རྒྱལ་རབས་གཉིས་པ། 1 - Tibetan Old Testament 2011

ཨེ་ལི་ཡཱ་དང་རྒྱལ་པོ་ཨ་ཧ་ཛ་ཡཱ།

¹ ཨིསི་རཱཨེལ་གྱི་རྒྱལ་པོ་ཨ་ཧབ་གྲོངས་པའི་རྗེས་ལ་མོ་ཨབ་ཡུལ་གི་ཨིསི་རཱཨེལ་ཐོག་ཏུ་ངོ་ལོག་བྱས་སོ།

² ཨིསི་རཱཨེལ་གྱི་རྒྱལ་པོ་ཨ་ཧ་ཛ་ཡཱ་ས་མར་ཡ་རུ་ཕོ་བྲང་གི་རྩེ་ཐོག་གི་ཁྱམས་ར་ནས་ལྷུང་བ་དང་ཚབ་ཆེ་རྨས་སོ། དེར་བརྟེན་ཁོང་གསོས་དང་མ་གསོས་སྐོར་རྟོགས་པའི་ཕྱིར་ཕེ་ལེ་ཤེད་པའི་གྲོང་ཁྱེར་ཨེག་རོན་གྱི་བྷལ་ཛེ་བུབ་ལ་མོ་རྒྱབ་པར་བང་ཆེན་འགའ་ཤས་བཏང་ངོ་།

³ འོན་ཀྱང་གཙོ་བོ་དཀོན་མཆོག་གི་ཕོ་ཉ་ཞིག་གིས་ཊིཤི་བྷིའི་ལུང་སྟོན་པ་ཨེ་ལི་ཡཱ་ལ་རྒྱལ་པོ་ཨ་ཧ་ཛ་ཡཱའི་བང་ཆེན་ཚོ་དང་འཕྲད་ནས་དེ་ཚོ་ལ་ཁྱོད་ཚོ་ཅིའི་ཕྱིར་ཨེག་རོན་གྱི་ལྷ་བྷལ་ཛེ་བུབ་ལ་མོ་རྒྱབ་པར་འགྲོ་བཞིན་ཡོད་དམ། ཁྱོད་ཚོའི་བསམ་པར་ཨིསི་རཱཨེལ་ལ་དཀོན་མཆོག་མེད་པ་རེད་བསམ་གྱི་ཡོད་དམ་ཞེས་སྨྲས་སོ།

⁴ རྒྱལ་པོ་ལ་གཙོ་བོ་དཀོན་མཆོག་གིས་ཁྱོད་རྨས་པ་ལས་མ་གསོས་པ་མ་ཟད། ཁྱོད་ཤི་གི་རེད་སྨྲོས་ཤིག་ཅེས་བཀའ་གནང་ངོ་། ཨེ་ལི་ཡཱས་གཙོ་བོ་དཀོན་མཆོག་གིས་བཀའ་གནང་བ་ལྟར་བྱས་སོ།

⁵ བང་ཆེན་ཚོ་རྒྱལ་པོའི་སར་ཕྱིར་ལོག་ནས། ཁོང་གཉིས་ལ་ཁྱོད་ཚོ་ཅིའི་ཕྱིར་ལོག་ཡོང་བ་ཡིན་ནམ་གསུངས་སོ།

⁶ དེ་ཚོས་ང་ཚོས་སྐྱེ་བོ་ཞིག་དང་འཕྲད་པས་དེས་ང་ཚོ་ཕྱིར་ལོག་ནས་རྒྱལ་པོ་ལ་གཙོ་བོ་དཀོན་མཆོག་གིས། ཁྱོད་ཀྱིས་ཅིའི་ཕྱིར་ཨེག་རོན་གྱི་ལྷ་བྷལ་ཛེ་བུབུ་ལ་མོ་རྒྱབ་པར་བང་ཆེན་གཏོང་བཞིན་ཡོད་དམ། ཁྱོད་ཀྱི་བསམ་བློར་ཨིསི་རཱཨེལ་ལ་དཀོན་མཆོག་མེད་པ་རེད་བསམ་པ་ཡིན་ནམ། ཁྱོད་རྨས་པ་ལས་མི་གསོས་པ་མ་ཟད། ཁྱོད་ངེས་པར་འཆི་གི་རེད་ཅེས་སྨྲས་བྱུང་ཞུས་སོ།

⁷ རྒྱལ་པོས། སྐྱེ་བོ་དེ་ཇི་འདྲ་ཞིག་འདུག་གམ་ཅེས་བཀའ་འདྲི་གནང་ངོ་།

⁸ དེ་ཚོས་ཁོང་ནི་སེམས་ཅན་གྱི་པགས་པའི་གོས་གྱོན་ནས་ཀོ་བའི་སྐེ་རགས་བཅིང་འདུག་ཅེས་ཞུས་སོ། རྒྱལ་པོས་དེ་ནི་ཨེ་ལི་ཡཱ་རེད་གསུངས་སོ།

⁹ དེ་ནས་ཁོང་གིས་འགོ་འཛིན་ཞིག་དང་མི་ལྔ་བཅུ་ཐམ་པ་ཨེ་ལི་ཡཱ་ལེན་པར་བཏང་ངོ་། འགོ་ཛིན་དེས་ཁོང་ནི་རི་ཞིག་གི་སྟེང་དུ་བཞུགས་ཡོད་པ་མཐོང་ནས་ཁོང་ལ། དཀོན་མཆོག་གི་སྐྱེ་བུ། རྒྱལ་པོས་ཁྱེད་ལ་མར་ཕེབས་ཤོག་གསུངས་བཞིན་འདུག་ཞུས་པས།

