ཨི་ཛི་ཀི་ཨེལ 1 - Tibetan Old Testament 2011

ཨི་ཛི་ཀི་ཨེལ་ལ་དཀོན་མཆོག་གི་ཞལ་གཟིགས་དང་པོ། ༡:༡—༧:༢༧ དཀོན་མཆོག་གི་རྒྱལ་ཁྲིད།

¹ ལོ་བཅུ་སུམ་པའི་ཟླ་བ་བཞི་པའི་ཚེས་ལྔ་པར་ང་བླ་མ་ཨི་ཛི་ཀི་ཨེལ་བྷུ་ཛིའི་བུ་བྷེ་བྷི་ལོན་གྱི་ཆུ་བོ་ཀེ་བར་དུ་ཡ་ཧུ་དཱ་པའི་བཙན་བྱོལ་བ་རྣམས་མཉམ་དུ་བསྡད་ཡོད་སྐབས་ནམ་མཁའ་ཕྱེས་པ་དང་དཀོན་མཆོག་གི་ཞལ་གཟིགས་ཞིག་ངས་མཐོང་བྱུང་།

² (དེ་ནི་རྒྱལ་པོ་ཡེ་ཧོ་ཡ་ཀིན་ལ་བཙན་བྱོལ་དུ་འཁྲིད་པའི་ལོ་ལྔ་པ་དེ་ཡིན་ནོ།)

³ བྷེ་བྷི་ལོ་ནི་ཡ་དུ་གཙང་པོ་ཀེ་བར་གྱི་ཉེ་འགྲམ་དུ་གཙོ་བོ་དཀོན་མཆོག་གིས་ང་ལ་བཀའ་གནང་བ་རྣམས་ངས་ཐོས་པ་དང་ང་ལ་ཁོང་གི་མཐུ་སྟོབས་ཀྱི་ཤེས་འཚོར་བྱུང་ངོ་།

⁴ ངས་ཡར་བལྟ་སྐབས་བྱང་ནས་རླུང་འཚུབ་ཅིག་ཡོང་བ་མཐོང་བྱུང་། སྤྲིན་སྟུག་པོ་ཞིག་ནས་གློག་དམར་འཁྱུགས་པ་དང་། དེའི་མཐའ་འཁོར་གྱི་ནམ་མཁའ་འོད་འཚེར་བཞིན་འདུག གློག་དམར་འཁྱུགས་ས་དེའི་ནང་ལི་ལྟ་བུ་ཞིག་འོད་འཚེར་བ་མཐོང་བྱུང་།

⁵ རླུང་འཚུབ་དེའི་དཀྱིལ་དུ་ངས་མིའི་དབྱིབས་ཅན་གྱི་སྲོག་ཆགས་གསོན་པོ་ལྟ་བུ་བཞི་མཐོང་བྱུང་།

⁶ འོན་ཀྱང་དེ་ཚོ་རེ་རེར་གདོང་བཞི་དང་ཤོག་པ་བཞི་འདུག་གོ

⁷ དེ་ཚོའི་རྐང་པ་རྣམས་དྲོང་པོ་དང་དེ་ཚོ་ནི་གླང་གོག་གི་རྨིག་པ་ལྟ་བུ་འདུག་གོ དེ་ཚོ་ནི་ལི་གན་ལྟར་འོད་འཚེར་བཞིན་འདུག་གོ།

⁸ དེ་ཚོའི་མདོང་བཞི་དང་ཤོག་པ་བཞི་མ་ཆད་པར་ཤོག་པ་རེ་རེའི་འོག་ཏུ་མིའི་ལག་པ་བཞི་འདུག་གོ

⁹ སྲོག་ཆགས་གསོན་པོ་རེ་རེའི་ཤོག་པ་གཉིས་བརྐྱངས་ཡོད་པ་དང་། དེ་ཚོ་གཅིག་གིས་གཅིག་ལ་ཤོག་པའི་རྩེ་ཡིས་འབྱར་ཡོད་པའི་རྐྱེན་གྱིས་གྲུ་བཞི་ཡོད་པ་དང་། དེ་ཚོ་འགྲུལ་སྐབས་ཚོ་ཞིག་ལྟར་དེ་ཚོའི་གཟུགས་པོ་མ་བསྒྱུར་བར་འགྲུལ་བཞིན་ཡོད་དོ།

