ཧི་བུརུ། 1 - Tshangla New Testament (BSI)

སྲས་ཤོ་ ཞིང༌ཁམས༌ག་འཐེན༌པ༌བ༌ཀེ༌བུ་ ཆི༌ལུ་གི༌ལ།

¹ དང་པོ་ག་དུས་ག་ དཀོན་མཆོག་གི་ ཨ་ཧ་ཕ་མ་བ་ཀབ་ཉི་ ལུང་བསྟན་པ་བ་ཀ་ཐུང་ཀེ་ཨ་ཉི་ མ་འདྲ་ཝ་ མ་འདྲ་ཝ་ཨ་ཉི་ ཤེབ་མང་པུ་ཐུར་ གསུང་གྲོས་མཛད་གནང་མ༌ལ།

² དག་པ་ཀབ་ཉི་ ཨོ་ཐ་དུས་ཇུ་ཀ་གི་ནེ་ལ་ དཀོན་མཆོག་གི་ ཨ་ཧ་ཏཱན་ རོ་ཀ་སྲས་ག་ཐུང་ཀེ་ཨ་ཉི་ གསུང་གྲོས་མཛད་གནང༌མ། ཉི་བཀོད་ཉི་ཐ་ཁཱན་བ་ ཐམས་ཅན་རང་ རོ་ཀེ་ཨ་ཉི་ བཀོད་པ་གི་ཝ༌ལ། དཀོན་མཆོག་གི་ རོ་ཀ་སྲས་ཤོ་ ཐམས་ཅན་རང་ཉོང་ཁཱན་ ཀེན་གནང་མ༌ལ།

³ སྲས་ཤོ་ དཀོན་མཆོག་ག་ གཟི་བརྗིད་ག་ འོད་ཟེར་གི༌ལ། ཉི་དཀོན་མཆོག་ ཧང་ད་བུ་ཅ་གི་ལ་སྨོ་ རོག་བུ་ ཨུ་ཉུ་ད་བུ་རང༌ཅ། ཐམས་ཅན་རང་ སྟོབས་དབང་ཆོ་ཁཱན་ རོ་ཀ་གསུང་གི་ ཏོས་པ་ཨ་དེན་གེ་ ཆོན་ཅ་གི༌ལ། རོ་ཀི་སོ་ངོ་ ཐམས་ཅན་རང་ སྡིག་པ་གེ་དག་ཉི་ གནང་དེན་གེ་ ཞིང་ཁམས་ག་བྱོན་ཐཱན་ ཐམས་ཅན་གེ་ གཟི་བརྗིད་ཅན་ཆོ་ཁཱན་ དཀོན་མཆོག་ག་ ལ་ཉོང་ལོ་ཀ་བཞུགས་པ༌ལ།

⁴ ཨོ་ཉི་ཨ་དེན་གེ་ ཞིང་ཁམས་ག་ འཐེན་པ་བ་ཀ་མཚན་གེ་ རོ་ཀ་མཚན་ ཆི་ལུ་ཅོད་གནང་མ་ པུརུས་ཀིན་ཨ་ཉི་ རོག་ཤོ་ ཞིང་ཁམས་ག་འཐེན་པ་བ་ཀེ་ ཆི་ལུ་གི༌ལ།

⁵ ཧང་ཡ་དག་ནེ་ལ་ དཀོན་མཆོག་གི་ ཡི་ཤུ་ག་གསུངས་མ་ད་བུ་ ཞིང་ཁམས་ག་འཐེན་པ་བ་ཀ་ ཧ་ལ་རང་མ་གསུངས་མ་ཅ་ ནཱན་ཤོ་ ཇ་ག་ཟ་གི༌ལ། ཐི་ནོང་ཇང་ ན་ག་ཨ་པ་རི་ཝ་ན་ དག༌ཉི། ཉི་ཨོམ་ཆང་རང་ ཨོ་ཐེན་བུ་གསུངས་མ་ཅ་ ཇང་ཤོ་ རོ་ཀ་ཨ་པ་རི༌ལེ། ཉི་རོག་ ཇ་ག་ཟ་རི་ལེ་ དག༌ཉི།

⁶ ཉི་ཨོམ་ཆང་རང་ དཀོན་མཆོག་གི་ འཛམ་གླིང་ནང་ཀ་ རོ་ཀ་གོ་སིང་ཁཱན་ ཟ་གནང་མེ་གང་ཀ་ གསུངས་མ་ཅ་ དཀོན་མཆོག་ག་ ཞིང་ཁམས་ག་འཐེན་པ་ ཐམས་ཅན་གི་ རོ་ཀ་གསོལ་ཝ་ཏབ་ཅེན་ དག༌ཉི།

