ཟེ་ཕན་ཡཱ། 1 - Tibetan Old Testament 2011

¹ ཨམ་མོན་གྱི་བུ་ཡོ་ཤི་ཡཱས་ཡ་ཧུ་དཱའི་ཡུལ་དུ་སྲིད་སྐྱོང་བྱེད་སྐབས་གཙོ་བོ་དཀོན་མཆོག་གིས་ཛེ་ཕན་ཡཱའི་བརྒྱུད་ནས་འཕྲིན་གནང་བ། ཡང་ཛེ་ཕན་ཡཱ་ནི་ཀུཤའི་བུ། ཀུ་ཤི་ནི་གྷེ་ད་ལི་ཡཱའི་བུ། གྷེ་དལ་ཡཱ་ནི་ཨ་མར་ཡཱའི་བུ། ཨ་མཱ་རི་ཡཱ་ནི་རྒྱལ་པོ་ཧེ་ཛི་ཀི་ཡཱའི་བུ་བཅས་ཡིན་ནོ༎

གཙོ་བོ་དཀོན་མཆོག་གིས་ཁྲིམས་གཅོད་ཀྱི་ཉིན་མོ།

² ངས་ས་གཞིའི་ངོས་ལ་ཡོད་པ་ཚང་མ་མེད་པ་བཟོ་རྒྱུ་ཡིན་ཞེས་གཙོ་བོ་དཀོན་མཆོག་གིས་གསུངས་སོ།

³ མི་དང་དུད་འགྲོ་དང་འདབ་ཆགས་དང་ཉའི་རིགས་ཚང་མ་མེད་པར་བྱེད་རྒྱུ་ཡིན། ངས་མི་ངན་རྣམས་ཚར་གཅོད་རྒྱུ་ཡིན། མི་རིགས་རྣམས་གཅིག་ཀྱང་མ་ལུས་པར་མེད་པར་བྱེད་རྒྱུ་ཡིན་ཞེས། ང་གཙོ་བོ་དཀོན་མཆོག་གི་སྨྲས་པ་ཡིན་ནོ།

⁴ ངས་ཡེ་རུ་ཤ་ལེམ་དང་ཡ་ཧུ་དཱའི་ཡུལ་མི་རྣམས་ལ་ཉེས་ཆད་གཏོང་རྒྱུ་ཡིན། དེར་ཡོད་པའི་བྷལ་གྱི་མཆོད་པའི་མཐའ་མར་ཤུལ་ཀྱང་མ་ལུས་པར་མེད་པར་བཟོས་ཏེ། དེ་ལ་བསྙེན་བཀུར་ཞུ་མཁན་ཕྱི་པའི་བླ་མ་རྣམས་ལ་སུས་ཀྱང་དྲན་གསོ་བྱེད་མི་ཐུབ་པ་བཟོ་རྒྱུ་ཡིན།

⁵ དེ་བཞིན་ཁང་པའི་ཐོག་ཏུ་འཛེགས་ནས་ཉི་མ་དང་ཟླ་བ་དང་རྒྱུ་སྐར་བཅས་ལ་བསྙེན་བཀུར་བྱེད་མཁན་རྣམས་ལ་ངས་མེད་པར་བཟོ་རྒྱུ་ཡིན། ང་ལ་བསྙེན་བཀུར་བྱེད་ཚུལ་བྱས་ནས་དམ་ཚིག་བསྲུང་རྒྱུའི་ཁ་ཆད་བྱས་རུང་། མོ་ལེག་ལྷའི་མིང་བརྗོད་དེ་མནའ་སྐྱེལ་མཁན་རྣམས་ཀྱང་ངས་མེད་པར་བཟོ་རྒྱུ་ཡིན།

⁶ དེ་བཞིན་ང་ལ་དད་ལོག་བྱས་ཏེ་ངའི་རྗེས་སུ་མི་འབྲངས་བར། ལམ་སྟོན་དང་འགོ་འཁྲིད་ཞུ་བར་ངའི་རྩར་མི་ཡོང་མཁན་རྣམས་ལའང་ངས་མེད་པར་བཟོ་རྒྱུ་ཡིན་ཞེས་གསུངས་སོ།

