ཀ་ལཱས་སི། 1 - Tshangla New Testament (BSI)

¹ ཨོ་ཐ་ཡི་གུ་ཤོ་ དཀོན་མཆོག་ག་ ཐུགས་བཞེད་དང་ཏུ་ཉི་ ཁིརིས་ཡི་ཤུ་ག་ སྐུ་ཚབ་ཨ་ཉི་སི་ཁཱན་ པ་ཝལ་དང་ ཨ་ཧ་ཀོ་ཏ་ ཏི་མོ་ཐི་གེ་གི༌ལ།

² ཨོ་ཐ་ཡི་གུ་ཤོ་ ཀ་ལཱས་སི་ག་ ཁིརིས་ཡི་ཤུ་ག་ དད་པ་ཨ་ཁཱན་དང་ དམ་ཚིག་ཙུང་ཁཱན་ ཨ་ཧ་ཡུང་ཟི་བ་ཀ་ཏཱན་ འབྲི་ཅ་གི༌ལ། ཨ་ཧ་ཡབ་དཀོན་མཆོག་གི་ ན་ཧ་སྐྱིད་པུ་དང་ ཐུགས་རྗེ་གནང་ཆེན༎

བཀའ་དྲིན་བསམ༌མ༌ག་སྨོན་ལམ།

³ ཨ་ཤི་ན་ཧ་དེན་གེ་ སྨོན་ལམ་ཏ་པེ་དྲང་རང་ ཨ་ཧ་གཙོ་བོ་ ཡི་ཤུ་ཁིརིས་ག་ ཡབ་དཀོན་མཆོག་ག་ བཀའ་དྲིན་བསམ༌ཅ།

⁴ ཧང་ཡ་དག་ནེ་ལ་ ན་ཤི་ཁིརིས་ཡི་ཤུ་ག་ དད་པ་ཀེ༌ལ། ཉི་དཀོན་མཆོག་ག་སོ་ངོ་ ཐམས་ཅན་རང་ ཕང་ལ་ཨ་ཉི་ ཨ་ཤི་ན་ཐ་ཝ༌ཅ།

⁵ ན་ཤི་ ཞིང་ཁམས་ཉོང་པེ་ག་ རེ་ཆ་ཨ་ཉི་ ཨོ་ཐ་བ་ཨན་ཅ་གི༌ལ། ཨོ་ཐ་ཀོར་གེ་ དེན་པ་གསུང་ག་ འཐེན་ལེག་པུ་ནང་ཀ་ ན་ཤི་གོ་མ་ ན་ཐ་ཝ་ཆོ༌ཝ།

⁶ ན་ཤི་ན་ཐ་ཁཱན་ འཐེན་ལེག་པུ་གི་ འཛམ་གླིང་ཐམས་ཅན་རང་ ཆ་པ༌ལ། ན་ཤི་དཀོན་མཆོག་ག་ ཐུགས་རྗེ་ག་ཀོར་གེ་ དེན་པ་ཧ་གོ་ལ་ཀབ་ཉི་ ན་ཧ་ཚེ་ག་ ཧང་ཇུང་མ་གི་ལ་སྨོ་ ཨུ་ཉུ་པུརུས་ཀིན་ཨ་ཉི་རང་ འཐེན་ལེག་པུ་གི་ ཨོ་ག་རང་ཆབ་ཉི་ སོ་ངོ་བ་ཀ་ ཚེ་སོར་ཉི་རང་བུ་ན།

⁷ ན་ཤི་དཀོན་མཆོག་ག་ ཐུགས་རྗེ་ཀོར་གེ་ ཨའི་ཀབ་ཉི་ དཀོན་མཆོག་ག་ཕྱག་ཞུ་ཁཱན་དང་ ཨ་ཤི་ཕང་ཁཱན་ ཨི་པ་ཕཱརས་གེ་ཨ་ཉི་ ལམ་པ་གི༌ལ། རོག་ཤོ་ ཨ་ཧ་ཚབ་ཀ་ དམ་ཚིག་ཙུང་ཉི་ལའི་ཨ་ཁཱན་ ཁིརིས་ག་གཡོག་པ་གི༌ལ།

