རྒྱལ་རབས་དང་པོ། 1 - Tibetan Old Testament 2011

རྒྱལ་པོ་དཱ་བིད་སྐུ་ན་བགྲེས་པའི་སྐབས།

¹ ད་ལྟ་རྒྱལ་པོ་དཱ་བིད་དགུང་ལོ་ཧ་ཅང་བགྲེས་ཡོད་པ་དང་། ཁོང་གི་ཞབས་ཕྱི་ཚོས་ཁོང་ལ་ཉལ་ཆས་གྲོ་པོ་ག་ཚོད་གཡོགས་ནའང་གྲོད་ཁུགས་ཐུབ་ཀྱི་མེད་པ་ཡིན་ནོ།

² དེར་བརྟེན་ཁོང་གི་ལས་བྱེད་པ་ཚོས། མི་དབང་ཆེན་པོ། ང་ཚོས་ཁྱེད་དང་མཉམ་དུ་བསྡད་མཁན་དང་བལྟ་རྟོགས་བྱེད་མཁན་བུད་མེད་ན་གཞོན་ཞིག་འཚོལ་དགོས་སོ། མོས་ཁྱོད་ལ་གྲོ་པོ་ཡོང་ཕྱིར་ཁྱེད་དང་མཉམ་དུ་ཉལ་བར་འགྱུར་ཞེས་ཞུས་སོ།

³ ཨིསི་རཱཨེལ་གྱི་ས་ཁུལ་ཡོངས་སུ་བུ་མོ་མཛེས་མ་ཞིག་འཚོལ་བ་དང་། ཤུ་ནེམ་ནས་བུ་མོའི་མིང་ལ་ཨ་བྷི་ཤག་ཟེར་བ་ཞིག་རྙེད་ནས་མོ་ལ་རྒྱལ་པོའི་དྲུང་དུ་འཁྲིད་ཡོང་ངོ་།

⁴ མོ་ཧ་ཅང་མཛེས་པོ་ཡོད་པ་དང་། རྒྱལ་པོར་བལྟ་རྟོགས་ཡག་པོ་བྱེད་དོ། འོན་ཀྱང་ཁོང་གིས་མོ་དང་གཉམ་དུ་འཁྲིག་སྤྱོད་གནང་མེད་པ་ཡིན་ནོ༎

ཨ་དྷོ་ནི་ཡཱས་རྒྱལ་ཁྲི་ཡིན་ངེས་ཞེས་བརྗོད་པ།

^5-6 ད་ཆ་ཨབ་ས་ལོམ་གྲོངས་པ་དང་། དཱ་བིད་དང་ཧ་གྷིད་ཀྱི་བུ་ཨ་དྷོ་ནི་ཡཱ་ནི་ད་ལྟ་ཡོད་པའི་བུ་ཆེ་ཤོས་དེ་ཡིན། ཁོ་ནི་ཧ་ཅང་མཛེས་པའི་སྐྱེས་བུ་ཞིག་ཡིན་ཏེ། དཱ་བིད་ཀྱིས་ཁོ་ལ་དོན་གནད་གང་གི་སྐོར་ལ་ཡང་བཀའ་བཀྱོན་གནང་གི་མེད་པ་དང་། ཁོ་ནི་རྒྱལ་པོར་འགྱུར་འདོད་ཆེན་པོ་ཡོད་པས། ཁོས་རང་ཉིད་ཀྱི་དོན་དུ་ཤིང་རྟ་འཁོར་ལོ་རྣམས་དང་རྟ་རྣམས་དང་སྲུང་སྐྱོབ་བྱེད་མཁན་མི་ལྔ་ཅུ་ཐམ་པ་གོ་སྒྲིགས་བྱས་ཏེ།

⁷ ཁོས་ཛེ་རུ་ཡཱའི་བུ་ཡོ་ཨབ་དང་བླ་མ་ཨ་བྷི་ཡ་ཐར་མཉམ་དུ་གྲོས་མོལ་བྱས་པ་དང་། ཁོ་ཚོས་ཁོ་ལ་རྒྱབ་སྐྱོར་བྱ་རྒྱུའི་ཁས་ལེན་བྱས་སོ།