⁷ གཙོ་བོ་དཀོན་མཆོག་གིས་ཉིན་མོ་དེ་ནི་ཉེ་བར་རན་པས། དེ་ཉིན་ཁོང་གིས་ཁྲིམས་གཅོད་གནང་སྐབས་ཁོང་གི་སྤྱན་སྔར་ཁྱོད་ཚོ་ཁུ་སིམ་མེར་སྡོད་ཅིག གང་ལགས་ཟེར་ན་གཙོ་བོ་དཀོན་མཆོག་གིས་ཉིད་ཀྱི་མི་འབངས་རྣམས་དམར་མཆོད་འབུལ་ཕྱིར་གྲ་སྒྲིག་མཛད་བཞིན་པ་ཡིན་ནོ། ཡ་ཧུ་དཱ་ལ་འཕྲོག་བཅོམ་བྱེད་ཕྱིར་དགྲ་བོ་རྣམས་ལ་མགྲོན་འབོད་གནང་ཡོད་དོ།

⁸ ཡང་གཙོ་བོ་དཀོན་མཆོག་གིས། དམར་མཆོད་ཀྱི་ཉིན་མོ་དེ་ལ། ངས་ལས་བྱེད་པ་རྣམས་དང་། རྒྱལ་སྲས་རྣམས་དང་། གཞན་ཡང་ཕྱི་རྒྱལ་བའི་ལུགས་སུ་འབྲངས་མཁན་རྣམས་ལ་ཉེས་ཆད་གཏོང་རྒྱུ་ཡིན།

⁹ ཡང་ཕྱི་པའི་བསྙེན་བཀུར་བྱེད་སྟངས་བཞིན་དུ་བྱེད་མཁན་དང་། འཕྲོག་བཅོམ་བྱས་ཏེ་སྲོག་གཅོད་བྱས་པའི་རྒྱུ་ནོར་གྱིས་རང་གི་དཔོན་པོའི་བང་མཛོད་བཀང་བར་བྱེད་མཁན་རྣམས་ལ་ངས་ཉེས་ཆད་ངེས་པར་དུ་གཏོང་རྒྱུ་ཡིན་ཞེས་གསུངས་སོ།

¹⁰ ཡང་གཙོ་བོ་དཀོན་མཆོག་གིས། དེ་ཉིན་ཡེ་རུ་ཤ་ལེམ་གྱི་ཉ་སྒོའི་འགྲམ་དུ་ངུ་འབོད་འདོན་པ་གོ་བ་དང་། གྲོང་ཁྱེར་གྱི་གྲོང་གསར་པའི་ཕྱོགས་ནས་སྨྲེ་སྔགས་ཀྱི་སྐད་དང་། དེ་བཞིན་རི་ཕྲན་ཕན་ཚུན་ནས་འཇིགས་སྐྲག་གི་སྒྲ་ཆེན་པོ་འབྱུང་རྒྱུ་ཡིན་པ་དང་།

¹¹ དེ་ཐོས་སྐབས་ཁྱོད་ཚོ་གྲོང་ཁྱེར་གྱི་སྨད་དུ་གནས་སྡོད་བྱེད་མཁན་རྣམས་སྨྲེ་སྔགས་དང་ངུ་འབོད་འདོན་དགོས་སོ། གང་ལགས་ཟེར་ན། དེ་དུས་ཚོང་པ་ཐམས་ཅད་ཤི་ཚར་བ་ཡིན་པའི་ཕྱིར་རོ།

¹² སྐབས་དེར་ངས་སྒྲོན་མེ་ཞིག་འཁྱེར་ནས་ཡེ་རུ་ཤ་ལེམ་ནང་དུ་འཚོལ་རྒྱུ་ཡིན། གཙོ་བོ་དཀོན་མཆོག་གིས་བྱིན་རླབས་དང་ཉེས་ཆད་སོགས་གང་ཡང་གནང་མི་ཡོང་ཞེས་བསམ་ནས་བག་མེད་ལྷོད་ཡངས་སུ་གནས་མཁན་རྣམས་ལ་ངས་ཉེས་ཆད་ངེས་པར་གཏོང་རྒྱུ་ཡིན་ནོ།

