Luke 1 - TPV-RV (Thamma Pitakadaw)

¹ လေးစားအပ်ပါသော သော်ဖိလု၊ ကျွန်ုပ်တို့လောကတွင် ဖြစ်ပျက်ခဲ့သော အံ့ဖွယ်အကြောင်းအရာများကို

² အစဦးကပင် မျက်မြင်သက်သေဖြစ်ခဲ့ကြသောသူများနှင့် ဘုရားရှင်၏သတင်းစကားကို ဟောပြောသွန်သင်သူတို့ ပြောဆိုခဲ့ကြသည့်အတိုင်း လူများစွာတို့က ကျွန်ုပ်တို့ထံသို့ ရေးသားဖော်ပြခဲ့ကြပါသည်။

³ ထို့ကြောင့် ကျွန်ုပ်သည်လည်း ဖြစ်ပျက်ခဲ့သည့် အကြောင်းအရာအလုံးစုံတို့ကို ဂရုတစိုက် စုံစမ်းလေ့လာခဲ့ပြီး

⁴ သင်တို့ သင်ယူခဲ့ရသည့် အကြောင်းအရာတို့သည် မှန်ကန်ကြောင်းကို သိစေရန် သင်တို့ထံ ဤကဲ့သို့အစဉ်အတိုင်း ရေးသားလိုက်ရခြင်း ဖြစ်ပါသည်။

⁵ ယုဒပြည်၌ ဟေရုဒ်မင်းကြီး အုပ်စိုးသောအချိန်တွင် ဇာခရိအမည်ရှိသော ဂျူးပုရောဟိတ်သည် အဘိယဟုခေါ်သော ပုရောဟိတ်အဖွဲ့ဝင် တစ်ဦးဖြစ်လေ၏။ သူ၏ဇနီး ဧလိရှဗက်မှာလည်း အာရုန်ဟုခေါ်သော ပုရောဟိတ်၏မျိုးရိုးမှ ဆင်းသက်လာသူဖြစ်၏။

⁶ သူတို့နှစ်ဦးသည် ဘုရားရှင်၏ပညတ်တော်တို့ကို အမှားမရှိ လိုက်နာကြသဖြင့် ဘုရားရှင်၏ရှေ့တော်၌ ဖြောင့်မတ်သောသူyများ ဖြစ်ကြ၏။

⁷ သို့ရာတွင် သူတို့၌ သားသမီးမရှိကြချေ။ အဘယ်ကြောင့်ဆိုသော် ဧလိရှဗက်သည် မြုံသောကြောင့် သားသမီးထွန်းကားခြင်းမရှိဘဲ သူတို့နှစ်ဦးစလုံးမှာလည်း အသက်အရွယ် လွန်စွာအိုမင်းနေသောကြောင့်ဖြစ်ကြ၏။

⁸ တစ်နေ့တွင် ပုရောဟိတ်ဇာခရိသည် ဗိမာန်တော်z၌ အလှည့်ကျတာဝန်ကို ဆောင်ရွက်နေစဉ်

⁹ ဘုရားရှင်ကို အလုပ်အကျွေးပြုရသော ပုရောဟိတ်တို့၏ဓလေ့ထုံးစံအတိုင်း ဗိမာန်တော်ထဲတွင် အမွှေးနံ့သာထွန်းညှိပူဇော်ရန် မဲနှိုက်၍ ရွေးချယ်ရာ၌ သူ့အား ရွေးချယ်ခံရ၏။

¹⁰ သို့ဖြစ်၍ ဇာခရိသည် အမွှေးနံ့သာများ ထွန်းညှိပူဇော်နေသောအချိန်၌ လူအများသည် ဗိမာန်တော်ဝန်း၌ ရပ်လျှက်ဆုတောင်းနေကြ၏။

¹¹ ထိုအချိန်၌ ဘုရားရှင်စေလွှတ်တော်မူသော နတ်ဒေဝါaတစ်ပါးသည် ဇာခရိအမွှေးနံ့သာများ ထွန်းညှိပူဇော်နေရာ ပလ္လင်၏လက်ယာဘက်၌ သူ့အား ကိုယ်ထင်ပြလျှက် ရပ်နေသည်ကို