⁸ ཐུགས་ཉིད་གི་གནང་ཁཱན་ ན་ཧ་སྙིང་རྗེ་ག་ཀོར་གེ་ རོ་ཀི་ཨ་ཧ་ཡེག་ཆོ༌ཝ།

⁹ ཨོ་ཉི་ཨ་དེན་གེ་ ཨ་ཤི་ན་ཧ་ཀོར་གེ་ ན་ཐ་དེན་ཐུར་གེ་ག་ཏཱན་ ཨ་ཤི་ན་ཧ་དེན་གེ་ སྨོན་ལམ་ཏབ༌ཅ། དཀོན་མཆོག་ག་ ཐུགས་བཞེད་ཀོར་གེ་ སེ་ལེ་དེན་གེ་ ཐུགས་ཉིད་ག་ རིག་པ་དང་ ཧ་གོ་ལེ་རེ་བ་ག་ཡོན་ཏན་ ཐམས་ཅན་རང་ དམ་པའི་ཐུགས་ཉིད་ག་ཐུང་ཀེ་ཨ་ཉི་ ན་ཧ་གནང་ཤོ་ཨ་ཉི་ དཀོན་མཆོག་ག་ཞུན༌ཅ།

¹⁰ ཨོ་ཐེན་ཨ་ཉི་ ནཱན་གི་ གཙོ་བོ་ག་ ཐུགས་བཞེད་དང་ཏུ་ཉི་ ཆོ་ལེ་རེ༌བེ། ཉི་ཧ་ལ་ཨ་ནེ་བུ་ རོ་ཀ་ཐུགས་ཀ་ཚུད་པ་ག་ལའི་ ཨ་ལེ་རེ༌བེ། ཉི་ནཱན་གི་ ལའི་ལེག་པུ་ཐམས་ཅན་ག་ སེ་སེ་ལེ་རེ༌བེ། ཉི་ནཱན་གི་ དཀོན་མཆོག་ག་ཀོར་གེ་ མང་པུ་མང་པུ་ སེ་ལེ་རེ༌བེ།

¹¹ ན་ཤི་ཐམས་ཅན་རང་ བཟོད་པར་སྒོམ་ཉི་ཐེས་པེ་ རེ་བེ་དེན་གེ་ རོ་ཀ་ཤུགས་སྟོབས་ག་ དབང་དང་ཏུ་ཉི་ དཀོན་མཆོག་གི་ ན་ཧ་བ་ཤུག་ཅཱན་ ཅོད་ཉི་གནང་ཆེན། ཉི་ན་ཧ་བ་ ཤོ་ནང་ཕེ་ཉི་

¹² ཡབ་ཀ་ བཀའ་དྲིན་བསམ་ཤོ། ཉི་འོད་ཟེར་ནང་ཀ་ཆོ་ཁཱན་ དམ་པའི་སོ་ངོ་བ་ཀ་ ཐོབ་ཐང་གེ་ དཀོན་མཆོག་གི་ ན་ཧ་ཕང་ཉོང་པེ་རེ་བ་ ཅོད་ཉི་གནང་མ༌ཅ།

¹³ རོ་ཀི་ ཨའི་མེར་བུ་གི་དབང་ཁཱན་ རྒྱལ་སྲིད་གེ་ཐར་ཐཱན་ རོ་ཀི་ཕང་ཁཱན་ རོ་ཀ་སྲས་ག་ རྒྱལ་སྲིད་ག་ནང་ཀ་ ཕ་ཉི་གནང་མ༌ཅ།

¹⁴ རོ་ཀི་ཨ་ཉི་ ཨ་ཧ་ཚེ་ཐར་གནང༌མ། ཉི་ཨ་ཧ་སྡིག་པ་ག་ བཤགས་པ་གནང༌མ༎

ཁིརིས་ཐམས༌ཅན༌གེ་ ཆི༌ལུ་གི༌ལ།

¹⁵ ཁིརིས་ཤོ་ ཐོང་མེ་མར་ཁཱན་ དཀོན་མཆོག་ག་ སྐུ་ཚབ་གི༌ལ། རོག་ཤོ་ བཀོད་ཁཱན་ཐམས་ཅན་གེ་ཆི་ལུ་ གོ་སིང་ཁཱན་སྲས་གི༌ལ།

¹⁶ ཞིང་ཁམས་དང་ འཛམ་གླིང་ག་ཆོ་ཁཱན་ ཐམས་ཅན་རང་ ཁིརིས་གེ་ཨ་ཉི་ དཀོན་མཆོག་གི་ བཀོད་པ་གི༌ལ། ཨ་ཤི་ཐོང་མེ་རེ་ཁཱན་དང་མར་ཁཱན་ ཐམས་ཅན་རང་ རོ་ཀི་བཀོད་པ་གི༌ལ། རྒྱལ་པོ་བ་དང་རྒྱལ་སྲིད་བ་ དབང་ཁཱན་བ་དང་ དབང་ཚད་ཙུང་ཁཱན་བ་ ཐམས་ཅན་རང་ རོ་ཀེ་ཨ་ཉི་བཀོད་པ་གི༌ལ། ཉི་རོ་ཀ་དེན་གེ་ བཀོད་པ་གི༌ལ།