¹⁰ སྲོག་ཆགས་གསོན་པོ་རེ་རེར་གདོང་མི་འདྲ་བ་བཞི་རེ་ཡོད་པ་ནི། མདུན་དུ་མིའི་གདོང་པ་དང་གཡས་སུ་སེང་གེའི་གདོང་པ་དང་གཡོན་དུ་གླང་གི་གདོང་པ་དང་རྒྱབ་ཏུ་བྱ་གླག་གི་གདོང་པ་འདྲ་བ་ཡོད་དོ།

¹¹ སྲོག་ཆགས་གསོན་པོ་རེ་རེའི་ཤོག་པ་གཉིས་པོ་དེའི་ཉེ་འགྲམ་གྱི་སྲོག་ཆགས་ཀྱི་ཤོག་པའི་རྩེ་དང་རྩེ་ཐུག་པའི་ཆེད་ཡར་བསྐྱངས་ཡོད། ཤོག་པ་གཉིས་པོ་གཞན་དེས་དེ་ཚོའི་གཟུགས་པོ་ལ་བཀབ་ཡོད་པ་ཡིན་ནོ།

¹² ཚོ་དེ་ཚོ་ཁ་བསྒྱུར་མ་དགོས་པར་རང་གི་འདོད་མོས་སར་འགྲོ་ཐུབ་པའི་ཆེད་སྲོག་ཆགས་གསོན་པོ་རེ་རེའི་གདོང་པ་ཕྱོགས་བཞིར་བལྟས་ཡོད་དོ།

¹³ སྲོག་ཆགས་གསོན་པོ་དེ་ཚོའི་ཁྲོད་དུ་གཏན་དུ་གཡོ་བའི་འོད་འཚེར་བའི་པད་འབར་ལྟ་བུ་ཞིག་འདུག་གོ མེ་འབར་བ་དང་དེ་ལས་གློག་འཁྱུག་བཞིན་ཡོད་པ་འདུག་གོ

¹⁴ གློག་འཁྱུག་པའི་མགྱོགས་ཚད་ལྟར་སྲོག་ཆགས་གསོན་པོ་དེ་ཚོ་ཕར་ཚུར་རྒྱུགས་བཞིན་འདུག་གོ

¹⁵ ངས་སྲོག་ཆགས་གསོན་པོ་དེ་ཚོ་བཞི་ལ་བལྟ་སྐབས་དེ་ཚོ་རེ་རེའི་ཉེ་འགྲམ་དུ་འཁོར་ལོ་བཞི་ས་ལ་རེག་པ་མཐོང་བྱུང་།

¹⁶ འཁོར་ལོ་བཞི་པོ་དེ་ཚོ་ནི་གཅིག་དང་འདྲ་བ་ཡོད་པ་དང་། དེ་ཚོ་རེ་རེ་བཞིན་རིན་ཆེན་རྡོ་ལྟར་འོད་འཚེར་བཞིན་ཡོད་པ་དང་། འཁོར་ལོ་རེ་རེའི་དཀྱིལ་དུ་འཁོར་ལོ་གཞན་དེ་འཛུལ་ཡོད་པ་དང་འདྲ་བ་མཐོང་བྱུང་།

¹⁷ འཁོར་ལོ་དེ་ཚོ་ཕྱོགས་བཞི་གང་དུ་ཡང་འགྲོ་ཐུབ་པའི་ཆེད་དུ་ཡིན་ནོ།

¹⁸ འཁོར་ལོ་དེ་ཚོའི་མཐའ་འཁོར་རྣམས་མཐོ་པོ་དང་ཞེད་སྣང་ཚ་པོ་ཡོད་པ་དང་། དེ་ཚོའི་མཐའ་འཁོར་རྣམས་མིག་གིས་བཀབ་ཡོད་དོ།

¹⁹ སྲོག་ཆགས་གསོན་པོ་དེ་ཚོ་གང་དུ་འགྲོ་ན་ཡང་འཁོར་ལོ་རྣམས་ཡང་དེ་ཚོ་མཉམ་དུ་འགྲོ་བ་དང་སྲོག་ཆགས་ཚོ་ས་ནས་ཡར་ལངས་སྐབས་འཁོར་ལོ་རྣམས་ཡང་ལངས་བཞིན་ཡོད་དོ།

