རུ་ཐི། 1 - Tibetan Old Testament 2011

ཨེ་ལི་མེ་ལེག་ནང་མི་དང་བཅས་པ་མོ་ཨབ་ཡུལ་དུ་གནས་སྤོས་བྱེད་པ།

^1-2 ལོ་མང་སྔོན་དུ་ཨིསི་རཱཨེལ་ཡུལ་དུ་རྒྱལ་པོ་མེད་པའི་དུས་ཤིག་ན་དེར་མུ་གེ་ཞིག་བྱུང་བས། མིང་ལ་ཨེ་ལི་མེ་ལེག་ཞེས་པའི་མི་ཞིག་རང་གི་བཟའ་ཟླ་ན་ཨོ་མི་དང་། དེ་ཚོའི་བུ་གཉིས་ཀྱི་མིང་ལ་མཱ་ལོན་དང་ཀིལ་ཡོན་བཅས་ནང་མི་ཆ་ཚང་འཁྲིད་ནས་ཡ་ཧུ་དཱ་ཡུལ་གྱི་བྷེད་ལེ་ཧེམ་ནས་མོ་ཨབ་ཡུལ་དུ་གནས་སྐབས་རིང་སྡོད་གནས་སྤོས་སོ། ཨེ་ལི་མེ་ལེག་ནི་ཨེཕ་རད་ཀྱི་རིགས་རུས་ནས་ཡིན་ཞིང། ཡང་དེ་ཚོ་མོ་ཨབ་ཡུལ་དུ་གནས་སྡོད་བྱེད་སྐབས།

³ ཨེ་ལི་མེ་ལེག་ཤི་བས། ན་ཨོ་མི་བུ་གཉིས་དང་མཉམ་དུ་བསྡད་དོ།

⁴ དེ་རྗེས་བུ་གཉིས་པོས་མོ་ཨབ་ཡུལ་གྱི་བུ་མོ་གཉིས་ཀྱི་མིང་ལ་ཨོར་པཱ་དང་རུད་སོ་སོའི་བཟའ་ཟླར་བླངས་ནས་ལོ་ བཅུ་ཙམ་སོང་བའི་རྗེས་སུ།

⁵ མཱ་ལོན་དང་ཀིལ་ཡོན་གཉིས་ཀ་ཤི་བས། ན་ཨོ་མི་རང་གི་བཟའ་ཟླ་དང་བུ་གཉིས་དང་ཁ་བྲལ་ནས་མོ་རང་གཅིག་པུར་ལུས་པ་ཡིན་ནོ༎

ན་ཨོ་མི་དང་རུད་བྷེད་ལེ་ཧེམ་དུ་ཕྱིར་ལོག་བྱེད་པ།

⁶ ལོ་ཤས་རྗེས་སུ་གཙོ་བོ་དཀོན་མཆོག་གིས་རང་གི་མི་དམངས་རྣམས་ལ་བྱིན་རླབས་གནང་སྟེ་ལོ་ཐོག་བཟང་པོ་བྱུང་བའི་སྐོར་ན་ཨོ་མིས་ཐོས་ནས་མོ་རང་གི་མནའ་མ་གཉིས་དང་མཉམ་དུ་མོ་ཨབ་ཡུལ་ནས་རང་ཡུལ་དུ་ལོག་རྩིས་བྱས་སོ།

⁷ ཡ་ཧུ་དཱ་རུ་ཕྱིར་ལོག་བྱེད་ཕྱིར་དེ་ཚོ་ལྷན་གཅིག་ཏུ་ཐོན་ཞིང་།

⁸ ལམ་དུ་མོས་རང་གི་མནའ་མ་གཉིས་ལ། ད་ཁྱོད་གཉིས་རང་རང་སོ་སོའི་ཨ་མའི་ནང་དུ་སོང་ཞིག ཁྱོད་གཉིས་ཀྱིས་ང་དང་ངའི་བུ་གཉིས་ལ་དྲིན་བྱས་པ་ནང་བཞིན། གཙོ་བོ་དཀོན་མཆོག་གིས་ཀྱང་ཁྱོད་གཉིས་ལ་བྱིན་རླབས་གནང་བར་ཤོག