¹⁷ ཧང་རང་མ་ལེ་གོ་མ་ ཁིརིས་བཞུགས་པ་ཆོ༌ཝ། ཉི་ཐམས་ཅན་རང་ རོ་ཀི་ཏབ་ཐུར་ཙུང་ཉི་ ཐ་ཝ༌ཅ།

¹⁸ ཁིརིས་ཤོ་ ཆོས་ཚོགས་ག་ཤ་རང་གི༌ལ། ཉི་ཆོས་ཚོགས་ཤོ་ རོ་ཀ་སྐུ་གཟུགས་གི༌ལ། རོག་ཤོ་ ཐམས་ཅན་གེ་ གོ་སིང་ཁཱན་སྲས་དང་ གཤགས་པ་གེ་ལོག་ཉི་ སྐུ་བཞེངས་ཁཱན་ གི་ཝ་ཨ་དེན་གེ་ རོག་ཤོ་ ཧང་ག་རང་གི་ནེ་བུ་ གོ་དང་པ་གི༌ལ།

¹⁹ ཧང་ཡ་དག་ནེ་ལ་ དཀོན་མཆོག་དངོས་སུ་ཨ་ཉི་ ཁིརིས་ག་ནང་ཀ་ བཞུགས་པེ་ག་ ཐུགས་བཞེས་ཝ་ཆོ༌ཝ།

²⁰ ཉི་རོ་ཀ་སྲས་གེ་ཨ་ཉི་ དཀོན་མཆོག་གི་ ཐམས་ཅན་རང་ལོག་ཉི་ རོག་ཀབ་ཉི་ ཆ་མ་ཅོད་གནང༌མ། ཉི་ཁྲིམས་ཤིང་ཐུང་ཀ་ཤོ་ཁཱན་ ཁིརིས་ག་སྐུ་ཁྲག་གེ་ཨ་ཉི་ ཞིང་ཁམས་དང་ འཛམ་གླིང་ག་ཆོ་ཁཱན་བ་ ཐམས་ཅན་རང་ དཀོན་མཆོག་ཀབ་ཆམ་ཉི་ སྐྱིད་པུ་རི༌ཝ།

²¹ ཉི་ནའི་བུ་ ཤེབ་ཐུར་ དཀོན་མཆོག་གེ་ ལམ་རིང་མུ་ག་ཆོ༌ཝ། ན་ཤི་སེམས་ངན་པ་མི་ཉི་ ལའི་ངན་པ་ཨ་ཝ་ཨ་དེན་གེ་ ནའི་དཀོན་མཆོག་ག་ དགྲ་རི་ཝ་ཆོ༌ཝ།

²² ཨོ་ཉེ་རང་གི་ནེ་བུ་ དཀོན་མཆོག་གི་ ན་ཧ་བ་ རོ་ཀ་ཇ་རོ་ཨ་ཉི་ ཅོད་གནང་མ༌ཅ། ན་ཧ་བ་ དཀོན་མཆོག་ག་ སྐུན་མདུན་ག་ དམ་པ་དང་ཙང་མ་ ཉི་ཅོན་ད་སུ་རང་མ་ཝ་ཨ་ཉི་ ཐིང་མེ་རིག་པེ་དེན་གེ་ ཁིརིས་གི་ རོ་ཀ་སྐུ་གཟུགས་ག་ཚེ་ ཁྲིམས་ཤིང་ཐུང་ཀ་ གཤགས་ཉི་གནང༌མ།

²³ དག་པ་ཀབ་ཉི་ ན་ཤི་དད་པ་སྒྲིང་སྒྲིང་ཨན་ཀེ་ཉི་ དད་པ་ མ་འགྱུར་བ་ཨ་ཉི་རང་ ཆོ་ལེ་ཁེ༌ལེ། ན་ཤི་འཐེན་ལེག་པུ་ ན་ཐ་ལ་ཀབ་ཉི་ ཉོང་ཁཱན་ན་ཧ་རེ་ཆ་ སིག་པེ་མ་བི། ཇང་པ་ཝལ་ཤོ་ འཛམ་གླིང་ག་སོ་ངོ་ ཐམས་ཅན་ག་བཤད་ཁཱན་ ཨོ་ཐ་འཐེན་ལེག་པུ་ག་ གཡོག་པ་རི་ཝ༌ཅ།

