ཤ་མུ་ཨེལ་གཉིས་པ། 1 - Tibetan Old Testament 2011

དཱ་བིད་ཀྱིས་ས་ཨུལ་གྲོངས་པའི་སྐོར་ཐོས་པ།

¹ ས་ཨུལ་གྲོངས་པའི་རྗེས་སུ་དཱ་བིད་ཀྱིས་ཨ་མ་ལེག་པ་རྣམས་ཀྱི་ཐོག་ཏུ་རྒྱལ་ཁ་ཐོབ་ནས་ཕྱིར་ལོག་བྱས་ཏེ། ཛིག་ལག་ཏུ་ཉིན་ཞག་གཉིས་གནས་སྡོད་བྱས་སོ།

² དེའི་སང་ཉིན་ས་ཨུལ་གྱི་སྒར་ནས་མི་ན་གཞོན་སླེབས་ཏེ། དེས་རང་གི་མྱ་ངན་འདོན་པའི་ཆེད་དུ་རང་གི་གྱོན་གོས་ཧྲལ་ནས་མགོ་ལ་ཐལ་བ་བྱུགས་ཤིང་། དཱ་བིད་ཀྱི་མདུན་དུ་ཕྱིན་ནས་གུས་ཞབས་ཆེན་པོས་ས་ལ་མགོ་བོ་སྒུར་རོ།

³ དཱ་བིད་ཀྱིས་ཁོ་ལ། ཁྱོད་ག་ནས་ཡོང་བ་ཡིན་ནམ་ཞེས་དྲིས་རྩད་བྱས་པ་དང་། དེའི་ལན་དུ་ཁོས། ང་ནི་ཨིསི་རཱཨེལ་པའི་དམག་སྒར་ནས་བྲོས་ཡོང་བ་ཡིན་ཞེས་བརྗོད་དོ།

⁴ དཱ་བིད་ཀྱིས་ཁོ་ལ་གསུངས་པ། གང་བྱུང་པ་ཚང་མ་ང་ལ་གཤོད་ཅིག། ཁོས་ལན་དུ། དམག་ས་ནས་ང་ཚོའི་དམག་མི་རྣམས་བྲོས་ཕྱིན་པ་མ་ཟད་ང་ཚོའི་མི་མང་པོ་ཤི་སོང་། ས་ཨུལ་དང་ཁོང་གི་བུ་ཡོ་ན་ཐན་ཡང་བསད་བཞག་ཅེས་སྨྲས་སོ།

⁵ དཱ་བིད་ཀྱིས། ས་ཨུལ་དང་ཡོ་ན་ཐན་བསད་པ་དེ་ཁྱོད་ཀྱིས་གང་འདྲ་ཟེར་ཤེས་བྱུང་ཞེས་དྲིས་པ་དང་།

⁶ དེའི་ལན་དུ་ཁོས་སྨྲས་པ། ང་རི་བོ་གྷིལ་བོ་རུ་ཡོད་སྐབས་ས་ཨུལ་ནི་རང་གི་མདུང་ལ་བརྟེན་ཏེ་ལངས་ནས་བསྡད་ཡོད་པ་ངས་མཐོང་བྱུང་། སྐབས་དེར་དགྲ་བོའི་ཤིང་རྟ་དང་རྟ་དམག་རྣམས་ཁོང་གི་མཐའ་བསྐོར་དུ་ཐག་ཉེ་པོར་སླེབས་ཡོད་པ་ཡིན་པས།

⁷ ཁོང་གིས་ཕར་ཚུར་གཟིགས་ཏེ་ང་ལ་མཐོང་ནས་སྐད་བཏང་བ་དང་། ངས་ཁོང་ལ། ཁྱེད་ལ་གང་གསུངས་རྒྱུ་ཡོད་དམ་ཞེས་ཞུས་པས།

⁸ ཁོང་གིས་ང་ལ་ཁྱོད་སུ་ཡིན་ཞེས་དྲིས་པའི་ལན་དུ། ང་ནི་ཨ་མ་ལེག་པ་ཞིག་ཡིན་ཞེས་ཞུས་པ་ཡིན།

⁹ དེ་ནས་ཁོང་གི། ཁྱོད་འདི་རུ་ཚུར་ཡོང་ནས་ང་གསོད་ཅིག གང་ལགས་ཟེར་ན། ང་ལ་རྨས་སྐྱོན་ཆེན་པོ་བྱུང་བས། ང་འཆི་གྲབ་ཡོད་ཅེས་གསུངས་པ་དང་།