¹⁰ ཨེ་ལི་ཡཱས་ལན་དུ། གལ་སྲིད་ང་དཀོན་མཆོག་གི་སྐྱེ་བུ་ཡིན་ན་ནམ་མཁའ་ནས་མེ་འབབ་ནས་ཁྱོད་དང་ཁྱོད་ཀྱི་མི་རྣམས་གསོད་པར་ཤོག་གསུངས་མ་ཐག་ཏུ། ནམ་མཁའ་ནས་མེ་འབབ་ནས་འགོ་འཛིན་དང་དེའི་མི་རྣམས་འཆིའོ།

¹¹ སྐྱར་དུ་རྒྱལ་པོས་འགོ་འཛིན་གཞན་ཞིག་དང་མི་ལྔ་བཅུ་ཐམ་པ་བཏང་ནས། ཨེ་ལི་ཡཱ་ལ་དཀོན་མཆོག་གི་སྐྱེ་བུ། རྒྱལ་པོས་ཁྱེད་ལ་འཕྲལ་དུ་མར་ཕེབས་ཤོག་ཅེས་བཀའ་གནང་གི་འདུག་ཅེས་ཞུས་པས།

¹² ལན་དུ་ཨེ་ལི་ཡཱས། ང་དཀོན་མཆོག་གི་སྐྱེ་བུ་ཡིན་ན་ནམ་མཁའ་ནས་མེ་འབབ་ནས་ཁྱོད་དང་ཁྱོད་ཀྱི་མི་རྣམས་གསོད་པར་ཤོག་གསུངས་མ་ཐག་མེ་འབབ་ནས་འགོ་འཛིན་དང་དེའི་མི་རྣམས་འཆིའོ།

¹³ སྐྱར་དུ་རྒྱལ་པོས་འགོ་འཛིན་ཞིག་དང་མི་ལྔ་བཅུ་ ཐམ་པ་བཏང་བ་རྣམས་ནས་འགོ་འཛིན་དེ་རི་བོའི་སྟེང་དུ་ཕྱིན་ནས་ཨེ་ལི་ཡཱའི་མདུན་དུ་སྤུས་མོ་བཙུགས་ནས་ཞུ་བ་ཕུལ་བ། དཀོན་མཆོག་གི་སྐྱེ་བུ་ང་དང་ངའི་མི་རྣམས་ལ་སྙིང་རྗེ་གནང་ནས། ང་ཚོའི་སྲོག་སྐྱོབས་རོགས་གནང་།

¹⁴ འགོ་འཛིན་གཞན་གཉིས་དང་དེ་ཚོའི་མི་རྣམས་ནམ་མཁའི་མེས་བསད་ཡོད་པ་ཡིན་ན་ཡང་ང་ལ་སྙིང་རྗེ་གནང་རོགས་གནང་ཞེས་ཞུས་སོ།

¹⁵ གཙོ་བོ་དཀོན་མཆོག་གི་ཕོ་ཉས། ཨེ་ལི་ཡཱ་ལ་མ་འཇིགས་པར་ཁོ་དང་མཉམ་དུ་མར་སོང་ཞིག་ཅེས་བཀའ་གནང་ངོ། དེར་བརྟེན་ཨེ་ལི་ཡཱ་འགོ་འཛིན་དེ་དང་མཉམ་དུ་རྒྱལ་པོའི་སར་ཕེབས་ནས།

¹⁶ ཁོ་ལ་སྨྲས་སོ། གཙོ་བོ་དཀོན་མཆོག་གིས་ཁྱོད་ལ། ཨིསི་རཱཨེལ་དུ་དཀོན་མཆོག་མེད་པ་ལྟར་ཁྱོད་ཀྱིས་ཨེག་རོན་གྱི་ལྷ་བྷལ་ཛེ་བུབ་ལ་མོ་རྒྱབ་པར་བང་ཆེན་རྣམས་བཏང་ངོ། དེའི་རྐྱེན་གྱིས་ཁྱེད་ནད་ལས་མི་གསོད་པ་མ་ཟད་ཁྱོད་ངེས་པར་འཆི་གི་རེད་ཅེས་བཀའ་གནང་ཡོད།

¹⁷ གཙོ་བོ་དཀོན་མཆོག་གིས་ཨེ་ལི་ཡཱ་བརྒྱུད་ནས་བཀའ་གནང་བ་ལྟར་ཨ་ཧ་ཛ་ཡཱ་འཆི་བའོ། ཨ་ཧ་ཛ་ཡཱ་ལ་བུ་ཕྲུག་མེད་སྟབས་ཁོའི་སྤུན་ཡོ་རམ་ནི་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱི་བུ་ཡེ་ཧོོ་རམ་གྱིས་རྒྱལ་སྲིད་སྐྱོངས་བའི་ལོ་གཉིས་པའི་སྐབས་སུ་ཁོ་རྒྱལ་པོར་འགྱུར་རོ།

¹⁸ རྒྱལ་པོ་ཨ་ཧ་ཛ་ཡཱའི་མཛད་པ་རྣམས་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ༎