ནཱ་ཧུམ། 1 - Tibetan Old Testament 2011

¹ ཨེལ་ཀོཤ་དུ་སྡོད་མི་ན་ཧུམ་གྱིས་མཐོང་བའི་ཞལ་གཟིགས་ཀྱི་ཚུལ་དུ་གྲོང་ཁྱེར་ནི་ན་ཝཱེའི་སྐོར་ལ་འཕྲིན་འདི་ཡིན་ནོ།

ནི་ན་ཝཱེའི་ཐོག་ཏུ་གཙོ་བོ་དཀོན་མཆོག་གི་ཐུགས་ཁྲོ།

² དཀོན་མཆོག་གཙོ་བོ་དཀོན་མཆོག་གིས་ཁ་གཏད་རྣམས་ལ་ཐུགས་བཟོད་མི་གནང་བ་དང་། ཁོང་ལ་རྒོལ་མཁན་རྣམས་ལ་ཉེས་ཆད་གནང་ངོ་། ཁོང་གི་ཐུགས་ཁྲོའི་ངང་དེ་ཚོ་ལ་དགྲ་ལེན་གནང་ངོ་།

³ གཙོ་བོ་དཀོན་མཆོག་ནི་ཐུགས་ཁྲོ་བར་ངང་རིང་བ་དང་། ཁོང་ནི་མཐུ་སྟོབས་ཆེ་ཞིང་། ཉེས་སྐྱོན་རྣམས་ནི་སྐྱོན་མེད་དུ་རྩིས་བ་མི་གནང་ངོ་། གཙོ་བོ་དཀོན་མཆོག་གི་ཞབས་ཆགས་སར་རླུང་འཚུབ་ལངས་བ་དང་། ནམ་མཁའི་སྤྲིན་རྣམས་ནི་ཁོང་གི་ཞབས་ཀྱིས་སླངས་པའི་རྡུལ་ལས་བྱུང་བ་ཡིན་ནོ།

⁴ ཁོང་གི་བཀའ་གནང་བ་ཙམ་གྱིས་རྒྱ་མཚོ་དང་གཙང་པོ་རྣམས་སྐམ་ཞིང་། བྷ་ཤཱན་ཡུལ་གྱི་སྤང་རྣམས་ཀྱང་སྐམ་པ་དང་། རི་བོ་ཀར་མེལ་སྟོངས་པར་འགྱུར་བ་དང་། ལེ་བ་ནོན་ཡུལ་གྱི་མེ་ཏོག་རྣམས་ཀྱང་རྙིད་པར་འགྱུར།

⁵ གཙོ་བོ་དཀོན་མཆོག་གི་སྤྱན་སྔར་རི་བོ་རྣམས་འགུལ་ཏེ་རི་ཕྲན་རྣམས་བཞུར་བ་དང་། ས་གཞི་ཡོངས་རྫོགས་གཡོ་ཞིང་། དེའི་ནང་དུ་གནས་བའི་མི་དང་བཅས་པ་ཐམས་ཅད་འཇིགས་ཤིང་འདར་རོ།

⁶ ཁོང་གི་ཐུགས་ཁྲོའི་མདུན་དུ་གསོན་པོར་སུ་ཞིག་གནས་ཐུབ་བམ། ཁོང་གི་ཐུགས་ཁྲོ་དྲག་པོ་དེ་ལ་སུས་གདོང་ལེན་བྱེད་ཐུབ་བམ། ཁོང་གི་ཐུགས་ཁྲོ་མེ་ལྕེ་འབར་བ་ལྟ་བུའི་མདུན་དུ་བྲག་རི་རྣམས་མར་བསྒྲིལ་ནས་དུམ་བུར་ཆག་པར་འགྱུར།

⁷ གཙོ་བོ་དཀོན་མཆོག་ནི་བཟང་བས། དཀའ་ངལ་གྱི་དུས་སུ་ཉིད་ཀྱི་མི་མང་རྣམས་ལ་སྲུང་སྐྱོབ་མཛད་ཅིང་། ཁོང་གི་ཕྱོགས་སུ་བློ་ཁ་བགྱུར་མཁན་རྣམས་ལ་ཉིད་ཀྱི་གཅེས་སྐྱོང་མཛད་དོ།

⁸ ཁོང་གི་དགྲ་བོ་ཡོངས་རྫོགས་ཆུ་ལོག་དྲག་པོ་བཞིན་ཁོང་གིས་ཚར་གཅོད་གནང་བར་འགྱུར། ཁོང་ལ་རྒོལ་མཁན་རྣམས་ལ་འཆི་བར་གཏོང་བར་འགྱུར།