¹² ဇာခရိမြင်လျှင် သူသည် အလွန်ကြောက်လန့်၍ တုန်လှုပ်လေ၏။

¹³ သို့သော် နတ်ဒေဝါက သူ့အား “မကြောက်နှင့်၊ ဇာခရိ။ အကြောင်းမူကား၊ သင်၏ဆုတောင်းသံကို ဘုရားရှင်ကြားသိတော်မူပြီ။ သင့်ဇနီး ဧလိရှဗက်သည် သင့်အတွက် သားယောကျ်ားတစ်ဦးကို ဖွားမြင်ပေးလိမ့်မည်။ သင်သည် သူ့ကို ယောဟန်ဟု အမည်ပေးရမည်။

¹⁴ သူမွေးဖွားသည့်အချိန်၌ သင်တို့ အလွန်ရွှင်လန်းဝမ်းမြောက်ရသကဲ့သို့ အခြားသူများသည်လည်း ဝမ်းမြောက်ပျော်ရွှင်ရလိမ့်မည်။

¹⁵ အကြောင်းမူကား ယောဟန်သည် ဘုရားရှင်၏ရှေ့တော်မှောက်၌ ကြီးကျယ်မြင့်မြတ်သောသူဖြစ်လိမ့်မည်။ သူသည် ဘယ်သောအခါမျှ စပျစ်ရည်နှင့် အရက်သေစာတို့ကို သောက်သုံးလိမ့်မည်မဟုတ်။ မိခင်ဝမ်းထဲမှာ ရှိစဉ်ကတည်းကပင် သူသည် ဉာဏ်အလင်းတော်၏ဦးဆောင်ထိန်းချုပ်မှုအောက်တွင် ရှိနေလိမ့်မည်။

¹⁶ သူသည် များစွာသော အစ္စရေးလူမျိုးတို့ကို အပြစ်ဒုစရိုက်မှ နောင်တသံဝေဂရစေပြီး သူတို့၏အရှင်သခင်ဖြစ်တော်မူသော ဘုရားရှင်ဘက်သို့ ပြန်လှည့်စေလိမ့်မည်။

¹⁷ ယောဟန်သည် အရိယာသူတော်စင်cဧလိယကဲ့သို့ ဉာဏ်အလင်းတော်နှင့် တန်ခိုးတော်ရှိပြီး အရှင်သခင်၏ရှေ့တော်ပြေး ဖြစ်လိမ့်မည်။ သူသည် မိဘများမှ သားသမီးတို့အပေါ်ထားသည့် စိတ်နှလုံးကို ပြောင်းလဲစေပြီး နာခံခြင်းမရှိသောသူတို့အား ဖြောင့်မတ်မှန်ကန်သည့် အသိဉာဏ်ပညာတို့ကို သင်ပေးလိမ့်မည်။ ထိုမှသာ လူတို့သည်လည်း အရှင်သခင်ကြွရောက်လာချိန်၌ အဆင်သင့်ဖြစ်နေကြလိမ့်မည်” ဟုဆိုလေ၏။

¹⁸ ထိုအခါ ဇာခရိကလည်း နတ်ဒေဝါအား “ဤကဲ့သို့ ဖြစ်လာနိုင်မည်ဆိုသည်ကို အကျွန်ုပ်မည်ကဲ့သို့ သိနိုင်ပါမည်နည်း။ အကြောင်းမူကား အကျွန်ုပ်တို့ ဇနီးမောင်နှံနှစ်ဦးစလုံးသည် အလွန်ပင်အိုမင်းနေကြပါပြီ” ဟုပြန်ပြောလိုက်သဖြင့်

¹⁹ နတ်ဒေဝါက ဇာခရိအား “ငါသည် ဘုရားရှင်၏ရှေ့တော်၌ ခစားရသည့် ဂါဗြေလဖြစ်၏။ ဤမင်္ဂလာသတင်းကောင်းကို သင့်ထံ လာရောက်ဟောကြားဖို့ရန် ဘုရားရှင်သည် ငါ့အား စေလွှတ်လိုက်ခြင်းဖြစ်၏။

