Jeremia 1 - Tshwa Bible

A kuvitanwa ka Jeremia.

¹ A timhaka ta Jeremia, nʼwana Hilkia, munwe wa vapristi va le Anatote, a tikweni ga Benjamini. Jox. 21:18; 1 Tih. 2:26

² A mhaka ya Jehova yi tile kakwe a masikwini ya Josia, a nʼwana Amoni, a hosi ya ka Juda, hi lembe ga wukhume ni manharu ga kufuma kakwe. 2 Tih. 23:34; 24:17; 25:8, 11

³ Yi lota kambe a masikwini ya Jehoiakimu, a nʼwana Josia, a hosi ya ka Juda, ni lomu kumbheleni ka lembe ga wukhume ni ginwe ga kufuma ka Zedekia, a nʼwana Josia, a hosi ya ka Juda, a xikhatini lexi a va le Jerusalema va nga khomiwa va yiswa wukhumbini, hi hweti ya wuntlhanu.

⁴ A mhaka ya Jehova yi lota ka mina, yiku:

⁵ Nzi ku tivile na nzi nga se ku ku wumba lomu rumbyini ga mamani wa wena; nzi lo ku hlawula na u nga se ku huma nyimbeni, nzi ku wumbele a kuva muprofeti wa matiko. Isa. 49:1; Gal. 1:15

⁶ Nzi lo hlamula, nziku: Oho, Hosi Jehova! Cuwuka, a nzi zi tivi ku wulawula, hakuva nza hi nwanana. Ekso. 4:10; 6:12

⁷ Kanilezi Jehova i te ngalo ka mina: U nga wuli uku: Nzi nwanana. Hakuva u ta famba ka vontlhe lava nzi ta nga ku ruma ka vona, u ta ya kanela zontlhe nzi ta nga ku laya zona.

⁸ U nga va chavi, hakuva nzi na wena a ku ku ponisa, ku wula Jehova. Deut. 31:6; Jox. 1:5

⁹ Zonake Jehova i lo nawuluta a canja gakwe, a khumba a nomu wa mina; na Jehova aku ka mina: Languta, nzi vekile a timhaka ta mina a nonwini wa wena.

¹⁰ Nyamutlha nzi ku yimisile hehla ka matiko ni hehla ka mifumo, lezaku u tsuwula, ni ku khungumula, ku hahlula ni ku wisa, ku aka ni ku byala. Jer. 5:14; 2 Kor. 10:4

¹¹ A mhaka ya Jehova yi lota ka mina, yiku: Jeremia, u wona yini ke? Nzi lo hlamula, nziku: Nzi wona a ravi ga sinya ya almonde.

¹² Jehova aku ka mina: U wonisisile khwatsi, hakuva nzi rinzele a timhaka ta mina lezaku ti maheka.

¹³ Ni mhaka ya Jehova yi lota ka mina hi khati ga wumbiri, yiku: U wona yini ke? Nzi lo hlamula, nziku: Nzi wona a mbita yi vilako, a nomu wa yona wu le tlhelweni ga Nwalungu.

¹⁴ Jehova aku ka mina: A khombo gi tata hi le Nwalungu hehla ka vaaki vontlhe va misava.

¹⁵ Hakuva nzi ta ramba a tixaka tontlhe ta matiko ya le Nwalungu, ku wula Jehova; linwe ni linwani li ta ta yimisa xitshamu xa wuhosi xa lona laha tinyangweni ta Jerusalema, kasi ku vukela a makhurisi ma ranzelekeleko muti, ni ku vukela a miti yontlhe ya ka Juda.

¹⁶ Zonake nzi ta hlawutela a kulamula ka mina hehla kabye hi kota ya kubiha kabye kontlhe, hakuva va nzi tsikile, va ya hisa tibani ka vanwani vanungungulu, ni ku khozela a mitiro ya mandla yabye wutsumbu.

¹⁷ Hikwalahoke, ti bohe a xiwunu xa wena, u yima, u va byela zontlhe lezi nzi ta nga ku laya zona. U nga dzuki u chava a mahlweni kabye, ku nga taku nzi ku chavisa mahlweni kabye. Lu. 12:35; Efe. 6:14; 1 Ped. 1:13

¹⁸ Hakuva, nyamutlha nzi ku mahile a kuva a muti wa khokhola, ni mhanze ya xiketse, ni khurisi ga suku a mahlweni ka tiko gontlhe, a mahlweni ka tihosi ta ka Juda ni tihosana ta kona, ni mahlweni ka vapristi ni vanhu va tiko.

¹⁹ Va talwa na wena, kanilezi va nga ta ku hlula; ihakuva mina nzi zinwe na wena, kasi ku ku ponisa, ku wula Jehova.