava hi lava va ta nga ranga ku suka.

¹⁰ Le Dzongeni ku tava ni mujeke wa wugovelo ga ka Rubeni, hi mabutho yabye; a hosana ya vanana va ka Rubeni hi Eliazura, a nʼwana wa Xedura,

¹¹ zinwe ni vavanuna va yimpi yakwe; ni lava va hlayilweko va wa hi 46,500.

¹² Lava va ta nga gova va gamela yena, hi lixaka la ka Simeoni; a hosana ya vanana va ka Simeoni hi Xelumieli a nʼwana wa Zurixadayi,

¹³ zinwe ni vavanuna va yimpi yakwe; lava va hlayilweko va wa hi 59,300;

¹⁴ ku gamela a lixaka la ka Gadi; a hosana ya vanana va ka Gadi hi Eliasafa a nʼwana wa Reueli.

¹⁵ A yimpi yakwe ni lava va hlayilweko, va wa hi 45,650.

¹⁶ Vontle lava va nga wa hlayilwe va wugovelo ga ka Rubeni va wa hi 151,450, ku kotisa mabutho yabye. Hi vona va ta nga suka va maha va wumbiri.

¹⁷ Zonake ku ta suka a tenda ga mutlhangano, a wugovelo ga vaLevi gi hi xikari ka magovelo manwani; lezi va govisako zona hi zalezo va ta nga sukisa zona, loyi ni loyi wutshanwini gakwe, hi mijeke yabye.

¹⁸ Le Muhlwa-gambo, ku tava mujeke wa wugovelo ga ka Efraime hi mitlawa yabye; a hosana ya vanana va ka Efraime hi Eliaxama a nʼwana wa Amihudi,

¹⁹ zinwe ni vavanuna va yimpi yakwe, ni lava va hlayilweko va wa hi 40,500.

²⁰ Ku ta gamela a lixaka la ka Manasa; a hosana ya vanana va ka Manasa hi Gamalieli a nʼwana wa Pedazura,

²¹ zinwe ni vavanuna va yimpi yakwe; ni lava va hlayilweko va wa hi 32,200,

²² Ku gamela lixaka la ka Benjamini; a hosana ya vanana va ka Benjamini hi Abidani a nʼwana wa Gideoni,

²³ zinwe ni vavanuna va yimpi yakwe, ni lava va hlayilweko va wa hi 35,400.

²⁴ A tsengo wa vontlhe vavanuna lava va hlayilweko va wugovelo ga ka Efraime va wa hi 108,100, hi mitlawa yabye. Vona va ta suka na va hi ntlawa wa wunharu.

²⁵ Hi tlhelo ga Nwalungu ku tava mujeke wa wugovelo ga ka Dani, hi mitlawa yabye; a hosana ya vanana va ka Dani hi Ahiezere a nʼwana wa Amixadayi,

²⁶ ni vavanuna va yimpi yakwe, ni lava va hlayilweko va wa hi 62,700.

²⁷ Lava va ta nga gova ku gamela vona hi lixaka la ka Axeri; a hosana ya vanana va ka Axeri hi Pagieli a nʼwana wa Okrani,

²⁸ ni vavanuna va yimpi yakwe, ni lava va hlayilweko va wa hi 41,500;

²⁹ ku gamela a lixaka la ka Naftali; a hosana ya vanana va ka Naftali hi Ahira a nʼwana wa Enani,

³⁰ ni vavanuna va yimpi yakwe, ni Sava va hlayilweko va wa hi 53,400.

³¹ A tsengo wontihe wa vavanuna va wugovelo ga ka Dani va wa hi 157,600. Vona va ta suka hi le nzhako ni mijeke yabye.

³² Lava hi vanana va ka Israeli, lava va hlayilweko hi tinyangwa tabye. Vontlhe lava va hlayilweko hi magovelo ya tiyimpi tabye va wa hi 603,550. Ekso. 12:37

³³ Kanilezi a vaLevi a va hlayiwangi xikari ka vanana va ka Israeli, kota lezi Jehova a leleteleko Mosi.

³⁴ A vanana va ka Israeli va lo maha zontlhe kota lezi Jehova a leleteleko Mosi. Va wa gova kota kulanzela ka mijeke yabye, ni kambe va wa suka hi yona ndlela leyo, loyi ni loyi hi lixaka la nyangwa yabye.