¹⁰ ངས་ཁོང་གི་འགྲམ་དུ་ཕྱིན་ནས་ཁོང་དཀྲོང་པ་ཡིན། གང་ལགས་ཟེར་ན། གང་ལྟར་ཁོང་ནི་ས་ལ་རིལ་མ་ཐག་ཏུ་གྲོངས་རྒྱུ་ངེས་ཅན་ཡིན་པས་ཕྱིར་རོ། དེ་རྗེས་ངས་ཁོང་གི་ཅོད་པན་དང་ཕྱག་གདུབ་བཅས་བླངས་ནས་ཁྱེད་ཀྱི་རྩར་འཁྱེར་ཡོད་ཅེས་ཞུས་སོ།

¹¹ དཱ་བིད་ཀྱིས་མྱ་ངན་གྱི་ཚུལ་དུ་རང་གི་གྱོན་གོས་ཧྲལ་བ་དང་། ཁོང་གི་མི་ཚང་མས་ཀྱང་དེ་བཞིན་དུ་བྱས་སོ།

¹² དེ་ཚོས་ས་ཨུལ་དང་ཡོ་ན་ཐན་དང་དཀོན་མཆོག་གི་མི་འབངས་ཨིསི་རཱཨེལ་པའི་ཆེད་དུ་མྱ་ངན་བྱས་ཏེ་དགོང་དྲོ་བར་སྨྱུང་གནས་སྲུང་ནས་བསྡད་དོ། གང་ལགས་ཟེར་ན། དམག་སར་མི་མང་པོ་སྲོག་སྐྱོན་བྱུང་བས་ཕྱིར་རོ།

¹³ གནས་ཚུལ་འཁྱེར་ཡོང་མཁན་ན་གཞོན་དེ་ལ་དཱ་བིད་ཀྱིས། ཁྱོད་རང་ག་ནས་ཡིན་ནམ་ཞེས་དྲིས་པས། ན་གཞོན་དེས། ང་ནི་མི་རིགས་ཨ་མ་ལེག་པ་ཞིག་ཡིན་ཀྱང་། ཁྱེད་ཀྱི་ཡུལ་ནང་སྡོད་མཁན་ཞིག་ཡིན་ཞེས་ཞུས་པ་དང་།

¹⁴ དཱ་བིད་ཀྱིས་ཁོ་ལ་གསུངས་པ། གཙོ་བོ་དཀོན་མཆོག་གིས་འདེམས་བསྐོས་མཛད་པའི་རྒྱལ་པོ་དེ་ཁྱོད་ཀྱིས་དཀྲོང་ནུས་པའི་བློ་སྟོབས་དེ་ཁྱོད་ལ་ག་ནས་སྐྱེད་བྱུང་ངམ།

¹⁵ དེ་ནས་དཱ་བིད་ཀྱིས་མི་ཞིག་བོས་ནས་ཁོ་གསོད་ཅིག་ཅེས་ཟེར་བ་དང་། མི་དེས་ཨ་མ་ལེག་པ་དེ་ལ་རལ་གྲི་ཞུས་ནས་བསད་དོ།

¹⁶ དཱ་བིད་ཀྱིས་ཨ་མ་ལེག་པ་དེ་ལ་སྨྲས་སོ། རྐྱེན་ངན་འདི་ཁྱོད་རང་ཉིད་ཀྱི་ཐོག་ཏུ་འཁྱེར་ཡོང་བ་ཡིན་པས། ཁྱོད་ཀྱིས་དཀོན་མཆོག་གིས་འདེམས་བསྐོས་མཛད་པའི་མི་དེ་བསད་པ་ཡིན་ཞེས་ངོས་ལེན་བྱས་པ་ཙམ་གྱིས་རང་གིས་རང་ལ་སྐྱོན་བརྫོད་བྱས་པ་ཡིན་ནོ༎

ས་ཨུལ་དང་ཡོ་ན་ཐན་གྱི་ཕྱིར་དུ་དཱ་བིད་ཀྱིས་མྱ་ངན་བྱེད་པ།

¹⁷ དཱ་བིད་ཀྱིས་ས་ཨུལ་དང་ཁོའི་བུ་ཡོ་ན་ཐན་གྱི་སྐོར་ལ་མྱ་ངན་གྱི་སྐྱོ་གླུ་བཏང་བ་དང།

¹⁸ ཡ་ཧུ་དཱ་པ་རྣམས་ལའང་སྐྱོ་གླུ་དེ་བསླབ་དགོས་པའི་བཀའ་གནང་ངོ་། (དེའི་སྐོར་ཡ་ཤར་གྱི་མདོའི་ནང་དུ་གསལ་ཡོད།)