²⁰ အချိန်တန်လျင် ဖြစ်လာမည့် ငါ့စကားကို သင်မယုံကြည်သည့်အတွက် ထိုအဖြစ်အပျက်များ ဖြစ်မလာခင်အချိန်တိုင်အောင် သင်သည် စကားမပြောနိုင်ဘဲ ဆွံ့အနေလိမ့်မည်” ဟုဆိုလေ၏။

²¹ ထိုသို့ ဇာခရိနှင့် နတ်ဒေဝါတို့ ဗိမာန်တော်အတွင်း၌ စကားပြောနေကြစဉ် အပြင်ဘက်တွင်ရှိသော လူထုပရိသတ်တို့သည် ဇာခရိအား စောင့်ဆိုင်းလျှက် ရှိကြ၏။ သူတို့သည် ဗိမာန်တော်အတွင်းတွင် ဇာခရိအဘယ်ကြောင့် အချိန်ကြာမြင့်စွာ ရှိနေသည်ကို အံ့ဩလျက်ရှိကြ၏။

²² ဇာခရိ အပြင်သို့ ပြန်လည်ထွက်လာသည့်အချိန်တွင် စကားမပြောနိုင်တော့သဖြင့် ဗိမာန်တော်အတွင်း၌ရှိနေစဉ်က ဇာခရိသည် နိမိတ်လက္ခဏာတစ်ခုခုကို မြင်ခဲ့ရသည်ဟု လူထုပရိသတ်တို့က နားလည်သွားကြလေ၏။ ဇာခရိသည်လည်း စကားပြောနိုင်ခြင်းမရှိဘဲ လူတို့အား ဆက်လက်၍ ခြေဟန်လက်ဟန်ဖြင့်သာ အမူအရာများပြသနေခဲ့လေ၏။

²³ ထို့နောက် ဇာခရိသည် ဗိမာန်တော်၌ ပုရောဟိတ်တို့ ပြုလုပ်ရမည့် အမှုကိစ္စအဝဝတို့ကို ဆောင်ရွက်ပြီးစီးသောအခါ သူ၏အိမ်သို့ပြန်လေ၏။

²⁴ အချိန်အတန်ကြာသောအခါ ဇာခရိ၏ဇနီး ဧလိရှဗက်တွင် ကိုယ်ဝန်ရှိလာ၍

²⁵ သူမက “အရှင်ဘုရားသည် သူ၏မဟာကရုဏာတော်ဖြင့် ငါ့အား ကိုယ်ဝန်ဆောင်စေခြင်းအခွင့်ကိုပေးပြီး လူအများ၏ကဲ့ရဲ့အထင်သေးခြင်းမှ ငါ့အား ဖယ်ရှားပေးတော်မူခဲ့ပြီ” ဟုသူမကိုယ်သူမဆိုလျှက် ငါးလခန့် ကြာမြင့်သည်အထိ လူအများအကြားသို့ သွားလာခြင်းမပြုဘဲနေလေ၏။

²⁶ ထို့နောက် ဧလိရှဗက်ကိုယ်ဝန်ခြောက်လခန့်ရှိသောအခါ ဘုရားရှင်သည် နတ်ဒေဝါဂါဗြေလအား ဂါလိလဲပြည်ရှိ နာဇရက်မြို့သို့ စေလွှတ်ကာ

²⁷ မာရိဟုခေါ်သော အပျိုစင်တစ်ဦးထံသို့ သွားရောက်၍ သတင်းစကားပြောဆိုစေခဲ့၏။ မာရိသည် ဘုရင်ဒါဝိဒ်၏မျိုးရိုးမှ ဆင်းသက်လာသူဖြစ်သည့် ယောသပ်နှင့် စေ့စပ်ထားသူဖြစ်သည်။

²⁸ နတ်ဒေဝါက မာရိအား နှုတ်ခွန်းဆက်ပြီးနောက် “ဘုရားရှင်ဟာ သင်နှင့်အတူ ရှိတော်မူပြီး သူ၏မဟာကရုဏာမေတ္တာတော်ကို သင့်အပေါ်မှာ အခြားအမျိုးသမီးများ အားလုံးထက်သာ၍ ပြသလေပြီ” ဟုပြောကြားလေသည်။