⁸ འོན་ཀྱང་བླ་མ་ཛ་དཱོག་དང་ཡེ་ཧོ་ཡ་དྷའི་བུ་བྷེ་ན་ཡཱ་དང་ལུང་སྟོན་པ་ན་ཐན་དང་ཤིམ་ཨི་དང་རིའི་དང་དཱ་བིད་ཀྱི་སྐུ་སྲུང་པ་རྣམས་ནས་ཨ་དྷོ་ནི་ཡཱའི་ཕྱོགས་སུ་མ་ཕྱིན་ནོ།

⁹ ཉིན་ཞིག་ཨ་དྷོ་ནི་ཡཱས་ཨེན་རོ་གྷེལ་གྱི་རྒྱུགས་ཆུའི་ཉེ་འགྲམ་དུ་སྦྲུལ་གྱི་བྲག་ཟེར་བ་དེར་ལུག་དང་བ་གླང་དང་བེའུ་རྒྱག་པ་རྣམས་དམར་མཆོད་འབུལ་ལོ། དམར་མཆོད་གྱི་མགྲོན་དུ་ཁོས་རྒྱལ་པོ་དཱ་བིད་ཀྱི་བུ་གཞན་དག་དང་རྒྱལ་པོའི་ལས་བྱེད་པ་ཡ་ཧུ་དཱ་པའི་མི་ཁོངས་རྣམས་མགྲོན་འབོད་བྱས་སོ།

¹⁰ འོན་ཀྱང་ཁོ་རང་དང་མ་གཅིག་པ་མིན་པའི་སྤུན་མཆེད་སོ་ལོ་མོན་དང་ལུང་སྟོན་པ་ན་ཐན་དང་བི་ན་ཡ་དང་རྒྱལ་པོའི་སྐུ་སྲུང་པ་རྣམས་ལ་མགྲོན་འབོད་མ་བྱས་སོ༎

སོ་ལོ་མོན་རྒྱལ་པོར་བསྐོས་པ།

¹¹ དེ་ནས་ན་ཐན་གྱིས་སོ་ལོ་མོན་གྱི་ཨ་མ་བྷད་ཤེ་བྷྷའི་སར་ཕེབས་ནས། ཧ་གྷིད་ཀྱིི་བུ་ཨ་དྷོ་ནི་ཡཱ་ཁོ་རང་ཉིད་རྒྱལ་པོར་འགྱུར་བ་ཤེས་མ་བྱུང་ངམ། རྒྱལ་པོ་དཱ་བིད་ཀྱིས་དེའི་སྐོར་གང་ཡང་མཁྱེན་གྱི་མེད་དོ།

¹² ཁྱོད་དང་ཁྱོད་ཀྱི་བུ་སོ་ལོ་མོན་གྱི་སྲོག་སྐྱོབ་འདོད་ཡོད་ན། ངས་ཁྱོད་ལ་གྲོས་སྟོན་ཞིག་བྱེད་རྒྱུ་ཡིན།

¹³ ཁྱོད་རང་རྒྱལ་པོ་དཱ་བིད་ཀྱི་དྲུང་དུ་སོང་ལ། མི་དབང་ཁྱེད་ནས་ངའི་བུ་སོ་ལོ་མོན་ལ་ཁྱེད་ཀྱི་ཤུལ་འཛིན་བྱེད་མཁན་དུ་རྒྱལ་པོར་བསྐོས་རྒྱུའི་ཞལ་བཞེས་གནང་མེད་དམ། ད་ཆ་ཨ་དྷོ་ནི་ཡཱ་རྒྱལ་པོར་འགྱུར་བ་དེ་ཅི་ཡིན་ནམ་ཞེས་ཤུས་ཤིག

