གསུམ་པ་ ཡུ་ཧན་ན། 1 - Tshangla New Testament (BSI)

¹ ཨོ་ཐ་ཡི་གུ་ཁེ་པ་ འགོ་དཔོན་ཡུ་ཧན་ན་གེ་གི༌ལ། ཉི་དེན་པ་ཨ་ཉི་རང་ ཇི་གི་ཕང་ཁཱན་ ཇ་རོ་ག་ཡཱས་ག་ཏཱན་ འབྲི་ཅ་གི༌ལ།

² ཇི་གི་ཕང་ཁཱན་ཇ་རོ་ ནཱན་རྣམ་ཤེས་ག་ ལེག་པུ་ཨ་ཉི་རང་ ཆོ་ཝ་པུརུས་ཀིན་ཨ་ཉི་ ན་ག་ལུས་པུ་བུ་ ནཝ་ཚཝ་ཧང་རང་མ་ཝ་ ཐམས་ཅན་རང་ ལེག་པུ་ཨུན་ཆེན་དག་ཉི་ ཇི་གི་ན་ག་དེན་གེ་ སྨོན་ལམ་ཏབ༌ཅ།

³ ཡི་ཤུ་པ་ཚེ་བང་ལོག་ཐཱན་ དེན་པ་ག་ཤེག་པ་ ནཱན་གི་ གནམ་མེད་ས་མེད་དམ་ཚིག་ཙུང་ཉི་ གོ་མ་ད་བུ་རང་ ལམ་དེན་པ་གེ་ དང་ལ་དག་ཉི་ ཡེག་པ་ཀབ་ཉི་ ཇང་གནམ་མེད་ས་མེད་ ཤོ་ནང་ཕེ༌ཝ།

⁴ ཇ་ག་ཝག་ཙ་ དེན་པ་ལམ་གེ་དང་ལ་དག་ཉི་ ན་ཐ་ཝ་གེ་ལག་ཉི་ ཇང་ཤོ་ནང་ཕེ་ཝ་ཅོད་ཁཱན་ བཱརའ་ཧང་རང་མཱན༌ཅ༎

གཙོ་བོ་ག་ཕྱག་ཞུ་ཁཱན་བ་ཀ་ ཇ་རོ་ཨའི།

⁵ ནཱན་གི་ གུམ་མ་ཡེན་ཐཱན་རང་གི་ནེ་བུ་ བཱརའ་ཡུང་ཟི་བ་ཀ་དེན་གེ་ ནཱན་གི་ དམ་ཚིག་ཙུང་ཉི་ལའི་ཨ་ན།

⁶ ནཱན་ག་སྙིང་རྗེ་ག་ཀོར་གེ་ རོག་ཏེ་བ་ཀི་ ཆོས་ཚོགས་ག་ཡེག་ཆོ༌ཝ། ཉི་དཀོན་མཆོག་ ཐུགས་བཞེས་ཝ་ཨ་ཉི་རང་ ནཱན་གི་ རོག་ཏེ་བ་དིན་ཅ་ཨ་ཉི་ ཅམ་ཐཱན་ཀུན་ཏིན་གནང་ཤོ།

⁷ ཧང་ཡ་དག་ནེ་ལ་ རོག་ཏེ་བ་ གཙོ་བོ་ག་དེན་གེ་ དང་ཅ་གི༌ལ། ཉི་ཡི་ཤུ་པ་མང་གི་ཁཱན་བ་ཀེ་ ཧང་རང་དོག་པུ་མཱན༌ཅ།

⁸ ཨའི་ཨའི་ཏེན་གི་རང་ རོག་ཏེ་བ་ཀ་ གཙོ་བོ་ག་ཕྱག་ཞུ་ཁཱན་བ་ཀ་ ཇ་རོ་ཨ་ལེ་ཁེ༌ལེ། ཉི་ཤ་ ཨ་ཧ་བ་བུ་ རོག་ཏེ་བ་ཀབ་ཉི་དོམ་ཐཱན་ དེན་པ་ག་དེན་གེ་ ལའི་ཨ་ཁཱན་རི༌ལེ།

⁹ ཇི་གི་ཆོས་ཚོགས་ག་ཏཱན་ ཡི་གུ་ཀེ་བ་ཆོ༌ཝ། དག་པ་ཀབ་ཉི་ འགོ་དཔོན་ཨ་ཉི་ ཆོ་ལེ་གོད་ཁཱན་ དྲི་ཡོ་ཏྲི་ཕཱས་གི་ ཨ་ཤི་ཡེག་པ་ཀབ་ཉི་ ཉཱན་པུ་མ༌ལ།