⁹ ཁྱོད་ཀྱིས་གཙོ་བོ་དཀོན་མཆོག་ལ་རྒོལ་བར་ཅིའི་ཕྱིར་བྱུས་ངན་རྩོམ་གྱི་ཡོད་དམ། ཁོང་གིས་ཁྱོད་ལ་ཡོངས་སུ་འཇིག་པར་མཛད་དེ། སུས་ཀྱང་ཁོང་ལ་ལན་ཐེངས་གཉིས་པར་རྒོལ་ཐབས་བྱེད་མི་ནུས།

¹⁰ ཁྱོད་ཚོ་མདུད་པ་ཐེབས་པའི་ཚེར་ཤིང་དང་སོག་མ་སྐམ་པོ་བཞིན་ཁྱོད་ཚོ་ར་བཟི་པ་ཚོ་མེར་བསྲེག་གཏོང་རྒྱུ་ཡིན་ནོ།

¹¹ ཀྱེ་ནི་ན་ཝཱེ་ཁྱོད་ལས་བྱུས་ངན་གྱི་ཁེངས་པའི་མི་ཞིག་ཁྱོད་ནས་ཐོན་ཏེ་གཙོ་བོ་དཀོན་མཆོག་གི་ཐོག་ཏུ་རྒོལ་བར་བརྩམས་སོ༎

¹² གཙོ་བོ་དཀོན་མཆོག་ཉིད་ཀྱི་མི་མང་ཨིསི་རཱཨེལ་པ་རྣམས་ལ་གསུངས་པ། ཨ་སུར་པ་རྣམས་སྟོབས་ཆེ་ཞིང་ཁ་གྲངས་མང་རུ་སོང་ཡོད་ནའང་དེ་ཚོ་ཚང་མ་འཇིག་ནས་ཚར་གཅོད་པར་འགྱུར། ཀྱེ་ངའི་མི་མང་ངས་ཁྱོད་ཚོ་ལ་གནོད་འཚེ་ཡོང་བཅུག་རུང་། ད་ངས་དེ་བཞིན་མི་བྱེད་དོ།

¹³ ཁྱོད་ཚོའི་ཐོག་ཏུ་ཨ་སུར་གྱིས་དབང་འཛིན་བྱེད་རྒྱུ་དེ་ངས་མཚམས་འཇོག་བྱེད་བཅུག་ཅིང་། ཁྱོད་ཚོ་བཅིངས་པའི་ལྕགས་ཐག་རྣམས་ཡོངས་སུ་བཅག་རྒྱུ་ཡིན་ནོ།

¹⁴ ཨ་སུར་པ་ཚོའི་སྐོར་ལའང་གཙོ་བོ་དཀོན་མཆོག་གིས་བཀའ་གནང་གསལ། ཁོང་ཚོའི་མི་རབས་ཆད་དེ་མིང་ཤུལ་ཙམ་ཡང་མི་ལུས་པ་དང་། ངས་ཁོང་ཚོའི་ལྷ་ཁང་ནང་ཡོད་པའི་ལྷ་རྟེན་རྣམས་རྩ་ལག་ཏུ་གཏོང་རྒྱུ་དང་། ཨ་སུར་པ་རྣམས་གསོན་པོར་གནས་འོས་པ་མ་ཡིན་པས། ངས་ཁོང་ཚོའི་ཆེད་དུ་དུར་ཁང་ཞིག་གྲ་སྒྲིག་བྱེད་བཞིན་ཡོད་དོ།

¹⁵ ལྟོས་དང་། རི་བརྒྱུད་ཁུལ་དུ་འཕྲིན་བཟང་སྒྲོག་པའི་བང་ཆེན་ཞིག་ཕེབས་བཞིན་ཡོད། ཁོང་གི་རྒྱལ་ཁ་ཆེན་པོའི་ཞི་བདེའི་འཕྲིན་བཟང་འཁྱེར་ཡོང་བཞིན་ཡོད་དོ། ཀྱེ་ཡ་ཧུ་དཱའི་མི་རྣམས། ཁྱོད་ཚོས་དུས་སྟོན་སྲུང་སྟེ། སྔར་ཁྱོད་ཚོས་དཀོན་མཆོག་ལ་དམ་བཅའ་ཕུལ་བ་ཚང་མ་སྒྲུབ་པར་བྱོས་ཤིག ད་མི་ངན་ཡོངས་རྫོགས་ཚར་གཅོད་བཏང་ཟིན་པས། དེ་ཚོས་ཁྱོད་ཚོའི་ཡུལ་དུ་ནམ་ཡང་དབང་འཛིན་བྱེད་མི་ཡོང་༎