¹⁴ ན་ཐན་གྱིས། ཁྱོད་ཀྱིས་དཱ་བིད་ལ་ལོ་རྒྱུས་ཞུས་བཞིན་པའི་སྐབས་དེར་ང་ཡོང་ནས་ཁྱོད་ཀྱི་ལོ་རྒྱུས་དེ་ལ་བདེན་པའི་ར་འཕྲོད་བྱ་རྒྱུ་ཡིན་ཞེས་སྨྲས་སོ།

¹⁵ དེ་འདྲ་སོང་ཙང་བྷད་ཤེ་བྷྷ་རྒྱལ་པོ་མཇལ་བར་གཟིམ་ཁང་དུ་བཅར་ནས། ཁོང་དགུང་ལོ་ཧ་ཅང་བགྲེས་པོ་ཡིན་པ་དང་ཤུ་ནེམ་ནས་ཡིན་པ་བུ་མོ་ཨ་བྷི་ཤག་གིས་ཁོང་ལ་ཞབས་ཕྱི་ཞུ་བཞིན་ཡོད་པ་དང་།

¹⁶ བྷད་ཤེ་བྷྷས་རྒྱལ་པོར་ཕྱག་ལན་གསུམ་ཕུལ་བ་དང་། རྒྱལ་པོས། ཁྱོད་ལ་ག་རེ་དགོས་སམ་ཅེས་སྨྲས་པ་དང་།

¹⁷ མོས་ལན་དུ། མི་དབང་ཆེན་པོ་གཙོ་བོ་དཀོན་མཆོག་ཁྱེད་ཀྱི་དཀོན་མཆོག་གི་མཚན་ནས་ཁྱེད་ཀྱི་རྗེས་སུ་ངའི་བུ་སོ་ལོ་མོན་རྒྱལ་པོར་འགྱུར་རྒྱུའི་དམ་བཅའ་གནང་ཡོད།

¹⁸ འོན་ཀྱང་ཨ་དྷོ་ནི་ཡཱ་རྒྱལ་པོར་འགྱུར་ཟིན་པས། དེའི་སྐོར་ཁྱེད་ཀྱིས་གང་ཡང་མཁྱེན་གྱི་མེད་དོ།

¹⁹ ཁོང་གིས་བ་གླང་མང་པོ་དང་ལུག་དང་བེའུ་རྒྱག་པ་སོགས་དམར་མཆོད་འབུལ་ནས་ཁྱེད་ཀྱི་བུ་རྣམས་དང་བླ་མ་ཨ་བྷི་ཡ་ཐར་དང་ཁྱེད་ཀྱི་དམག་སྤྱི་ཡོ་ཨབ་བཅས་ལ་མགྲོན་འབོད་བྱས་འདུག འོན་ཀྱང་ཁྱེད་ཀྱི་བུ་སོ་ལོ་མོན་ལ་མགྲོན་འབོད་བྱེད་མི་འདུག

²⁰ མི་དབང་ཆེན་པོ། ཨིསི་རཱཨེལ་པ་རྣམས་ཀྱིས་ཁྱེད་ཀྱི་ཤུལ་འཛིན་དུ་རྒྱལ་པོ་སུ་ཞིག་འགྱུར་རྒྱུ་ཡིན་པའི་སྐོར་ཁྱེད་ཀྱི་གསལ་སྒྲགས་གནང་རྒྱུ་དེ་སྒུག་བཞིན་ཡོད།

²¹ ཁྱེད་ཀྱིས་དེ་ལྟར་མ་གནང་བ་ཡིན་ན། ཁྱེད་གྲོངས་མ་ཐག་ངའི་བུ་སོ་ལོ་མོན་དང་ང་གཉིས་ཉེས་ཅན་དུ་རྩིས་ཡོང་ཞེས་ཞུས་སོ།

²² མོས་རྒྱལ་པོར་ཞུ་བཞིན་པའི་སྐབས་དེར་ན་ཐན་ཕོ་བྲང་དུ་སླེབས་སོ།

²³ ལུང་སྟོན་པ་ཕེབས་ཡོད་པའི་སྐོར་རྒྱལ་པོར་ཞུས་པ་དང་། ན་ཐན་ནང་དུ་ཕེབས་ནས་རྒྱལ་པོར་ཕྱག་འབུལ་ཞུས་སོ།