¹³ དེ་ཚོའི་རྒྱུ་ནོར་ཐམས་ཅད་འཕྲོག་པ་དང་གནས་ཁང་རྣམས་ཀྱང་སྟོར་བཤིག་གཏོང་བར་འགྱུར། དེ་ཚོས་ད་ལྟ་ཁང་པ་གསར་རྒྱག་བྱེད་བཞིན་པའི་ནང་དུ་ནམ་ཡང་སྡོད་རྒྱུ་མི་ཡོང་ངོ་། ད་ལྟ་འདེབས་ལས་བྱེད་བཞིན་པའི་རྒུན་ཚལ་ལས་རྒུན་ཆང་ནམ་ཡང་འཐུང་རྒྱུ་མི་ཡོང་ཞེས་གསུངས་སོ།

¹⁴ གཙོ་བོ་དཀོན་མཆོག་གི་ཉིན་མོ་ཆེན་པོ་དེ་ནི་ཉེ་བ་དང་། ཧ་ཅང་ཉེ་བར་བསླེབས་བཞིན་ཡོད། དངངས་སྐྲག་ཆེ་བའི་ཉིན་མོ་དེ་ལ་དཔའ་བོ་སྙིང་སྟོབས་ལྡན་པ་ཚོའང་རེ་ཐབས་ཟད་དེ་ངུ་སྐད་འདོན།

¹⁵ ཉིན་མོ་དེ་ནི། ཁྲོ་བའི་ཉི་མ་དང་། དཀའ་ངལ་དང་བློ་ཕམ་གྱི་ཉི་མ་དང་། མུན་པ་དང་ཡིད་མུག་བཅས་ཀྱི་ཉི་མ་དང་། གཞན་ཡང་སྤྲིན་པ་ནགས་པོ་འཁོར་བའི་ཉིན་མོ་བྱུང་བར་འགྱུར།

¹⁶ དམག་དུང་གི་སྒྲ་དང་ལྕགས་རིས་བསྐོར་བའི་གྲོང་ཁྱེར་ཁག་དང་མཁར་རྫོང་མཐོན་པོ་རྣམས་ལ་དམག་མི་ཚོས་དམག་བརྒྱབ་པའི་སྒྲ་ཐོས་པར་འགྱུར་རོ།

¹⁷ ཡང་གཙོ་བོ་དཀོན་མཆོག་གིས། ངས་མི་རིགས་ཀུན་གྱི་ཐོག་ཏུ་རྐྱེན་ངན་དེ་འདྲ་བཏང་བའི་སྒོ་ནས་དེ་ཚོ་ཚང་མ་ལོང་བ་བཞིན་དུ་འགྲུལ་དགོས་པ་ཞིག་ཆགས་རྒྱུ་ཡིན་ནོ། གང་ལ་ཟེར་ན་དེ་ཚོས་ངའི་བཀའ་དང་འགལ་བའི་ཉེས་སྡིག་བྱས་པས། དེ་ཚོའི་ཁྲག་ནི་ཆུ་བཞིན་འདོན་རྒྱུ་དང་། དེ་ཚོའི་རོ་རྣམས་ས་ཁར་རུལ་ནས་ལུས་རྒྱུ་ཡིན་ཞེས་གསུངས་སོ།

¹⁸ གཙོ་བོ་དཀོན་མཆོག་གིས་ཐུགས་ཁྲོ་མཛད་པའི་ཉིན་མོ་དེ་ལ། གསེར་དང་དངུལ་གྱིས་ཀྱང་དེ་ཚོ་སྐྱབས་མི་ཐུབ། ཁོང་གི་ཐུགས་ཁྲོའི་མེ་སྤུང་དྲག་པོས་ས་གཞི་ཐམས་ཅད་ཡོངས་སུ་འཇིག་རྒྱུ་ཡིན། ཁོང་གིས་འཛམ་གླིང་གི་མི་རིགས་ཀུན་ལ་བློ་བུར་དུ་ཡོངས་སུ་ཚར་གཅོད་མཛད་རྒྱུ་ཡིན་ནོ༎