ཨ་མོསེ 1 - Tibetan Old Testament 2011

¹ ཊེ་ཀོ་ཨ་ཞེས་པའི་གྲོང་གསེབ་ཀྱི་ལུག་རྫི་ཡིན་པ་ཨ་མོསེའི་བརྒྱུད་ནས་ལུང་བསྟན་བྱུང་བ། ཡང་ས་གཡོམ་མ་བརྒྱབ་པའི་ལོ་གཉིས་ཀྱི་སྔོན་དུ་ཡ་ཧུ་དཱ་རུ་རྒྱལ་པོ་ཨུ་ཛི་ཡཱ་དང་། ཨིསི་རཱཨེལ་དུ་ཡེ་ཧོ་ཨཤེའི་བུ་ཡེ་རོ་བོམ་གྱིས་རྒྱལ་སྲིད་སྐྱོང་སྐབས་དཀོན་མཆོག་གིས་ཨིསི་རཱཨེལ་གྱི་སྐོར་ལ་ཞལ་གཟིགས་ཀྱི་སྒོ་ནས་དེ་ཚོ་ཚང་མ་ཨ་མོསེའི་བརྒྱུད་ནས་ལུང་བསྟན་མངོན་པར་མཛད་གནང་བ་ནི།

² ཨ་མོསེས་སྨྲས་པ། རི་བོ་ཛི་ཡོན་གནས་མཆོག་དམ་པ་ནས། གཙོ་བོ་དཀོན་མཆོག་གིས་ནི་གསུང་སྐད་སྐྱོན། གྲོང་ཁྱེར་ཡེ་རུ་ཤ་ལེམ་ནས། འབྲུག་སྐད་བཞིན་དུ་ཁོང་གི་གསུང་སྐད་ལྡིར། སྤང་དང་རྩ་ཁ་ཡོངས་རྫོགས་སྐམ་པར་འགྱུར། རི་བོ་ཀར་མེལ་རྩ་རྣམས་རྙིད་པར་འགྱུར༎

ཨིསི་རཱཨེལ་གྱི་ཁྱིམ་མཚེས་རྒྱལ་ཁབ་རྣམས་ལ་དཀོན་མཆོག་གི་ཁྲིམས་གཅོད། སི་རི་ཡ།

³ གཙོ་བོ་དཀོན་མཆོག་གིས། དྷ་མསེ་ཀསེ་ཀྱི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོར་ངེས་པར་དུ་ཉེས་ཆད་གཏོང་རྒྱུ་ཡིན། དེ་ཚོས་གྷིལ་ཨད་ཀྱི་ཡུལ་མི་རྣམས་ལ་སྡུག་རྩུབ་དྲག་པོ་བཏང་བ་ཡིན་པས།

⁴ ཧ་ཛ་ཨེལ་རྒྱལ་པོས་བཞེངས་པའི་ཕོ་བྲང་དེ་ཐོག་ཏུ་ངས་མེ་གཏོང་རྒྱུ་ཡིན་པ་དང་། ངས་རྒྱལ་པོ་བྷེན་ཧ་དྷད་ཀྱི་མཁར་རྫོང་རྣམས་ཀྱང་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ།

⁵ ངས་དྷ་མསེ་ཀསེ་གྲོང་ཁྱེར་གྱི་གཞུང་སྒོ་རྣམས་བཅག་སྟེ། ཨ་བེན་ལུང་གཤོང་དུ་གནས་སྡོད་བྱེད་མཁན་རྣམས་དང་། བྷེ་ཐེ་དན་གྱི་སྲིད་སྐྱོང་པ་དེ་ཕྱིར་འདོན་བྱེད་རྒྱུ་དང་། སི་རི་ཡཱའི་ཡུལ་མི་རྣམས་བཙོན་བཟུང་བྱས་ཏེ་ཀིར་ཞེས་པའི་ཡུལ་དུ་འཁྲིད་རྒྱུ་ཡིན་ནོ༎

ཕེ་ལེ་ཤེད།

⁶ གཙོ་བོ་དཀོན་མཆོག་གིས་གསུངས་པ། གྷ་ཛའི་ཡུལ་མི་རྣམས་ཀྱིས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོ་ལ་ངེས་པར་དུ་ཆད་པ་གཏོང་རྒྱུ་ཡིན་ནོ། དེ་ཚོས་མི་རིགས་ཆ་ཚང་ཞིག་འཁྲིད་ནས་ཨེ་དྷོམ་གྱི་ཡུལ་མི་རྣམས་ཀྱི་ལག་པར་བྲན་འཁོལ་དུ་བཙོངས་པ་ཡིན་པས།