²⁴ དེ་ནས་ན་ཐན་གིས། མི་དབང་ཆེན་པོ། ཨ་དྷོ་ནི་ཡཱ་ནི་ཁྱེད་ཀྱི་ཤུལ་འཛིན་དུ་རྒྱལ་པོར་འགྱུར་རྒྱུར་གསལ་སྒྲགས་གནང་བ་ཡིན་ནམ།

²⁵ ཉི་མ་དེ་རིང་རང་ཁོས་བ་གླང་རྣམས་དང་ལུག་རྣམས་དང་བེའུ་གྱག་པ་རྣམས་མང་པོ་དམར་མཆོད་འབུལ་སོང་། ཁོང་གིས་ཁྱེད་ཀྱི་བུ་རྣམས་དང་དམག་སྤྱི་ཡོ་ཨབ་དང་བླ་མ་ཨ་བྷི་ཡ་ཐར་མགྲོན་འབོད་བྱས་ནས་ད་ལྟ་རང་ཁོ་ཚོ་དགྱེས་སྟོན་བྱེད་སྐབས་སུ། རྒྱལ་པོ་ཨ་དྷོ་ནི་ཡཱ་སྐུ་ཚེ་རིང་པོར་གནས་པར་ཤོག་ཅེས་སྐད་འབོད་བྱེད་བཞིན་འདུག

²⁶ འོན་ཀྱང་ཁོང་གིས་ང་དང་བླ་མ་ཛ་དཱོག་དང་བྷེ་ན་ཡཱ་དང་སོ་ལོ་མོན་བཅས་ལ་མགྲོན་འབོད་བྱས་མ་བྱུང་།

²⁷ མི་དབང་ཁྱེད་ཀྱིས་ལས་བྱེད་པ་ཚོར་ཁྱེད་ཀྱི་ཤུལ་འཛིན་དུ་རྒྱལ་པོ་སུ་ཞིག་འགྱུར་རྒྱུའི་སྐོར་མ་གསུངས་བར་འདི་ཚང་མ་གནང་བ་ཡིན་ནམ་ཞེས་ཞུས་པས།

²⁸ རྒྱལ་པོ་དཱ་བིད་ཀྱིས་བྷད་ཤེ་བྷྷ་ནང་ལ་འབོད་ཅིག་བསུངས་པ་དང་། མོ་ནང་ལ་ཡོང་ནས་ཁོང་གི་མདུན་དུ་ལངས་སོ།

²⁹ དེ་ནས་ཁོང་གིས་མོ་ལ། ངའི་དཀའ་ངལ་ཚང་མ་ནས་སྐྱོབས་གནང་མཁན་གསོན་པོའི་གཙོ་བོ་དཀོན་མཆོག་གི་མཚན་ནས་དམ་བཅའ་བྱེད་རྒྱུ་ཡིན།

³⁰ གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གི་མཚན་ནས་ཁྱོད་ཀྱི་བུ་སོ་ལོ་མོན་ངའི་ཤུལ་འཛིན་དུ་རྒྱལ་པོར་འགྱུར་རྒྱུའི་དམ་བཅའ་ཁྱོད་ལ་བྱས་པ་དེ་དེ་རིང་ངས་སྒྲུབ་རྒྱུ་ཡིན་ཞེས་གསུངས་སོ།

³¹ བྷད་ཤེ་བྷྷས་གུས་བཀུར་ཞུ་བཞིན་ཕྱག་འབུལ་ཞུས་ནས། ངའི་གཙོ་བོ་རྒྱལ་པོ་དུས་རྟག་ཏུ་སྐུ་ཚེ་རིང་པོ་ཡོང་བར་ཤོག་ཅེས་ཞུས་སོ།

³² རྒྱལ་པོ་དཱ་བིད་ཀྱིས་ཛ་དཱོག་དང་ན་ཐན་དང་། བྷེ་ན་ཡཱ་བཅས་སྐད་བཏང་བ་དང་ཁོ་ཚོ་སླེབས་ཏེ།

