ཧག་གྷཨེ 1 - Tibetan Old Testament 2011

མཆོད་ཁང་སྐྱར་དུ་བཞེངས་སྐོར་གཙོ་བོ་དཀོན་མཆོག་གིས་བཀའ་གནང་བ།

¹ པར་སི་ཡའི་རྒྱལ་པོ་ཆེན་པོ་དྷ་རི་ཨསེ་རྒྱལ་སྲིད་སྐྱོང་བའི་ལོ་གཉིས་པའི་ཟླ་བ་དྲུག་པའི་ཚེས་གཅིག་གི་ཉིན་གཙོ་བོ་དཀོན་མཆོག་ལུང་སྟོན་པ་ཧག་གྷཨེའི་བརྒྱུད་ནས་གསུངས་པ། གསུང་འཕྲིན་འདི་ནི་ཤལ་ཏི་ཨེལ་གྱི་བུ་ཡ་ཧུ་དཱའི་སྲིད་ཚབ་ཛེ་རུ་བྷ་བྷེལ་དང་ཡེ་ཧོ་ཛ་དག་གི་བུ་བླ་ཆེན་ཡོ་ཤུ་ཨའི་ཆེད་དུ་ཡིན་ནོ།

² ཀུན་དབང་ལྡན་པའི་གཙོ་བོ་དཀོན་མཆོག་གིས་ཧག་གྷཨེ་ལ་གསུངས་པ། མི་འདི་ཚོས། ད་ལྟ་མཆོད་ཁང་དེ་སྐྱར་བཞེངས་བྱེད་པའི་དུས་ལ་བབས་མེད་ཅེས་བརྗོད་ཀྱི་ཡོད་པས།

³ དེ་བས་ན་གཙོ་བོ་དཀོན་མཆོག་གིས་ལུང་སྟོན་པ་ཧག་གྷཨེའི་བརྒྱུད་ནས་མི་མང་ལ་གསུང་འཕྲིན་གནང་བ་དེ་ནི།

⁴ ཀྱེ་ངའི་མི་རྣམས། ངའི་མཆོད་ཁང་དེ་ནི་གྱང་གོག་རྙིང་པ་ཞིག་ཏུ་འགྱུར་ཡོད་པས། ཁྱོད་ཚོ་ནི་ཅིའི་ཕྱིར་ཁང་བཟང་བརྟན་པོའི་ནང་དུ་གནས་སྡོད་བྱས་སམ།

⁵ དེ་བས་ན་ཁྱོད་ཚོས་རང་གི་གནས་སྟངས་ལ་བརྟག་དཔྱད་བྱོས་ཞིག

⁶ ཁྱོད་ཚོས་འབྲུ་མང་པོ་བཏབ་ཀྱང་སྟོན་ཐོག་ཉུང་ཉུང་བསྡུས་ཡོང་། ཁྱོད་ཚོས་ཟ་བའི་ཆེད་དུ་ཁ་བཟས་ཡོད་ཀྱང་ཁྱོད་ཚོ་ཚིམ་པར་མི་འགྱུར། འཐུང་བའི་ཆེད་དུ་རྒུན་ཆང་ཡོད་ཀྱང་ཚིམས་པ་ལ་སྡང་བར་མི་འགྱུར། གྱོན་གོས་ཡོད་ཀྱང་དྲོས་མ་ཐུབ་བོ། དེ་བཞིན་གླ་པས་འབད་བརྩོན་བྱས་པའི་ནོར་ཨི་ཁུང་འབིག་པའི་དངུལ་ཁུག་ནང་བླུགས་པ་ལྟར་ཡིན་ནོ།

⁷ དེ་ལྟར་བྱུང་དགོས་པའི་གནད་དོན་གཙོ་བོ་དེ་གང་ཡིན་པ་ཁྱོད་ཚོས་མི་ཤེས་སམ།

⁸ དེ་བས་ན་ཁྱོད་ཚོ་རི་ཁར་ཕྱིན་སྟེ་ཤིང་བཅད་ནས་མཆོད་ཁང་ཉམས་གསོ་བྱེད་དགོས། གལ་སྲིད་དེ་ལྟར་བྱས་པ་ཡིན་ན་ང་ཧ་ཅང་དགའ་བ་དང་། ང་ལ་བསྙེན་བཀུར་བྱེས་དགོས་པ་བཞིན་བྱུང་བར་འགྱུར།

