Danieli 1 - Tshwa Bible

A kugonza ka Danieli ni vanghana vakwe.

¹ Hi lembe ga wunharu ga kufuma ka Jehoiakimu a hosi ya ka Juda, Nebukadnezzare a hosi ya le Babuloni i lota le Jerusalema a ta gi vimbezela.

² A Hosi yi lo nyikela Jehoiakimu a hosi ya ka Juda mandleni yakwe, ni zibya zinwani za yindlu ya Nungungulu. Nebukadnezzare i lo famba nazo tikweni ga Xinari, a zi enghenisa ndlwini ya nungungulu wakwe, a zi veka lomu bakweni ga nungungulu wakwe.

³ A hosi yi lo laya Axpenaze a nduna ya mithenwa ya yona, a mu ruma ku neha a manwani majaha ya yindlu ya wuhosi ya ka Israeli ni ya vahombe; 2 Tih. 20:18; Isa. 39:7

⁴ ma nga hi majaha ya timbhuri ti nga hiko na vala, a titlhari, va yileko mahlweni hi gonziselelo ni wutivi, lava va fanelweko hi ku enghena ntirweni wa yindlu ya hosi, kasi wa va gonzisa a matsaiela ni lirimi la maKaldea.

⁵ A hosi yi lo leletela lezaku siku ni siku va nyikiwa a zakuga za hosi ni vinya legi a nwako yena; va wundliswa lezo xipimo xa malembe manharu, kasi loku ma mbhelile malembe lawo va ta zi tiva ku tirela hosi.

⁶ Xikari ka vona ku wa hi Danieli na Hanania na Mixaeli na Azaria, va lixaka la ka Juda.

⁷ Kanilezi a nduna ya mithenwa yi lo va chula mavito manwani: Danieli ava Beltexazzari, Hanania ava Xadrake, Mixaeli ava Mexake, na Azaria ava Abed-nego.

⁸ Danieli i lo funga mbilwini yakwe lezaku a nga ta ti nyenyezisa hi zakuga za hosi, hambu hi vinya legi yi nwako gona. Hikwalaho i lo kombela ka nduna ya mithenwa lezaku a nga kurumetwi ku ti nyenyezisa.

⁹ Makunu Nungungulu i lo maha Danieli a kuma thomo ni wuxinji mahlweni ka nduna ya mithenwa.

¹⁰ Kanilezi a nduna ya mithenwa yiku ka Danieli: Nza chava hosi a nwinyi wa mina, loyi a nga leletela a kuga ka nwina ni kunwa ka nwina; hakuva a nga dzuka a wona tinghohe ta nwina na ti wonzile ku hunza ta titanga-kuloni. Lezo mu wa ta rwexa nanzu ka hloko ya mina mahlweni ka hosi.

¹¹ Zonake Danieli i te ngalo ka nekwa leyi yi nga yimisilwe hi nduna ya mithenwa a kuva muhlayisi wa Danieli na Hanania na Mixaeli na Azaria:

¹² Nza ku kombela, wa nga ringa malanza ya wena a masiku ya khume, va hi nyika kuga matsawu ni kunwa mati.

¹³ Zonake u ta ringanisa a tinghohe ta hina ni ta majaha lawa ma phamelwako a zakuga za hosi; hi kona u ta nga maha kuranza ka wena hi malanza ya wena.

¹⁴ Zinghaho i lo vumela mhaka yabye, a va ringa khume ga masiku.

¹⁵ A masiku lawo ya khume loku ma hunzile, a tinghohe tabye ti lo woneka na ti hlekahleka, na va kulukile ku hunza a majaha wontihe lawa ma nga waga a kuga ka hosi.

¹⁶ Zonake a nekwa yi lo susa a zakuga ni vinya legi va ngaku va tanwa, yi va nyika matsawu.

¹⁷ A majaha laya ya mune Nungungulu i lo ma nyika a wutivi ni kupimisisa mitsalweni yontlhe ni wutlhari. Danieli i wa pimisisa miwoniso yontlhe ni miloro.

¹⁸ Loku ma chikele a masiku lawa a hosi yi nga ma yimisile lezaku va ta nehiwa ha wona, a nduna ya mithenwa yi lo va yisa mahlweni ka Nebukadnezzare.

¹⁹ A hosi yi lo wulawula zinwe navo; xikari kabye vontlhe i wa nga hi kona a nga ringana na Danieli na Hanania na Mixaeli na Azaria. Hikwalaho va lo nyikwa mitiro laha hosini.

²⁰ Ni xihi xikhati a hosi yi nga va wutisa hi timhaka ta wutlhari ni wutivi, yi lo va kuma lezaku va hunza hi ka khume a tinʼanga tontlhe ni vangoma lava va nga wa hi mufunweni wakwe wontihe.

²¹ Danieli i lo simamisa kota lezo kala a lembe legi hosi Kurusi a nga sangula ku fuma ha gona.