³³ ཁོང་གིས་ཁོ་ཚོར་ངའི་རྒྱལ་ཁང་གི་ལས་བྱེད་པ་ཚོ་ཁྱོད་ཚོ་མཉམ་དུ་འཁྲིད་ནས་ངའི་བུ་སོ་ལོ་མོན་ལ་ང་རང་ཉིད་ཀྱི་དྲེལ་ལ་བཞོན་བཅུག་ནས་གྷི་ཧོན་གྱི་ཆུ་མིག་བར་མཉམ་དུ་འགྲོ་དགོས་སོ།

³⁴ ཛ་དཱོག་དང་ན་ཐན་གཉིས་ནས་ཁོ་ལ་ཨིསི་རཱཨེལ་པའི་རྒྱལ་པོར་བསྔོ་འབུལ་བྱོས་ཤིག དེ་ནས་དུང་ཆེན་འབུད་ནས་རྒྱལ་པོ་སོ་ལོ་མོན་སྐུ་ཚེ་ཡུན་རིང་གནས་པར་ཤོག་ཅེས་སྐད་འབོད་བྱོས་ཤིག

³⁵ དེ་ནས་ཁྱོད་ཚོ་ཁོ་དང་མཉམ་དུ་འདིར་ཡོང་ནས་ཁོ་ངའི་ཁྲིར་འཁོད་རྒྱུ་ཡིན་ནོ། གང་ལགས་ཟེར་ན། ཁོ་ནི་ངས་འདམས་པའི་ཨིསི་རཱཨེལ་དང་ཡ་ཧུ་དཱ་པའི་རྒྱལ་པོ་ཡིན་ཞེས་གསུངས་སོ།

³⁶ དེ་ནས་བྷེ་ན་ཡཱས་དེ་ལྟར་བྱེད་རྒྱུ་ཡིན་པས། གཙོ་བོ་དཀོན་མཆོག་གིས་ཁྱེད་ཀྱིས་བྱ་བ་དེ་ཚོ་ལ་ངོས་འཛིན་གནང་བར་ཤོག་ཅེས་ཞུས་སོ།

³⁷ གཙོ་བོ་དཀོན་མཆོག་མི་དབང་ཁྱེད་དང་མཉམ་དུ་བཞུགས་པ་བཞིན་སོ་ལོ་མོན་དང་མཉམ་དུ་ཡང་བཞུགས་ནས་ཁོང་གི་རྒྱལ་སྲིད་རྒྱལ་པོ་ཁྱེད་ཀྱི་རྒྱལ་སྲིད་ལས་སྟོབས་འབྱོར་དང་མངའ་ཐང་རྒྱས་པར་ཤོག་ཅེས་ཞུས་སོ།

³⁸ དེ་ནས་ཛ་དཱོག་དང་ན་ཐན་དང་བྷེ་ན་ཡཱ་དང་རྒྱལ་པོའི་སྐུ་སྲུང་པ་བཅས་ནས་སོ་ལོ་མོན་ལ་རྒྱལ་པོ་དཱ་བིད་ཀྱི་ཆིབས་དྲེལ་ལ་བསྐྱོན་ནས་ཆུ་མིག་གྷི་ཧོན་བར་དུ་མཉམ་དུ་ཕྱིན་ནོ།

³⁹ ཛ་དཱོག་གིས་གཙོ་བོ་དཀོན་མཆོག་གནས་པའི་དབུ་གུར་དམ་པ་ནས་འཁྱེར་ཡོང་བའི་ཁ་སྐྱུ་པོའི་སྣུམ་དེ་བླངས་ནས་སོ་ལོ་མོན་ལ་བྱུགས་ནས་ཁོང་ལ་རྒྱལ་པོར་བསྔོ་འབུལ་བྱས་སོ། དེ་ནས་དེ་ཚོས་དུང་ཆེན་འབུད་པ་དང་མི་མང་ཡོང་ནས་རྒྱལ་པོ་སོ་ལོ་མོན་སྐུ་ཚེ་རིང་པོར་གནས་པར་ཤོག་ཅེས་སྐད་འབོད་བྱས་སོ།