²⁹ သို့သော် မာရိသည် နတ်ဒေဝါ၏စကားတို့ကို ကြားသောအခါ အလွန်ပင်စိတ်ရှုပ်ထွေးပြီး နတ်ဒေဝါ၏စကားများသည် မည်သည်ကိုဆိုလိုကြောင်း တွေးတောနေလေ၏။

³⁰ ထို့နောက် နတ်ဒေဝါက သူမအား “မာရိ၊ ကြောက်ရွံ့ခြင်းမရှိနှင့်။ အကြောင်းမူကား ဘုရားရှင်သည် သင့်အား မျက်နှာသာပေးတော်မူလေပြီ။

³¹ သင်၌ ကိုယ်ဝန်ဆောင်၍ သားတော်တစ်ပါးဖွားမြင်လိမ့်မည်။ သင်သည် သူ့အမည်ကို ယေရှုဟူ၍ မှည့်ခေါ်ရမည်။

³² သူသည် ကြီးမြတ်သောသူတစ်ဦးဖြစ်လာပြီး အမြင့်မြတ်ဆုံးသောဘုရားရှင်၏သားတော်ဟု ခေါ်ဝေါ်ခြင်းကို ခံရမည်။ ဘုရားရှင်သည် သူ့အား သူ၏ဘိုးဘေး ဘုရင်ဒါဝိဒ်ကဲ့သို့ သူ၏လူမျိုးများကို အုပ်စိုးနိုင်သည့်အခွင့်ကို ပေးအပ်တော်မူလိမ့်မည်။

³³ သူသည် အစ္စရေးလူမျိုးအပေါင်းတို့ကိုd ရှင်ဘုရင်အဖြစ် ထာဝရအုပ်စိုးတော်မူပြီး သူ၏နိုင်ငံတော်သည်လည်း အဘယ်သောအခါမျှ ပျက်သုန်းလိမ့်မည်မဟုတ်” ဟုဆိုလေ၏။

³⁴ ထိုအခါ မာရိက “အကျွန်ုပ်သည် အပျိုစင်တစ်ဦးဖြစ်သည့်အတွက် ဤအရာသည် မည်သို့ဖြစ်နိုင်ပါမည်နည်း” ဟုနတ်ဒေဝါအား ဆိုသဖြင့်

³⁵ နတ်ဒေဝါကလည်း “ဉာဏ်အလင်းတော်သည် သင့်ထံသို့ ဆင်းသက်၍ ဘုရားရှင်၏ဘုန်းတန်ခိုးတော်သည်လည်း သင့်အပေါ်၌ လွှမ်းခြုံလိမ့်မည်။ ဤကဲ့သို့ မွေးဖွားလာမည့် မြင့်မြတ်သောကလေးငယ်သည်လည်း ဘုရားရှင်၏သားတော်ဟု ခေါ်ဝေါ်ခြင်းခံရမည်။

³⁶ သင်၏ဆွေမျိုး ဧလိရှဗက်သည်လည်း အိုမင်းမစွမ်း၍ လူအများက ကိုယ်ဝန်မဆောင်နိုင်ဟု ထင်ကြသော်လည်း ယခုတွင်မူ သူမသည် ကိုယ်ဝန်ဆောင်နေသည်မှာ ခြောက်လခန့်ကြာမြင့်လေပြီ။

³⁷ အကြောင်းမူကား ဘုရားရှင် မတတ်နိုင်သည့်အရာဟူ၍ မရှိသောကြောင့်ဖြစ်၏” ဟုပြောဆိုလေသည်။

³⁸ ထိုအခါ မာရိက “ဘုရားရှင်၏အစေခံတစ်ဦးဖြစ်ပါသော အကျွန်ုပ်၌ ဘုရားရှင်၏အလိုတော်အရ သင်ယခုပြောဆိုသော စကားများအတိုင်းပင် ဖြစ်ပါစေသော်” ဟုဆိုလေ၏။ ထို့နောက် နတ်ဒေဝါသည်လည်း မာရိထံမှ ထွက်ခွာသွားလေ၏။