¹⁰ ཇང་ཨོ་ཕ་ཀབ་ཉི་ རོ་ཀི་ཨ་ཁཱན་ག་ཀོར་གེ་ ཇི་གི་ན་ཧ་ཡེག༌པེ། ཉི་རོ་ཀི་ ཨ་ཧ་ཀོར་གེ་ ཆཱས་ངན་པ་ཨ་ཁཱན་ག་ཀོར་གེ་བུ་ ཇི་གི་ན་ཧ་ཡེག༌པེ། ཨོམ་ཏུར་ ཨ་ཝ་གི་བུ་ མ་དྲིག་པཱན་ རོ་ཀི་ཡི་ཤུ་པ་བ་བུ་ ཐོག་པུ་མ༌ལ། ཉི་བཱརའ་ཡི་ཤུ་པ་བ་ ཞུ་ལེ་ལམ་ཁཱན་ སོ་ངོ་བ་ཀ་བུ་ ཞུ་ལེ་མ་བི་ལཱན་ རོག་ཏེ་བ་ ཆོས་ཚོགས་གེ་ ཁོན་མེ་མིག་པ་ཕི་ན།

¹¹ ཇི་གི་ཕང་ཁཱན་གཙོ་བོ་ག་ཕྱག་ཞུ་ཁཱན་བ་ཀ་ ཇ་རོ་ཨའི། ཨོ་ཐ་ངན་པ་གེ་ དཔེ་མ་གོད་པཱན་ ལག་ཏང་ ལེག་པུ་ཨ་ལེ་གོད༌ཅོ། ལའི་ལེག་པུ་ཨ་ཁཱན་ སོ་ངོ་ཁེ་པ་ དཀོན་མཆོག་གེ་གི༌ལ། དག་པ་ཀབ་ཉི་ ལའི་ངན་པ་ཨ་ཁཱན་ སོ་ངོ་གི་ དཀོན་མཆོག་ མཇལ་བ་མཱན༌ཅ།

¹² དྲེ་མེ་ཏྲི་ཡཱས་ག་ཀོར་གེ་ ཐམས་ཅན་གི་ ལེག་པུ་ཡེག༌ཅ། ཉི་དེན་པ་གི་ཆང་ རོ་ཀ་ཀོར་གེ་ ལེག་པུ་ཡེག༌ཅ། ཉི་ཨ་ཤི་བུ་ ཨོ་ཉ་ཐུང་ཀ་པོན་ཉི་ རོག་ལེག་པུ་ཅ་དག་ཉི་ཡེག༌ཅ། ཉི་ཨ་ཤི་ཡེག་ཁཱན་ཁེ་པ་ དེན་པ་གི་ལ་དག་ཉི་ ན་ཤི་སེན༌ཅ༎

ཆཱས་མཇུག་དུས།

¹³ ཇི་གི་ན་ཧ་ཡེག་པེ་ཁེ་ཝ་ག་ ཆཱས་མང་པུ་ཐུར༌ཅ། དག་པ་ཀབ་ཉི་ ཨོ་ཐ་ཤུ་གུ་དང་ སྣག་རྩི་གི་ཨ་ཉི་ འབྲི་བེ་ག་སེམས་མ༌ལ།

¹⁴ ཇི་གི་ནཱན་དོ་ཟོ་རང་ རུ་མེ་ག་རེ་ཆ་ཨ་ཝ༌ཅ། ཉི་ཐུར་དང་ཐུར་ག་ པ་ཏོང་རུམ་ཉི་ཆཱས་ཨ་ཁེ།

¹⁵ ནཱན་སྐྱིད་པུ་ཨ་ཉི་ ཆོ་ལེ་ཉོང་ཅེན། ཐ་ཆོ་ཁཱན་ ཇ་རོ་བ་ཀི་ སྐུ་གཟུགས་བཟང་པོ་དག་ཉི་ཡེག༌ལ། ཉི་ཉ་ག་ཆོ་ཁཱན་ ཇ་རོ་བ་ཀ་བུ་ སྐུ་གཟུགས་བཟང་པོ་དག་ཉི་ཡེག༌ཅོ༎