ཨེ་ཕི་སི། 1 - Tshangla New Testament (BSI)1 ཨོ་ཐ་ཡི་གུ་ཁེ་པ་ དཀོན་མཆོག་ག་ ཐུགས་བཞེད་དང་ཏུ་ཉི་ ཁིརིས་ཡི་ཤུ་ག་ སྐུ་ཚབ་རི་ཁཱན་ པ་ཝལ་གི་ ཁིརིས་ཡི་ཤུ་ག་ དམ་ཚིག་ཙུང་ཉི་ཕྱག་ཞུ་ཁཱན་ ཨེ་ཕི་སཱས་ག་ དཀོན་མཆོག་ག་ སོ་ངོ་བ་ཀ་ཏཱན་ འབྲི་ཅ་གི༌ལ། 2 ཨ་ཧ་ཡབ་དཀོན་མཆོག་དང་ གཙོ་བོ་ཡི་ཤུ་ཁིརིས་གི་ ན་ཧ་ཐུགས་རྗེ་དང་ སྐྱིད་པུ་གནང་ཆེན༎ ཐུགས་ཉིད་ག་བྱིན་རླབས༌བ། 3 ཨ་ཧ་གཙོ་བོ་ཡི་ཤུ་ཁིརིས་ག་ཡབ་དང་ དཀོན་མཆོག་ག་ བཀའ་དྲིན་བསམ་ཁེ། ཧང་ཡ་དག་ནེ་ལ་ ཁིརིས་ག་ཐུང་ཀེ་ཨ་ཉི་ ཞིང་ཁམས་ག་བཱརང་ཀ་ཆོ་ཁཱན་ ཐུགས་ཉིད་ག་བྱིན་རླབས་ ཐམས་ཅན་རང་ རོ་ཀི་ཨ་ཧ་གནང་མ༌ཅ། 4 ཨ་ཧ་བ་ རོ་ཀ་སྤྱན་ག་ དམ་པ་དང་ ཅོན་ད་སུ་རང་མ་ཝ་ཨ་ཉི་ ཨུན་ཆེན་དག་པ་གི་ འཛམ་གླིང་མ་བཀོད་པེ་ གོ་མ་གེ་རང་ ཁིརིས་གེ་ཨ་ཉི་ དཀོན་མཆོག་གི་ ཨ་ཧ་བ་ཕང་ཉི་ སི་ཉི་གནང་མ༌ལ། 5 ཡི་ཤུ་ཁིརིས་ག་ཐུང་ཀེ་ཨ་ཉི་ ཨའི་ཤོ་ རོ་ཀ་སྲས་སྲས་མོ་ཅོད་ཉི་ གནང་མེ་དེན་གེ་ རོ་ཀི་གོ་མ་གེ་རང་ ཐུགས་བསམ་བཞེས་ཝ་ཆོ༌ཝ། ཉི་ཨུ་ཐུ་ཤོ་ རོག་ཐུགས་བཞེས་ཝ་ག་ ཐུགས་བསམ་གི་ཝ་ཆོ་ཝ༌ལ། 6 རོ་ཀི་གནམ་མེད་ས་མེད་ཕང་ཁཱན་ རོ་ཀ་སྲས་ག་ཐུང་ཀེ་ཨ་ཉི་ དཀོན་མཆོག་གི་ ཨ་ཧ་ཏོང་པ་གེ་ གནང་མ་ཨ་དེན་གེ་དང་ རོ་ཀ་གཟི་བརྗིད་ཅན་ག་ ཐུགས་རྗེ་ག་དེན་གེ་ ཨ་ཤི་དཀོན་མཆོག་ག་ བསྟོད་པ་ཕུལ་ཁེ། 7 ཧང་ཡ་དག་ནེ་ལ་ ཁིརིས་ག་སྐུ་ཁྲག་གི་ཨ་ཉི་ ཨ་ཧ་ཚེ་ཐར་གནང་མ༌ཅ། ཉི་དཀོན་མཆོག་ག་ ཐུགས་རྗེ་ཆི་ལུ་ཆོ་ཝ་ཨ་དེན་གེ་ ཨ་ཧ་སྡིག་པ་བ་ བཀའ་དྲིན་བསྐྱང་མ༌ཅ། 8 ཉི་རོ་ཀི་ རིག་པ་དང་ཤེས་རབ་ ཐམས་ཅན་དང་ཏབ་ཐུར་ག་ ཐུགས་རྗེ་བུ་ཇོབ་ཇོབ་ཨ་ཉི་ གནང་མ༌ཅ། 9 ཉི་ཧ་གོ་ལེ་མར་ཁཱན་ དཀོན་མཆོག་ག་འཆར་གཞི་ཁེ་པ་ ཨ་ཤི་ཧ་གོ་ལེ་རེ༌བ། རོ་ཀ་འཆར་གཞི་ཁེ་པ་ ཁིརིས་གི་འགྲུབ་ཕེ་དེན་གེ་ རོ་ཀ་ཐུགས་བསམ་ ལེག་པུ་དང་ཏུ་ཉི་ གོ་མ་གེ་རང་ ཙམ་ཉི་ཐ་ཝ་ཆོ་ཝ༌ལ། 10 ཨུ་ཐུ་ཤོ་ རོ་ཀ་འཆར་གཞི་གི༌ལ། དུས་ཙུན་ཕྲིག་ཀིན་ རེན་པ་ཀབ་ཉི་ ཞིང་ཁམས་དང་ འཛམ་གླིང་ག་ཆོ་ཁཱན་ ཐམས་ཅན་རང་ རོ་ཀི་ཁིརིས་ག་ དབང་ཚད་ཕརའ་ཁེ་ ཙུག་ཉི་གནང༌མེ། 11 དཀོན་མཆོག་གི་ རོ་ཀ་འཆར་གཞི་དང་ཏུ་ཉི་ ཐམས་ཅན་རང་ ཏབ་ཐུར་ཇུང་མེ་རིག༌ལ། ཉི་ཨའི་བུ་ རོ་ཀི་ གོ་དང་པ་གེ་རང་ ཙམ་ཉི་ཐ་ཁཱན་ རོ་ཀ་འཆར་གཞི་དང་ཏུ་ཉི་ ཁིརིས་ག་ཐུང་ཀེ་ སི་ཉི་གནང་མ༌ཅ། 12 ཨུ་ཉུ་ཤོ་ ཨའི་ཁིརིས་ག་ཐུང་ཀ་ གོ་དང་པ་རེ་ཆ་ཨ་ཁཱན་ སོ་ངོ་བ་ཀི་ གཟི་བརྗིད་ཅན་ག་ དཀོན་མཆོག་ག་ བསྟོད་པ་ཕུལ་ཆེན་དག་པ་གི་གི༌ལ། 13 ཉི་ཨོམ་ ན་ཤི་བུ་ ཐར་པ་གནང་ཁཱན་ འཐེན་ལེག་པུ་ག་ དེན་པ་གསུང་ཁེ་པ་ ན་ཐ་ཝ་ཨ་དེན་གེ་ ན་ཧ་བ་བུ་ ཁིརིས་ག་ནང་ཀ་ཚུད་པ༌ཅ། ན་ཤི་དད་པ་ཨ་ཝ་ཨ་དེན་གེ་ ན་ཧ་ཐུང་ཀ་ཐེལ་ཙི་ཕི་ཉི་ དབུ་མནའ་བཞེས་ཁཱན་ དམ་པའི་ཐུགས་ཉིད་གནང་མ༌ཅ། 14 དཀོན་མཆོག་གི་ དབུ་མནའ་བཞེས་ཁཱན་ ཐམས་ཅན་རང་ རོ་ཀི་ཨ་ཧ་གནང༌མེ། ཉི་དཀོན་མཆོག་ག་གི་ཁཱན་བ་ ཚེ་ཐར་ཐར་ཉི་གནང་མེ་དག་ཉི་ གེན་མེ་དེན་གེ་ དམ་པའི་ཐུགས་ཉིད་ཤོ་ ཇ་མི་གི༌ལ། རོ་ཀ་གཟི་བརྗིད་ག་ བསྟོད་པ་ཕུལ་ཁེ༎ པ་ཝལ་ག་སྨོན་ལམ། 15 ཨོ་ཉི་ཨ་དེན་གེ་ གཙོ་བོ་ཡི་ཤུ་ག་ཀེ་ཁཱན་ ན་ཧ་དད་པ་དང་ དམ་པའི་སོ་ངོ་བ་ཀ་དེན་གེ་ ན་ཧ་སྙིང་རྗེ་ག་ཀོར་གེ་ ཇི་གི་ ན་ཐ་དེན་ཐུར་གེ་ག་ཏཱན་ 