²⁰ སྲོག་ཆགས་གསོན་པོ་དེ་ཚོ་རང་གི་གང་འདོད་སར་འགྲོ་བ་དང་། འཁོར་ལོ་ཚོ་ཡང་སྲོག་ཆགས་གསོན་པོ་དེ་ཚོས་བྱས་པ་ལྟར་བྱེད་བཞིན་ཡོད་དོ། གང་ལ་ཟེར་ན། སྲོག་ཆགས་གསོན་པོ་དེ་ཚོས་དེ་ཚོ་ལ་དབང་བསྒྱུར་བྱེད་ཀྱི་ཡོད།

²¹ དེར་བརྟེན་སྲོག་ཆགས་གསོན་པོ་དེ་ཚོ་ནམ་འགྲོ་བ་དང་བསྡད་པ་དང་ནམ་མཁར་ལངས་བ་སོགས་བྱ་སྐབས་འཁོར་ལོ་རྣམས་ཡང་འདྲ་མཚུངས་བྱེད་བཞིན་ཡོད་དོ།

²² སྲོག་ཆགས་དེ་ཚོའི་མགོའི་སྟེང་རྨོག་ཐོག་གི་ཡིབ་ལྟར་རྡོ་ཤེལ་འོད་ཤིན་ཏུ་འཚེར་བས་བཟོས་པ་ཞིག་ཡོད་དོ།

²³ རྨོག་ཐོག་དེའི་འོག་སྲོག་ཆགས་གསོན་པོ་དེ་ཚོ་རང་གི་ཤོག་པ་གཉིས་གཉིས་དེའི་འགྲམ་གྱི་ཕྱོགས་སུ་བརྐྱངས་ཡོད་པ་དང་། གཞན་ཤོག་པ་གཉིས་པོ་རང་གི་གཟུགས་བཀབ་བཞིན་ལངས་ཡོད་པ་ཡིན་ནོ།

²⁴ དེ་ཚོ་འཕུར་སྐབས་ཤོག་པའི་སྒྲ་གྲགས་པ་ངས་ཐོས་བྱུང་། དེ་ནི་རྒྱ་མཚོ་གྲགས་པའི་གྲགས་སྐད་ལྟར་དང་དམག་དཔུང་ཧ་ཅང་ཁྱོན་ཆེའི་སྒྲ་ལྟར་དང་། མཐུ་སྟོབས་ཅན་གྱི་གཙོ་བོ་དཀོན་མཆོག་གི་གསུང་སྐད་ལྟར་ངས་ཐོས་བྱུང་། དེ་ཚོ་འཕུར་མཚམས་འཇོག་སྐབས་དེ་ཚོའི་ཤོག་པ་ལྟབ་རྩིག་རྒྱབ་བཞིན་ཡོད་དོ།

²⁵ འོན་ཀྱང་དེ་ཚོའི་མགོའི་སྟེང་གི་རྨོག་ཐོག་གི་སྟེང་ནས་སྒྲ་མུ་མཐུས་གྲགས་བཞིན་ཡོད་དོ།

²⁶ རྨོག་ཐོག་གི་སྟེང་ཨིན་དྲ་ནི་ལས་བཟོས་པའི་རྒྱལ་ཁྲི་ལྟ་བུ་ཞིག་ཡོད། རྒྱལ་ཁྲི་དེའི་སྟེང་མིའི་དབྱིབས་དང་འདྲ་བ་ཞིག་བཞུགས་ཡོད་དོ།

²⁷ དབྱིབས་དེ་མེའི་དཀྱིལ་དུ་ལིའི་་འོད་འཚེར་བ་ལྟར་འདུག་གོ དེའི་འོད་དེ་ཕྱོགས་བཞིར་ཁྱབ་ནས་ཡོད་དོ།

²⁸ དེའི་ཕྱོགས་བཞི་ལ་འཇའི་མཚོན་མདོག་ཚང་མར་འོད་འདུག་གོ ཤིན་ཏུ་འཚེར་བའི་འོད་དེ་ནི་གཙོ་བོ་དཀོན་མཆོག་གི་གཟི་བརྗིད་ཡིན་པ་སྟོན་པའི་ཕྱིར་རོ། ངས་འདི་མཐོང་སྐབས་ང་ས་ལ་ཁ་འབུབས་ནས་འགྱལ་ལོ། དེ་ནས་ངས་མི་ཞིག་གི་གཏམ་གླེང་གནང་བ་སྐད་ཞིག་ཐོས་བྱུང་༎