³⁹ များမကြာမီတွင် မာရိသည် အသင့်ပြင်၍ ဇာခရိနေထိုင်ရာ ယုဒပြည်ရှိ တောင်ပေါ်မြို့တစ်မြို့သို့ အလျင်အမြန်သွားလေ၏။

⁴⁰ ထိုနေရာသို့ရောက်သောအခါ သူမသည် ဇာခရိ၏အိမ်ထဲသို့ဝင်၍ ဇာခရိ၏ဇနီးဖြစ်သူ ဧလိရှဗက်အား နှုတ်ခွန်းဆက်လေ၏။

⁴¹ မာရိ၏နှုတ်ခွန်းဆက်စကားကို ကြားရသည်နှင့်တစ်ပြိုင်နက် ဧလိရှဗက်၏ဝမ်းထဲမှ ကလေးငယ်သည် လှုပ်ရမ်းကာ ဧလိရှဗက်သည်လည်း ဉာဏ်အလင်းတော်အားဖြင့် ဝမ်းမြောက်ရွှင်လန်းပြီး

⁴² သူမသည် မာရိအား “ဘုရားရှင်သည် အခြားသော အမျိုးသမီးများအားလုံးထက် သင့်အား သာ၍မင်္ဂလာရှိစေပြီး သင်မွေးဖွားလာမည့် ကလေးငယ်သည်လည်း မင်္ဂလာရှိပါ၏။

⁴³ ဤကဲ့သို့ အရှင်၏မယ်တော်သည် အကျွန်ုပ်ထံသို့ လာရသည့်အခွင့်ထူးကို အဘယ်ကြောင့်အကျွန်ုပ်ခံယူရပါသနည်း။

⁴⁴ အကြောင်းမူကား အသင်၏နှုတ်ခွန်းဆက်သံကို ကြားရသည်နှင့်ချက်ချင်း အကျွန်ုပ်၏ဝမ်းဗိုက်ထဲမှ ကလေးငယ်သည် ကြီးစွာသောပျော်ရွှင်မြူးတူးခြင်းဖြင့် လှုပ်ရမ်းပါ၏။

⁴⁵ ဘုရားရှင်၏သတင်းစကားသည် အမှန်တကယ်ပင် ဖြစ်လာလိမ့်မည်ဟု ယုံကြည်သောသင်သည်လည်း မင်္ဂလာရှိပါပေ၏” ဟုကျယ်လောင်သောအသံဖြင့် ဟစ်ကြွေးလေသည်။

⁴⁶ ထိုအခါ မာရိကလည်း “ဘုရားရှင်၏ကြီးမြတ်လှစွာသော ဘုန်းတန်ခိုးတော်ကို အကျွန်ုပ်၏စိတ်နှလုံးထဲမှ ချီးမွမ်းထောပနာပြုပါ၏။

⁴⁷ အကျွန်ုပ်၏စိတ်ဝိညာဉ်သည်လည်း ကယ်တင်ရှင်ဘုရားရှင်ထံတော်၌ အားရရွှင်လန်းပါ၏။

⁴⁸ အကြောင်းမူကား ဘုရားရှင်သည် သူ၏နိမ့်ကျသောအစေခံဖြစ်သည့် အကျွန်ုပ်ကို မေ့လျော့မထားပေ။ ယခုအချိန်မှစ၍ နောင်လာနောင်သားအပေါင်းတို့သည်အကျွန်ုပ်အား မင်္ဂလာရှိသောအမျိုးသမီးဟု ခေါ်ဝေါ်ကြလိမ့်မည်။

⁴⁹ အကြောင်းမူကား ဘုန်းတန်ခိုးကြီးမြတ်တော်မူသော ဘုရားရှင်သည် ကျွန်ုပ်ထံ၌ ကြီးမြတ်သောအရာတို့ကို ဆောင်ရွက်ပေးတော်မူလေပြီ။ သူ၏နာမတော်သည်လည်း မြင့်မြတ်စုံလင်တော်မူပါ၏။

⁵⁰ ခေတ်အဆက်ဆက်၌ ဘုရားရှင်သည် သူ့ကိုကြောက်ရွံ့ရိုသေသော သူတို့အား မဟာကရုဏာမေတ္တာတော်ကို အစဉ်အမြဲထင်ရှားစွာ ပြသတော်မူ၏။