⁹ ཁོང་གི་ཐུགས་རྗེས་ཁྱོད་གཉིས་ལ་ཁྱོ་གསར་པ་ཞིག་ཐོབ་ནས་སླར་ཡང་གཞིས་ཚུགས་པར་ཤོག་ཅེས་སྨྲས་ནས། ཡུལ་གྱི་སྲོལ་བཞིན་ཁོ་གཉིས་ལ་འོ་སྐྱེལ་ནས་སོ་སོར་ཁ་གྱེས་སྐབས།

¹⁰ ཁོ་གཉིས་ངུ་འབོད་འདོན་ཞིང་། ང་གཉིས་ཁྱེད་དང་མཉམ་དུ་ཁྱེད་ཀྱི་མི་རིགས་ཡོད་སར་འགྲོ་གི་ཡིན་ཞེས་སྨྲས་པ་དང་།

¹¹ ན་ཨོ་མིས་ལན་དུ། ངའི་བུ་མོ་ཁྱོད་གཉིས་རང་གི་ཨ་མའི་ནང་དུ་ངེས་པར་ལོག་འགྲོ་དགོས། ག་རེ་བལྟས་ནས་ངའི་གཞུག་ལ་ཡོང་གི་ཡོད་དམ། ཁྱོད་གཉིས་ལ་བཟའ་ཟླར་ཕན་ཆེད་དུ་ང་ལ་སྐྱར་དུ་བུ་སྐྱེ་ཐུབ་བམ།

¹² དེ་བས་ན་ཁྱོད་གཉིས་རང་རང་སོ་སོའི་ནང་དུ་ལོག་ཅིག ང་ནི་རྒས་ཤིང་ཁྱོ་ལེན་པའི་འོས་བབས་ཀྱང་མེད། གལ་སྲིད་དེ་ལྟར་བྱེད་པའི་རེ་ཐབས་ཡོད་ནའང་། དོ་དགོང་རང་ངས་ཁྱོ་ཞིག་ལེན་ནས་ང་ལ་བུ་སྐྱེས་པའི་དབང་དུ་བཏང་ནའང་།

¹³ དེ་ཚོ་ལོ་ན་མ་ལོན་པའི་བར་དུ་ཁྱོད་གཉིས་མི་གཞན་དང་ཆང་ས་མ་བརྒྱབས་པར་སྒུག་ནས་སྡོད་ཀྱི་ཡིན་ནམ། ཀྱེ་ངའི་བུ་མོ་ཚོ། དེ་ནི་མ་སྲིད་པ་ཞིག་ཡིན། གཙོ་བོ་དཀོན་མཆོག་གི་ང་ལ་ཐུགས་མི་མཉེས་པས། ཁྱོད་ཚོའི་དོན་དུ་ཧ་ཅང་སེམས་ཁྲལ་ཆེན་པོ་ཡོད་ཅེས་སྨྲས་པ་དང་།

¹⁴ ཁོ་གཉིས་སྐྱར་དུ་ངུས་སོ། དེ་རྗེས་ཨོར་པཱས་རང་གི་གྱོས་མོ་ལ་འོ་སྐྱེལ་ནས་རང་གི་ནང་དུ་ལོག་གོ འོན་ཀྱང་རུད་ཀྱིས་རང་གི་གྱོས་མོ་ལ་མ་སྤངས་སོ།

¹⁵ དེ་ནས་ན་ཨོ་མིས་རུད་ལ། ཨོར་པཱ་ནི་རང་གི་མི་རིགས་དང་སོ་སོའི་ལྷ་རྟེན་རྣམས་ཀྱི་ཕྱོགས་སུ་ལོག་ཕྱིན་པས། ཁྱོད་རང་ཡང་དེ་བཞིན་བྱོས་ཤིག་ཅེས་སྨྲས་ཀྱང་།