⁴⁰ དེ་ནས་དེ་ཚོ་ཚང་མ་ཁོང་གི་རྗེས་སུ་རྒྱུགས་ཡོང་ནས་དགའ་སྤྲོའི་སྐད་འདོན་པ་དང་གླིང་བུ་གཏོང་བ་དང་ས་གཞི་འགུལ་ཐུབ་པའི་ཅ་ཅོ་འདོན་ནོ།

⁴¹ ཨ་དྷོ་ནི་ཡཱ་དང་ཁོའི་སྐུ་མགྲོན་རྣམས་ནས་དགྱེས་སྟོན་ཐུགས་སྤྲོ་ཚར་གྲབ་ཡོད་སྐབས་ཁོ་ཚོས་སྒྲ་ཞིག་ཐོས་སོ། ཡོ་ཨབ་ཀྱིས་སྒྲ་དེ་ཐོས་པ་དང་ཁོས་གྲོང་ཁྱེར་ནང་གི་སྒྲ་དེའི་དོན་ཅི་ཡིན་ཞེས་དྲི་བ་དྲིས་པ་དང་།

⁴² ཁོས་སྐད་ཆ་བཤད་མ་ཚར་གོང་དུ་བླ་མ་ཨ་བྷི་ཡ་ཐར་གྱི་བུ་ཡོ་ན་ཐན་དེར་སླེབས་པ་དང་། ཨ་དྷོ་ནི་ཡཱས་ཁོ་ལ་ནང་ལ་ཤོག། ཁྱོད་མི་བཟང་པོ་ཞིག་ཡིན་སྟབས་ཁྱོད་ཀྱིས་གཏམ་ཡང་བཟང་པོ་ཞིག་འཁྱེར་ཡོད་ཤག་རེད་ཅེས་སྨྲས་སོ།

⁴³ ལན་དུ་ཡོ་ན་ཐན་གྱིས་དེ་ལྟར་མིན། མི་དབང་ཆེན་པོ་དཱ་བིད་ཀྱིས་སོ་ལོ་མོན་ལ་རྒྱལ་པོར་བསྐོས་སོང་།

⁴⁴ ཁོང་གིས་ཛ་དཱོག་དང་ན་ཐན་དང་བྷེ་ན་ཡཱ་དང་རྒྱལ་པོའི་སྐུ་སྲུང་པ་རྣམས་དང་མཉམ་དུ་བཏང་ནས། དེ་ཚོས་ཁོང་ལ་རྒྱལ་པོའི་ཆིབས་དྲེལ་ལ་བཞོན་བཅུག་པ་དང་།

⁴⁵ ཛ་དཱོག་དང་ན་ཐན་ནས་ཁོང་ལ་ཆུ་མིག་གྷི་ཧོན་དུ་རྒྱལ་པོར་ངོས་འཛིན་གྱི་བསྔོ་འབུལ་བྱས་སོང་། དེ་ནས་དེ་ཚོ་གྲོང་ཁྱེར་དུ་སོང་ནས་དགའ་སྤྲོའི་སྒྲ་སྒྲོགས་བཞིན་མི་མང་རྣམས་ཀྱི་འུར་སྒྲའི་གང་འདུག ད་ལྟ་ཁྱོད་ཚོས་ཐོས་པའི་སྒྲ་དེ་དེ་རང་ཡིན་ནོ།