⁷ ཞིང་ཁམས་ག་འཐེན་པ་བ་ཀ་ཀོར་གེ་ གསུངས་ཉི་ ཨོ་ཐེན་གསུངས་མ་ཅ་ དཀོན་མཆོག་གི་ རོ་ཀ་ཞིང་ཁམས་ག་འཐེན་པ་བ་ རི་དི་ད་བུ་ཅོད་ཉི་གནང༌ཅ། ཉི་རོ་ཀ་གཡོག་པ་བ་ མི་ད་བུ་ཅོད་ཉི་གནང་ཅ་ དག༌ཉི།

⁸ དག་པ་ཀབ་ཉི་ རོ་ཀི་ རོ་ཀ་སྲས་ག་ཏཱན་ ཨོ་ཐེན་གསུངས་མ་ཅ་ དཀོན་མཆོག་ ན་ག་གསེར་ཁྲི་ཁེ་པ་ དུས་ཏ་བུ་ག་དེན་གེ་གི༌ལ། ཉི་དྲང་པུ་ཨ་ཉི་ ནཱན་གི་ ན་ག་སོ་ངོ་བ་ དབང་ཉི་གནང༌ཅ།

⁹ ནཱན་གི་དྲང་པུ་ཕང་ཅ་ དག་པ་ཀབ་ཉི་ དྲང་པུ་མ་ཁཱན་བ་ ཟེས་པུ་མཱན་ཅ་དག༌ཉི། ཨོ་ཉི་ཨ་དེན་གེ་ ཇང་ ན་ག་དཀོན་མཆོག་གི་ ཤོ་ནང་ཕེ་ལེ་རིག་ཁཱན་སི་གི་ ན་ག་ཐུང་ཀ་སོག་ཉི་ ནཱན་ཁེ་པ་ ན་ག་ཇ་རོ་བ་ཀ་ཐུང་ཀེ་ཨ་ཉི་ ཐཱན་གནང་མ༌ཅ།

¹⁰ རོ་ཀི་ཨོ་ཐེན་བུ་ གསུངས་མ་ཅ་ གཙོ་བོ་ གོ་ཙུག་པེ་གང་ཀ་ འཛམ་གླིང་ག་རྨང་ ནཱན་གི་ཆེ་ཝ་གི༌ལ། ཉི་ཞིང་ཁམས་བ་བུ་ ན་ག་ཕྱག་ཀི་བཀོད་པ་གི༌ལ།

¹¹ རོག་ཏེ་བ་ ཐམས་ཅན་རང་ མ་ཝ་རི༌ལེ། དག་པ་ཀབ་ཉི་ ནཱན་ཐུར་ཤ་ དུས་ཏ་བུ་རང་བཞུགས༌པེ། རོག་ཏེ་བ་ ཐམས་ཅན་རང་ ཁ་མུང་པུརུས་ཀིན་ཨ་ཉི་ ཕུད་ཇོང༌མེ།

¹² ནཱན་གི་ རོག་ཏེ་བ་ ཁ་མུང་ཏ་པ་པུརུས་ཀིན་ཨ་ཉི་ དྲིན་གནང༌མེ། ཉི་ཁ་མུང་པུརུས་ཀིན་ཨ་ཉི་ རོག་ཏེ་བ་བུ་ ལེང༌མེ། དག་པ་ཀབ་ཉི་ ནཱན་ཤོ་ ཧ་ལ་རང་འགྱུར་བུ་མཱན༌ཅ། ཉི་ན་ག་ཚེ་ག་ ཧ་ལ་རང་ཇུག་མཱན༌ཅ།

¹³ ཇི་གི་ ན་ག་དགྲ་བྱང་ཕིཤི་བ་ ན་ག་བི་ག་ཏཱན་ མ་ཅོད་པ་སག་པུ་ ནཱན་ ཇ་ག་ལ་ཉོང་ལོ་ཀ་ ལང་ཉི་ཆོའི་ དག་ཉི་ དཀོན་མཆོག་གི་ ཞིང་ཁམས་ག་འཐེན་པ་ ཨི་བི་ག་ཏཱན་ གསུངས་མ་ལ་ཡ།

¹⁴ དག་པ་ཀབ་ཉི་ ཞིང་ཁམས་ག་འཐེན་པ་བ་ དཀོན་མཆོག་ག་ ཕྱག་ཞུ་ཁཱན་ གཡོག་པ་བ་གི༌ལ། ཨོ་ཐ་རྣམ་ཤེས་བ་ཤོ་ ཐར་པ་ཉོང་པེ་གི་ཁཱན་བ་ཀ་ ཇ་རོ་ཨ་ལེ་དེན་གེ་ དཀོན་མཆོག་གི་ ཀུན་ཏི་ཝ་གི༌ལ༎