⁵¹ သူသည် မာန်မာနထောင်လွှားသူ လူအပေါင်းတို့အား သူ၏တန်ခိုးတော်ဖြင့် လွင့်စင်စေတော်မူ၏။

⁵² သူသည် အုပ်စိုးသောသူတို့အား သူတို့၏ပလ္လင်ပေါ်မှ ဆွဲချ၍ နှိမ့်ချတတ်သူအပေါင်းတို့အား အရေးပါသောသူများ ဖြစ်စေပါ၏။

⁵³ သူသည် ဆာလောင်ငတ်မွတ်နေသောသူတို့ကို သူတို့လိုအပ်သည့်အရာတို့ဖြင့် ကျေနပ်နှစ်သိမ့်စေ၍ ကြွယ်ဝချမ်းသာသောသူတို့ကိုမူကား လက်ချည်းဗလာ စေလွှတ်တော်မူ၏။

⁵⁴ ဘုရားရှင်သည် ကျွန်ုပ်တို့၏ဘိုးဘေးဖြစ်သည့် အာဗြဟံနှင့် သူ၏မျိုးရိုးစဉ်ဆက်တို့အပေါ် အစဉ်ထာဝရ မဟာကရုဏာမေတ္တာတော်ထားရှိမည်ဟု ကတိတော်ထားခဲ့၏။

⁵⁵ ယခုအခါ၌ ဘုရားရှင်သည် သူ၏ကတိတော်ကို အောက်မေ့အမှတ်ရတော်မူလေပြီ။ ထို့ကြောင့် သူသည် အကျွန်ုပ်တို့နှင့် သူ၏အမှုတော်ကို ထမ်းဆောင်သူအစ္စရေးလူမျိုးအပေါင်းတို့ကို ကူညီမစတော်မူလေပြီ” ဟုဘုရားရှင်ကို ချီးမွမ်းထောပနာပြုလေ၏။

⁵⁶ ထို့နောက် မာရိသည် ဧလိရှဗက်နှင့်အတူ သုံးလခန့်နေထိုင်ခဲ့ပြီးနောက် သူမ၏အိမ်သို့ပြန်လေ၏။

⁵⁷ ထို့နောက် ဧလိရှဗက် မီးဖွားရန် အချိန်ကျလာသဖြင့် သားယောကျ်ားတစ်ဦးကို ဖွားမြင်လေ၏။

⁵⁸ သူမ၏အိမ်နီးချင်းများနှင့် ဆွေမျိုးများသည် သူမအပေါ် ၌ ဘုရားရှင်၏မဟာကရုဏာမေတ္တာတော်ကြီးမားပုံကို ကြားသိကြသဖြင့် သူမနှင့်ထပ်တူ ရွှင်လန်းဝမ်းမြောက်ကြရလေ၏။

⁵⁹ ထို့နောက် ကလေးငယ် မွေးဖွားပြီး ရှစ်ရက်မြောက်သောနေ့တွင် အရေဖျားလှီးမင်္ဂလာeကဲ့သို့သော ဆောင်ရွက်ရန်ဝတ္တရားများကို ဆောင်ရွက်ရန် လူများရောက်လာစဉ်တွင် သူတို့သည် ကလေးငယ်ကို ဖခင်ဖြစ်သူ၏အမည်ကိုယူ၍ ဇာခရိဟု အမည်ပေးလိုကြ၏။

⁶⁰ သို့သော် မိခင်ဖြစ်သူဧလိရှဗက်က ငြင်းဆန်ကာ “ထိုသို့မဟုတ်ပါ။ ကလေးငယ်အား ယောဟန်ဟု အမည်မှည့်ခေါ်ရမည်” ဟုဆိုလေ၏။

⁶¹ ထိုအခါ လူအပေါင်းတို့ကလည်း သူမအား “သို့သော် သင်၏မျိုးရိုး၌ ဤသို့သောအမည်ရှိသူ တစ်စုံတစ်ဦးမျှမရှိ” ဟုဆိုကြပြီးနောက်