16 ཇ་ག་སྨོན་ལམ་ག་ ན་ཧ་བ་ཡིད་ཀ་ཨ་ཉི་ ཇི་གི་ན་ཧ་དེན་གེ་ བཀའ་དྲིན་བསམ་མེ་ག་ ཐུབ་མ་ཐ་ཝ༌ཅ། 17 གཟི་བརྗིད་ཅན་ག་ཡབ་དང་ གཙོ་བོ་ཡི་ཤུ་ཁིརིས་ག་ དཀོན་མཆོག་གི་ ན་ཧ་ཏཱན་ རོ་ཀ་ཐུགས་ཉིད་གནང་ཤོ་དག་ཉི་ ཇི་གི་ཞུ་ཝ༌ཅ། ཉི་ན་ཤི་ རོག་ཨོ་ཉ་གེ་བུ་ལག་ཉི་ སེ་ལེ་དེན་གེ་ ཐུགས་ཉིད་གི་ཨ་ཉི་ ན་ཧ་རིག་པ་དང་ ཤེས་རབ་གནང༌མེ། 18 རོ་ཀི་ར་ཁཱན་བ་ཀ་ ཚེ་ལེག་པུ་གནང་མེ་དག་ཉི་ རོ་ཀི་དབུ་མནའ་བཞེས་ཁཱན་ཁེ་པ་ ན་ཤི་ཧ་གོ་ལེ་རེ་བེ་དེན་གེ་ ན་ཧ་སེམས་ཀ་ མིང་ཆོག་ཅེན་དག་ཉི་ ཇི་གི་སྨོན་ལམ་ཏབ༌ཅ། རོ་ཀི་ རོ་ཀ་སོ་ངོ་བ་ཀ་དེན་གེ་ཐ་ཁཱན་ གཟི་བརྗིད་ཅན་ག་བྱིན་རླབས་ གནམ་མེད་ས་མེད་ མང་པུ་ཆོ་ཁཱན་ཁེ་པ་ ན་ཤི་ཐོང་མེ་རེ༌བེ། 19-20 ཉི་ཨའི་ དད་པ་ཨ་ཁཱན་བ་ཀ་དེན་གེ་ཆོ་ཁཱན་ རོ་ཀ་སྟོབས་དབང་ཆི་ལུ་ཁེ་པ་བུ་ ན་ཤི་ཧ་གོ་ལེ་རེ༌བེ། ཨ་ཧ་པོང་ཀ་ ཕྱག་ལཱ་མཛད་ཁཱན་ སྟོབས་དབང་ཁེ་པ་ ཁིརིས་གཤགས་པ་གེ་བཞེངས་ཐཱན་ ཞིང་ཁམས་ག་ཕོ་བྲང་ག་ རོ་ཀ་ལ་ཉོང་ལོ་ཀ་ བཞུགས་པེ་བི་ཁཱན་ སྟོབས་དབང་ད་བུ་རང་ ཤུག་ཅཱན༌ཅ། 21 ཉི་ཨོམ་ རོག་ཁེ་པ་ ཚེ་ད་ལྟ་ག་དེན་གེ་ཤ་མང་གི་ཝ་ ཚེ་ཕྱི་མ་ག་དེན་གེ་བུ་ བཱརའ་དབང་ཁཱན་དང་ དབང་ཚད་ ཉི་སྟོབས་དབང་དང་ འགོ་དཔོན་ཐམས་ཅན་གེ་ ཆི་ལུ་རི་ཝ༌ཅ། 22 ཉི་དཀོན་མཆོག་གི་ ཐམས་ཅན་རང་ ཁིརིས་ག་ཞབས་ཕརའ་ཁ་ ཙུག་ཉི་གནང་མ༌ཅ། རོག་ཤོ་ ཆོས་ཚོགས་ག་དེན་གེ་ ཐམས་ཅན་ག་ ཤ་རང་ཨ་ཉི་ཀེ་བ༌ཅ། 23 ཆོས་ཚོགས་ཤོ་ རོ་ཀ་སྐུ་གཟུགས་གི༌ལ། ཉི་ཆོས་ཚོགས་ཁེ་པ་ ཁིརིས་གི་ཕུང་མ༌ཅ། ཉི་ཐམས་ཅན་རང་ ཨོ་ག་རང་གི་ནེ་བུ་ རོ་ཀི་ཨན་ ཕུང་ཉི་གནང༌ཅ༎ |