¹⁶ རུད་ཀྱིས་དེའི་ལན་དུ། ཁྱེད་རང་སྤངས་ནས་འགྲོ་དགོས་ཅེས་ཁྱེད་ཀྱིས་ང་ལ་ནན་ཏན་ཆེན་པོས་མ་གསུངས་རོགས་གནང་། ང་ཁྱེད་དང་མཉམ་དུ་འཁྲིད་རོགས་གནང་། ཁྱེད་རང་གང་དུ་ཕེབས་རུང་དེར་འགྲོ་གི་ཡིན། ཁྱེད་རང་གང་དུ་བཞུགས་རུང་དེ་གར་ངའང་བསྡད་ཀྱི་ཡིན། ཁྱེད་ཀྱི་མི་རིགས་དེ་ངའི་མི་རིགས་དང་ཁྱེད་ཀྱི་དཀོན་མཆོག་དེ་ངའི་དཀོན་མཆོག་ཏུ་ངོས་འཛིན་ཞུ་རྒྱུ་ཡིན།

¹⁷ ཁྱེད་རང་འཆི་ས་དེར་ངའང་ཤི་ནས་དུར་དུ་འཇུག་རྒྱུ་ཡིན། འཆི་བའི་རྐྱེན་གྱིས་མ་གཏོགས་གཞན་གང་གིས་ཀྱང་ང་ཁྱེད་དང་ཁ་འཕྲལ་མི་ཡོང་། གལ་སྲིད་དེ་ལྟར་བྱུང་བ་ཡིན་ན་གཙོ་བོ་དཀོན་མཆོག་གི་ཆད་པ་དྲག་པོ་དེ་ངའི་ཁར་འཕོག་པར་ཤོག་ཅེས་སྨྲས་པ་དང་།

¹⁸ ན་ཨོ་མིའི་སེམས་ལ། ད་རུད་ང་དང་མཉམ་དུ་འགྲོ་རྒྱུ་བློ་ཐག་གཙང་མ་བཅད་བཞག་བསམས་ནས་གཞན་གང་ཡང་མ་ལབ་བོ།

¹⁹ དེ་ནས་ཁོ་གཉིས་ཕྱིན་ཏེ་བྷེད་ལེ་ཧེམ་དུ་བསླེབས་པ་དང་། གྲོང་ཁྱེར་ནང་སྐད་གྲགས་ཆེན་པོ་བྱུང་ནས་བུད་མེད་རྣམས་ཀྱིས་དེ་ན་ཨོ་མི་རང་རེད་པས་ཤེས་དྲི་བ་ལེན་པའི་སྐབས།

²⁰ མོས་ང་ལ་ན་ཨོ་མི་མ་ཟེར་བར། མ་ར་ཞེས་ཟེར་ཞིག གང་ལ་ཟེར་ན་ཀུན་དབང་ལྡན་པའི་དཀོན་མཆོག་གིས་ངའི་མི་ཚེ་ཁག་ཏིག་བཟོས་གནང་བས་ཕྱིར་རོ།

²¹ ང་འདི་ནས་ཐོན་སྐབས་ང་ལ་གང་དགོས་པ་ཆ་ཚང་ཡོད་དོ། འོན་ཀྱང་ད་ཆ་གཙོ་བོ་དཀོན་མཆོག་གིས་ང་ལ་ལག་པ་སྟོང་པ་ཕྱིར་ལོག་འཁྲིད་ཕེབས་ཡོད། ཀུན་དབང་ལྡན་པའི་གཙོ་བོ་དཀོན་མཆོག་གིས་ང་ལ་ཆད་པ་གནང་སྟེ་ངའི་ཐོག་ཏུ་དཀའ་ངལ་མང་པོ་བྱུང་བ་མཐོང་བཞིན་དུ་ཁྱོད་ཚོས་ང་ལ་ན་ཨོ་མི་ག་རེའི་དོན་ལ་ཟེར་ཞེས་སྨྲས་སོ།

²² དེ་ལྟར་ན་ཨོ་མི་རང་གི་མནའ་མ་རུད་དང་མཉམ་དུ་མོ་ཨབ་ཡུལ་ནས་ཕྱིར་ལོག་བྱས་པས། སྟོན་ཐོག་ཐོག་མར་རྔ་རན་པའི་སྐབས་སུ་ཁོ་གཉིས་བྷེད་ལེ་ཧེམ་དུ་འབྱོར་རོ༎