⁶² သူတို့သည် ကလေးငယ်၏ဖခင်ဖြစ်သူ ဇာခရိအား လက်ဟန်ခြေဟန်ဖြင့် ကလေးငယ်ကို မည်ကဲ့သို့သောအမည်ကို မှည့်ခေါ်လိုသနည်းဟု မေးမြန်းကြလေ၏။

⁶³ ထိုအခါ ဇာခရိသည် ကျောက်သင်ပုန်းတစ်ချပ်ကို တောင်းယူလိုက်ပြီး သူ၏သားအမည်မှာ ယောဟန်ဖြစ်သည်ဟု ချရေးလိုက်သဖြင့် မြင်တွေ့ရသူ လူအပေါင်းတို့မှာလည်း အံ့အားသင့်သွားကြလေ၏။

⁶⁴ ထိုခဏချင်းတွင် ဇာခရိသည် ပြန်လည်စကားပြောလာနိုင်ကာ ဘုရားရှင်၏ဂုဏ်ကျေးဇူးတော်ကို စတင်ချီးမွမ်းလေ၏။

⁶⁵ အိမ်နီးချင်းများသည် ထိုအဖြစ်အပျက်ကို မြင်သောအခါ ကြောက်ရွံ့တုန်လှုပ်သွားခဲ့ကြလေ၏။ ထို့ပြင် လူအားလုံးတို့သည်လည်း ထိုသတင်းအား ယုဒပြည်တောင်ပေါ်ဒေသရှိ နေရာတိုင်း၌ ပြောဆိုနေကြလေတော့၏။

⁶⁶ ထိုသတင်းတို့ကို ကြားသိကြရသောသူအပေါင်းတို့ကလည်း “ဤကလေးငယ်ကြီးပြင်းလာသောအခါ မည်ကဲ့သို့သောသူ ဖြစ်မည်နည်း” ဟုသူတို့၏စိတ်နှလုံးထဲတွင် တီးတိုးပြောဆိုနေကြလေ၏။ အကြောင်းမူကား ဘုရားရှင်၏တန်ခိုးတော်သည်လည်း ကလေးငယ်နှင့် အတူရှိနေသောကြောင့်ဖြစ်၏။

⁶⁷ ထို့နောက် ကလေးငယ်၏ဖခင်ဖြစ်သူ ဇာခရိသည် ဉာဏ်အလင်းတော်၏ဦးဆောင်လမ်းပြမှုဖြင့် ဘုရားရှင်၏သတင်းစကားကို ဟောပြောသည်မှာ

⁶⁸ “အစ္စရေးလူမျိုးအားလုံးတို့၏ အရှင်သခင်ဖြစ်တော်မူသော ဘုရားရှင်၏ဂုဏ်ကျေးဇူးတော်ကို ချီးမွမ်းပါ၏။ သူသည် သူ၏လူမျိုးအပေါင်းတို့အား လွတ်မြောက်ခြင်းပေးရန် ရောက်လာလေပြီ။

⁶⁹ ဘုရားရှင်သည် မိမိ၏အစေခံဒါဝိဒ်မှ ဆင်းသက်လာသော တန်ခိုးအာဏာကြီးမားသည့် ကယ်တင်ရှင်အား ကျွန်ုပ်တို့အားလုံးအတွက် ပေးသနားတော်မူလေပြီ။

⁷⁰ ရှေးအချိန်ကပင် ဘုရားရှင်သည် သူ၏မြင့်မြတ်သော အရိယာသူတော်စင်များမှတဆင့် မိန့်ကြားခဲ့သည့်အတိုင်း

⁷¹ ဤတန်ခိုးကြီးသောကယ်တင်ရှင်သည် ကျွန်ုပ်တို့အား ရန်သူအပေါင်း၏လက်မှ ကယ်တင်မည့်အပြင် ကျွန်ုပ်တို့အား မလိုမုန်းတီးသူများ၏ဘေးအန္တရာယ်မှလည်း ကင်းလွတ်စေမည်ဖြစ်ပါ၏။