པ་ཝལ་གི་ ཆོས༌ཚོགས༌ག་ཕྱག་ཞུ་ཝ༌ལ།

²⁴ ན་ཧ་དེན་གེ་ ཇང་དཀའ་ཝ་ཅཱད་པ་ཀབ་ཉི་ ཇང་ཤོ་ནང་ཕེན༌ཅ། ཧང་ཡ་དག་ནེ་ལ་ ཁིརིས་གི་ རོ་ཀ་སྐུ་གཟུགས་ག་ཡོར་ཀེ་ དཀའ་ཝ་ཅཱད་ཁཱན་ཁེ་པ་ ཇི་གི་དཀའ་ཝ་ཅཱད་ཉི་ ཆུ་མེ་རིག༌ཅ། ཉི་ཨོ་ཉ་ཁིརིས་ག་ སྐུ་གཟུགས་ཤོ་ ཆོས་ཚོགས་གི༌ལ།

²⁵ དཀོན་མཆོག་གི་ ཇ་ག་ རོ་ཀ་ཆོས་ཚོགས་ག་ ཕྱག་ཞུ་ལེ་ག་ འགན་ཁག་གནང་མ༌ཅ། ཉི་ཨོ་ཉ་འགན་ཁག་ཤོ་ ན་ཧ་ཏཱན་ དཀོན་མཆོག་ག་གསུང་ ཚང་པ་ཨ་ཉི་བཤད་པེ་ག་ ལའི་གི༌ལ།

²⁶ ཉི་གོ་མ་ག་ ཉིང་མང་པུ་ཐུར་དང་ མི་རབས་མང་པུ་ཐུར་ག་དེན་གེ་ ཨོ་ཐ་གསུང་ཁེ་པ་ གུམ་ཉི་ཐ་ཝ་ཆོ༌ཝ། དག་པ་ཀབ་ཉི་ ཨོམ་རོ་ཀི་ རོ་ཀ་དམ་པའི་སོ་ངོ་བ་ཀ་ གེན་ཉི་གནང་མ༌ཅ།

²⁷ ཉི་ཁིརིས་ག་རྒྱུ་ནོར་དང་ གཟི་བརྗིད་ཁེ་པ་ ནའི་ཡ་ཧུ་དི་པ་མང་གི་ཁཱན་ སོ་ངོ་བ་ཀ་དེན་གེ་བུ་གི་ལ་ཨ་ཉི་ དཀོན་མཆོག་གི་ རོ་ཀ་སོ་ངོ་བ་ཀ་ གསུངས་མེ་ག་ ཐུགས་བཞེད་གནང་མ༌ཅ། གུམ་ཉི་ཐ་ཁཱན་ཆཱས་ཤོ་ ཨུ་ཐུ་གི༌ལ། ཁིརིས་ ན་ཧ་ནང་ཀ་བཞུགས་པ༌ཅ། ཉི་དཀོན་མཆོག་ག་ གཟི་བརྗིད་ག་ ན་ཤི་ན་ཧ་ཕང་ཉོང་པེ་དེན་གེ་ རོག་ཤོ་ ན་ཧ་རེ་ཆ་གི༌ལ།

²⁸ ཨོ་ཉི་ཨ་དེན་གེ་ ཨའི་ཨོ་ག་དི་ཝ་ཐུར་ ཨ་ཤི་ཐམས་ཅན་ག་ ཁིརིས་ག་ཀོར་གེ་ཡེག༌ཅ། ཁིརིས་ག་ རོག་ཏེ་བ་ ཐམས་ཅན་རང་ ཕུག་པ་ཅོད་ཉི་ དཀོན་མཆོག་ག་ གེན་མེ་དེན་གེ་ དཀོན་མཆོག་གི་གནང་ཁཱན་ རིག་པ་ག་ཐུང་ཀེ་ཨ་ཉི་ ཨ་ཤི་ རོག་ཏེ་བ་ཀ་ ཡོང་ཨ་ཉི་ཡེན་བིན༌ཅ།

²⁹ ཇ་ག་ནང་ཀ་ལའི་ཨ་ཁཱན་ ཁིརིས་ག་ཁེ་ཀོ་དང་ སྟོབས་དབང་ག་ཐུང་ཀེ་ཨ་ཉི་ ཨོ་ཐ་ལའི་འགྲུབ་ཕེ་དེན་གེ་ ཇི་གི་ཙ་དྲེག་ཉི་ ལའི་ཨན༌ཅ།