⁷ དེར་བརྟེན་ངས་གྷ་ཛའི་གྲོང་ཁྱེར་གྱི་ལྕགས་རི་རྣམས་ལ་མེ་གཏོང་ཞིང་། ཡུལ་དེའི་མཁར་རྫོང་རྣམས་མེས་ཡོངས་སུ་བསྲེག་པར་བྱེད་རྒྱུ་མ་ཟད།

⁸ ངས་ཨཤ་དྷོད་དང་། ཨཤ་ཀེ་ལོན་གྲོང་ཁྱེར་རྣམས་ཀྱི་སྲིད་སྐྱོང་བྱེད་མཁན་རྣམས་ཐར་སྐྲོད་གཏོང་རྒྱུ་ཡིན། དེ་བཞིན་ངས་གྲོང་ཁྱེར་ཨེག་རོན་ལ་ཉེས་ཆད་གཏོང་ཞིང་། ལྷག་འཕྲོས་ལུས་པའི་ཕེ་ལེ་ཤེད་པའི་ཡུལ་མི་ཚང་མ་ཤི་བར་འགྱུར་རོ༎

ཊ་ཡར།

⁹ གཙོ་བོ་དཀོན་མཆོག་གིས་གསུངས་པ། ཊ་ཡར་གྱི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོ་ལ་ངེས་པར་དུ་ཉེས་ཆད་གཏོང་རྒྱུ་ཡིན། དེ་ཚོས་མཐུན་གྲོགས་ཀྱི་འཆིང་ཡིག་ལ་རྩིས་མེད་བྱས་ཏེ། མི་རིགས་ཆ་ཚང་ཞིག་བཙོན་བཟུང་བྱས་ནས་ཨེ་དྷོམ་ཡུལ་དུ་འཁྲིད་ཕྱིན་པ་ཡིན་པས།

¹⁰ དེར་བརྟེན་ངས་ཊ་ཡར་གྱི་ལྕགས་རི་རྣམས་ལ་མེ་གཏོང་ནས། དེའི་ཁར་རྫོང་རྣམས་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ༎

ཨེ་དྷོམ།

¹¹ གཙོ་བོ་དཀོན་མཆོག་གིས་གསུངས་པ། ཨེ་དྷོམ་གྱི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོ་ལ་ངེས་པར་དུ་ཉེས་ཆད་གཏོང་རྒྱུ་ཡིན་ནོ། དེ་ཚོས་རང་རིགས་གཅིག་པའི་སྤུན་ཟླ་རྣམས་ལ་སྙིང་རྗེ་མ་བྱས་པར། རལ་གྲིས་དེ་ཚོར་རྗེས་སུ་དེད་པ་དང་། ཁོ་ཚོས་མུ་མཐུད་དེ་ཁྲོ་བ་དྲག་པོ་བྱས་པ་ཡིན་ནོ།

¹² དེར་བརྟེན་ངས་གྲོང་ཁྱེར་ཏེ་མན་གྱི་ཐོག་ཏུ་མེ་གཏོང་ཞིང་། བྷོཛ་རཱའི་མཁར་རྗོང་རྣམས་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ༎

ཨམ་མོན།

¹³ གཙོ་བོ་དཀོན་མཆོག་གིས་གསུངས་པ། ཨམ་མོན་གྱི་ཡུལ་མི་ཚོས་ཡང་ནས་ཡང་དུ་སྡིག་པ་བྱས་པ་ཡིན་པས། ངས་དེ་ཚོ་ལ་ངེས་པར་དུ་ཉེས་ཆད་གཏོང་རྒྱུ་ཡིན་ནོ། དེ་ཚོས་རང་གི་ས་མཚམས་རྒྱ་ཆེར་གཏོང་ཕྱིར་དམག་བརྒྱབ་སྐབས་གྷིལ་ཨད་ཡུལ་གྱི་བུད་མེད་མངལ་དང་ལྡན་པ་རྣམས་ཀྱི་ཁོག་པ་གཤགས་པ་ཡིན་པས།

¹⁴ དེར་བརྟེན་ངས་རབ་བཱའི་གྲོང་ཁྱེར་གྱི་ལྕགས་རི་རྣམས་ལ་མེ་གཏོང་ཞིང་། དེའི་མཁར་རྫོང་ཐམས་ཅད་མེས་ཡོངས་སུ་བསྲེག་པར་བྱེད་རྒྱུ་ཡིན་ནོ། དེ་ནས་དམག་འཁྲུགས་ཀྱི་ཉིན་མོ་དེ་ལ་སྐད་འབོད་ཆེན་པོ་འདོན་པ་དང་། འཐབ་རྩོད་དེ་ནི་རླུང་འཚུབ་ལྟ་བུར་འགྱུར་ཞིང་།

¹⁵ དེ་ཚོའི་རྒྱལ་པོ་དང་དཔོན་རིགས་རྣམས་བཙན་བྱོལ་དུ་འགྲོ་བར་འགྱུར་རོ༎