⁷² ဘုရားရှင်သည် ကျွန်ုပ်တို့၏ဘိုးဘေးများအပေါ် မဟာကရုဏာမေတ္တာတော်ကို ပြသတော်မူမည် ဖြစ်ကြောင်းနှင့် သူ၏မြင့်မြတ်သောပဋိညာဉ်ကို အောက်မေ့အမှတ်ရတော်မူလိမ့်မည်ဟု မိန့်တော်မူခဲ့၏။

⁷³ ဘုရားရှင်က ကျွန်ုပ်တို့၏ဘိုးဘေးဖြစ်သည့် အာဗြဟံကို ပေးထားခဲ့သည့်ကတိတော်အတိုင်း

⁷⁴ ကျွန်ုပ်တို့အား ဘေးအန္တရာယ်ပြုသူ ရန်သူများလက်မှ လွတ်မြောက်စေပြီး

⁷⁵ အကျွန်ုပ်တို့သည် အသက်ရှင်နေသမျှကာလပတ်လုံး ဘုရားရှင်၏ရှေ့တော်မှောက်၌ မြင့်မြတ်ခြင်းနှင့် ဖြောင့်မတ်ခြင်းရှိလျက် အကြောက်တရားကင်းဝေးစွာဖြင့် ဘုရားရှင်ကို အလုပ်အကျွေးပြုနိုင်ကြလိမ့်မည်” ဟူ၍ဖြစ်၏။

⁷⁶ ထို့နောက် ဇာခရိသည် သူ၏ကလေးငယ်အား “ငါ၏သားငယ်၊ သင့်ကို အမြင့်မြတ်ဆုံးသောဘုရားရှင်၏အရိယာသူတော်စင်ဟု ခေါ်ဝေါ်ချီးမြှင့်ကြလိမ့်မည်ဖြစ်ပြီး သင်သည် အရှင်သခင်၏ရှေ့ကသွား၍ သူ၏လမ်းကို ကြိုတင်ပြင်ဆင်ပေးရမည့်သူလည်း ဖြစ်ပေလိမ့်မည်။

⁷⁷ အရှင်ဘုရားသည် လူတို့၏အပြစ်ဒုစရိုက်များကို ခွင့်လွှတ်တော်မူခြင်းအားဖြင့် ကယ်တင်ခြင်းအခွင့်ကို ပေးအပ်ရန် ရောက်လာတော့မည်ဖြစ်ကြောင်းကို သင်သည် လူတို့အား ဟောပြောရပေလိမ့်မည်။

⁷⁸ ဘုရားရှင်သည် အကျွန်ုပ်တို့အပေါ်၌ မဟာကရုဏာမေတ္တာတော်ကြီးမားလှသည့်အတွက် သူ၏လူမျိုးတော်များကို ကယ်တင်တော်မူမည်ဖြစ်၏။

⁷⁹ ကောင်းကင်မှ မိုးသောက်အရုဏ်ဦးနေမင်းသည် အမှောင်ထုကို ဖယ်ရှားသကဲ့သို့ ဘုရားရှင်ထံတော်မှ လာသည့် ကယ်တင်ရှင်မေရှိယအရှင်သည်လည်း ဘုရားရှင်ကို မသိမမြင်ကြသူများနှင့် သေခြင်းတရားကို ကြောက်ရွံ့ကြသူများကို ကူညီမစဖို့ရန် ကြွရောက်လာပါလိမ့်မည်ဖြစ်ပြီး သူသည် အားလုံးသောသူတို့အား ငြိမ်းချမ်းသာယာသည့်လမ်းသို့ ဦးဆောင်လမ်းပြပေးတော်မူပါလိမ့်မည်” ဟုဆိုလေ၏။

⁸⁰ ယခုအခါ၌ ယောဟန်သည်လည်း အရွယ်ရောက်လာပြီး အကျင့်သီလနှင့်ပြည့်စုံသူဖြစ်လာပြီးနောက် ဘုရားရှင်သည် သူ့အား အစ္စရေးလူမျိုးတို့ရှေ့၌ အမှုတော်ကို စတင်ဆောင်ရွက်စေလိုသော နေ့ရက်မတိုင်မီအထိ သူသည် တောကန္တာရထဲတွင် ကျင်လည်နေခဲ့လေသည်။