⁴⁶ དེ་ལས་ལྷག་པ་གང་བྱུང་སོང་ཟེར་ན། ད་ཆ་སོ་ལོ་མོན་རྒྱལ་པོ་ཡིན་པ་དང་།

⁴⁷ དེ་ཡིན་ཙང་རྒྱལ་སྲིད་ཀྱི་ལས་བྱེད་པ་ཚོས་མི་དབང་ཆེན་པོ་དཱ་བིད་ལ་གུས་ཕྱག་ཕུལ་བར་ཕྱིན་ནས། ཁོང་ཚོས་རྒྱལ་པོ་ལ། ཁྱེད་ཀྱི་དཀོན་མཆོག་གིས་སོ་ལོ་མོན་ལ་ཁྱེད་ལས་མཚན་སྙན་གྲགས་ཆེ་བ་བྱུང་བ་མ་ཟད་སྟོབས་འབྱོར་དང་མངའ་ཐང་ལྷག་པར་རྒྱས་པར་ཤོག་ཅེས་ཞུས་པ་དང་། དེ་ནས་རྒྱལ་པོ་དཱ་བིད་ཀྱིས་ཉལ་ཁྲིའི་སྟེང་ནས་དབུ་སྒུར་ནས་གསུངས་པ།

⁴⁸ ཁོང་གིས་དེ་རིང་གི་ཉི་མ་ལ་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ངའི་ཤུལ་འཛིན་དུ་ངའི་རིགས་བརྒྱུད་ནང་ནས་རྒྱལ་པོ་ཞིག་བསྐོ་གཞག་གནང་བ་དང་། ངའི་མི་ཚེའི་རིང་ལ་དེ་ལྟར་མཐོང་ཐུབ་པ་དེ་ལ་བསྟོད་བསྔགས་པར་ཤོག་ཅེས་མོན་ལམ་འདེབས་སོ།

⁴⁹ དེ་ནས་ཨ་དྷོ་ནི་ཡཱའི་མགྲོན་པོ་རྣམས་འཇིགས་ནས་ལངས་ཏེ་རང་རང་སོ་སོའི་ལམ་དུ་ཕྱིན་ནོ།

⁵⁰ ཨ་དྷོ་ནི་ཡཱ་ཁོ་རང་ཡང་སོ་ལོ་མོན་ལ་ཧ་ཅང་འཇིགས་ནས་ལངས་ཏེ་གཙོ་བོ་དཀོན་མཆོག་གནས་པའི་དབུ་གུར་དམ་པའི་སར་ཕྱིན་ནས་མཆོད་ཁྲིའི་ཟུར་ཞིག་ལ་འཐམས་སོ།

⁵¹ རྒྱལ་པོ་སོ་ལོ་མོན་ལ། ཨ་དྷོ་ནི་ཡཱ་ཁྱེད་ལ་འཇིགས་ནས་མཆོད་ཁྲིའི་ཟུར་ཞིག་ལ་འཐམས་འདུག་ཅེས་ཞུས་པ་དང་། ཁོས་རྒྱལ་པོ་སོ་ལོ་མོན་གྱིས་ང་ལ་མི་གསོད་པའི་དམ་བཅའ་གནང་དགོས་ཤེས་ཞུས་སོ།

⁵² སོ་ལོ་མོན་གྱིས། ཁོ་དམ་ཚིག་ཅན་ཡིན་ན་ཁོའི་སྐྲ་རྐང་གཅིག་ཀྱང་རེག་པར་མི་བྱའོ། འོན་ཀྱང་ཁོ་དེ་ལྟར་མིན་ན་ཁོ་འཆི་བར་ངེས་སོ་ཅེས་གསུངས་སོ།

⁵³ དེ་ནས་རྒྱལ་པོ་སོ་ལོ་མོན་གྱིས་ཨ་དྷོ་ནི་ཡཱ་འཁྲིད་ཕྱིར་མི་རྣམས་བཏང་ནས། ཁོ་ལ་མཆོད་ཁྲིད་ནས་མར་ཕབ་སྟེ་འཁྲིད་ཡོང་དགོས། ཨ་དྷོ་ནི་ཡཱ་རྒྱལ་པོའི་དྲུང་དུ་ཕྱིན་ནས་གུས་བཀུར་དང་ཕྱག་འབུལ་ཞུས་པ་དང་། དེ་ནས་རྒྱལ་པོས་ད་ཁྱོད་རང་རང་གི་ཁྱིམ་དུ་སོང་ཞིག་ཅེས་གསུངས་སོ༎