¹⁹ ཨིསི་རཱཨེལ་པ་ཡི་རི་བརྒྱུད་ཁུལ། ང་ཚོའི་འགོ་དཔོན་རྣམས་ནི་བསད་ནས་ཡོད། ང་ཚོའི་དམག་མི་བློ་སྟོབས་ཆེ་ཤོས་རྣམས་ནི་འགྱེལ་ནས་ཡོད།

²⁰ གྷད་དང་ཨཤ་ཀེ་ལོན་འགྲུལ་ལམ་དུ། ལོ་རྒྱུས་དེའི་སྐོར་ཁྱབ་བསྒྲགས་མ་བྱེད་ཅིག། ཕེ་ལེ་ཤེད་ཀྱི་བུད་མེད་དེ་ཚོ་དང་། ཕྱི་པའི་བུ་མོར་དགའ་སྤྲོ་བྱེད་མ་བཅུག།

²¹ གྷིལ་བོ་ཡི་རི་བོ་རྣམས་ཀྱི་ཁར། ཆར་པ་དང་ནི་ཟིལ་པ་བབས་མ་བཅུག། དེ་ཡི་ས་ཞིང་ཁག་ནི་སྟོངས་པར་གནས་པར་ཤོག། གནས་དེར་དཔའ་བོ་བློ་སྟོབས་ཅན་རྣམས་ཀྱིས། ཕུབ་ནི་མཐོང་ཆུང་སྣང་མེད་ལུས་ཡོད་ཅིང་། ས་ཨུལ་གྱི་ཕུབ་ལ་སྣུམ་ནི་བྱུགས་མཁན་མེད་པར་ལུས།

²² ཡོ་ན་ཐན་གྱི་གཞུ་ནི་གཟི་རྔམ་ཆེ། ས་ཨུལ་གྱི་རལ་གྲིར་སྙིང་རྗེ་མེད། དེ་ཚོས་སྐྱེ་བོ་མཐུ་སྟོབས་ཅན་རྣམས་ལ། ཞུས་སྐབས་དགྲ་བོའི་ཚོགས་རྣམས་ཡོངས་སུ་འཇིགས།

²³ ས་ཨུལ་དང་ནི་ཡོ་ན་ཐན་གཉིས་ནི། ངོ་མཚར་ཆེ་ལ་ཕན་ཚུན་བརྩེ་མཐུན་ཆེ། ཁོ་གཉིས་མཉམ་དུ་གསོན་ཞིང་མཉམ་དུ་འཆི། འདབ་ཆགས་བྱ་གླག་ལས་མྱུར་བར་ཕུར་རྩལ་ཆེ། གཅན་གཟན་སེང་གེ་ལས་ཀྱང་སྟོབས་ཤུགས་ཆེ།

²⁴ ཀྱེ་ཨིསི་རཱཨེལ་པ་ཡི་བུད་མེད་རྣམས། ས་ཨུལ་ཕྱིར་དུ་སེམས་ནང་མྱ་ངན་བྱོས། ཁོང་གིས་ཁྱོད་ཚོར་རིན་ཐང་ཆེ་བའི་གོས། དམར་པོ་དང་ནི་བཟང་པོས་བརྒྱན་པ་དང་། རིན་ཆེན་གསེར་དང་ཕྲ་ཡིས་ཁྱོད་ཚོར་བརྒྱན།

²⁵ བློ་སྟོབས་ཅན་གྱི་དམག་མི་རྣམས་ས་ཁར་འགྱེལ། དེ་ཚོ་ཡོངས་སུ་དམག་སར་བསད་པར་བྱས། ཡོ་ན་ཐན་ཡང་རི་ཁར་བསད་ཅིང་ལུས།

²⁶ ཀྱེ་ཁྱེད་ང་ཡི་གཅེན་པོ་ཡོ་ན་ཐན། ཁྱེད་ཀྱི་ཕྱིར་དུ་ང་ནི་མྱ་ངན་བྱེད། ཁྱོད་ནི་ངའི་དོན་ཇི་ལྟར་བྱམས་བརྩེ་ཆེ། ཁྱེད་ཀྱི་ཐུགས་བརྩེ་ངའི་དོན་ཇི་ལྟར་ཆེ། དེ་ནི་བུད་མེད་བྱམས་བརྩེ་ལས་ཀྱང་ལེགས།

²⁷ དཔའ་བོ་བློ་སྟོབས་ལྡན་པའི་དམག་མི་རྣམས། འགྱེལ་ནས་ས་ཁར་དེ་མུར་ལུས་ཤིང་གནས། དེ་ཚོའི་གོ་མཚོན་རྣམས་ནི་མཁོ་མེད་ལུས༎