⁹ ཁྱོད་ཚོས་སྟོན་ཐོག་རྒྱས་པོ་ཞིག་གི་རེ་འདོད་བྱས་མོད། འོན་ཀྱང་དེ་ནི་ཉུང་ངུ་ཞིག་ལས་མ་སྨིན་པ་དང་། ཁྱོད་ཚོས་སྟོན་ཐོག་དེ་བསྡུས་ནས་ནང་དུ་འཁྱེར་སྐབས་ངས་དེ་ཚོར་ཕུ་བཏབ་པ་ཡིན། ངས་དེ་ལྟར་བྱེད་དགོས་དོན་ནི། ངའི་མཆོད་ཁང་དེ་གྱང་གོག་ཞིག་ཏུ་འགྱུར་ཡོད་པས། ཁྱོད་ཚོ་ནི་རང་གི་ཁྱིམ་བཟོས་རྒྱུར་མ་ཁོམ་ཤིག་ཤིག་བྱས་སོ།

¹⁰ དེ་རྐྱེན་གྱི་ཆར་ཆུ་དུས་སུ་མི་འབེབས་ཤིང་ལོ་ཐོག་སོགས་གང་ཡང་སྐྱེས་མེད་དོ།

¹¹ ངས་རི་བརྒྱུད་ཁུལ་དང་། ཞིང་དང་། དེ་བཞིན་རྒུན་ཚལ་ཁག་དང་། ཁ་སྐྱུར་པོའི་སྐྱེ་ཚལ་ཁག་དང་། ས་ལས་སྐྱེ་ཚད་རིགས་ཀྱི་སྟོན་ཐོག་ཁག་དང་། མི་དང་དུད་འགྲོ་སྲོག་ཆགས་ཀུན་གྱི་ཐོག་ཏུ་ཐན་པ་བཏང་ཡོད་པ་ཡིན་ནོ༎

མི་མང་ནས་གཙོ་བོ་དཀོན་མཆོག་གི་བཀའ་ལ་བརྩི་སྲུང་བཞུས་པ།

¹² དེ་ནས་ཛེ་རུ་བྷ་བྷེལ་དང་ཡོ་ཤུ་ཨས་གཙོས་པས་བྱེས་ཡུལ་བྷེ་བྷི་ལོ་ནི་ཡ་ནས་ཕྱིར་ལོག་བྱས་པའི་མི་མང་ཚང་མས་གཙོ་བོ་དཀོན་མཆོག་རང་གི་དཀོན་མཆོག་ལ་ཅི་གསུངས་བཀའ་འགྲུབ་ཞུས་ནས་བརྩི་གུས་ཞུས་ཤིང་། དེ་ཚོ་འཇིག་ནས་གཙོ་བོ་དཀོན་མཆོག་གི་བང་ཆེན་ལུང་སྟོན་པ་ཧག་གྷཨེས་གང་སྨྲས་པར་ཉན་ནོ།

¹³ དེ་རྗེས་ཧག་གྷཨེ་ནས་མི་མང་རྣམས་ལ་གཙོ་བོ་དཀོན་མཆོག་གི་གསུང་འཕྲིན་གནང་ངོ་། ང་ཁྱོད་ཚོ་དང་མཉམ་དུ་གནས་རྒྱུའི་དམ་བཅའ་བྱེད་ཀྱི་ཡོད།

¹⁴ དེ་རྗེས་གཙོ་བོ་དཀོན་མཆོག་གིས་ཡ་ཧུ་དཱའི་སྲིད་ཚབ་ཛེ་རུ་བྷ་བྷེལ་དང་བླ་ཆེན་ཡོ་ཤུ་ཨས་གཙོས་པས་བྱེས་ནས་ཕྱིར་ལོག་བྱས་པའི་མི་ཚང་མར་མཆོད་ཁང་བཞེངས་པའི་ལས་ལ་ཞུགས་པའི་ཕྱིར་སེམས་ཤུགས་ཆེན་པོ་གནང་ངོ་། དེ་ཚོ་ཡོང་ནས་ཀུན་དབང་ལྡན་པའི་གཙོ་བོ་དཀོན་མཆོག་རང་གི་དཀོན་མཆོག་གི་མཆོད་ཁང་དུ་ལས་བྱེད་པར་འགོ་བཙུགས་སོ།

¹⁵ རྒྱལ་པོ་ཆེན་པོ་དྷ་རི་ཨསེ་རྒྱལ་སྲིད་སྐྱོང་ལོ་གཉིས་པའི་ཟླ་བ་དྲུག་པའི་ཚེས་ཉི་ཤུ་བཞིའི་ཉིན་དེ་ཚོས་ལས་མགོ་བཙུགས་སོ༎